Day of Pentecost [Mahana nō te Penetetōte], nā Sidney King

3–9 nō Tiurai

Te ’Ohipa 1–5

« ʼEi ʼite ho’i ’outou nō’u »

E haʼamata i tā ’oe faʼaineineraʼa nā roto i te taiʼoraʼa i Te ’Ohipa 1–5. E ’imi nā roto i te pure ’ia ’ite i te mau hina’aro o te mau tamari’i tā ’oe e haʼapiʼi nei. E nehenehe te Mai, pe’e mai—nō te ta’ata hō’ē ’e te ’utuāfare ’e teie arata’i ha’api’ira’a e tauturu ia ’oe.

Tītau i te mana’o

E pāpaʼi ’O vai au ? i niʼa i te ʼiri pāpaʼiraʼa. E hōroʼa i te tahi mau faʼahitiraʼa parau e rave rahi nō niʼa ia Petero ʼe e ani i te mau tamariʼi ē, nō vai teie mau faʼahitiraʼa parau. E aha atu ā tā rātou i ʼite nō niʼa ia Petero ?

Ha’api’i i te ha’api’ira’a tumu : Te mau tamari’i ’āpī

Te ’Ohipa 1:1–11

Tē arataʼi nei Iesu Mesia i tāna ’Ēkālesia nā roto i te mau peropheta ’e te mau ’āpōsetolo.

Te ’itera’a ē ’ua nā roto te Faʼaora i te mau ʼāpōsetolo i te arataʼiraʼa i tāna ʼĒkālesia i mutaʼa ihora, e nehenehe ïa te reira e tauturu i te mau tamariʼi ’ia noaʼa te ʼiteraʼa pāpū nō niʼa i te mau peropheta ʼe te mau ʼāpōsetolo i tō tātou nei ’anotau.

Te mau ’ātivite e au

• E fa’a’ite i te hōho’a rahi o te arata’i ha’api’ira’a nō teie hepetoma i roto i te Mai, pe’e mai—nō te ta’ata hō’ē ’e te ’utuāfare. E ani i te mau tamariʼi nō te aha te mau taʼata e hiʼo nei i niʼa i te raʼi. E haʼapoto i te ʼāʼamu i roto i Te ’Ohipa 1:1–11. (E hi’o ato’a « Pene 55 : Te arataʼi nei te mau ʼāpōsetolo i te ʼĒkālesia », i roto i Te mau ’ā’amu o te Faufa’a ’Āpī145–47, ’aore rā te video e tano i ni’a i te ChurchofJesusChrist.org.) E ani i te hō’ē tamari’i ’ia fa’a’ite i te hōho’a nō te mau ’āpōsetolo i teienei. ʼO vai tē arataʼi i te ʼĒkālesia ’ia ʼore anaʼe te Mesia i niʼa i te fenua nei ?

• E haʼuti i te ha’uti faʼatano tāreta ma te hōhoʼa o te Peresideniraʼa Mātāmua ʼe o te tino ʼAhuru ma Piti ʼāpōsetolo e ora nei. ʼIa ʼite-anaʼe-hia e piti tāreta tano, ’a faʼaʼite i te iʼoa o te ʼāpōsetolo ʼaore rā o te peresideni ʼe ’a parau i te tahi mea nō niʼa iāna.

• I muri mai i te hō’ē hōho’a nō te Peresideni o te ’Ēkālesia, e tāpiri i te hōho’a na’ina’i nō te mau mea tāna e ha’api’i nei, mai te hōho’a nō te Fa’aora, te bāpetizora’a, ’aore rā te hiero. ’Ia rave te tamariʼi tātaʼitahi i te taime nō te hiʼo i te hōʼē o te mau hōhoʼa ʼe ’ia parau atu i te toeʼa o te mau pīahi, « Tē haʼapiʼi mai nei te peropheta ia tātou nō niʼa i [te tumu parau i niʼa i te hōhoʼa]. » ’A fa’a’ite pāpū ē, tē ha’api’i mai nei te mau peropheta ’e te mau ’āpōsetolo ia tātou i te mea tā Iesu e hina’aro ia tātou ’ia ’ite ’e ’ia rave.

