« ថ្ងៃទី ៣–៩ ខែ មេសា ។ បុណ្យអ៊ីស្ទើរ ៖ ‹ សេចក្តីស្លាប់អើយ ជ័យជម្នះរបស់ឯងនៅឯណា ? › » ចូរមកតាមខ្ញុំ—សម្រាប់អង្គការបឋមសិក្សា ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )
« ថ្ងៃទី ៣–៩ ខែ មេសា ។ បុណ្យអ៊ីស្ទើរ » ចូរមកតាមខ្ញុំ—សម្រាប់អង្គការបឋមសិក្សា ៖ ឆ្នាំ ២០២៣
ថ្ងៃទី ៣–៩ ខែ មេសា
បុណ្យអ៊ីស្ទើរ
« សេចក្តីស្លាប់អើយ ជ័យជម្នះរបស់ឯងនៅឯណា ? »
សូមប្រើពេលវេលារបស់បងប្អូនជាមួយនឹងកុមារដើម្បីជួយពួកគេឲ្យមើលទៅបុណ្យអ៊ីស្ទើរថា ជារដូវមួយដើម្បីអបអរសាទរនៅក្នុងព្រះអង្គសង្គ្រោះ ហើយដើម្បីបង្កើនការដឹងគុណរបស់ពួកគេចំពោះពលិកម្មរបស់ទ្រង់កាន់តែជ្រាលជ្រៅ ។ គំនិតនៅក្នុងគម្រោងមេរៀនទាំងនេះអាចត្រូវបានកែតម្រូវដើម្បីជួយបងប្អូនឲ្យបង្រៀនកុមារគ្រប់អាយុបាន ។
អញ្ជើញឲ្យចែកចាយ
សូមបង្ហាញរូបភាពព្រះអង្គសង្រ្គោះនៅក្នុងសួនច្បារគែតសេម៉ានី នៅលើឈើឆ្កាង និងបន្ទាប់ពីការមានព្រះជន្មរស់ឡើងវិញរបស់ទ្រង់ ( សូមមើលរូបភាពនេះនៅក្នុង គម្រោងមេរៀនសប្តាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ និង សៀវភៅរូបភាពដំណឹងល្អ ល.រ ៥៦–៦០ ) ។ សូមឲ្យកុមារចែកចាយអ្វីដែលពួកគេដឹងអំពីព្រឹត្តិការណ៍ដែលបានបង្ហាញនៅក្នុងរូបភាពនេះ ។
បង្រៀនគោលលទ្ធិ ៖ កុមារតូចៗ
ព្រះយេស៊ូវគ្រីស្ទគឺជាព្រះអង្គសង្រ្គោះរបស់ខ្ញុំ ។
នៅពេលបងប្អូនអានអំពីដង្វាយធួនរបស់ព្រះយេស៊ូវ សូមសញ្ជឹងគិតអំពីរបៀបដែលបងប្អូនអាចជួយដល់កុមារឲ្យទទួលអារម្មណ៍នៃសេចក្ដីស្រឡាញ់ដ៏លើសលប់របស់ព្រះយេស៊ូវចំពោះពួកគេ ។
សកម្មភាពដែលអាចធ្វើបាន
-
