« ថ្ងៃទី ១៧–២៣ ខែ មេសា ។ ម៉ាថាយ ១៨; លូកា ១០ ៖ ‹ តើត្រូវឲ្យខ្ញុំធ្វើដូចម្ដេចដើម្បីឲ្យបានជីវិតអស់កល្បជានិច្ច ? › » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )

« ថ្ងៃទី ១៧–២៣ ខែ មេសា ។ ម៉ាថាយ ១៨; លូកា ១០ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២៣

សាសន៍សាម៉ារីចិត្តល្អ ដោយ ឌេន ប៊ើរ

ថ្ងៃទី ១៧–២៣ ខែ មេសា

ម៉ាថាយ ១៨; លូកា ១០

« តើត្រូវឲ្យខ្ញុំធ្វើដូចម្ដេចដើម្បីឲ្យបានជីវិតអស់កល្បជានិច្ច ? »

នៅពេលបងប្អូនអាន និងពិចារណាប្រកបដោយការអធិស្ឋានពី ម៉ាថាយ ១៨ និង លូកា ១០ សូមយកចិត្តទុកដាក់នឹងការបំផុសគំនិតដោយស្ងាត់ស្ងៀមមកពីព្រះវិញ្ញាណបរិសុទ្ធ ។ ទ្រង់នឹងប្រាប់បងប្អូនពីរបៀបនៃការបង្រៀន និងរឿងទាំងអស់នេះអនុវត្តចំពោះបងប្អូន ។ សូមកត់ត្រាចំណាប់អារម្មណ៍ដែលបងប្អូនមាន ។

កត់ត្រាចំណាប់អារម្មណ៍របស់បងប្អូន

នៅពេលបងប្អូនសួរសំណួរទៅព្រះអម្ចាស់នោះ បងប្អូនអាចទទួលបានចម្លើយមួយដែលបងប្អូនមិនរំពឹងទុក ។ តើនរណាជាអ្នកជិតខាងរបស់ខ្ញុំ ? អ្នកទាំងឡាយណាដែលត្រូវការជំនួយ និងសេចក្ដីស្រឡាញ់របស់បងប្អូន ។ តើអ្នកណាធំជាងគេក្នុងនគរស្ថានសួគ៌ ? កុមារម្នាក់ ។ តើវាគ្រប់គ្រាន់ទេដើម្បីអភ័យទោសដល់អ្នកដែលធ្វើខុសប្រាំពីរដងនោះ ? ទេ បងប្អូនគួរតែអភ័យទោសប្រាំពីរចិតសិបដង ។ ( សូមមើល លូកា ១០:២៩–៣៧; ម៉ាថាយ ១៨:៤, ២១–២២ ) ។ ចម្លើយដែលមិនបានរំពឹងទុកមកពីព្រះអម្ចាស់ អាចអញ្ជើញយើងឲ្យផ្លាស់ប្ដូររបៀបដែលយើងគិត មានអារម្មណ៍ និងប្រព្រឹត្ត ។ ប្រសិនបើបងប្អូនកំពុងស្វែងរកព្រះឆន្ទៈរបស់ព្រះអម្ចាស់ ដោយសារតែបងប្អូនពិតជាចង់រៀនអំពីទ្រង់ នោះព្រះអម្ចាស់នឹងបង្រៀនបងប្អូនពីរបៀបរស់នៅតាមរបៀបមួយដែលដឹកនាំទៅរកជីវិតអស់កល្បជានិច្ចជាមួយនឹងទ្រង់ ។

គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន

ម៉ាថាយ ១៨:២១–៣៥

ប្រសិនបើខ្ញុំទទួលបានការអភ័យទោសមកពីព្រះអម្ចាស់ នោះខ្ញុំត្រូវតែអភ័យទោសដល់អ្នកដទៃដែរ ។

