24–30 nō Tiurai

Te ’Ohipa 16–21

« Tē parau mai ra te Fatu ia mātou e haere e parau atu i te ’evanelia »

I muri iho i te tai’ora’a i Te ’Ohipa 16–21, ’a pe’e i te mau muhumuhu a te Vārua ’e ’a feruri i te mau mana’o i roto i teie arata’i ha’api’ira’a ’a fa’aineine ai ’oe nō te ha’api’i. E hi’o i te « Pāhonoraʼa i te mau hinaʼaro o te mau tamariʼi ’āpī » i roto i teie buka, nō te tahi atu ā tauturu.

Tītau i te mana’o

E ani i te mau tamari’i ’ia fa’a’ite mai ia ’oe e aha tā rātou i ’ite nō ni’a i te mau ’ohipa i tupu i ni’a ia Paulo i te fa’a’itera’a i te ’evanelia. E nehenehe ato’a rātou e paraparau nō ni’a i te tahi atu mau misiōnare tā rātou i mātau ’aore rā, nō ni’a i te mau ’ohipa i tupu nō rātou, i te fa’a’itera’a i te ’evanelia i te tahi atu ta’ata.

Ha’api’i i te ha’api’ira’a tumu : Te mau tamari’i ’āpī

Te ’Ohipa 16:25–34

Tē haʼapiʼi nei te mau misiōnare i te mau taʼata nō niʼa ia Iesu.

ʼUa ʼite ānei tā ’oe mau pīahi ē e aha tā te mau misiōnare e rave nei ? Nāhea ’oe e tauturu ai i te mau tamariʼi ʼia hāro’aro’a ē, e nehenehe rātou ’ia faʼaʼite i te ʼevanelia ia vetahi ʼē ?

Te mau ’ātivite e au

• E tauturu i te mau tamariʼi ’ia haʼuti mai i Te ’Ohipa 16:25–34 ’a haʼapoto ai ’oe i te ʼāʼamu nō Paulo ʼe Sila i te faʼaʼiteraʼa i te ʼevanelia i roto i te fare ’āuri (hiʼo atoʼa i te « Pene 61 : Paulo ʼe Sila i roto i te fare ʼāuri », i roto i Te mau ’ā’amu o te Faufa’a ’Āpī, 158–60, ʼaore rā te video e tano i niʼa i te ChurchofJesusChrist.org). E fa’ata’a ē, tē haʼapiʼi atoʼa nei te mau misiōnare i teie mahana i te mau taʼata nō niʼa ia Iesu ʼe tē tauturu atoʼa nei ia rātou ’ia faʼaineine nō te bāpetizoraʼa.

• E hāmani i te mau pine iʼoa misiōnare ’ia tāmau te mau tamariʼi, ʼe e tauturu ia rātou ’ia pāpaʼi i tō rātou iʼoa i niʼa i te mau pine. E haʼapiʼi atu i te mau tamariʼi i te mau faʼahitiraʼa parau ʼōhie nō niʼa i te haʼapiʼiraʼa tumu tā rātou e faʼaʼite atu ’ia vetahi ʼē, mai te parau « E tamari’i au nā te Atua » « tē paraparau mai nei te Atua nā roto i te hōʼē peropheta ora », ʼaore rā « ʼo Iesu Mesia tō tātou Faʼaora. » ’A fa’aha’amana’o i te mau tamari’i ē, ’aita e tītauhia ’ia fāri’i i te hō’ē tāreta i’oa misiōnare nō te fa’a’ite i te ’evanelia ia vetahi ’ē.

Te ’Ohipa 17:10–12

Tē faʼaʼite pāpū mai nei te mau pāpaʼiraʼa moʼa nō niʼa i tō tātou Metua i te ao ra ’e ia Iesu Mesia.

Noa atu eʼita ā e nehenehe i te tahi o te mau tamariʼi tā ’oe e haʼapiʼi nei ’ia taiʼo, e nehenehe rā ’oe e tauturu ia rātou ’ia faʼatupu i te hōʼē here i te mau pāpaʼiraʼa moʼa ʼe ’ia ʼite e nāhea te reira i te faʼaʼite pāpū nō te Faʼaora.