សូមបង្ហាញរូបភាពរបស់ព្រះយេស៊ូវ ហើយសូមឲ្យកុមារចែកចាយអ្វីដែលពួកគេដឹងអំពីអ្វីដែលទ្រង់បានធ្វើសម្រាប់យើង ។ សូមថ្លែងទីបន្ទាល់របស់បងប្អូនពីសេចក្តីស្រឡាញ់របស់ព្រះអង្គសង្គ្រោះ និងព្រះចេស្តារបស់ទ្រង់ដើម្បីសង្រ្គោះយើងពីអំពើបាប ។ សូមលើកកញ្ចក់មួយឡើង ហើយឲ្យកុមារប្ដូរវេនគ្នាមើលកញ្ចក់នោះ ។ កាលកុមារម្នាក់ៗមើលហើយ សូមនិយាយថា « ព្រះយេស៊ូវស្រឡាញ់ [ ឈ្មោះរបស់កុមារ ] ហើយទ្រង់អាចជួយសង្គ្រោះ [ ឈ្មោះរបស់កុមារ ] ឲ្យរស់នៅជាមួយព្រះវរបិតាសួគ៌ម្តងទៀត » ។
-
សូមបង្ហាញរូបភាព ព្រះយេស៊ូវកំពុងអធិស្ឋាននៅក្នុងសួនច្បារគែតសេម៉ានី ( សៀវភៅរូបភាពដំណឹងល្អ ល.រ. ៥៦ ) កាលបងប្អូនតំណាលរឿងអំពីព្រះយេស៊ូវរងទុក្ខនៅឯសួនច្បារគែតសេម៉ានីសម្រាប់អំពើបាបទាំងឡាយរបស់ពិភពលោកនេះ ( សូមមើល ម៉ាថាយ ២៦:៣៦–៤៦; លូកា ២២:៣៩–៤៤ ) ។ សូមថ្លែងទីបន្ទាល់ថា ដោយសារតែការរងទុក្ខរបស់ទ្រង់ នោះយើងអាចត្រូវបានអភ័យទោសឲ្យ កាលយើងបានធ្វើការជ្រើសរើសខុស ។ បងប្អូនក៏អាចប្រើ « ជំពូក ៥១ ៖ ព្រះយេស៊ូវរងទុក្ខនៅក្នុងសួនច្បារគែតសេម៉ានី » ផងដែរ ( នៅក្នុង ដំណើររឿងព្រះគម្ពីរសញ្ញាថ្មី ទំព័រ ១២៩–៣២ ឬ វីដេអូដូចគ្នានេះនៅលើគេហទំព័រ ChurchofJesusChrist.org ) ។
-
សូមច្រៀងជាមួយគ្នានូវចម្រៀងមួយបទអំពីសេចក្តីស្រឡាញ់របស់ព្រះយេស៊ូវចំពោះយើង ដូចជាបទ « ខ្ញុំស្គាល់ក្តីស្នេហ៍ព្រះសង្គ្រោះ » ( សៀវភៅចម្រៀងកុមារ ទំព័រ ៤២–៤៣ ) ។ សូមជួយកុមារឲ្យស្វែងរកពាក្យនៅក្នុងបទចម្រៀងដែលពិពណ៌នាពីសេចក្តីស្រឡាញ់របស់ព្រះអង្គសង្រ្គោះ ។ តើអ្វីដែលជួយយើងឲ្យទទួលអារម្មណ៍នៃសេចក្តីស្រឡាញ់របស់ទ្រង់ ? តើយើងអាចជួយអ្នកដទៃឲ្យទទួលអារម្មណ៍នៃសេចក្តីស្រឡាញ់របស់ទ្រង់យ៉ាងដូចម្តេច ?
ទ្រង់មានព្រះជន្មរស់ឡើងវិញ ដោយ ហ្គ្រេក អុលសិន
ដោយសារព្រះយេស៊ូវបានសុគត ហើយបានមានព្រះជន្មរស់ឡើងវិញ នោះខ្ញុំនឹងរស់នៅម្ដងទៀត ។
តើបងប្អូនអាចជួយកុមារឲ្យយល់ថា ដោយសារតែព្រអង្គសង្គ្រោះ នោះយើង និងមនុស្សជាទីស្រឡាញ់របស់យើងនឹងរស់ឡើងវិញនៅថ្ងៃណាមួយដោយរបៀបណា ?