យោបល់របស់ពេត្រុសថា គាត់អាចអភ័យទោសនរណាម្នាក់ប្រាំពីរដង ដែលវាហាក់ដូចជាសប្បុរសណាស់ ប៉ុន្តែព្រះយេស៊ូវបានបង្រៀនច្បាប់កាន់តែខ្ពស់ជាង ។ ចម្លើយរបស់ទ្រង់ « ខ្ញុំមិនថា ឲ្យអ្នកអត់ទោសត្រឹមតែ៧ដងទេ គឺដល់៧ចិតសិបដងទៅទៀត » ( ខទី ២២ ) គឺពុំមែនជាការបង្រៀនអំពីចំនួនលេខនោះទេ ប៉ុន្តែទ្រង់បង្រៀនអំពីការអភិវឌ្ឍន៍អាកប្បកិរិយាដូចជាព្រះគ្រីស្ទក្នុងការអភ័យទោសវិញ ។ នៅពេលបងប្អូនអានពាក្យប្រៀបប្រដូចអំពីអ្នកបម្រើគ្មានក្តីមេត្តាករុណា ចូរពិចារណាអំពីចំនួនដងដែលបងប្អូនបានទទួលអារម្មណ៍នៃក្ដីមេត្តាករុណារបស់ព្រះ ។ តើមាននរណាម្នាក់ដែលត្រូវការទទួលបានសេចក្តីមេត្តាករុណាពីបងប្អូនដែរឬទេ ?

អែលឌើរ ដេវីឌ អ៊ិ សូរិនសិន បានផ្តល់ការដាស់តឿនដ៏សំខាន់នេះ ៖ « ថ្វីបើយើងត្រូវតែអភ័យទោសដល់អ្នកជិតខាងម្នាក់ដែលធ្វើឲ្យយើងមានរបួសក្ដី ក៏យើងគប្បីធ្វើការក្នុងន័យស្ថាបនា ដើម្បីការពារកុំឲ្យរបួសនោះកើតឡើងម្តងទៀត ។ … ការអភ័យទោសពុំតម្រូវឲ្យយើងទទួលយក ឬអត់ឱនឲ្យសេចក្ដីអាក្រក់ឡើយ ។ … ប៉ុន្តែនៅពេលយើងប្រយុទ្ធប្រឆាំងនឹងអំពើបាប យើងមិនត្រូវអនុញ្ញាតឲ្យការស្អប់ ឬកំហឹងគ្រប់គ្រងលើគំនិត ឬសកម្មភាពរបស់យើងឡើយ » ( « Forgiveness Will Change Bitterness to Love » Liahona ខែ ឧសភា ឆ្នាំ ២០០៣ ទំព័រ ១២ ) ។

លូកា ១០:១–២០

តើពួកចិតសិបនាក់ជានរណា ?

នៅខាងក្រោមនេះ គឺជាលំនាំមួយដែលបានបង្កើតនៅក្នុងជំនាន់ព្រះគម្ពីរសញ្ញាចាស់ ( សូមមើល និក្ខមនំ ២៤:១; ជនគណនា ១១:១៦ ) ព្រះយេស៊ូវគ្រីស្ទ « បានតែងតាំងពួកចិតសិបនាក់ » បន្ថែមពីលើពួកសាវកដប់ពីរនាក់របស់ទ្រង់ ដើម្បីធ្វើជាសាក្សីពីទ្រង់ ផ្សាយដំណឹងល្អរបស់ទ្រង់ ហើយជួយទ្រង់នៅក្នុងកិច្ចការរបស់ទ្រង់ ។ លំនាំនេះបន្ដនៅក្នុងសាសនាចក្រដែលបានស្ដារឡើងវិញ ។ ពួកចិតសិបនាក់ត្រូវបានហៅឲ្យបម្រើដល់ពួកដប់ពីរនាក់នៅក្នុងបេសកកម្មរបស់ពួកគេក្នុងនាមជាសាក្សីពិសេសរបស់ព្រះយេស៊ូវគ្រីស្ទទៅកាន់ពិភពលោកទាំងមូល ។