Te mau ’ātivite e au

• E tauturu i te hōʼē o te mau tamariʼi ’ia taiʼo i te pereota « ʼua… ʼimi rātou i te parau i pāpaʼihia ra i te mau mahana atoʼa » (Te ’Ohipa 17:11). E ani i te mau tamariʼi ’ia fa’atoro i te rima i ni’a i te mau mahana atoʼa o te hepetoma i niʼa i te hōʼē tārena ’a fa’ahiti ai rātou i teie pereota nā muri ia ’oe. E hīmene ’āmui i te hō’ē hīmene ’o tē ha’api’i nei nō ni’a i te mau ha’amaita’ira’a nō te tai’ora’a i te mau pāpa’ira’a mo’a, mai te « Quand je lis l’Écriture sainte » (Chants pour les enfants, 66).

• Nō te haʼapiʼi i te mau tamariʼi ē, tē faʼaʼite pāpū nei te mau pāpaʼiraʼa moʼa nō tō tātou Metua i te ao ra ʼe nō Iesu Mesia, e tauturu ia rātou ’ia huri atu i te hōʼē pene i roto i te mau pāpaʼiraʼa moʼa, mai Te ’Ohipa 17 ʼaore rā 18,ʼe ’ia ʼimi i te mau ta’o mai te Atua, Fatu, ’aore rā Iesu. (E nehenehe ’oe e tāpaʼo i teie mau tāʼo nā mua roa, ’ia nehenehe i te mau tamariʼi ʼia ʼite ʼōhie noa i te reira mau tāʼo.) I te mau taime atoʼa e ʼite te mau tamari’i i te hōʼē o teie mau tāʼo, e ani ia rātou ’ia faʼaʼite mai i te tahi mea tā rātou i ʼite nō niʼa i tō tātou Metua i te ao ra ʼe ia Iesu Mesia.

Te ’Ohipa 17:22–31

E tamari’i au nā te Atua.

I niʼa i te ʼāivi nō Māti, ʼua haʼapiʼi Paulo i te mau parau tumu nō niʼa i te nātura o te Atua, ’e tae noa atu i te mau parau mau e tamariʼi tātou nāna ʼe « ʼaita ʼoia i ātea ʼē atu ia tātou atoʼa nei » (Te ’Ohipa 17:27). Nāhea ’oe e tauturu ai i te mau tamariʼi ’ia ʼite ē e mea fātata rātou i tō rātou Metua i te ao ra ?

Te mau ’ātivitē e au

• E ani i te mau tamariʼi ʼia fa’ahiti i te pereota « e huāʼai mātou nā te Atua » (Te ’Ohipa 17:29), ’e e haʼamāramarama ē, te auraʼa o te huāʼai e tamariʼi ïa. E faʼaʼite i tō ’oe ʼiteraʼa pāpū i te tamariʼi tātaʼitahi ē, e tamariʼi ʼoia nā te Atua. E ani ia rātou ’ia faʼaʼite mai i tō rātou mau manaʼo nō niʼa i tō rātou Metua i te ao ra.

• E faʼaʼite i te hōhoʼa nō te mau tamariʼi ʼe tō rātou mau ʼutuāfare (mai te mea e nehenehe, e faʼaʼohipa i te hōhoʼa nō te mau tamariʼi i roto i tā ’oe piha haʼapiʼiraʼa). E ani i te mau tamari’i ’ia toro i te rima i ni’a i te mau metua i roto i te mau hōho’a. E haʼamāramarama ē e mau tamariʼi tātou nā tō tātou mau metua vahine ʼe metua tāne, ʼe e mau tamariʼi vārua anaʼe tātou pāʼātoʼa nō tō tātou nā Metua i te Raʼi ra.

• E hīmene i te hōʼē hīmene nō niʼa i tō tātou Metua i te ao ra, mai « E Metua Tō’u » (Te mau hīmene, 188). Ma te tauturuhia e te mau tamariʼi, e pāpaʼi i te mau parau ʼaore rā e pāpa’i hōhoʼa i niʼa i te tāpura ’o tē faʼahōhoʼa nei i te mau mea tā tātou i haʼapiʼi mai nō niʼa i tō tātou Metua i te ao ra i roto i te hīmene.