សកម្មភាពដែលអាចធ្វើបាន
-
សូមបង្រៀនកុមារនូវដំណើររឿងនៃបុណ្យអ៊ីស្ទើរ ដោយប្រើរូបភាពរបស់ព្រះគ្រីស្ទក្នុងសួនច្បារគែតសេម៉ានី នៅលើឈើឆ្កាង និងបន្ទាប់ពីការមានព្រះជន្មរស់ឡើងវិញរបស់ទ្រង់ ( សូមមើល សៀវភៅរូបភាពដំណឹងល្អ ល.រ. ៥៦–៦០ និងរូបភាពពេញទំព័រនៅក្នុង គម្រោងមេរៀនសប្តាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាកៗ និងក្រុមគ្រួសារ ) ។ ចូរឲ្យកុមារពីរបីនាក់កាន់រូបភាពទាំងនេះ ខណៈបងប្អូនតំណាលរឿង ។ សូមប្រាប់កុមារអំពីមនុស្សពីរបីនាក់ដែលបានឃើញព្រះយេស៊ូវបន្ទាប់ពីទ្រង់បានរស់ឡើងវិញ ដែលមានដូចជា ម៉ារា ( សូមមើល យ៉ូហាន ២០:១–១៨ ) ឬ ថូម៉ាស ( សូមមើល យ៉ូហាន ២០:២៤–២៩ ) ។
-
សូមសួរកុមារថា ហេតុអ្វីយើងប្រារព្ធធ្វើបុណ្យអ៊ីស្ទើរ ។ សូមពន្យល់ថា នៅបុណ្យអ៊ីស្ទើរ យើងប្រារព្ធថ្ងៃដែលព្រះយេស៊ូវគ្រីស្ទបានមានព្រះជន្មរស់ឡើងវិញ ។ សូមសួរ ប្រសិនបើមានកុមារណាចង់ចែកចាយអ្វីដែលក្រុមគ្រួសាររបស់គេធ្វើ ដើម្បីរំឭកដល់ការរស់ឡើងវិញរបស់ព្រះយេស៊ូវគ្រីស្ទ ។
-
សូមពន្យល់ថា រស់ឡើងវិញ មានន័យថា រស់នៅម្ដងទៀតបន្ទាប់ពីយើងស្លាប់ ។ សូមថ្លែងទីបន្ទាល់របស់បងប្អូនថា ដោយសារតែព្រះយេស៊ូវគ្រីស្ទ នោះយើងនឹងរស់ឡើងវិញម្ដងទៀត—យើងនឹងរស់នៅម្ដងទៀត បន្ទាប់ពីយើងស្លាប់ទៅ ហើយយើងនឹងមិនស្លាប់ទៀតឡើយ ។
-
សូមប្រើស្រោមដៃមួយគូដើម្បីបង្រៀនកុមារថា យើងទាំងអស់គ្នាមានរូបកាយមួយ ( តំណាងដោយស្រោមដៃ ) និងវិញ្ញាណមួយ ( តំណាងដោយដៃយើង ) ។ នៅពេលយើងស្លាប់ទៅ នោះវិញ្ញាណ និងរូបកាយរបស់យើងបែកចេញពីគ្នា ។ វិញ្ញាណរបស់យើងនឹងបន្ដរស់នៅ ប៉ុន្ដែរាងកាយរបស់យើងមិនរស់នៅទៀតឡើយ ។ នៅពេលយើងរស់ឡើងវិញ នោះវិញ្ញាណ និងរូបកាយរបស់យើងនឹងរួបរួមគ្នាឡើងវិញម្ដងទៀត ។ សូមអនុញ្ញាតឲ្យកុមារប្ដូរវេនគ្នាពាក់ស្រោមដៃ ហើយដោះវាចេញ ។
-
សូមច្រៀងជាមួយគ្នានូវបទចម្រៀងបុណ្យអ៊ីស្ទើរ ដូចជាបទ « តើព្រះយេស៊ូវរស់ឡើងវិញឬ ? » ឬ « ព្រះយេស៊ូវបានរស់ឡើងវិញ » ( សៀវភៅចម្រៀងកុមារ ទំព័រ ៤៥, ៤៤ ) និងបង្ហាញរូបភាពរបស់ព្រះយេស៊ូវបន្ទាប់ពីទ្រង់បានមានព្រះជន្មរស់ឡើងវិញដល់កុមារ ( សូមមើល សៀវភៅរូបភាពដំណឹងល្អ ល.រ. ៥៩–៦១ ) ។