Te ’Ohipa 3:1–10

E nehenehe tā tō tātou Metua i te ao ra e haʼamaitaʼi ia vetahi ʼē nā roto atu iāʼu.

E aha tā ’oe e rave nō te tauturu i te mau tamariʼi ’ia ʼite i te mau rāveʼa e nehenehe ai rātou ’ia haʼamaitaʼi i te mau taʼata ’āti a’e ia rātou ? E tauturu ia rātou ’ia haʼapiʼi mai nā roto mai i te hiʼoraʼa o Petero ʼe o Ioane i te faʼaoraraʼa i te taʼata hāpepa.

Te mau ’ātivite e au

•  E ani i te mau tamariʼi ’ia rave i te mau ʼohipa ’o tē tūʼati atu i te ʼāʼamu i roto i Te ’Ohipa 3:1–10, mai te tororaʼa atu i tō rātou rima nō te moni ʼe te ʼōuʼau’a-haere-raʼa ma te ʼoaʼoa. ’Ua nāhea tō tātou Metua i te ao ra i te haʼamaitaʼiraʼa i te taʼata tē ʼore e maraʼa i te haere ?

• E hōpoi mai i te hōʼē pūtē ʼe te mau hōhoʼa ’o tē fa’ahoho’a i te mau rāveʼa e nehenehe ai tātou ’ia haʼamaitaʼi ʼe ’ia tāvini ia vetahi ʼē. E vaiiho i te mau tamariʼi ’ia māʼiti i te mau hōhoʼa, ’ia tae i tō rātou taime, i roto i te pūtē ʼe ’ia faʼaʼite mai e nāhea rātou ’ia haʼamaitaʼi ia vetahi ʼē nā roto i te reira rāveʼa.

• E ani i te mau tamari’i ’ia fa’a’ite mai i te hō’ē taime i tauturu ai rātou i te tahi taʼata.

Te ’Ohipa 5:1–11

E nehenehe au e riro ’ei ta’ata parautiʼa.

’Ua fa’a’ite mai te mau keresetiano mātāmua e aha tei tītauhia ia rātou nō te tauturu ’ia ’atu’atu i te tahi ’e te tahi. Te feiā tei fatu i te fenua ’ua ho’o rātou i te reira ʼe ʼua hōroʼa i te moni i te mau ʼāpōsetolo, ’o tei hōro’a ho’i nā te feiā moʼa tei roto i te hepohepo. ʼUa haʼavare Anania rāua ’o Saphira nō niʼa i tā rāua hōroʼaraʼa, ma te manaʼo ē e nehenehe rāua e haʼavare i te mau tāvini a te Fatu.

Te mau ’ātivite e au

• ’A tauturu i te mau tamariʼi ’ia haʼuti mai i te ʼāʼamu o Anania rāua ’o Saphira. E haʼamāramarama atu ē noa atu eʼita tātou e pohe ’ia haʼavare anaʼe tātou, tē faʼaʼite mai nei rā teie ʼāʼamu i te faufaʼa rahi nō tō tātou Metua i te ao ra ’ia parau tātou i te parau mau.

• E tauturu i te mau tamariʼi ’ia ʼite ē te auraʼa o te parautiʼa ’o te parauraʼa ïa i te mau taime atoʼa i te parau mau ʼe te ’orera’a e rave i tā te tahi atu taʼata.

• ’A faʼaʼohipa i te mau pēpe hurio i hāmanihia i te pūtē pāpie nō te faʼaʼiteʼite i te mau hete ri’i e haʼavare ʼore ai ʼaore rā e haʼavare ai te tahi taʼata. E ani i te mau tamariʼi ’ia tiʼa mai i niʼa ’ia haʼavare ʼore anaʼe te hō’ē ʼaore rā ’ia pārahi i raro ’ia haʼavare anaʼe te tahi. ’A tauturu i te mau tamari’i ’ia hāro’aro’a nō te aha e mea faufa’a ’ia riro ’ei tamari’i parauti’a.

