« ថ្ងៃទី ៣–៩ ខែ មេសា ។ បុណ្យអ៊ីស្ទើរ ៖ ‹ សេចក្តីស្លាប់អើយ ជ័យជម្នះរបស់ឯងនៅឯណា ? › » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )

« ថ្ងៃទី ៣–៩ ខែ មេសា ។ បុណ្យអ៊ីស្ទើរ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២៣

ថ្ងៃទី ៣–៩ ខែ មេសា

បុណ្យអ៊ីស្ទើរ

« សេចក្តីស្លាប់អើយ ជ័យជម្នះរបស់ឯងនៅឯណា ? »

នៅពេលបងប្អូនអានទីបន្ទាល់អំពីការរស់ឡើងវិញរបស់ព្រះអង្គសង្គ្រោះនៅក្នុងគម្រោងនេះ សូមកត់ចំណាំអំពីអារម្មណ៍ និងចំណាប់អារម្មណ៍ដែលកើតមានចំពោះបងប្អូនមកពីព្រះវិញ្ញាណបរិសុទ្ធ ។

កត់ត្រាចំណាប់អារម្មណ៍របស់បងប្អូន

អំឡុងសប្ដាហ៍ចុងក្រោយនៃជីវិតរបស់ព្រះអង្គសង្គ្រោះ មានពួកសាសន៍យូដាជាច្រើននៅជុំវិញទ្រង់ ចូលរួមនៅក្នុងទំនៀមទម្លាប់នៃបុណ្យរំលង ។ ពួកគេបានរៀបចំអាហារ ច្រៀងចម្រៀង ហើយប្រមូលផ្ដុំគ្នាដើម្បីចងចាំអំពីការរំដោះនៃពូជពង្សអ៊ីស្រាអែល ចេញពីការធ្វើជាទាសករដល់ពួកអេស៊ីព្ទ ។ ក្រុមគ្រួសារបានប្រមូលផ្ដុំគ្នាស្ដាប់ដំណើររឿងអំពីទេវតាបំផ្លាញ ដែលបានរំលងផុតផ្ទះរបស់ពួកអយ្យកោរបស់ពួកគេ ដែលបានគូសសញ្ញានៅលើមាត់ទ្វារដោយឈាមរបស់ចៀម ។ នៅក្នុងពិធីប្រារព្វទាំងអស់នេះ គឺសម្បូរទៅដោយនិមិត្តរូបនៃការប្រោសលោះ ដែលមានមនុស្សមួយចំនួនតូចប៉ុណ្ណោះដែលបានដឹងថា ព្រះយេស៊ូវគ្រីស្ទ គឺជាកូនចៀមនៃព្រះ ដែលហៀបនឹងរំដោះពួកគេចេញពីសេវកភាពនៃអំពើបាប និងសេចក្ដីស្លាប់—តាមរយៈការរងទុក្ខ ការសុគត និងការរស់ឡើងវិញរបស់ទ្រង់ ។ ទោះជាយ៉ាងនោះក្ដី ក៏មានអ្នកដែលទទួលស្គាល់ព្រះយេស៊ូវថាជាព្រះមែស៊ីដែលបានសន្យារបស់ពួកគេ ជាអង្គប្រោសលោះដ៏អស់កល្បជានិច្ចរបស់ពួកគេដែរ ។ ចាប់តាំងពីពេលនោះមក ពួកសិស្សរបស់ព្រះយេស៊ូវគ្រីស្ទ បានថ្លែងជាសាក្សីទៅកាន់ពិភពលោកថា « ព្រះគ្រីស្ទបានសុគត ដោយព្រោះបាបរបស់យើងរាល់គ្នា … ហើយថា ទ្រង់ត្រូវគេបញ្ចុះក្នុងផ្នូរ រួចដល់ថ្ងៃទី៣ នោះទ្រង់មានព្រះជន្មរស់ឡើងវិញ » ( កូរិនថូស ទី១ ១៥:៣–៤ ) ។

គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន

ម៉ាថាយ ២១–២៨

ព្រះយេស៊ូវគ្រីស្ទរំដោះខ្ញុំពីអំពើបាប និងសេចក្ដីស្លាប់ ពង្រឹងភាពទន់ខ្សោយរបស់ខ្ញុំ ហើយលួងលោមចិត្តខ្ញុំនៅក្នុងការសាកល្បងរបស់ខ្ញុំ ។

របៀបមួយដើម្បីផ្ដោតទៅលើពរជ័យទាំងឡាយនៃដង្វាយធួនរបស់ព្រះអង្គសង្គ្រោះ សប្ដាហ៍នេះត្រូវចំណាយពេលជារៀងរាល់ថ្ងៃអាន អំពីសប្ដាហ៍ចុងក្រោយនៃជីវិតរបស់ព្រះយេស៊ូវ ( កាលវិភាគអានអាចមានដូចខាងក្រោម ) ។ តើបងប្អូនរកឃើញអ្វីខ្លះនៅ ក្នុងជំពូកទាំងនេះដែលជួយបងប្អូនឲ្យមានអារម្មណ៍នៃសេចក្ដីស្រឡាញ់ពីព្រះអង្គសង្គ្រោះ ? សូមពិចារណាថាតើជំពូកទាំងនេះបង្រៀនបងប្អូនអំពីអ្វីខ្លះ ទាក់ទងនឹងរបៀបដែលទ្រង់អាចរំដោះបងប្អូនពីអំពើបាប សេចក្ដីស្លាប់ ការសាកល្បង និងភាពទន់ខ្សោយ ។ តើបងប្អូនប្រើសេចក្ដីជំនឿទៅលើព្រះចេស្ដានៃការរំដោះរបស់ទ្រង់យ៉ាងដូចម្ដេច ?

ថ្ងៃអាទិត្យ ៖ ការចូលទៅទីក្រុងយេរូសាឡិមដោយជោគជ័យ ( ម៉ាថាយ ២១:៦–១១ )
ថ្ងៃចន្ទ ៖ ការសម្អាតព្រះវិហារបរិសុទ្ធ ( ម៉ាថាយ ២១:១២–១៦ )
ថ្ងៃអង្គារ ៖ ការបង្រៀននៅក្នុងទីក្រុងយេរូសាឡិម ( ម៉ាថាយ ២១–២៣ )
ថ្ងៃពុធ ៖ បានបន្ដការបង្រៀន ( ម៉ាថាយ ២៤–២៥ )
ថ្ងៃព្រហស្បតិ៍ ៖ បុណ្យរំលង និងការរងទុក្ខរបស់ព្រះគ្រីស្ទនៅក្នុងសួនច្បារគេតសេម៉ានី ( ម៉ាថាយ ២៦ )
ថ្ងៃសុក្រ ៖ ការសាកល្បង ការឆ្កាង និងការបញ្ចុះ ( ម៉ាថាយ ២៧:១–៦១ )
ថ្ងៃសៅរ៍ ៖ ព្រះសពរបស់ព្រះគ្រីស្ទបានដាក់ទៅក្នុងផ្នូរ ( ម៉ាថាយ ២៧:៦២–៦៦ ) ខណៈដែលទ្រង់ធ្វើការងារបម្រើនៅក្នុងពិភពវិញ្ញាណ ( គោលលទ្ធិ និង សេចក្ដីសញ្ញា ១៣៨ )
ថ្ងៃអាទិត្យ ៖ ការយាងទៅស្ថានសួគ៌នៃព្រះយេស៊ូវគ្រីស្ទ និងការយាងមកជួបនឹងពួកសិស្សរបស់ទ្រង់ ( ម៉ាថាយ ២៨:១–១០ )

