e rave rahi ta’ata i te hiti ’ānāvai ’e ’o tē bāpetizohia ra i roto i te ’ānāvai

Day of Pentecost [Mahana nō te Penetetōte], nā Sidney King

3–9 nō Tiurai

Te ’Ohipa 1–5

« ’Ei ’ite ho’i ’outou nō’u »

’A tuatāpapa ai ’outou i te Te ’Ohipa 1–5, e nehenehe te Vārua Maita’i e fa’auru ia ’outou nō te ’ite mai i te mau parau mau e tano i tō ’outou orara’a. E tāpa’o i te mau ’īrava ’ua tae mai te tahi mana’o ta’a ’ē, ’e e hi’o i te mau taime e tano ’ia fa’a’ite atu i te reira.

Pāpa’i i te mau mana’o e tae mai

’Aita a’enei ’outou i feruri e aha tā Petero i feruri ’e i mana’o i te « ti’atonu-māite-ra’a [rātou te mau ’āpōsetolo] i ni’a i te ra’i » ’a haere ai Iesu i tōna ra Metua ? (Te ’Ohipa 1:10). Te ’Ēkālesia tā te Tamaiti a te Atua i ha’amau, tei roto ïa i teienei i te rima o Petero. Te hōpoi’a « e haere […] e fa’ariro i te mau fenua ato’a ’ei pipi », tei ni’a atu ra ïa ia Petero (Mataio 28:19). ’Ua mana’o ānei ’oia ē, ’aita terā pi’ira’a i tano nōna, ’aore rā ’ua taiā ānei ’oia, ’aita ïa e fa’a’itera’a i roto i te buka nō Te ’Ohipa. Te mea e ’itehia ra, e mau ’itera’a pāpū mata’u ’ore ïa ’e te mau fa’afāriura’a, te mau fa’aorara’a temeio rahi, te mau fa’a’itera’a pae vārua ’e te tupura’a rahi o te ’Ēkālesia. ’O te ’Ēkālesia noa iho ā a te Fa’aora, arata’i-noa-hia iho ā e ana. E ti’a roa ’ia parauhia te buka nō Te ’Ohipa a te mau ’āpōsetolo, Te ’Ohipa a Iesu Mesia nā roto i tāna mau ’āpōsetolo. Arata’ihia e te mani’ira’a rahi pae vārua, e ’ere fa’ahou ’o Petero i te ta’ata tāi’a ’e te ma’ua tā Iesu i fārerei i te pae tahatai nō te roto nō Galilea. E ’ere fa’ahou ato’a ’oia i terā ta’ata pe’ape’a, ma’a hepetoma nā mua atu, tei maramara ’e tei ta’i i te hunara’a ē, ’ua mātau ’oia ia Iesu nō Nazareta.

I roto i te buka nō Te ’Ohipa, e tai’o ’outou i te mau parau pūai rahi nō ni’a ia Iesu Mesia ’e tāna ’evanelia. E ’ite ato’a ’outou nāhea te reira ’evanelia e taui ai i te ta’ata—mai ia ’outou ato’a—’ei pipi itoito tā te Atua i ’ite e nehenehe rātou e riro mai.

ītona tuatāpapara’a a te ta’ata hō’ē

Mau mana’o nō tā’u iho tuatāpapara’a pāpa’ira’a mo’a

Te ’Ohipa 1:1–8, 15–26 ; 2:1–42 ; 4:1–13, 31–33

Tē fa’atere nei Iesu Mesia i tāna ’Ēkālesia nā roto i te Vārua Maita’i.

Tē fa’ati’a nei te buka nō Te ’Ohipa nō ni’a i te mau tauto’ora’a a te mau ’āpōsetolo nō te fa’ati’ara’a i te ’Ēkālesia a Iesu Mesia i muri iho i tōna revara’a i ni’a i te ra’i. Noa atu ā ’aita fa’ahou Iesu Mesia i ni’a i te fenua nei, ’ua arata’i ’oia i te ’Ēkālesia nā roto i te heheura’a, nā roto i te Vārua Maita’i. E hi’o ’ua nāhea te Vārua Maita’i i te arata’ira’a i teie nau feiā fa’atere ’āpī nō te ’Ēkālesia a te Mesia ’a tai’o ai ’oe i te mau tuha’a i muri nei : Te ’Ohipa 1:1–8, 15–26 ; 2:1–42 ; 4:1–13, 31–33.