-
សូមបង្ហាញរូបភាពមួយអំពីនរណាម្នាក់ដែលបងប្អូនស្គាល់ ដែលបានស្លាប់ទៅហើយ ។ សូមចែកចាយទីបន្ទាល់របស់បងប្អូនថា គាត់នឹងរស់ឡើងវិញ ដោយសារតែដង្វាយធួន និងការមានព្រះជន្មរស់ឡើងវិញរបស់ព្រះយេស៊ូវគ្រីស្ទ ។
-
សូមមើលវីដេអូ « Jesus Is Resurrected » ឬ « The Risen Lord Appears to the Apostles » ជាមួយគ្នា ( នៅលើគេហទំព័រChurchofJesusChrist.org ) ។ ឬបង្ហាញវីដេអូបុណ្យអ៊ីស្ទើរផ្សេងទៀតនៅលើគេហទំព័រ Easter.ComeuntoChrist.org ។
បង្រៀនគោលលទ្ធិ ៖ កុមារធំៗ
ព្រះយេស៊ូវបានរងទុក្ខសម្រាប់ខ្ញុំនៅក្នុងសួនច្បារគែតសេម៉ានី និងនៅលើឈើឆ្កាង ។
កាលដែលបងប្អូនសិក្សាព្រះគម្ពីរនៅសប្តាហ៍នេះ សូមពិចារណានូវរបៀបដែលបងប្អូនអាចជួយកុមារឲ្យស្ថាបនាសេចក្តីជំនឿរបស់ពួកគេលើព្រះយេស៊ូវគ្រីស្ទ និងដង្វាយធួនរបស់ទ្រង់ ។
សកម្មភាពដែលអាចធ្វើបាន
-
សូមអានជាមួយនឹងកុមារក្នុង លូកា ២២:៣៩–៤៤ ព្រមទាំងខគម្ពីរជម្រើសមកពី ម៉ាថាយ ២៧:២៩–៥០ ។ សូមឲ្យពួកគេរកមើលពាក្យដែលជួយពួកគេឲ្យយល់ពីអ្វីដែលព្រះអង្គសង្គ្រោះបានជួបនៅឯសួនច្បារគែតសេម៉ានី និងនៅលើឈើឆ្កាង ។
-
សូមជួយកុមារឲ្យទន្ទេញមាត្រាទីបីនៃសេចក្ដីជំនឿ ។ សូមថ្លែងទីបន្ទាល់របស់បងប្អូនថា ព្រះយេស៊ូវគ្រីស្ទមានព្រះចេស្តាដើម្បីសង្គ្រោះយើងឲ្យរួចផុតពីអំពើបាប និងពីសេចក្ដីស្លាប់ ។
-
សូមជួយកុមារឲ្យរៀបចំការនិយាយខ្លីមួយអំពីដង្វាយធួនរបស់ព្រះយេស៊ូវគ្រីស្ទ ដែលពួកគេអាចចែកចាយជាមួយនឹងមនុស្សដទៃបាន ។ សូមលើកទឹកចិត្តពួកគេឲ្យដាក់បញ្ចូលនៅក្នុងការនិយាយរបស់ពួកគេនូវបទគម្ពីរ និងទីបន្ទាល់របស់ពួកគេ ។ ប្រសិនបើពួកគេត្រូវការជំនួយបន្ថែម នោះពួកគេអាចអាន « ធ្វើឲ្យធួន, ដង្វាយធួន » នៅក្នុង សេចក្ដីណែនាំដល់បទគម្ពីរទាំងឡាយ ( នៅលើគេហទំព័រscriptures.ChurchofJesusChrist.org ) ។
ដោយសារព្រះយេស៊ូវបានសុគត ហើយបានមានព្រះជន្មរស់ឡើងវិញ នោះខ្ញុំនឹងរស់នៅម្ដងទៀត ។