• E taiʼo i te mau tamariʼi i teie mau parau nō roto mai i Te ’Ohipa 17:27 : « ʼAita rā ʼoia i ātea ʼē atu ia tātou atoʼa nei. » E faʼahiti na i te taime i ʼite ai ’oe ē ʼaita ’oe i ātea ʼē atu i tō tātou Metua i te ao ra, ʼe e ani i te mau tamariʼi ’ia nā reira atoʼa.

E tamari’i ana’e te mau ta’ata ato’a nā te Atua.

Ha’api’i i te ha’api’ira’a tumu : Te mau tamari’i pa’ari a’e

Te ’Ohipa 16:14–15, 25–34 ; 18:7–8, 24–28

E nehenehe au e riro ʼei misiōnare i teienei.

Nāhea ’oe e tauturu ai i te mau tamariʼi ’ia riro mai ia Paulo te huru ʼe ’ia faʼaʼite ia vetahi ʼē i te mea tā rātou e ha’api’i mai nei nō niʼa i te ʼevanelia ?

Te mau ’ātivitē e au

• E ani i te mau tamariʼi ’ia taiʼo i Te ’Ohipa 16:14–15, 25–34 ; 18:7–8, 24–28 ʼe ’ia hāmani i te hōʼē tāpura nō te mau taʼata tā Paulo ’e Apolo i faʼaʼite atu i te ʼevanelia. I muri iho, e ani ia rātou ʼia hāmani i te hōʼē tāpura nō te mau taʼata tā rātou e nehenehe e faʼaʼite atu i te ʼevanelia. E vaiiho i te mau tamariʼi ’ia haʼuti mai e nāhea rātou e nehenehe ai e faʼaʼite i teie mau taʼata nō niʼa ia Iesu Mesia ʼaore rā ’ia ani ia rātou ’ia haere mai i te fare pureraʼa. E nehenehe atoʼa ’oe e ani i te mau tamariʼi ’ia pāpaʼi i te mau rata iti nō te faʼaʼite i te ’itera’a pāpū nō te hōʼē parau mau o te ʼevanelia i teie mau taʼata.

• E ani i te mau misiōnare rave tāmau, te mau misiōnare tahito, ʼaore rā te mau misiōnare pāroita ’ia haere mai i roto i te piha haʼapiʼiraʼa nō te faʼaʼite mai i te mau mea tei tupu i ni’a ia rātou ’a faʼaʼite ai rātou i te ʼevanelia. E faʼaitoito i te mau tamariʼi ’ia ui i te mau uiraʼa nō ni’a i te huru rātou e nehenehe ai e faʼaʼite i te ʼevanelia ia vetahi ʼē.

Te ’Ohipa 17:2–4, 10–12 ; 18:28

Tē faʼaʼite pāpū nei te mau pāpaʼiraʼa moʼa nō Iesu Mesia.

Tē faʼaʼite pāpū nei te mau peropheta atoʼa nō Iesu Mesia. Nāhea ’oe e haʼapiʼi ai i te mau tamariʼi ’ia ʼimi iāna i roto i te mau pāpaʼiraʼa moʼa, noa atu ē ʼaita i faʼahitihia tōna iʼoa ?

Te mau ’ātivitē e au

• E tauturu i te mau tamari’i ’ia tai’o i Te ’Ohipa 17:2–4, 10–12 ; 18:28,ʼe e ani ia rātou ’ia ʼimi e aha te parau tumu hōʼē roa e vai ra i roto i teie mau ’īrava parau. ’Ia au i teie mau ʼīrava, e aha ïa tei tauturu i te mau taʼata ʼia tiʼaturi i te ʼevanelia ’e ia Iesu Mesia ? E ani i te mau tamariʼi ’ia faʼaʼite mai i te mau ʼāʼamu e au-roa-hia e rātou nō niʼa ia Iesu, tā rātou i haʼapiʼi mai i roto i te mau pāpaʼiraʼa moʼa.