Ha’api’i i te ha’api’ira’a tumu : Te mau tamari’i pa’ari a’e

Te ’Ohipa 1:8, 22–26

Tē arataʼi nei Iesu Mesia i tāna ’Ēkālesia nā roto i te mau peropheta ’e te mau ’āpōsetolo.

E nāhea ’oe ’ia tauturu i te mau tamari’i ’ia hāro’aro’a ē, nā te mau peropheta ’e te mau ’āpōsetolo e arata’i nei i te ’Ēkālesia a te Fa’aora i teie mahana, mai i mutaʼa ihora ?

Te mau ’ātivite e au

• E pāpaʼi i niʼa i te ʼiri pāpaʼiraʼa Tē nāhea ra Iesu Mesia i te arataʼi i te ʼĒkālesia ’ia ’ore anaʼe ʼoia i niʼa i te fenua nei ? E ani i te mau tamariʼi ’ia ʼimi i te mau pāhonoraʼa i te uiraʼa ’a taiʼo ai ’oe i te mau parau a te Faʼaora i te mau ʼāpōsetolo i roto i te Te ’Ohipa 1:8. E tauturu i te mau tamari’i ’ia hāro’aro’a ē, ’ua mā’iti Iesu i te mau peropheta ’e te mau ’āpōsetolo nō te arata’i i te ’Ēkālesia i teie mahana, mai iāna i rave i tahito ra.

• E taiʼo ʼāmui i Te ’Ohipa 1:22–26. ʼEi piha haʼapiʼiraʼa, e hi’o ’ua nāhea te mau ʼāpōsetolo i te piʼira’a i te hōʼē ʼāpōsetolo ʼāpī.

• Nā mua roa, e ani i te hō’ē tamari’i ’e tōna metua ’ia ha’api’i mai nō ni’a i te āpōsetolo tei pi’i-’āpī-hia iho nei (e nehenehe rātou e ’ite i te ha’amāramaramara’a nō ni’a i te mau ’āpōsetolo i « Te pupu nō te Tino ’Ahuru ma Piti ’āpōsetolo », ChurchofJesusChrist.org). E ani i te tamariʼi ’ia faʼaʼite mai i tō te piha haʼapiʼiraʼa te mea tāna i haʼapiʼi mai ʼe mai te mea e nehenehe, te mea tā te ʼāpōsetolo i parau nō niʼa i tōna piʼiraʼa i roto i tāna a’ora’a mātāmua i te ʼāmuiraʼa rahi.

ʼUa arataʼi te mau ʼāpōsetolo i te ʼĒkālesia i muri aʼe i tō te Mesia haereraʼa atu i te raʼi.

Te ’Ohipa 2:36–47

Tē faʼaʼite pāpū nei te Vārua Maitaʼi i tōʼu nei ʼāʼau i te mau parau mau o te ʼevanelia.

’Ia haʼapiʼi anaʼe te mau tamariʼi ’ia ʼite i te Vārua Maitaʼi i te paraparaura’a ia rātou, ʼe faʼauruhia rātou ’ia faʼaroʼo ʼe ’ia rave i te ʼohipa ’ia au i te faʼaururaʼa tā rātou e fāriʼi.

Te mau ’ātivite e au

• E taiʼo ʼāmui i Te ’Ohipa 2:36–37. E aha ïa tō tātou huru ’ia parau anaʼe mai te Vārua Maitaʼi ia tātou i te tahi mea i roto i tō tātou ʼāʼau ?

• ʼEi piha haʼapiʼiraʼa, e hāmani i te hōʼē hōhoʼa pia ma teie mau parau E aha tā tātou e rave ? i niʼa roa. E faʼaʼiteʼite i te hōhoʼa pia i te mau hepetoma atoʼa, ma te tuʼu i te mau rāveʼa e nehenehe ai i te mau tamariʼi ’ia rave i te mea tā rātou i haʼapiʼi mai i roto i te haʼapiʼiraʼa nō te hepetoma tātaʼitahi.