នៅថ្ងៃមួយ កុមារដែលបងប្អូនបង្រៀននឹងជួបបទពិសោធន៍ការស្លាប់របស់មនុស្សជាទីស្រឡាញ់ម្នាក់ ប្រសិនបើពួកគេមិនទាន់បានជួបទេនោះ ។ សូមជួយពួកគេឲ្យដឹងថា ដោយសារព្រះយេស៊ូវគ្រីស្ទបានមានព្រះជន្មរស់ឡើងវិញ នោះយើងទាំងអស់គ្នានឹងរស់ឡើងវិញ ។
សកម្មភាពដែលអាចធ្វើបាន
-
សូមបង្ហាញរូបភាព ល.រ. ៥៧–៥៩ នៅក្នុង សៀវភៅរូបភាពដំណឹងល្អ និងសូមឲ្យកុមារផ្គូផ្គងរូបភាពជាមួយនឹងសារលិខិតដូចតទៅនេះ ៖ ម៉ាថាយ ២៧:២៩–៣៨, ៥៩–៦០; យ៉ូហាន ២០:១០–១៨ ។
-
សូមអញ្ជើញកុមារឲ្យអានពី « រស់ឡើងវិញ, ដំណើររស់ឡើងវិញ » នៅក្នុងសេចក្តីណែនាំដល់បទគម្ពីរទាំងឡាយ ( នៅលើគេហទំព័រ scriptures.ChurchofJesusChrist.org ) និងរកអ្វីមួយដែលពួកគេចង់បង្រៀនដល់ក្រុមគ្រួសាររបស់ពួកគេ ។ សូមឲ្យពេលកុមារដើម្បីចែកចាយអ្វីដែលពួកគេបានរកឃើញ ។
-
សូមជួយកុមារឲ្យមើលក្នុង លិបិក្រមប្រធានបទ នៃ សៀវភៅចម្រៀងកុមារ ដើម្បីស្វែងរកចម្រៀងមួយបទ ដែលពួកគេចង់ច្រៀងអំពីព្រះយេស៊ូវគ្រីស្ទ ឬការមានព្រះជន្មរស់ឡើងវិញ ។ សូមច្រៀងចម្រៀងជាមួយគ្នា ហើយសូមសួរកុមារពីអ្វីដែលពួកគេបានរៀនចេញពីបទចម្រៀងនេះ ។
-
សូមបង្ហាញវីដេអូ « Jesus Is Resurrected » ( នៅលើគេហទំព័រChurchofJesusChrist.org ) ហើយសូមអញ្ជើញកុមារពីរបីនាក់ឲ្យចែកចាយទីបន្ទាល់របស់ពួកគេអំពីដង្វាយធួន និងការមានព្រះជន្មរស់ឡើងវិញរបស់ព្រះអង្គសង្រ្គោះ ។ ( បងប្អូនអាចសូមឲ្យកុមារទាំងនេះធ្វើនៅក្នុងអំឡុងពេលពីរបីថ្ងៃនេះ ពីមុនចូលរៀន ដើម្បីពួកគេអាចរៀបចំខ្លួនបាន ) ។ សូមឲ្យកុមារសរសេរទុកនូវទីបន្ទាល់របស់ពួកគេដើម្បីចែកចាយនៅផ្ទះ ។
លើកទឹកចិត្តឲ្យមានការរៀនសូត្រនៅឯគេហដ្ឋាន
ដើម្បីជួយកុមារឲ្យចែកចាយនូវអ្វីដែលពួកគេបានរៀនជាមួយនឹងក្រុមគ្រួសាររបស់ពួកគេ សូមលើកទឹកចិត្តពួកគេឲ្យច្រៀងចម្រៀងមួយបទអំពីព្រះយេស៊ូវគ្រីស្ទនៅផ្ទះនាសប្ដាហ៍នេះ ។
ការកែលម្អការបង្រៀនរបស់យើង
កុមារទទួលបានប្រយោជន៍អំពីការរៀនសាឡើងវិញ ។ សូមកុំខ្លាចនឹងធ្វើសកម្មភាពនានាច្រើនដងច្រើនសាឡើយ ជាពិសេសជាមួយនឹងកុមារតូចៗ ។ ការធ្វើសាឡើងវិញនឹងជួយកុមារឲ្យចងចាំអ្វីដែលបងប្អូនបង្រៀន ។