សូមមើលផងដែរ គោលលទ្ធិ និង សេចក្តីសញ្ញា ១០៧:២៥–២៦, ៣៣–៣៤, ៩៧ ។

លូកា ១០:២៥–៣៧

ដើម្បីទទួលបានជីវិតដ៏អស់កល្បជានិច្ច ខ្ញុំត្រូវស្រឡាញ់ព្រះ ហើយស្រឡាញ់អ្នកជិតខាងរបស់ខ្ញុំឲ្យដូចខ្លួនខ្ញុំ ។

វាមានប្រយោជន៍ដើម្បីចាំថា ពាក្យប្រៀបប្រដូចអំពីសាសន៍សាម៉ារីចិត្តល្អ គឺជារបៀបរបស់ព្រះយេស៊ូវក្នុងការឆ្លើយនឹងសំណួរពីរ ៖ « តើត្រូវឲ្យខ្ញុំធ្វើដូចម្តេច ដើម្បីឲ្យបានជីវិតអស់កល្បជានិច្ច ? » និង « តើអ្នកណាជាអ្នកជិតខាងខ្ញុំ ? » ( លូកា ១០:២៥, ២៩ ) ។ នៅពេលបងប្អូនអានពាក្យប្រៀបប្រដូចនេះ សូមចាំសំណួរទាំងនេះក្នុងចិត្ត ។ តើបងប្អូនរកបានចម្លើយអ្វី ?

នៅជំនាន់របស់ព្រះយេស៊ូវ គំនុំរវាងពួកសាសន៍យូដា និងសាសន៍សាម៉ារីគឺមាននៅរាប់សតវត្សរ៍មកហើយ ។ សាសន៍សាម៉ារីគឺជាកូនចៅរបស់ពួកសាសន៍យូដាដែលរស់នៅក្នុងស្រុកសាម៉ារី ដែលបានរៀបការនឹងពួកសាសន៍ដទៃ ។ ពួកសាសន៍យូដាមានអារម្មណ៍ថា ពួកសាសន៍សាម៉ារីពុករលួយដោយសារតែទំនាក់ទំនងរបស់ពួកគេជាមួយនឹងពួកសាសន៍ដទៃ ហើយបានក្បត់សាសនា ។ ពួកសាសន៍យូដានឹងធ្វើដំណើររាប់គីឡូវាងផ្លូវដើម្បីកុំឲ្យដើរកាត់ស្រុកសាម៉ារី ។ ( សូមមើលផងដែរ លូកា ៩:៥២–៥៤; ១៧:១១–១៨; យ៉ូហាន ៤:៩; ៨:៤៨ ) ។

ហេតុអ្វីបងប្អូនគិតថា ព្រះអង្គសង្គ្រោះបានជ្រើសរើសសាសន៍សាម៉ារី ជាសាសន៍មួយដែលត្រូវសាសន៍យូដាស្អប់ លើកមកធ្វើជាឧទាហរណ៍អំពីសេចក្ដីមេត្តាករុណា និងការស្រឡាញ់ដល់អ្នកជិតខាងទៅវិញ ? តើពាក្យប្រៀបប្រដូចនេះបំផុសគំនិតបងប្អូនឲ្យធ្វើអ្វីខ្លះ ?

សូមមើលផងដែរ ម៉ូសាយ ២:១៧; « Parable of the Good Samaritan » និង « A Good Samaritan » ( វីដេអូ ) នៅលើគេហទំព័រ ChurchofJesusChrist.org ។

5:6

លូកា ១០:៣៨–៤២

យើងជ្រើសយក « ចំណែកយ៉ាងល្អ » ដោយធ្វើការជ្រើសរើសប្រចាំថ្ងៃដែលដឹកនាំទៅរកជីវិតដ៏នៅអស់កល្បជានិច្ច ។

