« ថ្ងៃទី ២៤–៣០ ខែ មេសា ។ យ៉ូហាន ៧–១០ ៖ ‹ ខ្ញុំជាអ្នកគង្វាលល្អ › » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )

« ថ្ងៃទី ២៤–៣០ ខែ មេសា ។ យ៉ូហាន ៧–១០ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២៣

ខ្ញុំក៏មិនកាត់ទោសនាងដែរ ដោយ អេវ៉ា ខូលេវ៉ា ធីម៉ូធី

ថ្ងៃទី ២៤–៣០ ខែ មេសា

យ៉ូហាន ៧–១០

« ខ្ញុំជាអ្នកគង្វាលល្អ »

នៅពេលបងប្អូនអាន យ៉ូហាន ៧–១០ បងប្អូនអាចទទួលបានការបំផុសមកពីព្រះវិញ្ញាណបរិសុទ្ធអំពីគោលការណ៍ខាងគោលលទ្ធិនៅក្នុងជំពូកទាំងនេះ ។ ការកត់ត្រាចំណាប់អារម្មណ៍របស់បងប្អូនអាចជួយបងប្អូនឲ្យធ្វើផែនការមួយដើម្បីធ្វើសកម្មភាពទៅលើវា ។

កត់ត្រាចំណាប់អារម្មណ៍របស់បងប្អូន

ថ្វីដ្បិតតែព្រះយេស៊ូវគ្រីស្ទយាងមកដើម្បីនាំឲ្យមាន « សេចក្តីសុខសាន្ត [ និង ] ដែលជាទីគាប់ព្រះហឫទ័យដល់ទ្រង់ » ក្ដី ( លូកា ២:១៤ ) ក៏មាន « ការបាក់បែកទាស់គ្នាដោយព្រោះទ្រង់ » ( យ៉ូហាន ៧:៤៣ ) ។ មនុស្សដែលបានធ្វើជាសាក្សីក្នុងព្រឹត្តិការណ៍ដូចគ្នា បានមាននូវការសន្និដ្ឋានខុសគ្នាទាំងស្រុងអំពីព្រះយេស៊ូវគ្រីស្ទជានរណា ។ អ្នកខ្លះសន្និដ្ឋានថា « លោកជាមនុស្សល្អ » ខណៈដែលអ្នកឯទៀតនិយាយថា « អ្នកនោះជាអ្នកបញ្ឆោតប្រជាជន » ( យ៉ូហាន ៧:១២ ) ។ ពេលទ្រង់ព្យាបាលដល់បុរសខ្វាក់ភ្នែកម្នាក់នៅថ្ងៃឈប់សម្រាក មានមនុស្សខ្លះបានទទូចថា « មនុស្សនោះមិនមែនមកពីព្រះទេ ព្រោះមិនកាន់ថ្ងៃឈប់សម្រាកសោះ » ខណៈដែលអ្នកឯទៀតបានសួរថា « ធ្វើដូចម្តេចឲ្យមនុស្សមានបាបអាចធ្វើទីសម្គាល់យ៉ាងនេះបាន ? » ( យ៉ូហាន ៩:១៦ ) ។ ប៉ុន្ដែដាច់ដោយឡែកពីការសន្និដ្ឋានអស់ទាំងនោះ មានអ្នកដែលស្វែងរកសេចក្ដីពិតបានទទួលស្គាល់ព្រះចេស្ដានៅក្នុងព្រះបន្ទូលរបស់ទ្រង់ « មិនដែលមានអ្នកណានិយាយដូចអ្នកនោះទេ » ( យ៉ូហាន ៧:៤៦ ) ។ ខណៈដែលពួកសាសន៍យូដាបានសូមព្រះយេស៊ូវឲ្យ « ប្រាប់ពួកយើងឲ្យច្បាស់ » ថាតើទ្រង់គឺជាព្រះគ្រីស្ទឬ រួចទ្រង់បានបើកសម្ដែងគោលការណ៍មួយដែលអាចជួយយើងញែកដឹងសេចក្ដីពិតពីភាពខុសឆ្គង ទ្រង់បានមានព្រះបន្ទូល ៖ « ចៀមខ្ញុំទាំងប៉ុន្មានវាស្តាប់ខ្ញុំហើយមកតាម ខ្ញុំក៏ស្គាល់វាដែរ » ( យ៉ូហាន ១០:២៤, ២៧ ) ។

គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន

យ៉ូហាន ៧:១៤–១៧

នៅពេលខ្ញុំរស់នៅតាមសេចក្ដីពិតដែលព្រះយេស៊ូវគ្រីស្ទបានបង្រៀន នោះខ្ញុំបានដឹងថា វាគឺជាការពិត ។

