3–9 ʻEpeleli

Toetuʻú

“ʻE Faʻitoka, Kofaʻā Ho Mālohí?”

Lolotonga hoʻo lau ʻa e ngaahi fakamoʻoni ki he Toetuʻu ʻa e Fakamoʻuí ʻi he lēsoni ko ʻení, hiki ʻa e ngaahi ongo mo e fakakaukau ʻokú ke maʻu mei he Laumālie Māʻoniʻoní.

Lekooti e Ngaahi Ongo ʻOkú ke Maʻú

Lolotonga e uike fakaʻosi ʻo e moʻui ʻa e Fakamoʻuí, naʻe kau atu ha kau Siu tokolahi ki he tala-tukufakaholo ʻo e Laka Atú. Naʻa nau teuteuʻi ha meʻatokoni, hivaʻi ha ngaahi hiva, pea fakatahataha mai ke fakamanatua hono fakahaofi e fale ʻo ʻIsilelí mei he nofo pōpula ki he kau ʻIsipité. Naʻe fakafanongo ʻa e ngaahi fāmilí ki hono talanoaʻi ʻo e fakalaka ʻa e ʻāngelo fakaʻauhá mei he tukui ʻapi ʻo ʻenau ngaahi kuí he naʻa nau fakaʻilongaʻi honau ngaahi matapaá ʻaki ʻa e totoʻi lamí. Lolotonga e kātoanga fakafiefia ne mahu ai ʻa e ngaahi fakataipe ʻo e fakahaofí, ko ha tokosiʻi pē ʻiate kinautolu naʻa nau ʻilo ki he teuteu ʻa Sīsū Kalaisi, ko e Lami ʻa e ʻOtuá, ke fakahaofi kinautolu mei he haʻisia ki he angahalá mo e maté—ʻo fakafou ʻi Heʻene mamahí, ʻEne pekiá, mo ʻEne Toetuʻú. Naʻe ʻi ai foki mo ha niʻihi naʻa nau fakahā ko Sīsū honau Mīsaia kuo talaʻofa maí, ʻa honau Fakamoʻui taʻengatá. Talu mei he ʻaho ko iá, kuo fakamoʻoni ʻe he kau ākonga ʻa Sīsū Kalaisí ki māmani kotoa naʻe “pekia ʻa Kalaisi ʻi heʻetau ngaahi angahalá … pea naʻe fai ia, pea naʻe toetuʻu hake ia ʻi hono tolu ʻo e ʻahó” (1 Kolinitō 15:3–4).

Ngaahi Fakakaukau ki Hono Ako Fakataautaha ʻo e Folofolá

Mātiu 21–28

ʻOku fakahaofi au ʻe Sīsū Kalaisi mei he angahalá mo e maté, fakamālohia au ʻi hoku ngaahi vaivaí, mo fakafiemālieʻi au ʻi hoku ngaahi faingataʻaʻiá.

Ko ha founga ʻe taha ke tokanga taha ai ki he ngaahi tāpuaki ʻo e Fakalelei ʻa e Fakamoʻuí ʻi he uike ní, ko hano tuku ha taimi he ʻaho kotoa pē ke laukonga ai ʻo kau ki he uike fakaʻosi ʻo e moʻui ʻa Sīsuú (ʻoku ʻoatu ʻi heni ha taimi tēpile laukonga). Ko e hā ʻokú ke ʻiloʻi ʻi he ngaahi vahe ko ʻení ʻokú ne tokoniʻi koe ke ke ongoʻi e ʻofa ʻa e Fakamoʻuí? Fakalaulauloto ki he meʻa ʻoku akoʻi atu ʻe he ngaahi vahe ko ʻení fekauʻaki mo e founga te Ne lava ai ʻo fakahaofi koe mei he angahalá, maté, ngaahi ʻahiʻahí, mo e ngaahi vaivaí. ʻOku founga fēfē hoʻo fakamālohia ʻa e tui ki Hono mālohi ke fakahaofí?

• Sāpate: Hū Ikuna ki Selusalemá (Mātiu 21:6–11)

• Mōnite: Ko hono fakamaʻa ʻo e temipalé (Mātiu 21:12–16)

• Tūsite: Akonaki ʻi Selusalemá (Mātiu 21–23)

• Pulelulu: Hoko atu e akonakí (Mātiu 24–25)

• Tuʻapulelulu: Ko e Laka Atú mo e mamahi ʻa Kalaisi ʻi he Ngoue ko Ketisemaní (Mātiu 26)

• Falaite: Fakamāuʻí, Tutukí, mo e telió (Mātiu 27:1–61)

• Tokonaki: Fakaʻeʻepa ʻa e sino ʻo Kalaisí ʻi he fonualotó (Mātiu 27:62–66) lolotonga iá ʻokú Ne malanga ʻi he maama tataliʻanga ʻo e ngaahi laumālié (Tokāteline mo e Ngaahi Fuakava 138)

• Sāpaté: Ko e Hāʻele Hake ʻa Sīsū Kalaisí mo ʻEne hā ki Heʻene kau ākongá (Mātiu 28:1–10)

Vakai foki Easter.ComeuntoChrist.org.