• I ni’a i te mau ’api parau, ’a pāpa’i i te mau fa’ahorora’a pāpa’ira’a mo’a ’o tē ha’api’i nei nō ni’a i te Fa’aora (e ’itehia ia ’oe te tahi pae i roto i te Arata’i nō te mau pāpa’ira’a mo’a, « Iesu Mesia », scriptures.ChurchofJesusChrist.org). ’A huna i te mau ’api parau nā roto i te piha ’e ’a ani i te mau tamari’i ’ia ’imi i te reira. E tauturu i te mau tamariʼi ’ia ʼimi i te mau fa’ahorora’a tei ʼitehia e rātou, ʼe e ani ia rātou ’ia faʼaʼite i te tahi ʼe te tahi i te mea tā te pāpaʼiraʼa moʼa tātaʼitahi e haʼapiʼi mai nei nō niʼa ia Iesu.

Te ’Ohipa 17:22–31

E tamariʼi au nā te Atua.

Nāhea ’oe e tauturu ai i te mau tamariʼi ’ia haʼamanaʼo ē, e mau tamari’i rātou nā te Atua ?

Te mau ’ātivitē e au

• E faʼaʼite atu i te mau tamariʼi i te hōʼē ʼōfaʼi, ʼe ’a haʼamāramarama atu ē i te tau o Paulo, ʼua haʼamori te mau taʼata i te mau atua tā rātou i hāmani nā roto mai i te ʼōfaʼi ʼe te tahi atu mau mātēria. E ani i te mau tamari’i ’ia tai’o i Te ’Ohipa 17:27–29. E aha tā tātou e ha’api’i mai nei nā roto mai i teie mau ’īrava nō niʼa i te Atua ? E haʼamāramarama atu ē, te auraʼa o te huā’ai ’o te mau tamariʼi ïa. E ani i te mau tamariʼi e aha tō rātou huru ʼia ʼite ē e mau tamariʼi rātou nā te Atua.

• E ani i te mau tamariʼi ’ia taiʼo i Te ’Ohipa 17:27. E ani i te mau tamari’i ’ia pāpa’i ’e ’aore rā ’ia pāpa’i hōho’a nō te mau rāve’a e « perehahu atu rātou » ’e ’aore rā e ha’afata i te Atua. I nāhea ra tō rātou ʼiteraʼa ē « ʼaita ʼoia i ātea ʼē atu ’ia [rātou] atoʼa nei » ?

Fa’aitoito i te ha’api’ira’a i te fare

E faʼaitoito i te mau tamariʼi ’ia ʼimi i te hōʼē pāpaʼiraʼa moʼa i teie hepetoma ’o tē haʼapiʼi mai nō niʼa ia Iesu Mesia (e nehenehe te reira e tupu i roto i tā rātou iho ʼaore rā tā te ʼutuāfare tuatāpaparaʼa i te mau pāpaʼiraʼa moʼa). I te hepetoma i muri nei, e ani ia rātou ’ia fa’a’ite mai e aha tei ’itehia ia rātou.

Haʼamaitaʼi i tā tātou haʼapiʼiraʼa

E tauturu i te mau tamari’i ’ia riro ’ei pīahi maita’i a’e. Tā ’oe fā i roto i te haʼapiʼiraʼa i te mau tamariʼi e ʼere ïa i te hōroʼa-noa-raʼa i te parau mau ia rātou. E tiʼa atoʼa rā ia ’oe ’ia tauturu ia rātou ’ia riro mai ’ei feiā mā’imi parau mau nā roto i tō rātou iho pūai. ʼEi hiʼoraʼa, ʼeiaha e faʼatiʼa noa i te mau tamariʼi i te ʼāʼamu nō tō Paulo pororaʼa i niʼa i te ʼāivi nō Māti, e nehenehe ’oe e faʼanaho i te mau ʼātivite, mai tei faʼaʼitehia i roto i teie arata’i ha’api’ira’a, ’o tē tauturu ia rātou ’ia ʼite rātou iho i te mau parau mau i roto i te ʼāʼamu.