នៅក្នុង លូកា ១០:៣៨–៤២ ព្រះយេស៊ូវបានអញ្ជើញម៉ាថាដោយគួរសមឲ្យគិតខុសពីមុនអំពីរបៀបដែលនាងចំណាយពេលរបស់នាង ។ បន្ទាប់ពីដកស្រង់ខគម្ពីរទាំងនេះ ស៊ីស្ទើរ ខារ៉ុល អេហ្វ ម៉ាកខន់ឃី បានបង្រៀន ៖ « ដើម្បីឲ្យបានបរិសុទ្ធ យើងត្រូវតែរៀនអង្គុយឲ្យទៀបនឹងព្រះបាទនៃព្រះដ៏បរិសុទ្ធនៃសាសន៍អ៊ីស្រាអែល ហើយចំណាយពេលវេលាដល់សេចក្ដីបរិសុទ្ធ ។ តើយើងទុកទូរសព្ទ បញ្ជីការងារដ៏ច្រើន និងការខ្វល់ខ្វាយពីរឿងខាងលោកិយមួយអន្លើរដែរឬទេ ? ការអធិស្ឋាន ការសិក្សា ហើយការស្ដាប់បន្ទូលរបស់ព្រះយាងអញ្ជើញក្ដីស្រឡាញ់ដែលលាងជម្រះ ហើយព្យាបាល ចូលមកក្នុងព្រលឹងយើង ។ ចូរយើងយកពេលដើម្បីមានភាពបរិសុទ្ធ ដើម្បីយើងអាចបានបំពេញដោយព្រះវិញ្ញាណដ៏ពិសិដ្ឋ និងដែលញែកជាបរិសុទ្ធ » ( « The Beauty of Holiness » Liahona ខែ ឧសភា ឆ្នាំ ២០១៧ ទំព័រ ១១ ) ។ បងប្អូនប្រហែលជាចង់ពិនិត្យមើលពីរបៀបដែលបងប្អូនចំណាយពេលវេលារបស់បងប្អូន—សូម្បីតែទៅលើការណ៍ល្អៗ ។ តើមានអ្វីដែល « ត្រូវការ » ( ខទី ៤២ ) ការយកចិត្តទុកដាក់របស់បងប្អូនច្រើនជាងនេះទៀត ?

គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្រុមគ្រួសារ

ម៉ាថាយ ១៨:១–១១ ។ហេតុអ្វីក៏ព្រះយេស៊ូវចង់ឲ្យយើងប្រែក្លាយដូចជាកុមារតូច ? តើគុណលក្ខណៈអ្វីខ្លះដែលកូនក្មេងមាន ដែលយើងអាចអភិវឌ្ឍដើម្បីប្រែក្លាយកាន់តែដូចព្រះគ្រីស្ទ ? ( សូមមើល ម៉ូសាយ ៣:១៩ ) ។

ព្រះយេស៊ូវជាមួយនិងក្មេងៗ — ព្រះយេស៊ូវសព្វព្រះទ័យឲ្យកូនសិស្សរបស់ទ្រង់ប្រែក្លាយដូចជាកុមារតូចៗ ។

ម៉ាថាយ ១៨:១៥ ។តើយើងអាចអនុវត្តការទូន្មាននៅក្នុង ម៉ាថាយ ១៨:១៥ ចំពោះការប្រាស្រ័យទាក់ទងនៅក្នុងគ្រួសារយើងបានយ៉ាងដូចម្តេច ? តើការធ្វើដូច្នេះនឹងផ្ដល់ពរជ័យដល់គ្រួសារយើងយ៉ាងដូចម្ដេច ?

ម៉ាថាយ ១៨:២១–៣៥ ។តើពាក្យប្រៀបប្រដូចនេះបង្រៀនយើងអ្វីខ្លះអំពីព្រះយេស៊ូវ គ្រីស្ទ ? តើវាបង្រៀនយើងអ្វីខ្លះអំពីរបៀបដើម្បីប្រព្រឹត្តចំពោះមនុស្សដទៃទៀត ?

លូកា ១០:២៥–៣៧ ។សមាជិកគ្រួសារអាចរីករាយនឹងការស្លៀកពាក់តុបតែង ហើយសម្ដែងតាមពាក្យប្រៀបប្រដូចនេះ ។ តើពេលខ្លះយើងអាចដូចមនុស្សប្រភេទខុសៗគ្នានៅក្នុងពាក្យប្រៀបប្រដូចនេះយ៉ាងដូចម្ដេចដែរ ? តើព្រះអង្គសង្គ្រោះដូចជាសាសន៍សាម៉ារីចិត្តល្អយ៉ាងដូចម្ដេច ? តើយើងអាចក្លាយដូចជាសាសន៍សាម៉ារីចិត្តល្អដោយរបៀបណា ?

