Conversion on the Way to Damascus [Te fa’afāriura’a i ni’a i te arati’a nō Damaseko], nā Michelangelo Merisi da Caravaggio

10–16 nō Tiurai

Te ’Ohipa 6–9

« E aha vau, e aha tō ’oe hina’aro ? »

E haʼamata nā roto i te taiʼora’a i Te ’Ohipa 6–9. E nehenehe te arata’i ha’api’ira’a nō teie hepetoma i roto i te Mai, pe’e mai—nō te ta’ata hō’ē ’e te ’utuāfare e tauturu ia ’oe ’ia tuatāpapa i teie mau pene. E nehenehe te mau ʼātivite nō te mau tamari’i ’āpī i roto i teie arata’i ha’api’ira’a e fa’aauhia nō te mau tamari’i paʼari aʼe, nā reira ato’a nō te mau ’ātivite nō te mau tamari’i pa’ari a’e.

Tītau i te mana’o

’A pāpa’i i ni’a i te tāpura te i’oa o te tahi ’o te mau ta’ata i roto i Te ’Ohipa 6–9, mai ia Saula, Setephano ’e o Tabita. ’A ani i te mau tamari’i ’ia fa’a’ite mai i te mau mea tā rātou i ’ite nō ni’a i teie mau ta’ata.

Ha’api’i i te ha’api’ira’a tumu : Te mau tamari’i ’āpī

Te ’Ohipa 6–7

E nehenehe au e peʼe ia Iesu Mesia nā roto i te pārurura’a i te mea tiʼa.

E aha ïa tā te mau tamariʼi e haʼapiʼi ai nā roto mai ia Setephano, nō niʼa i te riroraʼa ʼei pipi nā Iesu Mesia ?

Te mau ’ātivite e au

• E tauturu i te mau tamariʼi ’ia faʼatupu i te mau ʼātivite e tano i te hōʼē hīmene nō niʼa i te māʼitiraʼa i te mea tiʼa, mai te « Défends le bien » (Chants pour les enfants, 81). E faʼaʼohipa i Te ’Ohipa 7:51–60 nō te ha’api’i i te mau tamariʼi ē, ’ua ha’api’i Setephano nō niʼa ia Iesu Mesia, noa atu ’ua fa’atupu te reira i te riri i roto i te feiā faʼatere ’āti Iūda (hiʼo atoʼa i te « Pene 57 : ʼUa tāparahi pohe te feiā ’iʼino ia Setephano », i roto i Te mau ’ā’amu o te Faufa’a ’Āpī, 150–51, ʼaore rā te video e tano i ni’a i te ChurchofJesusChrist.org). Nāhea tō Setephano tiʼaraʼa atu nō te mea tiʼa ?

• E hōroʼa atu i te mau tamariʼi e rave rahi hi’ora’a nō te mau tamari’i e rave i te hō’ē mā’itira’a i roto i te tiʼa ʼe te hape. E ani i te mau tamariʼi e aha tā rātou e rave nō te tiʼa atu nō te mea tiʼa.

Te ’Ohipa 8:26–39

Tē faʼauru nei te Vārua Maitaʼi iāʼu ’ia faʼa’ite i te ʼevanelia ia vetahi ʼē.

ʼUa peʼe Philipi i te mau muhumuhu a te Vārua ʼe ʼua tauturu i te hōʼē taʼata nō Etiopia ’o tē fifi ra ’ia hāro’aro’a i te mau pāpaʼiraʼa moʼa. E aha ïa te mau haʼapiʼiraʼa tā teie ʼāʼamu e hōroʼa atu i te mau tamariʼi tā ’oe e haʼapiʼi nei ?

Philip Teaching the Ethiopian [Philipi i te ha’api’ira’a i te ta’ata nō Etiopia], nā Robert T. Barrett

Te mau ’ātivite e au

• E huti mai e piti pārahiraʼa nō te hāmani i te hōʼē pere’oʼo huti. E ani i e piti tamariʼi ’ia pārahi i roto i te pere’oʼo huti, hōʼē nō te tiʼa atu nō Philipi ʼe te tahi nō te tiʼa atu nō te taʼata nō Etiopia. I muri iho e faʼatiʼa i te ʼāʼamu nō te ha’api’ira’a Philipi i te ʼevanelia i te taʼata nō Etiopia.

• ’A fa’a’ite i te hō’ē ’ohipa i tupu i reira ’oe i te putapūra’a i te Vārua Maita’i i te paraura’a ia ’oe ’ia fa’a’ite i te ’evanelia i te hō’ē ta’ata. ’A fa’a’ite pāpū ē, e nehenehe te Vārua Maita’i e tauturu ia tātou ’ia parau ia vetahi ’ē nō ni’a ia Iesu.

Te ’Ohipa 9:1–20

Tē ani nei tō tātou Metua i te ao ra iā’u ’ia tātarahapa ’e ’ia taui.