ពួកសាសន៍យូដានឹកឆ្ងល់យ៉ាងអស្ចារ្យនៅពេលព្រះយេស៊ូវចេះច្រើន ព្រោះទ្រង់ពុំបានរៀនសូត្រសោះ ( សូមមើល ខទី ១៥ )—យ៉ាងហោចណាស់ គឺពុំបានរៀនតាមរបៀបដែលពួកគេធ្លាប់រៀន ។ នៅក្នុងការឆ្លើយតបរបស់ព្រះយេស៊ូវ ទ្រង់បានបង្រៀនពីរបៀបផ្សេងអំពីការស្គាល់សេចក្ដីពិត ដែលមានចំពោះមនុស្សគ្រប់រូប ដោយពុំគិតពីការអប់រំ ឬជីវប្រវត្តិ ។ ស្របតាម យ៉ូហាន ៧:១៤–១៧ តើបងប្អូនអាចដឹងថាគោលលទ្ធិដែលព្រះយេស៊ូវបានបង្រៀនគឺជាការពិតយ៉ាងដូចម្ដេច ? តើដំណើរការនេះបានជួយបងប្អូនអភិវឌ្ឍទីបន្ទាល់របស់បងប្អូនអំពីដំណឹងល្អយ៉ាងដូចម្ដេច ?

យ៉ូហាន ៨:២–១១

សេចក្តីមេត្តាករុណារបស់ព្រះអង្គសង្គ្រោះមានសម្រាប់មនុស្សគ្រប់រូប ។

នៅពេលនិយាយអំពីការប្រាស្រ័យទាក់ទងរបស់ព្រះអង្គសង្គ្រោះជាមួយនឹងស្ត្រីដែលត្រូវគេនាំមកដោយចោទថាបានប្រព្រឹត្តសាហាយស្មន់ អែលឌើរ ឌែល ជី រិនឡាន់ បានមានប្រសាសន៍ថា ៖ « ប្រាកដណាស់ ព្រះអង្គសង្គ្រោះពុំលើកទោសដល់សេចក្តីកំផិតទេ ។ ប៉ុន្តែទ្រង់ក៏ពុំកាត់ទោសស្ត្រីនោះដែរ ។ ទ្រង់បានលើកទឹកចិត្តនាងឲ្យកែប្រែជីវិតនាងសារជាថ្មី ។ នាងមានការជំរុញចិត្តឲ្យផ្លាស់ប្តូរ ដោយសារតែក្តីអាណិតនិងក្តីមេត្តាករុណារបស់ទ្រង់ ។ ការបកប្រែដោយយ៉ូសែប ស្ម៊ីធអំពីព្រះគម្ពីរប៊ីបបញ្ជាក់ពីលទ្ធផលនៃភាពជាសិស្សរបស់ស្ត្រីនោះ ៖ ‹ ហើយស្ដ្រីនោះបានថ្វាយសិរីល្អដល់ព្រះចាប់តាំងពីគ្រានោះមក ហើយបានជឿទៅលើព្រះនាមរបស់ទ្រង់ › [ សូមមើល យ៉ូហាន ៨:១១ ] » ( « Our Good Shepherd » Liahona ខែ ឧសភា ឆ្នាំ ២០១៧ ទំព័រ ៣០ ) ។

តើបងប្អូនមានអារម្មណ៍ដូចជាស្ត្រីរូបនោះ ថាបានទទួលសេចក្ដីមេត្តាករុណា ជំនួសឲ្យការផ្ដន្ទាទោសមកពីព្រះអង្គសង្គ្រោះនៅពេលណា ? តើបងប្អូនដូចជាពួកអាចារ្យ និងពួកផារិស៊ីដែលចោទប្រកាន់ ឬវិនិច្ឆ័យអ្នកដទៃទាំងខ្លួនបងប្អូនមានអំពើបាបដែរនោះនៅពេលណា ? ( សូមមើល យ៉ូហាន ៨:៧ ) ។ តើបងប្អូនអាចរៀនអ្វីខ្លះទៀត មកពីរបៀបដែលព្រះអង្គសង្គ្រោះបានប្រាស្រ័យទាក់ទងនឹងពួកអាចារ្យ និងពួកផារិស៊ី និងស្ត្រីដែលត្រូវបាននាំមកកាន់ទ្រង់ ថាបានប្រព្រឹត្តអំពើសាហាយស្មន់នោះ ? តើបងប្អូនបានរៀនអ្វីខ្លះអំពីការអភ័យទោសរបស់ព្រះអង្គសង្គ្រោះ នៅពេលបងប្អូនអានខគម្ពីរទាំងនេះ ?

