Chi moko laa’in tatink’e sa’ tojb’a-maak, xb’aan li xEva Koleva Timothy

24–30 abril

Jwan 7–10

“Laa’in li chaab’il aj k’aak’alenel karneer”

Naq nakawil Jwan 7–10, naru nakaweek’a lix wankil li Santil Musiq’ej chirixeb’ li na’leb’ sa’eb’ li ch’ol a’in. Wi taatz’iib’a li k’a’ru nakaweek’a, tatxtenq’a chixk’uub’ankil chan ru naq taak’anjela.

Tz’iib’a li nakak’oxla

Us ta li Jesukristo kichal chixk’amb’al li “tuqtuukil usilal” rik’ineb’ li winq (Lukas 2:14), kiwan “jun jachok-ib’ sa’ xyanqeb’ li tenamit sa’ xk’ab’a’ li Jesus” (Jwan 7:43). Eb’ li ke’ilok re li yoo chi k’ulmank, jalan jalanq lix na’leb’eb’ chirix ani li Jesus. Wankeb’ li ke’yehok re, “Chaab’il winq a’an,” ut wankeb’ chik li ke’yehok re, “Naxb’alaq’iheb’ b’an li tenamit” (Jwan 7:12). Naq li Jesus kixk’irtesi jun li mutz’ sa’ li hilob’aal kutan, wankeb’ li ke’yehok re, “Li winq a’in moko rik’in ta li Dios nachalk xb’aan naq ink’a’ naxk’e xloq’al li hilob’aal kutan,” ut wankeb’ chik li ke’patz’ok re, “Chanru naq tixb’aanu li xninqal eetalil a’in junaq winq aj maak?” (Jwan 9:16). A’ut sa’ xyi chixjunil li choqink, eb’ li yookeb’ chixsik’b’al li yaal ke’xk’e reetal lix wankil li raatin, xb’aan naq “maajun junaq winq na’aatinak jo’ na’aatinak li winq a’an” (Jwan 7:46). Naq eb’ laj Judio ke’xpatz’ re li Jesus naq “tixye chi ch’olch’o ru” ma a’an li Kristo, a’an kixk’ut jun raqal chi na’leb’ li naru chiqatenq’ankil re taqanaw ru li yaal ut li moko yaal ta: “Eb’ lin karneer neke’rab’i xyaab’ inkux,” chan, ut “laa’in nekeb’innaw ru ut eb’ a’an nikine’xtaaqe” (Jwan 10:24, 27).

Li na’leb’ re xtzolb’aleb’ li loq’laj hu aajunes

Jwan 7:14–17

Wi ninyu’amiheb’ li na’leb’ k’utb’il xb’aan li Jesukristo, tin’ok chixnawb’al naq yaaleb’.

Eb’ laj Judio ke’sach xch’ool rik’in xnaab’alil lix nawom li Jesus, xb’aan naq a’an ink’a’ tzolb’il (chi’ilmanq li raqal 15)—us ta, ink’a’ rik’in li tzole’k jo’ li k’aynaqeb’ wi’. Naq li Jesus kichaq’ok, kixk’ut jun b’e re xnawb’al li yaal li naru nab’eek wi’ li junjunq, maak’a’ naxye ma tzolb’il malaj b’ar nachal chaq. Rik’in li k’a’ru yeeb’il sa’ Jwan 7:14–17, chan ru naru tat-ok chixnawb’al naq yaal jun li na’leb’ k’utb’il xb’aan li Jesus? Chan ru naq xattenq’aak rik’in xb’aanunkil a’in re xnimankil xnawom aach’ool chirix li evangelio?

Jwan 8:2–11

Li ruxtaan li Kolonel wan choq’ re chixjunileb’.