I te taime i parau ai Iesu ia Saulo ’ia faʼaea i te hāmani ’ino i te ʼĒkālesia a te Fatu, ʼua tātarahapa Saulo i te reira iho ā taime ʼe ʼua taui. Nāhea teie ʼāʼamu e nehenehe ai e tauturu i te mau tamariʼi tā ’oe e haʼapiʼi nei ’ia hinaʼaro i te taui vitiviti ’ia rave anaʼe rātou i te hōʼē ʼohipa hape ?

Te mau ’ātivite e au

• E haʼapoto i te ʼāʼamu nō te faʼafāriuraʼa o Saulo, tei ʼitehia i roto i Te ’Ohipa 9:1–20 (hiʼo atoʼa i te « Pene 59 : Tē haʼapiʼi nei Saulo nō niʼa ia Iesu », i roto i Te mau ’ā’amu o te Faufa’a ’Āpī, 154–55, ʼaore rā te video e tano i niʼa i te ChurchofJesusChrist.org).

• ’A paraparau i te mau tamari’i nō ni’a i te mau mea e taui, mai te hō’ē fanau’a rana, ’o tē riro mai ’ei rana, ’aore rā, te hō’ē hē ’o tē riro mai ’ei purehua. E fa’a’ite i te hōho’a, mai te mea e nehenehe. ’Ua nāhea Paulo i te tauiraʼa i te taime ’a fārerei ai Iesu Mesia iāna ?

• ’A pāpa’i hōho’a i te hōʼē ma’araʼa purūmu i niʼa i te tāpura. E ani i te mau tamariʼi ’ia fa’a’ite i te iʼoa o te mau vāhi tā rātou e hinaʼaro e haere e mātaʼitaʼi, ʼe ’ia pāpaʼi i te reira i te pae niʼa o te hōʼē purūmu. E aha tē tupu mai ’ia tipuʼu anaʼe tātou nā te purūmu hape ? ’A fa’aau i te tātarahapa i te ho’ira’a mai i ni’a i te ’ē’a tano.

• E ani i te mau tamariʼi ’ia fa’ahiti fa’ahou i te parau a Saulo i te Fatu : « E aha vau, e aha tō ’oe hina’aro ? » (Te ’Ohipa 9:6). E aha tā te Fatu e hinaʼaro ia tātou ’ia rave ?

Ha’api’i i te ha’api’ira’a tumu : Te mau tamari’i pa’ari a’e

Te ’Ohipa 6–7

E riro vau ʼei ’ite nō Iesu Mesia.

Nāhea ’oe e tauturu ai i tā ’oe mau pīahi ’ia haʼapiʼi mai nā roto mai i te hi’ora’a o Setephano i te tiʼaraʼa ʼei ʼite nō Iesu Mesia ?

Te mau ’ātivite e au

• E taiʼo i te Te ’Ohipa 6:5–15 ʼe 7:51–60 ʼe te mau tamariʼi. E aha te mea i fa’ariro ia Setephano ’ei ’ite pāpū nō Iesu Mesia ? E ani i te hōʼē tamari’i ʼaore rā hau atu, ’ia amo i te ti’ara’a o Setephano ʼe ’ia faʼaʼite mai nō te aha rātou e ti’aturi ai ia Iesu Mesia.

• E ani i te mau tamariʼi ’ia taiʼo i Te ’Ohipa 6:3–10, ma te ʼimi i te mau tāpaʼo maitaʼi o Setephano tei tauturu iāna ’ia tupu i te rahi.

• E ani i te mau tamariʼi ’ia tauturu ia ’oe ’ia feruri i te mau taime e nehenehe ai rātou e tiʼa atu ʼei ʼite nō Iesu Mesia ʼe nō tāna ʼevanelia. E tauturu ia rātou ’ia haʼuti mai i te tahi o teie mau hiʼoraʼa. E ani i te mau tamariʼi ’ia taiʼo ia Mosia 18:9. E faʼaʼite ē te riroraʼa ʼei ʼite nō Iesu Mesia tei roto te reira i te mau fafauraʼa tā tātou i rave i te taime bāpetizoraʼa.

Te ’Ohipa 8:9–24

Te autahuʼaraʼa, e hōro’a faufaʼa rahi ïa nō ’ō mai i te Atua ra.

Tē faʼatiani nei Sātane i te pōroʼi ē e hōro’a mai te mau mea mātēria i te ʼoaʼoa ia tātou. Nāhea ’oe e faʼaʼohipa ai i te ʼāʼamu o Simona nō te tauturu i te mau tamariʼi ’ia haʼafaufaʼa i te mau mea vārua mai te autahuʼaraʼa ʼe te mau haʼamaitaʼiraʼa nō roto mai i te reira ?

Te mau ’ātivite e au

• E haʼapoto i te ʼāʼamu o Simona, tei ʼitehia i roto i te Te ’Ohipa 8:5–24 (hiʼo atoʼa i te « Pene 58 : Simona ʼe te autahuʼaraʼa », i roto i Te mau ’ā’amu o te Faufa’a ’Āpī,152–53, ʼaore rā te video e tano i niʼa i te ChurchofJesusChrist.org). Nō te aha e ʼore ai e nehenehe ia tātou ’ia fāriʼi i te autahuʼaraʼa nā roto i te hoʼoraʼa mai i te reira ? Nāhea te hō’ē ta’ata e fāri’i mau ai i te mana o te autahu’ara’a ? (hi’o Te mau Hīro’a Fa’aro’o 1:5).