Tutukí, tā ʻe Louise Parker

Mātiu 28:1–10; Luke 24:13–35; Sione 20:19–29; 1 Kolinitō 15:1–8, 55

ʻOku fakamoʻoni ha tokolahi ki he Toetuʻu ʻa Sīsū Kalaisí.

Fakakaukauloto pe ne fēfē nai hono mātātonu ʻe he kau ākongá ʻa hono manukia, ngaohikovia, mo tutuki ʻo Sīsuú. Ne nau mātātonu Hono mālohí, ongoʻi ʻa e moʻoni ʻo ʻEne ngaahi akonakí, pea nau tui ko e ʻAlo Ia ʻo e ʻOtuá. Pau pē naʻe fakatupu ʻe he mamata tonu e kau ākongá ki Heʻene pekiá ke nau ongoʻi loto mamahi mo puputuʻu. Ka naʻe ʻikai fuoloa kuo nau hoko ko ha kau fakamoʻoni ki he mana maʻongoʻonga ʻo ʻEne Toetuʻú.

Ko e hā te ke lava ʻo ako mei he ngaahi fakamatala ʻa kinautolu naʻa nau mamata tonu ki he Fakamoʻui kuo Toetuʻú? Fakaʻilongaʻi e aʻusia ʻa e tokotaha kotoa ʻi he Mātiu 28:1–10; Luke 24:13–35; Sione 20:19–29; mo e 1 Kolinitō 15:1–8, 55. (ʻE lava ke maʻu ha kau fakamoʻoni kehe ki he Kalaisi kuo toetuʻú ʻi he 3 Nīfai 11; Molomona 1:15; ʻEta 12:38–39; Tokāteline mo e Ngaahi Fuakava 76:19–24; 110:1–10; mo e Siosefa Sāmita—Hisitōlia 1:15–17.) Ko e hā e meʻa ʻoku ongo taha kiate koe fekauʻaki mo e ngaahi fakamoʻoni ʻa e kau fakamoʻoni ko ʻení? Hili e Toetuʻu ʻa e Fakamoʻuí, naʻe toetuʻu mo e niʻihi kehé pea naʻa nau hā ki ha kakai tokolahi (vakai Mātiu 27:52–53; 3 Nīfai 23:9). ʻOku tākiekina fēfē ʻe hoʻo tui ki he Fakamoʻuí mo e talaʻofa ʻo e toetuʻú ʻa e anga hoʻo moʻuí?

Vakai foki, “Toetuʻu ʻa Sīsū,” (vitiō), ChurchofJesusChrist.org.

1 Pita 1:3–11

ʻOku ʻomi ʻe Sīsū Kalaisi ʻa e ʻamanaki leleí mo e fiefiá kiate au.

Ko e hā ha ngaahi lea pe kupuʻi lea ʻi he 1 Pita 1:3–11 ʻokú ne ʻoatu ʻa e ʻamanaki lelei koeʻuhí ko Sīsū Kalaisi? Ko e fē nai e taimi kuó ke ongoʻi ai ʻa e ʻamanaki lelei ko iá?

Naʻe fakamoʻoniʻi ʻe ʻEletā Kēliti W. Kongi ʻoku hanga ʻe he Toetuʻú ʻo “ʻomi … ha ʻamanaki lelei kiate kinautolu kuo mole hanau kupu, kinautolu kuo ʻikai toe lava ʻo mamata, fanongo, pe lue; pe kinautolu kuo mole ki ha mahaki, puke fakaʻatamai, pe faʻahinga tōnounou. ʻOkú Ne kumi kitautolu. ʻOkú Ne fakamoʻui kitautolu. … Koeʻuhí [foki] ‘naʻe fai ʻe he ʻOtuá tonu ʻa e fakalelei ki he ngaahi angahala ʻa e māmaní’ [ʻAlamā 42:15], … ʻoku malava ke Ne tokoniʻi kitautolu ʻi he ʻaloʻofa ʻo fakatatau mo hotau ngaahi vaivaí. … ʻOku tau fakatomala mo fai ʻa e meʻa kotoa ʻoku tau ala lavá. ʻOkú Ne takatakaiʻi kitautolu ʻo taʻengata ʻʻe he ongo toʻukupu ʻo ʻene ʻofá’ [2 Nīfai 1:15]” (“Hosana mo Haleluʻia—Ko e Sīsū Kalaisi Moʻuí: Ko e ʻElito ʻo e Fakafoki Mai e Ongoongoleleí mo e Toetuʻú,” Liahona, Mē 2020, 54).