សូមមើលផងដែរនៅលើគេហទំព័រ Easter.ComeuntoChrist.org ។

ព្រះយេស៊ូវនៅលើឈើឆ្កាង — ការឆ្កាង ដោយ លូអីស ផាកកឺ

ម៉ាថាយ ២៨:១–១០; លូកា ២៤:១៣–៣៥; យ៉ូហាន ២០:១៩–២៩; កូរិនថូស ទី១ ១៥:១–៨, ៥៥

សាក្សីជាច្រើនបានថ្លែងទីបន្ទាល់អំពីការមានព្រះជន្មរស់ឡើងវិញរបស់ព្រះយេស៊ូវគ្រីស្ទ ។

សូមស្រមៃមើលថាវាមានអារម្មណ៍យ៉ាងណា ដែលចំពោះពួកសិស្សមើលឃើញព្រះយេស៊ូវត្រូវគេចំអក ប្រមាថ ហើយឆ្កាងនោះ ។ ពួកគេបានធ្វើជាសាក្សីពីព្រះចេស្ដារបស់ទ្រង់ បានដឹងពីសេចក្ដីពិតនៃការបង្រៀនរបស់ទ្រង់ ហើយមានជំនឿថាទ្រង់គឺជាព្រះរាជបុត្រារបស់ព្រះ ។ ការធ្វើជាសាក្សីពីការសុគតរបស់ទ្រង់ ប្រាកដជាបានបណ្ដាលឲ្យពួកសិស្សរបស់ទ្រង់មានអារម្មណ៍ទុក្ខព្រួយ និងភាន់ច្រឡំ ។ ប៉ុន្តែមិនយូរប៉ុន្មាន ពួកគេបានក្លាយជាសាក្សីនៃអព្ភូហេតុដ៏អស្ចារ្យពីការមានព្រះជន្មរស់ឡើងវិញរបស់ទ្រង់ ។

តើបងប្អូនអាចរៀនអ្វីខ្លះ ក្នុងដំណើររឿងអំពីអ្នកទាំងឡាយដែលបានឃើញព្រះអង្គសង្គ្រោះដែលព្រះជន្មរស់ឡើងវិញនោះ ? សូមគូសចំណាំ ឬកត់ចំណាំបទពិសោធន៍របស់បុគ្គលម្នាក់ៗនៅក្នុង ម៉ាថាយ ២៨:១–១០; លូកា ២៤:១៣–៣៥; យ៉ូហាន ២០:១៩–២៩; និង កូរិនថូស ទី១ ១៥:១–៨, ៥៥ ។ ( សាក្សីផ្សេងទៀតអំពីព្រះគ្រីស្ទដែលព្រះជន្មរស់ឡើងវិញ អាចរកឃើញនៅក្នុង នីហ្វៃទី៣ ១១; មរមន ១:១៥; អេធើរ ១២:៣៨–៣៩; គោលលទ្ធិ និង សេចក្ដីសញ្ញា ៧៦:១៩–២៤; ១១០:១–១០ និង យ៉ូសែប ស្ម៊ីធ—ប្រវត្តិ ១:១៥–១៧ ) ។ តើអ្វីទៅដែលធ្វើឲ្យបងប្អូនមានចំណាប់អារម្មណ៍អំពីទីបន្ទាល់របស់សាក្សីទាំងនេះ ? បន្ទាប់ពីការរស់ឡើងវិញរបស់ព្រះអង្គសង្គ្រោះ អ្នកផ្សេងទៀតក៏បានរស់ឡើងវិញផងដែរ ហើយបានបង្ហាញខ្លួនដល់មនុស្សជាច្រើន ( សូមមើលម៉ាថាយ ២៧:៥២–៥៣; នីហ្វៃទី៣ ២៣:៩ ) ។ តើសេចក្ដីជំនឿរបស់បងប្អូនលើព្រះអង្គសង្គ្រោះ និងការសន្យានៃការរស់ឡើងវិញ ជះឥទ្ធិពលលើរបៀបដែលបងប្អូនរស់នៅយ៉ាងដូចម្ដេច ?

សូមមើលផងដែរ « Jesus Is Resurrected » « The Risen Lord Appears to the Apostles » « Blessed Are They That Have Not Seen, and Yet Have Believed » ( វីដេអូ ) នៅលើគេហទំព័រ ChurchofJesusChrist.org ។

2:19

2:29

ពេត្រុស ទី១ ១:៣–១១

ព្រះយេស៊ូវគ្រីស្ទប្រទានសេចក្ដីសង្ឃឹម និងក្តីអំណរដល់ខ្ញុំ ។

តើពាក្យ ឬឃ្លាអ្វីខ្លះនៅក្នុង ពេត្រុស ទី១ ១:៣–១១ បានផ្ដល់សេចក្តីសង្ឃឹមដល់បងប្អូនដោយសារតែព្រះយេស៊ូវគ្រីស្ទ ? តើបងប្អូនទទួលអារម្មណ៍ពីសេចក្ដីសង្ឃឹមនោះនៅពេលណា ?

