« ថ្ងៃទី ៥–១១ ខែ មិថុនា ។ យ៉ូហាន ១៤–១៧ ៖ ‹ ចូរនៅជាប់ក្នុងសេចក្តីស្រឡាញ់របស់ខ្ញុំចុះ › » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )

« ថ្ងៃទី ៥–១១ ខែ មិថុនា ។ យ៉ូហាន ១៤–១៧ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២៣

អាហារយប់ចុងក្រោយ ដោយ វិល្លាម ហ៊ែនរី ម៉ាហ្គែតសុន

ថ្ងៃទី ៥–១១ ខែ មិថុនា

យ៉ូហាន ១៤–១៧

« ចូរនៅជាប់ក្នុងសេចក្តីស្រឡាញ់របស់ខ្ញុំ »

នៅពេលបងប្អូនអានអំពីការបង្រៀនរបស់ព្រះអង្គសង្គ្រោះនៅក្នុង យ៉ូហាន ១៤–១៧ ព្រះវិញ្ញាណបរិសុទ្ធនឹងជួយបងប្អូនឲ្យរកឃើញសារលិខិតទាំងឡាយសម្រាប់បងប្អូន ។ សូមកត់ត្រាចំណាប់អារម្មណ៍ដែលបងប្អូនមាន ។

កត់ត្រាចំណាប់អារម្មណ៍របស់បងប្អូន

សព្វថ្ងៃនេះ យើងហៅវាថា « អាហារយប់ចុងក្រោយ » ប៉ុន្តែយើងពុំដឹងថា តើពួកសិស្សរបស់ព្រះយេស៊ូវពិតជាបានដឹងដោយពេញលេញដែរឬអត់ ថាវាជាអាហារចុងក្រោយរបស់ពួកគេជាមួយនឹងលោកគ្រូរបស់ពួកគេពីមុនទ្រង់សុគត ពេលពួកគេជួបជុំគ្នាសម្រាប់ពិធីជប់លៀងបុណ្យរំលងប្រចាំឆ្នាំនោះ ។ ទោះជាយ៉ាងណាក៏ដោយ ព្រះយេស៊ូវ « ទ្រង់ជ្រាបថា ពេលកំណត់ ដែលទ្រង់ត្រូវចេញ » ( យ៉ូហាន ១៣:១ ) ។ មិនយូរប៉ុន្មាន ទ្រង់នឹងជួបនឹងការរងទុក្ខនៅសួនច្បារគែតសេម៉ានី ការក្បត់ និងការបដិសេធមកពីមិត្តជិតស្និទ្ធបំផុតរបស់ទ្រង់ និងការរងទុក្ខដល់សុគតនៅលើឈើឆ្កាង ។ ប៉ុន្តែទោះជារឿងទាំងអស់នេះនឹងកើតឡើងចំពោះទ្រង់ក្ដី ក៏ការផ្ដោតរបស់ព្រះយេស៊ូវ គឺពុំមែនមកលើព្រះអង្គទ្រង់ទេ ប៉ុន្តែទៅលើពួកសិស្សរបស់ទ្រង់វិញ ។ តើការណ៍អ្វីខ្លះ ដែលពួកគេត្រូវការដឹងជាច្រើនថ្ងៃ និងជាច្រើនឆ្នាំជាមុននោះ ? ការបង្រៀនដ៏ទន់ភ្លន់របស់ព្រះយេស៊ូវនៅក្នុង យ៉ូហាន ១៤–១៧ បង្ហាញពីរបៀបដែលទ្រង់មានព្រះទ័យចំពោះពួកសិស្សរបស់ទ្រង់ នៅពេលនោះ និងពេលឥឡូវនេះ ។ ក្នុងចំណោមសេចក្ដីពិតពេញដោយការលួងលោមជាច្រើន ទ្រង់បានចែកចាយនូវការធានាអះអាងថា ក្នុងន័យមួយ គឺទ្រង់នឹងមិនដែលចាកចេញពីពួកគេឡើយ ។ ទ្រង់បានសន្យាថា « បើអ្នករាល់គ្នាកាន់តាមបញ្ញត្តិខ្ញុំ នោះនឹងនៅជាប់ក្នុងសេចក្តីស្រឡាញ់របស់ខ្ញុំ » ( យ៉ូហាន ១៥:១០ ) ។

គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន

យ៉ូហាន ១៤–១៥

ខ្ញុំបង្ហាញសេចក្ដីស្រឡាញ់របស់ខ្ញុំចំពោះព្រះយេស៊ូវគ្រីស្ទ តាមរយៈការកាន់តាមព្រះបញ្ញត្តិទាំងឡាយរបស់ទ្រង់ ។

នៅពេលបងប្អូនអាន យ៉ូហាន ១៤–១៥ បងប្អូនអាចកត់ចំណាំ ឬគូសចំណាំការប្រើពាក្យ ស្រឡាញ់ នីមួយៗ ។ បងប្អូនអាចកត់សម្គាល់ពាក្យ បទបញ្ញត្តិដែលថ្លែងឡើងវិញជាញឹកញាប់នៅក្នុងទំនាក់ទំនងជាមួយនឹងពាក្យ សេចក្ដីស្រឡាញ់នៅក្នុងជំពូកទាំងនេះ ។ តើបងប្អូនអាចរៀនអ្វីខ្លះ អំពីទំនាក់ទំនងរវាងសេចក្ដីស្រឡាញ់ និងបទបញ្ញត្តិមកពីការបង្រៀនរបស់ព្រះអង្គសង្គ្រោះ ? តើពាក្យ និងឃ្លាអ្វីខ្លះទៀត ដែលបងប្អូនឃើញថាជាប់ទាក់ទងនឹងពាក្យ ស្រឡាញ់ នៅក្នុងជំពូកទាំងនេះ ?

សូមពិចារណាអំពីរបៀប ដែលសេចក្ដីស្រឡាញ់របស់ព្រះអង្គសង្គ្រោះបានជះឥទ្ធិពលលើបងប្អូន ។

សូមមើលផងដែរ យ៉ូហាន ១៣:៣៤–៣៥; ឌី.ថត គ្រីស្តូហ្វឺសិន « Abide in My Love » Liahona ខែ វិច្ឆិកា ឆ្នាំ ២០១៦ ទំព័រ ៤៨–៥១ ។

អាហារយប់ចុងក្រោយ ដោយ ក្លាកខេលី ប្រាយ

យ៉ូហាន ១៤–១៦

ព្រះវិញ្ញាណបរិសុទ្ធជួយខ្ញុំឲ្យបំពេញគោលបំណងរបស់ខ្ញុំក្នុងនាមជាសិស្សម្នាក់របស់ព្រះយេស៊ូវគ្រីស្ទ ។

ពួកសិស្សរបស់ទ្រង់ប្រាកដជាមានចិត្តខ្ទេចខ្ទាំហើយ ដែលឮថា ពេលវេលារបស់ពួកគេជាមួយព្រះអង្គសង្គ្រោះជិតផុតទៅហើយនោះ ។ ពួកគេក៏ប្រហែលជាព្រួយចិត្តថា តើពួកគេអាចបន្តជីវិតទៅដោយគ្មានទ្រង់ដោយរបៀបណា ។ កាលបងប្អូនអាន ម៉ាថាយ ១៤–១៦ សូមរកមើលអ្វីដែលព្រះអង្គសង្គ្រោះបានមានព្រះបន្ទូលដើម្បីធានាអះអាងដល់ពួកគេ ។ ជាពិសេស សូមកត់សម្គាល់ពីអ្វីដែលទ្រង់បានបង្រៀនពួកគេអំពីព្រះវិញ្ញាណបរិសុទ្ធ ។ តើបងប្អូនរៀនអ្វីខ្លះអំពីព្រះវិញ្ញាណបរិសុទ្ធ ចំពោះព្រះបន្ទូលរបស់ព្រះអង្គសង្គ្រោះនៅក្នុងខគម្ពីរដូចខាងក្រោម ?

