3–9 ʻEpeleli

Toetuʻú

“ʻE Faʻitoka, Kofaʻā Hoʻo Mālohí?”

Fakaʻaongaʻi ho taimi mo e fānaú ke tokoniʻi kinautolu ke nau vakai ki he Toetuʻú ko ha faʻahitaʻu ke tau fiefia ʻi he Fakamoʻuí mo fakaloloto ange ʻenau houngaʻia koeʻuhí ko ʻEne feilaulaú. ʻE lava ke fakafeʻungaʻi e ngaahi fakakaukau ʻi he lēsoni ko ʻení ke tokoni atu ke akoʻi e fānau ʻi ha faʻahinga taʻu motuʻa pē.

Fakaafeʻi e Feʻinasiʻakí

Fakaʻaliʻali ha fakatātā ʻo e Fakamoʻuí ʻi Ketisemani, ʻi he kolosí, pea mo e hili ʻEne Toetuʻú (vakai ki he fakatātā ʻi he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí mo e Tohi Fakatātā ʻo e Ongoongoleleí, fika 56–60). Kole ki he fānaú ke vahevahe ʻa e meʻa ʻoku nau ʻilo fekauʻaki mo e ngaahi meʻa ʻoku ʻi he fakatātaá.

Akoʻi e Tokāteliné: Fānau Iiki Angé

Ko Sīsū Kalaisi ʻa hoku Fakamoʻuí.

ʻI hoʻo laukonga fekauʻaki mo e Fakalelei ʻa Sīsū Kalaisí, fakalaulauloto ki ha founga te ke lava ai ʻo tokoni ke ongoʻi ʻe he fānaú ʻa e lahi e ʻofa ʻa Sīsū ʻiate kinautolú.

Ngaahi ʻEkitivitī ʻe Ala Fakahokó

• Fakaʻaliʻali ha fakatātā ʻo Sīsū, pea kole ki he fānaú ke nau vahevahe ʻa e meʻa ʻoku nau ʻilo fekauʻaki mo e meʻa naʻá Ne fai maʻatautolú. Fai hoʻo fakamoʻoni ki he ʻofa ʻa e Fakamoʻuí mo Hono mālohi ke fakahaofi kitautolu mei he angahalá. Puke hake ha sioʻata, pea tuku ki he fānaú ke nau taufetongi ʻi he sio ki aí. ʻI heʻenau fai iá, lea ʻaki e, “ʻOku ʻofa ʻa Sīsū ʻia [hingoa e tokotahá], pea te Ne lava ʻo tokoniʻi ʻa [hingoa e tokotahá] ke toe nofo fakataha mo e Tamai Hēvaní.”

• Fakaʻaliʻali e fakatātā Ko e Lotu ʻa Sīsū ʻi Ketisemaní (Tohi Fakatātā ʻo e Ongoongoleleí, fika 56) ʻi hoʻo fai e talanoa ʻo e mamahi ʻa e Sīsū ʻi Ketisemani koeʻuhí ko e ngaahi angahala ʻo e māmaní (vakai Mātiu 26:36–46; Luke 22:39–44). Fakamoʻoni ange ʻoku tuʻunga ʻi Heʻene mamahí, ʻe lava ai ke fakamolemoleʻi kitautolu ʻi he taimi ʻoku tau fai ai ha fili hala. Te ke lava foki ʻo fakaʻaongaʻi ʻa e “Vahe 51: Ko e Mamahi ʻa Sīsū ʻi he Ngoue ko Ketisemaní” (ʻi he Ngaahi Talanoa ʻo e Fuakava Foʻoú, 129–32, pe ko e vitiō ʻoku fekauʻaki mo ia ʻi he ChurchofJesusChrist.org).

• Hivaʻi fakataha ha foʻi hiva fekauʻaki mo e ʻofa ʻa Sīsū ʻiate kitautolú, hangē ko e “ʻOku Ongo ʻa e ʻOfá” (Tohi Hiva ʻa e Fānaú, 42–43). Tokoniʻi e fānaú ke nau ʻiloʻi ʻa e ngaahi lea ʻi he hivá ʻokú ne fakamatalaʻi mai ʻa e ʻofa ʻa e Fakamoʻuí. Ko e hā ʻokú ne tokoniʻi kitautolu ke tau ongoʻi ʻEne ʻofá? Te tau tokoniʻi fēfē nai e niʻihi kehé ke nau ongoʻi ʻEne ʻofá?

Kuó Ne Toe Tuʻu, tā ʻa Greg Olsen

Koeʻuhi naʻe pekia pea toetuʻu ʻa Sīsū, te u lava ʻo toe moʻui.