Naq yoo chi aatinak chirix li raatin li Kolonel rik’in li ixq li chapb’il sa’ li muxuk sumsu, li Elder Dale G. Renlund kixye: “Yaal, li Kolonel ink’a’ kixk’ulub’a li muxuk sumsu. A’b’an ink’a’ ajwi’ kixjit li ixq. Kixwaklesi b’an xch’ool chixjalb’al lix yu’am. Li ixq kiwaklesiik xch’ool chi jale’k xb’aan lix toq’ob’ahom ut li ruxtaan. Sa’ lix jaltesinkil ru li Santil Hu xb’aan laj Jose Smith nach’olob’aman xyaalal naq chirix a’in ki’ok choq’ jun tzolom: “Ut li ixq kixnima ru li Dios chalen chaq li hoonal a’an, ut kixpaab’ lix k’ab’a’ ” [chi’ilmanq Jwan 8:11, jo’ jaltesinb’il ru xb’aan laj Jose Smith]” (“Li qaChaab’il aj Ilol Karneer,” Jolomil ch’utub’aj-ib’ re abril 2017).

Jo’q’e xaweek’a naq chanchanat li ixq, ut xak’ul li uxtaan ruuchil li jite’k rik’in li Kolonel? Jo’q’e xatwan jo’eb’ laj tz’iib’ ut laj Fariseo, ut xajit malaj xatraqok aatin chirixeb’ laa was aawiitz’in, us ta laa’at ajwi’ wan aamaak? (chi’ilmanq Jwan 8:7). K’a’ chik ru naru taatzol rik’in li kixb’aanu li Kolonel rik’ineb’ laj tz’iib’ ut eb’ laj Fariseo, ut rik’in li ixq li chapb’il sa’ li muxuk sumsu? K’a’ru nakatzol chirix lix kuyb’al li maak xb’aan li Kolonel naq nakawileb’ li raqal a’in?

Chi’ilmanq ajwi’ “Vete y no peques mas” (video), ChurchofJesusChrist.org.

Jwan 9

Wi wan qapaab’aal, li Dios naru naxk’utb’esi rib’ sa’ lix rahil qach’ool.

K’a’ru naxk’ut chawu Jwan 9:1–3 chirix li yale’k ut eb’ li rahil ch’oolej? Naq nakawil Jwan 9, k’oxla chan ru naq “lix k’anjel li Dios ke’k’utun” sa’ xyu’am li winq mutz’ chalen chaq sa’ xyo’lajik. Chan ru xk’utum rib’ sa’ laa yu’am, jo’ ajwi’ sa’ lix rahil aach’ool?

Jwan 10:1–30

Li Jesukristo a’an li Chaab’il aj Ilol Karneer.

Us ta ink’a’ jwal nakanaweb’ ru li karneer ut li k’aak’alenk, rilb’al Jwan 10, b’ar wi’ li Kolonel naxye, “Laa’in li chaab’il aj k’aak’alenel karneer,” naru naxk’ut chawu li ninqi yaal chirix li Kolonel. Re xtawb’aleb’ li yaal a’an, sik’eb’ li aatin neke’xch’olob’ k’a’ru jun li chaab’il aj k’aak’alenel, ut chak’e reetal chan ru naq eb’ li aatin a’an neke’xk’am rib’ rik’in li Kolonel. A’ineb’ junjunq li eetalil:

• Raqal 3: “Naxb’oqeb’ lix karneer rik’in lix k’ab’a’eb’ ut narisiheb’ chi b’eek.”

• Raqal 11: A’an “naxk’e lix yu’am sa’ xk’ab’a’eb’ lix karneer.”

• Raqal 16: “Jun ch’uutaqeb’ aj chik naq te’wanq, ut junaq ajwi’ laj k’aak’alehom reheb’.”

A’ineb’ junqaq li patz’om li tate’xtenq’a chixtz’ilb’al rix li raqal a’in: Chan ru naq li Jesus chanchan jun li okeb’aal? (che’ilmanq li raqal 7–9). Jo’kan b’i’ naq a’an “naxk’e “xyu’am … chi numtajenaq”? (raqal 10). Ma wan hoonal xaweek’a’ naq a’an naxnaw aawu? (chi’ilmanq li raqal 14). Chan ru nakak’e reetal lix yaab’ xkux li Chaab’il aj ilol Karneer? (chi’ilmanq li raqal 27).