ហេតុអ្វីក៏ពួកសិស្សត្រូវការជំនួយប្រភេទនេះមកពីព្រះវិញ្ញាណបរិសុទ្ធ ? តើព្រះវិញ្ញាណបរិសុទ្ធបំពេញតួនាទីទាំងនេះ សម្រាប់បងប្អូនយ៉ាងដូចម្ដេច ? សូមពិចារណាពីអ្វីដែលបងប្អូនអាចធ្វើបាន ដើម្បីធ្វើឲ្យឥទ្ធិពលរបស់ទ្រង់កាន់តែមានខ្លាំងឡើងនៅក្នុងជីវិតរបស់បងប្អូន ?

សូមមើលផងដែរ នីហ្វៃទី៣ ១៩:៩; ២៧:២០; គោលលទ្ធិ និង សេចក្ដីសញ្ញា ១១:១២–១៤; ម៉ូសេ ៦:៦១; មីឈែល ឌី ក្រេហ្គ « Spiritual Capacity » Liahona ខែ វិច្ឆិកា ឆ្នាំ ២០១៩ ទំព័រ ១៩–២១ ។

យ៉ូហាន ១៥:១–៨

នៅពេលខ្ញុំនៅជាប់នឹងព្រះគ្រីស្ទ ខ្ញុំនឹងផ្ដល់ផលផ្លែល្អ ។

តើបងប្អូនគិតថា វាមានន័យយ៉ាងណាដើម្បី « នៅជាប់នឹង [ ព្រះគ្រីស្ទ ] » ? ( យ៉ូហាន ១៥:៤ ) ។ តើ « ផលផ្លែ » អ្វីរបស់បងប្អូន ដែលបង្ហាញថា បងប្អូនបាននៅជាប់នឹងគល់ ដែលតំណាងឲ្យព្រះយេស៊ូវគ្រីស្ទនោះ ?

យ៉ូហាន ១៧

ព្រះយេស៊ូវគ្រីស្ទជាអង្គបង្រួបបង្រួមសម្រាប់ពួកសិស្សរបស់ទ្រង់ ។

ព្រះបន្ទូលរបស់ព្រះយេស៊ូវបានកត់ត្រានៅក្នុង យ៉ូហាន ១៧ ត្រូវបានស្គាល់ថាជាការអធិស្ឋានអង្វរក ។ នៅក្នុងការអធិស្ឋាននេះ ព្រះយេស៊ូវកំពុងអធិស្ឋានសម្រាប់ពួកសាវករបស់ទ្រង់ និង « ទាំងអ្នកណាដែលនឹងជឿដល់ [ ទ្រង់ ] ដោយសារពាក្យរបស់គេថែមទៀតដែរ » ( យ៉ូហាន ១៧:២០ ) ។ នោះមានន័យថា ទ្រង់កំពុងអធិស្ឋានសម្រាប់បងប្អូន ។ តើព្រះយេស៊ូវស្នើរសុំអ្វីខ្លះមកពីព្រះបិតារបស់ទ្រង់ជួសឲ្យបងប្អូន និងអស់អ្នកដែលជឿដទៃទៀត ? តើការណ៍នេះបង្រៀនអ្វីដល់បងប្អូនអំពីព្រះទ័យរបស់ទ្រង់ចំពោះបងប្អូន ?

ការអធិស្ឋាននេះក៏បង្រៀនពីសេចក្ដីពិតដ៏អស្ចារ្យអស់កល្បជានិច្ចផងដែរ ។ តើបងប្អូនរកឃើញសេចក្ដីពិតអ្វីខ្លះ ? នៅពេលបងប្អូនអានជំពូកនេះ សូមពិចារណាកត់ត្រាពីអ្វីដែលបងប្អូនរៀនអំពីចំណុចដូចខាងក្រោម ៖

ការអធិស្ឋាន
ទំនាក់ទំនងរបស់ព្រះយេស៊ូវគ្រីស្ទជាមួយនឹងព្រះវរបិតាទ្រង់
ទំនាក់ទំនងរបស់ព្រះអង្គសង្គ្រោះជាមួយនឹងពួកសិស្សរបស់ទ្រង់
របៀបដែលពួកសិស្សត្រូវខុសពីលោកិយ
សេចក្ដីពិតផ្សេងទៀតដែលលេចធ្លោចំពោះបងប្អូន