អែលឌើរ ហ្គើរីត ដបុលយូ ហ្គង បានថ្លែងទីបន្ទាល់ថា ការរស់ឡើងវិញ « ផ្ដល់សេចក្ដីសង្ឃឹមដល់អ្នកដែលបានបាត់បង់អវយវៈ ដែលលែងមើលឃើញ លែងស្ដាប់ឮ ឬលែងដើរបាន ឬដែលរងទុក្ខនឹងជំងឺរុំារ៉ៃ ជំងឺផ្លូវចិត្ត ឬសមត្ថភាពថយចុះផ្សេងទៀត ។ ទ្រង់នឹងរកយើងឃើញ ។ ទ្រង់ធ្វើឲ្យយើងពេញលេញ ។ … [ ជាមួយគ្នាផងដែរ ] ដោយសារ ‹ ព្រះអង្គទ្រង់ផ្ទាល់បានធ្វើឲ្យធួននឹងអំពើបាបទាំងឡាយនៃមនុស្សលោក › [ អាលម៉ា ៤២:១៥ ] … នោះជាមួយនឹងសេចក្ដីមេត្តាករុណា ទ្រង់អាចជួយយើងទៅតាមភាពទន់ខ្សោយ របស់យើង ។ … យើងប្រែចិត្ត ហើយធ្វើអ្វីទាំងអស់ដែលយើងអាចធ្វើបាន ។ ទ្រង់ឱបក្រសោបយើងអស់កល្បជានិច្ច ‹ ដោយព្រះពាហុនៃសេចក្ដីស្រឡាញ់របស់ទ្រង់ › [ នីហ្វៃទី២ ១:១៥ ] » ( « Hosanna and Hallelujah—The Living Jesus Christ: The Heart of Restoration and Easter » Liahona ខែ ឧសភា ឆ្នាំ ២០២០ ទំព័រ ៥៤ ) ។

សូមមើលផងដែរ អាលម៉ា ២៧:២៨; ៣៦:១–២៤; នីហ្វៃទី៣ ៩:១១–១៧; មរ៉ូណៃ ៧:៤០–៤១។

គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្រុមគ្រួសារ

ComeuntoChrist.org ។គេហទំព័រ Easter.ComeuntoChrist.org មាននូវកាលប្រវត្តិ និងការពិពណ៌នាអំពីអ្វីដែលបានកើតឡើងនៅក្នងថ្ងៃនីមួយៗនៃសប្ដាហ៍ចុងក្រោយ នៃព្រះជន្មរបស់ព្រះអង្គសង្គ្រោះ ។ ជារៀងរាល់ថ្ងៃក្នុងសប្ដាហ៍នោះ គ្រួសាររបស់បងប្អូនអាចរំឭកអំពីការពិពណ៌នាទាំងនេះដើម្បីមើលឃើញពីអ្វីដែលព្រះអង្គសង្គ្រោះបានធ្វើនៅថ្ងៃនោះ ឬបងប្អូនអាចអានអំពីសប្ដាហ៍ចុងក្រោយរបស់ទ្រង់នៅក្នុងបទគម្ពីរជាគ្រួសារ ( សូមមើលបញ្ជីផ្ដល់ជាគំនិតនៅក្នុងវគ្គ « គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន » ខាងលើ ) ។