’Ei melo nō te Ēkālesia a te Mesia i teie mahana, e hōpoi’a nā tātou tāta’itahi te ’āmuira’a i roto i te ’ohipa nō te fa’aorara’a ’e te fa’ateiteira’a—te orara’a i te ’evanelia a Iesu Mesia, te aupurura’a i te feiā e hina’aro ta’a ’ē tō rātou, te anira’a i te ta’ata ’ia haere mai i te Mesia ra, ’e te tāhō’ēra’a i te mau ’utuāfare nō te tau a muri atu (hi’o Buka arata’i rahi, 1.2). E aha te ha’api’ira’a tā ’oe e ’apo nei mai roto mai i teie mau ’āpōsetolo mātāmua, nō ni’a i te huru ’oe e nehenehe ai e tūru’i i ni’a i te Vārua Maita’i nō te arata’ira’a i tā ’oe mau tauto’ora’a ?

Hi’o ato’a Arata’i nō te mau pāpa’ira’a mo’a, « Vārua Maita’i. »

Te ’Ohipa 2:36–47 ; 3:12–21

Tē tauturu nei te mau parau tumu ’e te mau ’ōro’a o te ’evanelia iā’u ’ia haere i te Mesia.

’Ua « putapū [a’enei tō ’oe] ’ā’au », mai te mau ’āti Iuda ra i te Penetekōte ? (Te ’Ohipa 2:37). Pēnei a’e ’ua rave ’oe i te hō’ē mea tā ’oe e tātarahapa ra, ’aore rā ’ua hina’aro noa ’oe e taui i tō ’oe orara’a. E aha tē rave ’ia tae ana’e mai teie mau mana’o ? Tei roto te parau a’o a Petero i te mau ’āti Iuda ra i Te ’Ohipa 2:38. E hi’o maita’i na e aha tei tupu i ni’a i teie nau feiā fa’afāriu maoti te mau parau tumu ’e te mau ’ōro’a mātāmua o te ’evanelia (mai te fa’aro’o, te tātarahapara’a, te bāpetizora’a ’e te hōro’a nō te Vārua Maita’i—’oia ho’i tei parau-ato’a-hia te ha’api’ira’a tumu a te Mesia), i roto i Te ’Ohipa 2:37–47.

’Ua bāpetizo-a’ena-hia paha ’oe ’e ’ua fāri’i a’ena i te hōro’a nō te Vārua Maita’i, e nāhea ïa ’oe i te tāmau i te fa’a’ohipa i te ha’api’ira’a tumu a te Mesia ? E hi’o na i teie mau parau a Elder Dale G. Renlund : « E riro tātou i te maita’i roa mai nā roto i […] te fa’a’ohipara’a i te fa’aro’o [i te Mesia], te tātarahapara’a ; te ravera’a i te ’ōro’a nō te fa’a’āpī i te mau fafaura’a ’e te mau ha’amaita’ira’a o te bāpetizora’a ’e te fāri’ira’a i te Vārua Maita’i ’ei hoa tāmau i te hō’ē fāito teitei a’e. ’E ’a rave ai tātou i te reira, e riro rahi mai tātou mai te Mesia ra te huru ’e e ti’a atu ra ia tātou ’ia fa’a’oroma’i ē tae noa atu i te hope’a, noa atu te tītaura’a ato’a » (« E tāmau noa te Feiā Mo’a i te mau Mahana Hope’a nei i te tāmata », Liahona, Mē 2015, 56).

Te ’Ohipa 3:19–21

E aha « te ’anotau haumārū » ’e « te tau e ti’a ai te mau mea ato’a nei » ?

« Te ’anotau haumārū », ’o te Mileniuma ïa, te tau e ho’i mai ai Iesu Mesia i ni’a i te fenua nei. « Te tau nō te fa’aho’i-fa’ahou-ra’a i te mau mea ato’a » o te Fa’aho’i-fa’ahou-ra’a ïa o te ’evanelia, ’o tē fa’aineine i te ao nei nō te Mileniuma.

Te ’Ohipa 3 ; 4:1–31 ; 5:12–42

’Ua hōro’ahia i te mau pipi a Iesu Mesia te mana nō te rave i te mau temeio nā ni’a i tōna i’oa.