យ៉ូហាន ១៧:១១, ២១–២៣

ព្រះវរបិតាសួគ៌ និងព្រះយេស៊ូវគ្រីស្ទមានភាពរួបរួមដ៏ឥតខ្ចោះ ។

នៅក្នុងការអធិស្ឋានរបស់ទ្រង់នៅក្នុង យ៉ូហាន ១៧ ព្រះយេស៊ូវបានសង្កត់ធ្ងន់លើភាពរួបរួមរបស់ទ្រង់ជាមួយនឹងព្រះវរបិតា ។ តើព្រះវរបិតា និងព្រះរាជបុត្រាតែ « មួយ » តាមរបៀបណា ? ( យ៉ូហាន ១៧:១១, ២១–២៣ ) ។ សូមកត់សម្គាល់ថា ព្រះអង្គសង្គ្រោះបានអធិស្ឋានសុំឲ្យពួកសិស្សរបស់ទ្រង់ក្លាយជាតែមួយ « ដូចជា »—ឬតាមរបៀបដូចគ្នានឹង—ទ្រង់ និងព្រះបិតាទ្រង់គឺតែមួយ ( យ៉ូហាន ១៧:២២ ) ។ តើការណ៍នេះមានអត្ថន័យយ៉ាងណាចំពោះបងប្អូន ? សូមគិតអំពីទំនាក់ទំនងរបស់បងប្អូន—ឧទាហរណ៍ ជាមួយស្វាមី ឬភរិយា ឬសមាជិកគ្រួសារផ្សេងៗទៀតរបស់បងប្អូន ជាមួយសមាជិកវួដ និងជាមួយពួកគ្រិស្តសាសនិកដូចគ្នា ។ តើបងប្អូនអាចខិតខំឆ្ពោះទៅកាន់ការរួបរួម ដែលព្រះយេស៊ូវមានជាមួយនឹងព្រះវរបិតាយ៉ាងដូចម្ដេច ?

សូមមើលផងដែរ ឃ្វីនថិន អិល ឃុក « Hearts Knit in Righteousness and Unity » Liahona ខែ វិច្ឆិកា ឆ្នាំ ២០២០ ទំព័រ ១៨–២២; សារ៉ុន អូប៊ែង « By Union of Feeling We Obtain Power with God » Liahona ខែ វិច្ឆិកា ឆ្នាំ ២០២០ ទំព័រ ៥៥–៥៧ ។

គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្រុមគ្រួសារ

យ៉ូហាន ១៤:៥–៦ ។សមាជិកគ្រួសារអាចរីករាយនឹងការប្ដូរវេនគ្នាដឹកនាំគ្រួសារដើរតាមផ្លូវមួយ ។ តើព្រះយេស៊ូវគឺជា « ផ្លូវ » ដោយរបៀបណា ? តើទ្រង់ដឹកនាំយើងទៅណា ?

យ៉ូហាន ១៤:២៦–២៧ ។តើសេចក្ដីសុខសាន្តរបស់ព្រះយេស៊ូវខុសគ្នាពីប្រភេទដែល « លោកិយឲ្យ » យ៉ាងដូចម្ដេច ? សមាជិកគ្រួសារអាចចែកចាយវិធីទាំងឡាយ ដែលពួកគេបានរកឃើញសេចក្ដីសុខសាន្ត និងការលួងលោមតាមរយៈព្រះវិញ្ញាណបរិសុទ្ធ ។

យ៉ូហាន ១៥:១–៨ ។វាអាចនឹងជាការសប្បាយដើម្បីអានខគម្ពីរទាំងនេះនៅខាងក្រៅនៅជិតនឹងដើមទំពាំងបាយជូរ ដើមឈើមួយ ឬដើមឈើផ្សេងទៀត ។ តើមានអ្វីកើតឡើងចំពោះខ្នែងមួយ នៅពេលវាត្រូវបានកាត់ចេញពីដើមនោះ ? បងប្អូនអាចនិយាយថាតើយើងដូចជាខ្នែងយ៉ាងដូចម្ដេច និងអត្ថន័យនៃការ « នៅជាប់ » នឹងព្រះអង្គសង្គ្រោះ និង « បង្កើតផល » ។