បងប្អូនអាចនឹងពិចារណាពីការច្រៀងជាមួយគ្នានូវទំនុកតម្កើង ឬចម្រៀងកុមារមួយបទ ដែលគាំទ្រដល់សេចក្ដីពិតនៅក្នុងពាក្យប្រៀបប្រដូចនេះ ។ ឧទាហរណ៍មួយគឺ « ខ្ញុំនឹងដើរតាមព្រះអង្គ » ( ទំនុកតម្កើង ល.រ. ១៣៥ ) ប៉ុន្តែមានបទជាច្រើនទៀត ។ សមាជិកគ្រួសារអាចរីករាយនឹងការរកទំនុកតម្កើង ឬចម្រៀងមួយបទ ហើយពន្យល់ថាតើវាទាក់ទងនឹងពាក្យប្រៀបប្រដូចនេះយ៉ាងណា ។

លូកា ១០:៣៨–៤២ ។តើវាលំបាកដែរឬទេដើម្បីដាក់រឿងខាងវិញ្ញាណឲ្យចូលទៅក្នុងកាលវិភាគគ្រួសាររបស់បងប្អូន ? រឿងអំពីម៉ារា និងម៉ាថា អាចបំផុសឲ្យមានក្រុមប្រឹក្សាគ្រួសារ ឬរាត្រីជួបជុំក្រុមគ្រួសារអំពីរបៀបធ្វើកិច្ចការនេះឲ្យបានប្រសើរឡើង ។ បងប្អូនអាចធ្វើបញ្ជីមួយអំពីរបៀបដើម្បីជ្រើសរើស « ចំណែកយ៉ាងល្អ » ជាក្រុមគ្រួសារ ( សូមមើល លូកា ១០:៤២ ) ។

សម្រាប់គំនិតបន្ថែមសម្រាប់ការបង្រៀនដល់កុមារ សូមមើល គម្រោងមេរៀនសប្ដាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់អង្គការបឋមសិក្សា ។

ចម្រៀងដែលលើកទឹកចិត្តឲ្យប្រើ ៖ « ព្រះយេស៊ូវមានបន្ទូលស្រឡាញ់មនុស្សគ្រប់រូប » សៀវភៅចម្រៀងកុមារ ទំព័រ ៣៩ ។

ការកែលម្អការបង្រៀនរបស់យើង

ចិញ្ចឹមបីបាច់បរិយាកាសនៃសេចក្ដីស្រឡាញ់ ។ របៀបដែលសមាជិកគ្រួសារមានអារម្មណ៍ ហើយប្រព្រឹត្តចំពោះ គ្នាទៅវិញទៅមក អាចមានឥទ្ធិពលយ៉ាងខ្លាំងដល់ស្មារតីនៅក្នុងគេហដ្ឋានរបស់បងប្អូន ។ សូមជួយសមាជិកគ្រួសារទាំងអស់ឲ្យធ្វើចំណែករបស់ពួកគេដើម្បីបង្កើតឲ្យមានគេហដ្ឋានប្រកបដោយសេចក្ដីស្រឡាញ់ និងការគោរពគ្នា ដើម្បីឲ្យមនុស្សគ្រ់បរូបនឹងមានអារម្មណ៍សុវត្ថិភាពក្នុងការចែកចាយបទពិសោធន៍ សំណួរ និងទីបន្ទាល់ ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ ១៥ ) ។

ព្រះគ្រីស្ទនៅជាមួយម៉ារា និង ម៉ាថា — ព្រះគ្រីស្ទគង់នៅក្នុងផ្ទះរបស់ម៉ារា និងម៉ាថា ដោយ វ៉លធើរ រ៉េន