Chi’ilmanq ajwi’ Salmos 23; Esekiel 34; Alma 5:37–39; 3 Nefi 15:21–16:5; Gerrit W. Gong, “Li Chaab’il aj Ilol Karneer, lix Karneer li Dios,” Jolomil ch’utub’aj-ib’ re abril 2019.

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Jwan 7:24.Re xtenq’ankil laa junkab’al chixtawb’al ru lix k’utum li Jesus li natawman sa’ Jwan 7:24, naru nakak’ut chiruheb’ junaq rix li k’a’aq re ru, a’b’an jalanaq xsa’. Malaj, eb’ li komon re laa junkab’al naru neke’xwotz junaq na’leb’ xe’xk’ul b’ar wi’ xe’xtzol naq ink’a’ te’raqoq aatin chirix li neke’ril. Naru ajwi’ nakatz’iib’a lix seeb’al li junjunq li ink’a’ nak’eeman reetal sa’ junpaat (chi’ilmanq ajwi’ 1 Samuel 16:7; Thomas S. Monson, “Ver a los demás como lo que pueden llegar a ser,” Liahona, noviembre 2012, 68–71).

Jwan 8:31–36.K’a’ru naraj naxye “eechaninb’il xb’aan li maak”? (chi’ilmanq ajwi’ Moroni 7:11). K’a’ru li yaal k’utb’il xb’aan li Jesus li naru chi ach’ab’ank qe?

Li Jesus kixk’irtesi jun li mutz’, xb’aan laj Carl Heinrich Bloch

Jwan 9.Chan ru naru taatenq’aheb’ laa junkab’al chirilb’al sa’ xk’a’uxl chan ru naq li Jesus kixk’irtesi li mutz’ sa’ Jwan 9? Naru teeb’aanu sa’ komonil li kik’ulman sa’ li seraq’ a’in, malaj teek’ut li video “Jesús sana a un hombre ciego de Nacimiento” (ChurchofJesusChrist.org). Xxaqab’ li esil chi kok’ aj xsa’, re teeril jo’ junkab’al eb’ li raqal sa’ Jwan 9. Tz’aama chiruheb’ naq te’xtz’iib’a k’a’ru neke’xtzol sa’ li esilal, jo’ k’a’ru xyaalalil naq jalb’il qach’ool re lix evangelio li Jesukristo.

Jwan 10:1–18, 27–29.Re te’tz’aqonq li komon sa’ li junkab’al sa’ tzolok rik’in li jaljookil ru aatin chirix li chaab’il aj k’aak’alenel karneer, patz’ re li junjunq naq tixyiib’ xjalam-uuch: jun aj elq’, jun okeb’aal, jun aj k’aak’alenel karneer, jun tojb’il moos, jun xojb’, ut jun karneer. Patz’ chiruheb’ naq te’ril sa’ Jwan 10:1–18, 27–29, ut aatinanqex sa’ junkab’al chirix li k’a’ru kixk’ut li Kolonel chirix li k’a’ru xe’yiib’.

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Na’ilok we Jehova,” Eb’ li B’ich, 60.

Xkawresinkil aawib’ chi tzolok

Sik’eb’ li aatin ut li ch’ol aatin li neke’wulak chawu. Naq yookat chi ilok, li Musiq’ej naru tixk’ut chawu junjunq aatin malaj ch’uut chi aatin li te’wulaq chawu malaj li chanchan tz’iib’anb’il choq’ aawe laa’at. K’oxla xtz’iib’ankil resil li aatin ut li raqal chi aatin li namusiq’ank aawe sa’ Jwan 7–10.

Ink’a’ chik sachenaq, xb’aan laj Greg K. Olsen