យ៉ូហាន ១៥:១៧–២៧; ១៦:១–៧ ។ហេតុអ្វីបងប្អូនគិតថា ព្រះយេស៊ូវគ្រីស្ទព្រមានដល់ពួកសិស្សរបស់ទ្រង់អំពីការបៀតបៀន ? តើពួកសិស្សរបស់ព្រះគ្រីស្ទត្រូវបានបៀតបៀននៅសព្វថ្ងៃនេះយ៉ាងដូចម្ដេចខ្លះ ? តើដំបូន្មានរបស់ព្រះអង្គសង្គ្រោះនៅក្នុងខគម្ពីរទាំងនេះអាចជួយដល់យើងយ៉ាងដូចម្ដេច នៅពេលយើងប្រឈមនឹងការបៀតបៀន ?

យ៉ូហាន ១៦:៣៣ ។តើព្រះយ៉េស៊ូវគ្រីស្ទយកឈ្នះលើលោកិយយ៉ាងដូចម្ដេច ? តើដង្វាយធួនរបស់ទ្រង់នាំមកនូវភាពសុខសាន្ត និងក្ដីសង្ឃឹមឡើងយ៉ាងដូចម្ដេច ? ( សូមមើលផងដែរ គោលលទ្ធិ និង សេចក្ដីសញ្ញា ៦៨:៦ ) ។

យ៉ូហាន ១៧:២១–២៣ ។តើអ្វីខ្លះដែលនឹងជួយគ្រួសារបងប្អូនឲ្យរៀនពីរបៀបរួបរួមគ្នាកាន់តែខ្លាំងឡើង ដូចជាព្រះយេស៊ូវគ្រីស្ទ និងព្រះវរបិតាសួគ៌ ? ប្រហែលជាបងប្អូនអាចនិយាយអំពីក្រុមកីឡាដែលចូលចិត្តមួយ និងរបៀបដែលពួកគេធ្វើការរួមគ្នាដើម្បីឆ្ពោះទៅកាន់គោលដៅដូចគ្នាមួយ ។ ឬបងប្អូនអាចស្ដាប់ក្រុមចម្រៀង ឬក្រុមតន្ត្រីមួយ ហើយពិភាក្សាពីរបៀបដែលតន្ត្រីកររួបរួមគ្នាដើម្បីបង្កើតជាតន្ត្រីដ៏ពិរោះ ។

សម្រាប់គំនិតបន្ថែមសម្រាប់ការបង្រៀនដល់កុមារ សូមមើល គម្រោងមេរៀនសប្ដាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់អង្គការបឋមសិក្សា ។

ចម្រៀងដែលលើកទឹកចិត្តឲ្យប្រើ ៖ « ព្រះវិញ្ញាណបរិសុទ្ធ » សៀវភៅចម្រៀងកុមារ ទំព័រ ៥៦ ។

ការកែលម្អការបង្រៀនរបស់យើង

ប្រើការថតជាសំឡេង ។ នៅពេលបងប្អូនបង្រៀនគ្រួសាររបស់បងប្អូនអំពីបទគម្ពីរនានា សូមពិចារណាធ្វើការស្ដាប់ព្រះគម្ពីរជាសំឡេង ដែលមាននៅលើគេហទំព័រ ChurchofJesusChrist.org ឬនៅក្នុងកម្មវិធីបណ្ណាល័យដំណឹងល្អ ។ ការស្ដាប់ យ៉ូហាន ១៤–១៧ អាចមានអានុភាពជាពិសេស ដោយសារជំពូកទាំងនេះមាននូវព្រះបន្ទូលរបស់ព្រះអង្គសង្គ្រោះជាច្រើន ។

ផ្លែទំពាំងបាយជូរនៅលើដើម — ទ្រង់បានបង្រៀនថា « ខ្ញុំជាគល់ អ្នករាល់គ្នាជាខ្នែង » ( យ៉ូហាន ១៥:៥ ) ។