• E faʼaʼite i te mau hōhoʼa nō te ʼōroʼa mo’a, te hōʼē hiero (faʼahōhoʼaraʼa i te mau haʼamaitaʼiraʼa hiero), te hōʼē bāpetizoraʼa, ʼe te tahi atu mau haʼamaitaʼiraʼa tā tātou e fāriʼi nā roto i te autahuʼaraʼa. E haʼamāramarama ē teie mau hōroʼa nō ’ō mai i te Atua, eʼita ïa e hoʼohia mai i te moni. Nō te aha e mea faufa’a a’e te reira i te mau mea ato’a tā tātou e nehenehe e ho’o mai ? Nāhea tātou ’ia fāri’i i teie mau ha’amaita’ira’a ?

Te ’Ohipa 9:1–20

Tē ani nei tō tātou Metua i te ao ra iā’u ’ia tātarahapa ’e ’ia taui.

I te taime ’a parau ai Iesu ia Saulo ’ia faʼaea i te hāmani ’ino i te ʼĒkālesia a te Fatu, ʼua tātarahapa Saulo i te reira iho ā taime ʼe ʼua taui. Nāhea teie ʼāʼamu e nehenehe ai e tauturu i te mau tamariʼi tā ’oe e haʼapiʼi nei ’ia hinaʼaro i te taui vitiviti ’ia rave anaʼe rātou i te hōʼē ʼohipa hape ?

Te mau ’ātivite e au

• E ani i te mau tamariʼi ’ia tūfetu i te hōʼē ʼapi parau nā te ʼāfaraʼa. E ani ia rātou ’ia pāpaʼi Nā mua i niʼa i te hōʼē ʼāfaraʼa ʼe I muri mai i niʼa i te tahi atu ʼāfaraʼa. E taiʼo ʼe te mau tamariʼi i Te ’Ohipa 8:1–3 ; 9:1–2 ʼe 9:17–22, ’e ’a ani ia rātou ’ia pāpa’i i te mau tāʼo ’aore rā te mau pereota ’o tē faʼaʼite mai i te huru o Saulo nā mua ’e i muri mai i tōna ʼite-mata-raʼa i te Fatu.

• E ani i te hōʼē melo nō te pāroita ’ia faʼaʼite mai i te ʼāʼamu nō tōna faʼafāriuraʼahia ’e nāhea te riroraʼa ʼei melo nō te ʼĒkālesia i te tauira’a i tōna oraraʼa, mai te oraraʼa o Saulo tei taui.

• ʼA pāpa’i hoho’a i te « arati’a nō Damaseko » i niʼa i te tāpura. E ani i te mau tamariʼi ’ia taiʼo i te Te ’Ohipa 9:6, 11, 18, 20–22, ma te ʼimi i te mea tā Saulo i rave nō te tātarahapa ʼe nō te fāriu atu i te Mesia ra, ʼe ’ia pāpaʼi i teie mau mea nā niʼa i te arati’a. E aha tā tātou i ʼapo nā roto mai ia Saulo nō niʼa i te riro-maita’i-ra’a tō tātou huru mai tō te Mesia ra ?

• E ani i te mau tamariʼi ’ia pāpa’i hoho’a i te tufaʼa au-roa-hia e rātou nō te ʼāʼamu o te faʼafāriruraʼa o Saulo ʼe ’ia faʼaʼite atu i tā rātou pāpa’ira’a hoho’a i tō te piha haʼapiʼiraʼa.

Fa’aitoito i te ha’api’ira’a i te fare

E faʼaitoito i te mau tamariʼi ’ia parau i tō rātou ʼutuāfare nō ni’a i te ʼātivite au-roa-hia e rātou i roto i te piha haʼapiʼiraʼa i teie mahana ʼe e aha tā te reira i ha’api’i mai ia rātou.

Haʼamaitaʼi i tā tātou haʼapiʼiraʼa

Tauturu i te mau tamari’i ’ia ha’api’i mai nā roto mai i te mau pāpa’ira’a mo’a. E’ita paha te mau tamari’i ’āpī e nehenehe e tai’o rahi, e nehenehe rā ’oe ’ia faʼaʼohipa ia rātou ’ia ’apo mai i te ha’api’ira’a mai roto mai i te mau pāpa’ira’a mo’a. ’Ei hi’ora’a, e tai’o ’oe i te hō’ē ’īrava ’e e ani ia rātou ’ia ti’a i ni’a ’aore rā, ’ia ’āfa’i i tō rātou rima i ni’a ’ia fa’aro’o ana’e rātou i te hō’ē ta’o ’aore rā, hō’ē pereota ta’a ’ē tā ’oe e hina’aro e rōtahi i ni’a iho.