Vakai foki ʻAlamā 27:28; 36:1–24; 3 Nīfai 9:11–17; Molonai 7:40–41.

Ngaahi Fakakaukau ki Hono Ako Fakafāmili ʻo e Folofolá mo e Efiafi ʻi ʻApí

ComeuntoChrist.org.ʻOku ʻi he Easter.ComeuntoChrist.org ha fakahokohoko mo e fakamatala ki he meʻa naʻe hoko he ʻaho takitaha ʻi he uike fakaʻosi ʻo e moʻui ʻa e Fakamoʻuí. ʻI he ʻaho kotoa pē ʻo e uiké, te ke lava mo homou fāmilí ʻo toe vakaiʻi ʻa e ngaahi fakamatala ko ʻení ke ʻiloʻi pe ko e hā e meʻa naʻe fai ʻe he Fakamoʻuí ʻi he ʻaho ko iá, pe te mou laukonga fakafāmili mei he folofolá fekauʻaki mo Hono uike fakaʻosí (vakai ki ha lisi kuo fokotuʻu atu ʻi ʻolunga ʻi he “Ngaahi Fakakaukau ki hono Ako Fakataautaha ʻo e Folofolá”).

Ngaahi Himí mo e Tohi Hiva ʻa e Fānaú.Fakakaukau ke hivaʻi fakataha ha ngaahi hiva fekauʻaki mo e Fakalelei mo e Toetuʻu ʻa e Fakamoʻuí lolotonga e uike ní, kau ai ha ngaahi hiva ʻe niʻihi ʻoku ʻikai ke mou maheni mo ia. (Vakai foki ki he fakahokohoko fakatefito ʻo e Ngaahi Himí pe Tohi Hiva ʻa e Fānaú, ki he ngaahi tefito hangē ko e “Fakaleleí,” “Pekiá mo e Toetuʻú,” “Toetuʻú.”) Ke tokoni ki he fāmilí ke nau ako ʻa e ngaahi hivá, te ke lava ʻo fakaʻaliʻali ha ngaahi fakatātā ʻo fakatatau ki hono fakaleá.

Naunau kia “Sīsū Kalaisí” kuo fakatahatahaʻi ʻi he Gospel Library.ʻOku ʻi he konga ko e “Sīsū Kalaisi” ʻi he Gospel Library ʻa e ngaahi vitiō, ngāue fakaʻaati, mo e hiva ʻe lava ʻo tokoni ki homou fāmilí ke fakamanatua e Toetuʻu ʻa e Fakamoʻuí ʻi he Toetuʻu ko ʻení.

“Ko e Kalaisi Moʻuí: Ko e Fakamoʻoni ʻa e Kau ʻAposetoló.”Lau fakafāmili ʻa e “Ko e Kalaisi Moʻuí: Ko e Fakamoʻoni ʻa e Kau ʻAposetoló” (ChurchofJesusChrist.org). Fakaafeʻi e mēmipa takitaha ʻo e fāmilí ke nau fili ha pōpoaki ʻo e Toetuʻú mei he fakamoʻoni ko ʻení ke vahevahe mo e niʻihi kehé. Hangē ko ʻení, te mou lava ʻo faʻu ha ngaahi pousitā ke fakaʻaliʻali ʻi he mītia fakasōsialé, ʻi homou matapā muʻá, pe ʻi homou ʻapí.

Ke maʻu ha ngaahi fakakaukau lahi ange ki hono akoʻi ʻo e fānaú, vakai ki he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Palaimelí.

Hiva ʻoku fokotuʻu atú: “Kuo Toetuʻu ʻa Sīsū,” Tohi Hiva ʻa e Fānaú, 44.

Ko Hono Fakatupulaki e Ako Fakataautahá

Fokotuʻu ha ngaahi taumuʻa ʻoku tokangaʻi ngofuá. ʻE lava ke tāpuekina hoʻo moʻuí ʻi hoʻo tuku ha kiʻi taimi ke ako ai e folofolá. Tukupā ke ke ako ia ʻi he ʻaho kotoa pē, fekumi ki ha founga ke ke fakamanatu ai hoʻo tukupaá, pea fai ho lelei tahá ke ke tauhi pau ia. Kapau ʻe ngalo ʻiate koe, ʻoua ʻe loto-foʻí. Toe kamata pē.

Ketisemani, tā ʻe Adam Abram