Te ke tokoni fēfē ke mahino ki he fānaú, te tau toetuʻu ʻi ha ʻaho mo hotau ngaahi ʻofaʻangá, koeʻuhí ko Sīsū Kalaisi?

Ngaahi ʻEkitivitī ʻe Ala Fakahokó

• Akoʻi ki he fānaú ʻa e talanoa ʻo e Toetuʻú ʻo ngāue ʻaki e ʻū fakatātā ʻo Kalaisi ʻi Ketisemaní, ʻi he kolosí, pea ʻi he hili ʻEne Toetuʻú (vakai, Tohi Fakatātā ʻo e Ongoongoleleí, fika 56–60 mo e fakatātā peesi kakato ʻi he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí). Tuku ki ha fānau ʻe niʻihi ke nau puke ʻa e ʻū fakatātaá lolotonga hoʻo fai e talanoá. Talanoa ki he fānaú fekauʻaki mo ha kakai ʻe niʻihi ne nau mamata kia Sīsū hili ʻEne toetuʻú, hangē ko Mele (vakai, Sione 20:1–18) pe ko Tōmasi (vakai, Sione 20:24–29).

• Fehuʻi ki he fānaú pe ko e hā e ʻuhinga ʻoku tau fakafiefiaʻi ai e Toetuʻú. Fakamatalaʻi ange ʻoku tau fakafiefiaʻi ʻi he Toetuʻú ʻa e ʻaho ne toetuʻu ai ʻa Sīsū Kalaisí. Fehuʻi ange pe ʻoku ʻi ai ha fānau ʻoku nau fie vahevahe ʻa e meʻa ʻoku fai ʻe heʻenau ngaahi fāmilí ke fakamanatua ʻaki e Toetuʻu ʻa Sīsū Kalaisí.

• Fakamatalaʻi ange ʻoku ʻuhinga e toetuʻú ki he toe moʻui hili ʻetau maté. Fai hoʻo fakamoʻoni te tau toetuʻu koeʻuhi ko Sīsū Kalaisi—te tau toe moʻui hili ʻetau maté, pea he ʻikai ʻaupito ke tau toe mate.

• Fakaʻaongaʻi ha kofunima ke akoʻi ki he fānaú ʻoku tau maʻu kotoa ha sino (ʻoku fakafofongaʻi ʻe he kofunimá) mo ha laumālie (ʻoku fakafofongaʻi ʻe ha nima). ʻI heʻetau maté, ʻoku mavahevahe hotau laumālié mo hotau sinó. ʻOku hokohoko atu e moʻui ʻa hotau ngaahi laumālié, kae ngata e moʻui ʻa hotau sinó. ʻI he taimi ʻoku tau toetuʻu aí, ʻoku toe fakatahataha mai hotau laumālié mo e sinó. Tuku ki he fānaú ke nau taufetongi ʻi hono tui mo vete ʻa e kofunimá.

• Hivaʻi fakataha ha hiva Toetuʻu, hangē ko e “Naʻe Toetuʻu Nai ʻa Sīsū?” pe “Kuo Toetuʻu ʻa Sīsū” (Tohi Hiva ʻa e Fānaú, 45, 44), pea fakaʻaliʻali ki he fānaú ha ʻū fakatātā ʻo Sīsū hili ʻEne toetuʻú (vakai, Tohi Fakatātā ʻo e Ongoongoleleí, fika 59–61).

• Fakaʻaliʻali ha fakatātā ʻo ha tokotaha ʻokú ke ʻiloʻi ka kuo mālōlō. Vahevahe hoʻo fakamoʻoni te ne toetuʻu koeʻuhí ko e Fakalelei mo e Toetuʻu ʻa Sīsū Kalaisí.

• Mamata fakataha ʻi he vitiō “Toetuʻu ʻa Sīsū” (ChurchofJesusChrist.org). Pe fakaʻaliʻali ha vitiō ʻe taha ʻo e Toetuʻú ʻoku hā ʻi he Easter.ComeuntoChrist.org.

Akoʻi e Tokāteliné: Fānau Lalahi Angé

Naʻe mamahi ʻa Sīsū ʻi Ketisemani pea ʻi he funga kolosí maʻaku.

ʻI hoʻo ako e folofolá he uike ní, fakalaulauloto ki he founga te ke lava ai ʻo tokoni ki he fānaú ke langaki ʻenau tui kia Sīsū Kalaisi mo ʻEne Fakaleleí.