’Ua tīa’i te ta’ata piri’o’i ’ia fāri’i i te moni mai roto mai i te feiā e haere mai i te hiero. E mea hau atu rā tā te mau tāvini a te Fatu i hōro’a iāna. ’Ia tai’o ’oe i Te ’Ohipa 3 ; 4:1–31 ’e te 5:12–42, ’a feruri e aha tā te semeio i fa’atupu i ni’a i teie mau ta’ata :

• Te ta’ata piri’o’i

• Petero ’e Ioane

• Te mau ta’ata i te hiero tei ’ite i te reira

• Te mau tahu’a rahi ’e te feiā fa’atere

• Te tahi atu feiā mo’a

tē fa’aora ra Petero i te hō’ē ta’ata

Such as I Have I Give Thee [Mai tā’u i hōro’a iā ’oe], nā Walter Rane

ītona tuatāpapara’a a te ’utuāfare

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

Te ’Ohipa 1:21–26.E nehenehe te tai’ora’a i Te ’Ohipa 1:21–26 e tauturu i tō ’outou ’utuāfare ’ia ’āparau nō ni’a i te mau ha’amaita’ira’a e tae mai nō te vaira’a te mau ’āpōsetolo i ni’a i te fenua nei. E nehenehe te mau melo o te ’utuāfare e fa’a’ite mai ’ua nāhea rātou i te noa’ara’a te ’ite pāpū ē, te mau ’āpōsetolo ’e te mau ’āpōsetolo i teie mahana, ’ua pi’ihia ïa e te Atua. Nō te aha e mea faufa’a teie ’itera’a ?

Te ’Ohipa 2:37.E aha te aura’a nō te parau ra « putapū atu ra tō rātou ’ā’au » ? I nāfea ra te reira i te tupura’a nō tātou ? Nō te aha e mea faufa’a ’ia parau « e aha tātou nei ? » ’ia tae mai taua mau mana’o ra ?

Te ’Ohipa 3:1–10.E au paha tō ’outou ’utuāfare ’ia ha’uti ta’ata ora i te ’ā’amu i roto i teie mau ’īrava. E nehenehe atoʼa tā ʼoutou e māta’ita’i i te video « Peter and John Heal a Man Crippled Since Birth [ʼUa faʼaora Petero ʼe ’o Ioane i te hōʼē taʼata piri’o’i mai tōna fānauraʼahia] » (ChurchofJesusChrist.org). E aha te ta’a-’ē-ra’a i roto i te ha’amaita’ira’a tā te ta’ata i te hiero i fāri’i ’e te mea tāna i tīa’i ? E aha te mau ha’amaita’ira’a tīa’i-’ore-hia a te Metua i te ao ra tā tātou i ’ite i te taera’a mai ia tātou ?

Te ’Ohipa 3:12–26 ; 4:1–21 ; 5:12–42.E aha tā ’outou e fa’ahiahia nei i te ha’apa’o maita’i o Petero ’e Ioane ? (hi’o ato’a i te video « Peter Preaches and Is Arrested [Tē poro ra Petero ’e ’ua tāpe’ahia] » i ni’a ia ChurchofJesusChrist.org). Nāhea tātou e itoito ai i roto i tō tātou ’itera’a pāpū nō Iesu Mesia ? E nehenehe e tauturu i te mau tamari’i ’āpī ’ia ha’api’ipi’i i te fa’a’itera’a i tō rātou ’itera’a pāpū.

Te ’Ohipa 4:31–5:4.Nāhea tātou e tauturu ai i tō tātou ’utuāfare, te pāroita ’aore rā te huira’atira, ’ia riro rahi atu ā mai tei fa’a’itehia nei i roto i Te ’Ohipa 4:31–37 ? E aha te aura’a te parau « hō’ē atu ra ’ā’au ’e hō’ē ho’i [vairua] » ? E aha tā tātou e rave nei i te tahi taime ’o tē « huna […] i te hō’ē pae » o tā tātou tauturura’a ? Nō te aha e nehenehe e parau ē e « [ha’avarera’a te reira i] te Atua] » ? (Te ’Ohipa 5:2, 4). E nāhea te ha’avarera’a i te ha’amāuiui ia tātou i te pae vārua ?

Nō te mau mana’o hau atu nō te ha’api’ira’a i te mau tamari’i, ’a hi’o te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Hīmene tei mana’ohia : « Nā te Vārua Mo’a e arata’i », Te mau hīmene, N°143.

Ha’amaita’i i tā tātou ha’api’ira’a

Mā’iti i te hō’ē tumu parau. E fa’a’ohu te mau melo o te ’utuāfare nō te mā’iti i te hō’ē tumu parau i roto i Te ’Ohipa 1–5 ’e tuatāpapa ’āmui atu ai.

Mau ’āpōsetolo ’e e piti melahi e toro ra i te rima i ni’a

The Ascension [Te pe’era’a i ni’a i te ra’i], nā Harry Anderson