UYesu uthetha noPetros ngaselunxwemeni

Feed My Sheep, nguKamille Corry [Dlisa Izimvu Zam]

EyeSilimela 26–EyeKhala 2

Mateyu 28; Marko 16; Luka 24; Yohane 20–21

“UVukile”

Funda ngokuthandaza Mateyu 28; Marko 16; Luka 24; noYohane 20–21, uqwalasele kuvuyo onalo ngenxa yoVuko lukaKrestu. Ngubani onokusikeleleka ngokuva ubungqina bakho besi siganeko?

Bhala Iimvakalelo Zakho

Kubabukeli abaninzi, ukufa kukaYesu waseNazarete kwakunokubonakala ngathi sisiphelo esiyimpoxo sobomi obubalaseleyo. Ingaba le yayingeyiyo indoda eyayivuse uLazaro ekufeni? Ingaba Yena wayengamelananga nezigrogriso ezazivela kubaFarasi ngokuphinda-phindeneyo? Yena wayebonise amandla okuphilisa ubumfana, iqhenqa, nedumbe. Imimoya neelwandle zazimthobela Yena. Kwaye kanti Yena wayelapha, ejinga emnqamlezweni, ebhengeza, “Kugqityiwe” (Yohane 19:30). Kusenokwenzeka ukuba kwakukho isimangaliso esinyanisekileyo esithile emazwini entlekisa awathi “Abanye wabasindisa, yena ngokwakhe akanakuzisindisa” (Mateyu 27:42). Kodwa thina siyazi ukuba ukufa kukaYesu kwakungesiso isiphelo sebali. Siyazi ukuba inzolo yengcwaba yayiyeyexeshana kwaye umsebenzi osindisayo kaKrestu wawusaqala nje. Yena uyafumaneka namhlanje hayi “phakathi kwabafileyo” kodwa phakathi kwabaphilayo (Luka 24:5). Iimfundiso zakhe zazingenako ukuthuliswa, kuba abafundi baKhe abathembekileyo babeya kushumayela ivangeli kuzo “zonke iintlanga,” bethembele kwisithembiso saKhe sokokuba Yena wayeya “kuba [nabo] yonke imihla, kude kube sekuphelisweni kwephakade eli” (Mateyu 28:19–20).

umfanekiso wokuzifundela wedwa

Iingcebiso Zokuzifundela Izibhalo Wedwa

Mateyu 28; Marko 16; Luka 24; Yohane 20

UYesu Krestu wavuka ekufeni.

Kule mihlathi, uya kufunda ngesinye seziganeko esibaluleke kakhulu kwimbali yoluntu: uVuko lukaYesu Krestu. Njengoko ufunda, zifake endaweni yabantu ababebona iziganeko ezingqonge uVuko. Yintoni oyifunda kumava wabo?

Ingaba wena uziva njani njengoko ufunda ngoVuko loMsindisi? Cinga ukuba lukuchaphazele njani wena—inkangelo yakho ebomini, ubudlelwane bakho, ukholo lwakho kuKrestu, nokholo lwakho kwezinye iinyaniso zevangeli.

Bona kananjalo IsiKhokelo kwiZibhalo, “UVuko”.

Luka 24:13–35

Ndingamema uMsindisi ukuba “ahlale [nam].”

Njengoko ufunda ngamava wabafundi ababini ababehamba-hamba abathi badibana noMsindisi ovukileyo kwabafileyo, khangela izinto ezinxusene namava wakho njengomlandeli kaKrestu. Ungahamba kanjani naYe namhlanje kwaye ummeme Yena ukuba “ahlale” okwexeshana? (Luka 24:29). Ububona njani ubukho baKhe ebomini bakho? Kungeziphi iindlela uMoya oyiNgcwele othe wangqina ngazo kuwe ngobuthixo bukaYesu Krestu?

Luka 24:36–43; Yohane 20

Uvuko kwabafileyo lukukuhlanganiswa komoya nomzimba ngokwesigxina.

Iingxelo zoVuko lukaYesu Krestu zinokukunceda uqonde ukuba kuthetha ukuthini ukuvuswa kwabafileyo. Umzekelo, ziinyaniso zini ozifumana kuLuka 24:36–43 noYohane 20 ezimalunga nemizimba evukileyo kwabafileyo? Usenokuhlola ezinye izibhalo ezingcwele ezimalunga novuko, ezinjenga 1 AbaseKorinte 15:35–44; AbaseFilipi 3:20–21; 3 Nifayi 11:13–15; IMfundiso neMinqophiso 88:27–31; 110:2–3; 130:1, 22.

Yohane 20:19–29

“Banoyolo abo bangabonanga, bakholwa noko.”