• E ani i te mau tamariʼi ’ia tai’o i Te ’Ohipa 2:41–47 ’e ’ia ʼimi i te mau mea maitaʼi tā te mau taʼata e rave i muri aʼe i tō rātou bāpetizoraʼahia. E aha ïa te mau mea maitaʼi tā tātou e nehenehe e rave nō te faʼaʼite i tō tātou māuruuru nō te hōroʼa o te Vārua Maitaʼi tā tātou i fāriʼi i te taime ’a bāpetizohia ai tātou ?

Te ’Ohipa 3:1–10

E nehenehe tā tō tātou Metua i te ao ra e haʼamaitaʼi ia vetahi ʼē nā roto atu iāʼu.

Nāhea ’oe ’ia haʼapiʼi i te mau tamariʼi ē e nehenehe rātou e haʼamaitaʼi ia vetahi ʼē, noa atu ē, ʼaita tā rātou e « ’ārio ʼe te ’auro » ? (Te ’Ohipa 3:6). Nāhea ’oe ’ia tauturu ia rātou ’ia hiʼo i te mau rāveʼa nō te tāvini i te Atua nā roto i te tāviniraʼa ia vetahi ʼē ? (hi’o Mosia 2:17).

Te mau ’ātivite e au

• E ani i te hōʼē tamariʼi ’ia taiʼo i Te ’Ohipa 3:1–10 ’a haʼuti ai te tahi atu mau tamariʼi i te ʼāʼamu. (ʼEi tautururaʼa, e hi’o ato’a « Pene 56 : Tē faʼaora ra Petero i te hōʼē taʼata », i roto i Te mau ’ā’amu o te Faufa’a ’Āpī,148–49, ’aore rā te video e tano i ni’a i te ChurchofJesusChrist.org.) E fa’a’ite atoʼa ’oe i te video « Peter and John Heal a Man Crippled Since Birth [ʼUa faʼaora Petero ʼe ’o Ionae i te hōʼē taʼata hāpepa mai tōna fānauraʼahia] » (ChurchofJesusChrist.org). Nāhea te haʼamaitaʼiraʼa tei fāri’ihia e teie taʼata i rahi aʼe i te moni tāna i ani atu ?

• E faʼahaere atu i te hōʼē pūtē moni pa’ari. ’Ia tāpeʼa ana’e te mau tamariʼi i te pūtē, e ani atu ia rātou e aha tā rātou e nehenehe e hoʼo mai i taua moni ra. E ani i te mau tamari’i e aha tā tātou e hōro’a ia vetahi ’ē e ’ere i te mea tāmoni. E ani ia rātou ’ia fa’a’ite mai e nāhea rātou e tauturu ai ia vetahi ’ē ’ia ha’afātata atu ā i te Fa’aora—e hōro’a ho’i ’aita tōna e moni (Te ’Ohipa 3:6).

Fa’aitoito i te ha’api’ira’a i te fare

E faʼaitoito i te mau tamariʼi ’ia faʼanaho i te hōʼē rāveʼa e nehenehe ai rātou ’ia tāvini i tō tātou Metua i te ao ra nā roto i te tautururaʼa i te hōʼē melo o tō rātou ʼutuāfare i teie hepetoma.

Ha’amaita’i i tā tātou ha’api’ira’a

Tāmau ’ā’au i te hō’ē ’īrava. E māʼiti i te hōʼē ’īrava pāpaʼiraʼa moʼa tā ’oe e manaʼo e nehenehe e tauturu i te mau tamariʼi i roto i tā ’oe piha haʼapiʼiraʼa, mai Te ’Ohipa 2:38 ʼaore rā Te ’Ohipa 3:19, ʼe e tauturu ia rātou ’ia tāmau ʼāʼau i te hōʼē pereota i roto i te pāpaʼiraʼa moʼa. E nehenehe atoʼa te mau hōhoʼa, ’aore rā te mau ’ohipa e tauturu i te mau tamariʼi ’ia tāmau ʼāʼau i te mau pāpaʼiraʼa moʼa.