Ngaahi ʻEkitivitī ʻe Ala Fakahokó

• Lau fakataha mo e fānaú e Luke 22:39–44 pea mo e ngaahi veesi kuo filifili mei he Mātiu 27:29–50. Fakaafeʻi ke nau fekumi ki he ngaahi foʻi lea ʻokú ne tokoniʻi kinautolu ke mahino e meʻa ne aʻusia ʻe he Fakamoʻuí ʻi Ketisemaní pea ʻi he kolosí.

• Tokoniʻi e fānaú ke nau maʻuloto e tefito ʻo e tui hono tolú. Vahevahe hoʻo fakamoʻoni ʻoku maʻu ʻe Sīsū Kalaisi e mālohi ke fakahaofi kitautolu mei he angahalá mo e maté.

• Tokoni ki he fānaú ke nau teuteu ha ngaahi lea nounou fekauʻaki mo e Fakalelei ʻo Sīsū Kalaisí ʻa ia te nau lava ʻo vahevahe mo e niʻihi kehé. Poupouʻi ke nau fakakau ha potufolofola mo ʻenau ngaahi fakamoʻoní, ʻi heʻenau leá. Kapau te nau fie maʻu tokoni, ʻe lava ke nau lau ʻa e “Fakaleleí, Fakaleleiʻí” ʻi he Fakahinohino ki he Ngaahi Folofolá (scriptures.ChurchofJesusChrist.org).

Koeʻuhi naʻe pekia pea toetuʻu ʻa Sīsū, te u toe moʻui foki mo au.

ʻE ʻi ai ha ʻaho ʻe aʻusia ai ʻe he fānau ʻokú ke akoʻí, ha mate ʻa ha ʻofaʻanga kapau kuo teʻeki ai ke nau aʻusia ia. Tokoni ke nau ʻiloʻi ʻoku tuʻunga ʻi he toetuʻu ʻa Sīsū Kalaisí, te tau toetuʻu kotoa mo kitautolu.

Ngaahi ʻEkitivitī ʻe Ala Fakahokó

• Fakaʻliʻali ʻa e fakatātā fika 57–59 ʻi he Tohi Fakatātā ʻa e Ongoongoleleí, pea kole ki he fānaú ke nau fakatauhoa ʻa e ʻū fakatātaá mo e ngaahi potufolofola ko ʻení: Mātiu 27:29–38, 59–60; Sione 20:10–18.

• Fakaafeʻi ʻa e fānaú ke nau takitaha lau ʻa e “Toetuʻú” ʻi he Fakahinohino ki he Ngaahi Folofolá (scriptures.ChurchofJesusChrist.org) pea kumi ha meʻa te nau fie akoʻi ki honau ngaahi fāmilí. ʻOange ki he fānaú ha taimi ke nau vahevahe ai e meʻa ne nau maʻú.

• Tokoniʻi e fānaú ke nau fekumi ʻi he fakahokohoko ʻo e tefitó ʻi he Tohi Hiva ʻa e Fānaú ke maʻu ha hiva fekauʻaki mo Sīsū Kalaisi pe ko e Toetuʻú, ʻa ia te nau fie hivaʻi. Hivaʻi fakataha ʻa e foʻi hivá, pea fehuʻi ki he fānaú pe ko e hā ʻoku nau ako mei he foʻi hiva ko ʻení.

• Fakaʻaliʻali ʻa e vitiō “Toetuʻu ʻa Sīsū” (ChurchofJesusChrist.org), pea fakaafeʻi ha fānau ʻe niʻihi ke vahevahe ʻenau fakamoʻoni fekauʻaki mo e Fakalelei mo e Toetuʻu ʻa e Fakamoʻuí. (Te ke lava ʻo kole ki he fānau ko ʻení ke nau fai ʻeni ʻi ha ngaahi ʻaho kimuʻa he kalasí koeʻuhí ke nau mateuteu.) Fakaafeʻi e fānaú ke nau hiki hifo ʻenau ngaahi fakamoʻoní ke vahevahe ʻi ʻapi.

Poupouʻi e Ako ʻi ʻApí

Ke tokoni ki he fānaú ke nau vahevahe e meʻa ne nau akó ki honau ngaahi fāmilí, poupouʻi ke nau hivaʻi ha foʻi hiva ʻi ʻapi he uiké ni fekauʻaki mo Sīsū Kalaisi.

Fakatupulaki ʻEtau Founga Akoʻí

ʻOku ʻaonga ki he fānaú ʻa hono toutou fakahoko ha meʻa. ʻOua ʻe manavasiʻi ke toutou fai e ngaahi ʻekitivitií, tautefito ki he fānau iiki angé. ʻE tokoni hono toutou fakahokó ke manatuʻi ʻe he fānaú e meʻa ʻokú ke akoʻí.