សូមមើលផងដែរ « Go and Sin No More » ( វីដេអូ ) នៅលើគេហទំព័ ChurchofJesusChrist.org ។

យ៉ូហាន ៩

ប្រសិនបើយើងមានសេចក្ដីជំនឿ នោះព្រះអាចបង្ហាញអង្គទ្រង់ក្នុងទុក្ខលំបាករបស់យើងបាន ។

តើ យ៉ូហាន ៩:១–៣ បង្រៀនបងប្អូនអ្វីខ្លះអំពីឧបសគ្គ និងទុក្ខលំបាកនៃជីវិត ? កាលបងប្អូនអាន យ៉ូហាន ៩ សូមពិចារណាពីរបៀបដែល « ការណ៍របស់ព្រះ [ បាន ] សម្ដែងមក » នៅក្នុងជីវិតរបស់បុរសដែលខ្វាក់ពីកំណើតនោះ ។ តើការណ៍នេះបានសម្ដែងមកនៅក្នុងជីវិតរបស់បងប្អូន—រួមទាំងនៅក្នុងទុក្ខលំបាករបស់បងប្អូនយ៉ាងដូចម្ដេច ?

យ៉ូហាន ១០:១–៣០

ព្រះយេស៊ូវគ្រីស្ទគឺជាអ្នកគង្វាលល្អ ។

សូម្បីតែបងប្អូនមិនស្គាល់ចៀម និងការឃ្វាលចៀមច្បាស់ក្ដី ក៏ការអានក្នុង យ៉ូហាន ១០ ជាកន្លែងដែលព្រះអង្គសង្គ្រោះមានព្រះបន្ទូលថា « ខ្ញុំជាអ្នកគង្វាលល្អ » អាចបង្រៀនបងប្អូននូវសេចក្ដីពិតដ៏សំខាន់អំពីទ្រង់បានដែរ ។ ដើម្បីស្វែងរកសេចក្ដីពិតទាំងនេះ សូមរកមើលឃ្លាទាំងឡាយដែលពិពណ៌នាថា អ្នកគង្វាលល្អមានលក្ខណៈយ៉ាងណា ហើយពិចារណាពីរបៀបដែលឃ្លាទាំងនោះអនុវត្តចំពោះព្រះអង្គសង្គ្រោះ ។ ខាងក្រោមនេះគឺជាឧទាហរណ៍មួយចំនួន ៖

ខទី ៣ ៖ « ឯចៀមរបស់គាត់ នោះគាត់ហៅតាមឈ្មោះវានីមួយៗនាំចេញទៅក្រៅ » ។
ខទី ១១ ៖ ទ្រង់ « ស៊ូតែប្តូរជីវិតជំនួសចៀម » ។
ខទី ១៦ ៖ « នោះនឹងមានហ្វូងតែ១ និងអ្នកគង្វាលតែ១វិញ » ។

នេះជាសំណួរបន្ថែមទៀត ដើម្បីជួយបងប្អូនពិចារណាពីជំពូកនេះ ៖ តើព្រះយេស៊ូវដូចជាទ្វារយ៉ាងដូចម្ដេច ? ( សូមមើល ខទី ៧–៩ ) ។ តើទ្រង់បានប្រទានឲ្យបងប្អូននូវ « ជីវិត…នោះពេញបរិបូរផង » យ៉ាងដូចម្តេច ? ( ខទី ១០ ) ។ តើបងប្អូនទទួលអារម្មណ៍ថា ទ្រង់ស្គាល់បងប្អូនដោយផ្ទាល់នៅពេលណា ? ( សូមមើល ខទី ១៤ ) ។ តើបងប្អូនស្គាល់សំឡេងរបស់អ្នកគង្វាលល្អដោយរបៀបណា ? ( សូមមើល ខទី ២៧ ) ។

សូមមើលផងដែរ ទំនុកដំកើង ២៣; អេសេគាល ៣៤; អាលម៉ា ៥:៣៧–៣៩; នីហ្វៃទី៣ ១៥:២១–១៦:៥; ហ្គើរីត ដបុលយូ ហ្គង « Good Shepherd, Lamb of God » Liahona ខែ ឧសភា ឆ្នាំ ២០១៩ ទំព័រ ៩៧–១០១ ។

គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្នុងគ្រួសារ

យ៉ូហាន ៧:២៤ ។ដើម្បីជួយគ្រួសារបងប្អូនឲ្យយល់ពីការបង្រៀនរបស់ព្រះយេស៊ូវនៅក្នុង យ៉ូហាន ៧:២៤ បងប្អូនអាចបង្ហាញពួកគេនូវអ្វីមួយដែលមើលពីក្រៅផ្សេង ហើយខាងក្នុងផ្សេង ។ ឬសមាជិកគ្រួសារអាចចែកចាយបទពិសោធន៍ ដែលបានបង្រៀនពួកគេមិនឲ្យវិនិច្ឆ័យលើរូបរាងខាងក្រៅ ។ បងប្អូនក៏អាចរាយពីគុណសម្បត្តិដែលសមាជិកគ្រួសារម្នាក់ៗមាន ដែលមើលតែសំបកក្រៅមិនឃើញ ( សូមមើល សាំយូអែល ទី១ ១៦:៧; ថូម៉ាស អេស ម៉នសុន « See Others as They May Become » Liahona ខែ វិច្ឆិកា ឆ្នាំ ២០១២ ទំព័រ ៦៨–៧១ ) ។