Abanye abantu baziva njengoTomas, abathi, “Ukuba andithanga ndibone … , andisayi kukholwa” (Yohane 20:25). Ngokoluvo lwakho, kutheni ukukholwa ngaphandle kokubona kuba yintsikelelo? (bona Yohane 20:29). Cinga nzulu ngendlela othe wasikelelwa ngayo ngenxa yokukholelwa ezintweni ongaziboniyo. Yintoni ekunceda ubenokholo kuMsindisi naxa ungenako ukumbona? Ungaqhubeka njani usomeleza ukholo lwakho “kwizinto ezingabonwayo, eziyinyani”? (bona Alma 32:16–21; Etere 12:6). Cinga ngokubhala amava kwincwadana yembali awathe akunceda ukholelwe kuYesu Krestu, okanye wabelane ngawo nomnye umntu omaziyo.

Yohane 21:1–17

UMsindisi undimema ukuba ndondle izimvu zaKhe.

Kusenokunikisa umdla ukuthelekisa intsebenziswano yoMsindisi nabaPostile baKhe kuYohane 21 kwixesha lokuqala apho wayebaxelela ukuba bohlise iminatha yabo yokuloba, eshicilelwe kuLuka 5:1–11. Zeziphi izinto ezifanayo nezahlukeneyo ozifumanayo? Zeziphi iingqiqo ngobufundi ozifumanayo?

Cinga ngokuba amazwi woMsindisi kuPetros awakuYohane 21:15–17 ebenokusebenza njani kuwe. Ingaba kukhona nantoni na ekuthintela ekubeni ulungiselele izimvu zeNkosi? Ibiza kuthini impendulo yakho ukuba iNkosi ibinokubuza, “Uyandithanda na?” Cinga nzulu ngendlela onokubonisa ngayo uthando lwakho eNkosini.

Bona kananjalo 1 Petros 5:2–4, 8.

umfanekiso wofundo losapho

Iingcebiso Zofundo Lwezibhalo Ezingcwele Zosapho noMhlangano Wangorhatya Wosapho

Luka 24:5–6.UMongameli uThomas S. Monson wathi ngoLuka 24:5–6, “Akukho mazwi kwiZibhalo zamaKrestu awanentsingiselo kum ngakumbi” (“He Is Risen!,” Liyahona, Canzibe 2010, 89). Athetha ukuthini la mazwi kuwe nosapho lwakho?

Mateyu 28; Marko 16; Luka 24; Yohane 20–21.Njengoko usapho lwakho lufunda ezi zahluko, phawula abantu ababesebenzisana noYesu kwingxelo nganye. Umzekelo, yintoni ekuchukumisayo malunga nabantu ababetyelele ingcwaba loMsindisi? Yintoni oyifunda emazwini okanye kwizenzo zabaPostile okanye zabafundi ababesendleleni eya e-Emawusi?

Thethani ngomntu othile usapho lwakho olumaziyo othe wasweleka, kwaye nixoxe ngokuba iinyaniso ezikwezi zahluko ziyizisa njani intuthuzelo.

UYesu uhamba namadoda amabini endleleni

Road to Emmaus (Indlela eya e-Emawusi), nguWendy Keller

Mateyu 28:16–20; Marko 16:14–20; Luka 24:44–53.Kule miqolo, yintoni uYesu awayeyicela abaPostile baKhe ukuba bayenze? Thina singanceda kanjani ekuphumezeni lo msebenzi? Amalungu osapho angabelana ngamava apho xa wayeve “iNkosi isebenza nawo” ukuphumeza iinjongo zaYo (Marko 16:20).

Yohane 21:15–17.Cinga ngokufunda le miqolo xeshikweni nisitya kunye. Oku kungongeza intsingiselo ethile emazwini woMsindisi “dlisa izimvu zam.” Koko kwakufundiswa nguYesu malunga nezimvu kwiTestamente eNtsha (bona, ngokomzekelo, Mateyu 9:35–36; 10:5–6; 25:31–46; Luka 15:4–7; Yohane 10:1–16), kutheni ukondla izimvu kuyeyona ndlela elungileyo yokuchaza ukunceda abantwana bakaThixo? Yintoni le mfaniso eyifundisayo ngendlela uBawo waseZulwini noYesu Krestu abaziva ngayo ngathi?

Ngeengcebiso ezithe vetshe malunga nokufundisa abantwana, bona isishwankathelo sale veki kwi-Come, Follow Me—For Primary.

Ukuphucula Ukuzifundela Izibhalo Wedwa

Sebenzisa umculo ukumema uMoya kwaye ufunde imfundiso. Ukumamela umculo okanye ukucula iingoma ezimalunga noMsindisi zingamema uMoya kwaye kukuncede ufunde ngaYe.

Umfazi ebona uKrestu ovukileyo kwabafileyo ngasengcwabeni

The Resurrected Christ, nguWalter Rane [UKrestu Ovukileyo Kwabafileyo]