ទំនុកតម្កើង និង សៀវភៅចម្រៀងកុមារ ។សូមពិចារណាក្នុងការច្រៀងជាមួយគ្នានូវចម្រៀងទាំងឡាយអំពីដង្វាយធួន និងការមានព្រះជន្មរស់ឡើងវិញរបស់ព្រះអង្គសង្គ្រោះ អំឡុងសប្ដាហ៍នេះ រួមទាំងចម្រៀងខ្លះដែលបងប្អូនមិនសូវចេះផងដែរ ។ ( សូមមើល លិបិក្រមប្រធានបទនៃ ទំនុកតម្កើង ឬ សៀវភៅចម្រៀងកុមារ ក្រោមប្រធានបទដូចជា « ដង្វាយធួន » « បុណ្យអ៊ីស្ទើរ » ឬ « ការរស់ឡើងវិញ » ) ។ ដើម្បីជួយសមាជិកគ្រួសាររៀនចម្រៀងទាំងឡាយ បងប្អូនអាចបង្ហាញរូបភាពដែលត្រូវនឹងទំនុកបទ ។

ការចងក្រងអំពី « ព្រះយេស៊ូវគ្រីស្ទ » នៅក្នុងបណ្ណាល័យដំណឹងល្អ ។ការចងក្រងនៅក្នុងបណ្ណាល័យដំណឹងល្អ ដែលមានចំណងជើងថា « ព្រះយេស៊ូវគ្រីស្ទ » រួមមាននូវវីដេអូ រូបសិល្បៈ និងតន្ត្រី ដែលអាចជួយគ្រួសារបងប្អូនឲ្យប្រារព្ធពិធីអបអរការមានព្រះជន្មរស់ឡើងវិញរបស់ព្រះអង្គសង្គ្រោះនៅថ្ងៃបុណ្យអ៊ីស្ទើរនេះ ។

« ព្រះគ្រីស្ទដ៏មានព្រះជន្មរស់ ៖ ទីបន្ទាល់នៃពួកសាវក » ។សូមអាន « ព្រះគ្រីស្ទដ៏មានព្រះជន្មរស់ ៖ ទីបន្ទាល់នៃពួកសាវក » ជាក្រុមគ្រួសារ ( នៅលើគេហទំព័រ ChurchofJesusChrist.org ) ។ សូមអញ្ជើញសមាជិកគ្រួសារម្នាក់ៗឲ្យជ្រើសរើសសារលិខិតបុណ្យអ៊ីស្ទើរមួយ ចេញពីទីបន្ទាល់នេះដើម្បីចែកចាយជាមួយអ្នកផ្សេងទៀត ។ ឧទាហរណ៍ បងប្អូនអាចបង្កើតជាបដាបង្ហាញនៅលើប្រព័ន្ធផ្សព្វផ្សាយសង្គម នៅលើច្រកទ្វាររបស់បងប្អូន ឬនៅក្នុងគេហដ្ឋានរបស់បងប្អូន ។

សម្រាប់គំនិតបន្ថែម សម្រាប់ការបង្រៀនដល់កុមារ សូមមើល គម្រោងមេរៀនសប្ដាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់អង្គការបឋមសិក្សា ។

ចម្រៀងដែលលើកទឹកចិត្តឲ្យប្រើ ៖ « ព្រះយេស៊ូវបានរស់ឡើងវិញ » សៀវភៅចម្រៀងកុមារ ទំព័រ ៤៤ ។

ការកែលម្អដល់ការសិក្សាផ្ទាល់ខ្លួន

ដាក់គោលដៅដែលអាចគ្រប់គ្រងបាន ។ ការចំណាយពេលពីរបីនាទីក្នុងមួយថ្ងៃ សិក្សាបទគម្ពីរ អាចផ្តល់ពរដល់ជីវិតរបស់បងប្អូន ។ សូមតាំងចិត្តសិក្សារាល់ថ្ងៃ ស្វែងរកវិធីមួយដើម្បីរំឭកបងប្អូនអំពីការតាំងចិត្តរបស់បងប្អូន ហើយខំឲ្យអស់ពីលទ្ធភាពដើម្បីធ្វើតាម ។ ប្រសិនបើបងប្អូនភ្លេច សូមកុំបោះបង់ចោលឡើយ ។ គ្រាន់តែចាប់ផ្ដើមម្ដងទៀត ។

ព្រះគ្រីស្ទនៅក្នុងសួនច្បារគែតសេម៉ានី — សួនច្បារគែតសេម៉ានី ដោយ អ័ដាម អាប់រាម