យ៉ូហាន ៨:៣១–៣៦ ។តើ « បាវបម្រើរបស់អារក្ស » មានន័យយ៉ាងណា ? ( សូមមើលផងដែរ មរ៉ូណៃ ៧:១១ ) ។ តើសេចក្ដីពិតអ្វីខ្លះដែលព្រះយេស៊ូវបានបង្រៀន អាចនាំឲ្យយើងមានសេរីភាព ?

ព្រះគ្រីស្ទកំពុងព្យាបាលបុរសខ្វាក់ភ្នែកម្នាក់ — ព្រះគ្រីស្ទកំពុងព្យាបាលបុរសខ្វាក់ភ្នែក ដោយ ខាល ហេនរីក ប្លក់

យ៉ូហាន ៩ ។តើបងប្អូនអាចជួយគ្រួសាររបស់បងប្អូនមើលឃើញពីដំណើររឿងរបស់ព្រះយេស៊ូវព្យាបាលបុរសខ្វាក់ភ្នែកនៅក្នុង យ៉ូហាន ៩ យ៉ាងដូចម្ដេច ? បងប្អូនអាចសម្ដែងរឿងជាមួយគ្នា ឬបង្ហាញវីដេអូ « Jesus Heals a Man Born Blind » ( នៅលើគេហទំព័រ ChurchofJesusChrist.org ) ។ សូមផ្អាករឿងម្តងម្កាល ដើម្បីសមាជិកគ្រួសារអាចអានខឆ្លើយឆ្លងគ្នាមកពី យ៉ូហាន ៩ ។ សូមអញ្ជើញពួកគេឲ្យកត់ចំណាំមេរៀនណាដែលពួកគេបានរៀនអំពីដំណើររឿងដូចជា តើវាមានន័យយ៉ាងណាដើម្បីប្រែជាបានប្រែចិត្តជឿទៅលើដំណឹងល្អរបស់ព្រះយេស៊ូវគ្រីស្ទ ។

7:48

យ៉ូហាន ១០:១–១៨, ២៧–២៩ ។ដើម្បីឲ្យសមាជិកគ្រួសារចូលរួមក្នុងការរៀនសូត្រមកពីពាក្យប្រៀបប្រដូចអំពីអ្នកគង្វាលល្អ សូមឲ្យពួកគេម្នាក់ៗគូររូបមួយដូចតទៅនេះ ៖ ចោរ ទ្វារ អ្នកគង្វាល កម្មករ ( អ្នកដែលគេជួលឲ្យធ្វើការ ) សត្វចចក និងចៀម ។ សូមអញ្ជើញពួកគេឲ្យអាន យ៉ូហាន ១០:១–១៨, ២៧–២៩ បន្ទាប់មកពិភាក្សាជាគ្រួសារអំពីអ្វីដែលព្រះអង្គសង្គ្រោះបានបង្រៀនអំពីរឿងដែលពួកគេបានគូររូប ។

សម្រាប់គំនិតបន្ថែមសម្រាប់ការបង្រៀនដល់កុមារ សូមមើល គម្រោងមេរៀនសប្ដាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់អង្គការបឋមសិក្សា ។

ទំនុកតម្កើងដែលលើកទឹកចិត្តឲ្យប្រើ ៖ « ឱ! ព្រះទ្រង់ឃ្វាលខ្ញុំពិត » ទំនុកតម្កើង ល.រ. ៥៥ ។

ការកែលម្អដល់ការសិក្សាផ្ទាល់ខ្លួន

ស្វែងរកពាក្យ និងឃ្លាបំផុសគំនិត ។ នៅពេលបងប្អូនអាន នោះព្រះវិញ្ញាណអាចបំផុសពាក្យ ឬឃ្លាជាក់លាក់នានាឲ្យបងប្អូនយកចិត្តទុកដាក់ដើម្បីបំផុស និងលើកទឹកចិត្តបងប្អូន ឬហាក់ដូចជាសរសេរទុកសម្រាប់តែបងប្អូន ។ សូមពិចារណាធ្វើការកត់ចំណាំពាក្យ ឬឃ្លានានាដែលបំផុសគំនិតបងប្អូននៅក្នុង យ៉ូហាន ៧–១០ ។

ព្រះគ្រីស្ទជាមួយនឹងសត្វចៀមមួយក្បាល — ពុំវង្វេងបាត់ទៀតឡើយ ដោយ ហ្គ្រេក ខេ អូលសិន