24–30 nō Tiurai

Te ’Ohipa 16–21

« Tē parau mai ra te Fatu ia mātou e haere e parau atu i te ’evanelia »

’Ia tai’o ’outou nō ni’a i te mau tauto’ora’a a Paulo nō te porora’a i te ’evanelia, e muhumuhu mai te Vārua ia ’outou i te tahi mau mana’o i te ’ā’au ’aore rā i te ferurira’a. E pāpa’i i te reira mau muhumuhu ma te fa’ata’a i te fa’anahora’a nō te rave i te reira.

Pāpa’i i te mau mana’o e tae mai

I roto i te mau parau hope’a a te Fatu i tāna mau ’āpōsetolo, ’ua fa’aue ’oia : « ’E teienei, e haere ’outou e fa’ariro i te mau fenua ato’a ’ei pipi, ’a bāpetizo atu ai ia rātou i roto i te i’oa o te Metua ’e nō te Tamaiti, ’e nō te Vārua Maita’i ; ma te ha’api’i atu ia rātou i te ha’apa’o i te mau mea ato’a tā’u i parau atu ia ’outou na » (Mataio 28:19–20). Noa atu ē ’aita te mau ’āpōsetolo i haere roa i te mau fenua ato’a, tē fa’a’ite mau nei Te ’Ohipa 16–21 ē, ’ua fa’ahaere ’o Paulo ’e tōna mau hoa i te ’ohipa i mua i te fa’ati’ara’a i te ’Ēkālesia. ’Ua ha’api’i rātou i te ta’ata, ’ua bāpetizo ’e ’ua tu’u i te hōro’a nō te Vārua Maita’i. ’Ua fa’atupu rātou i te mau temeio, ’ua fa’ati’a roa mai i te hō’ē ta’ata mai te pohe mai, ’e ’ua tohu rātou nō ni’a i te taivāra’a rahi (Te ’Ohipa 20:7–12, 28–31). ’E tē tāmau noa nei te ’ohipa tā rātou i ha’amata nā roto i te mau ’āpōsetolo ora nō teie ’anotau, nā reira ato’a te mau pipi itoito mai ia ’outou ’o tē tauturu nei i te fa’atupu i te fa’auera’a a te Fa’aora nā roto i te mau rāve’a ’aita Paulo i mana’o noa a’e. Pēnei a’e ’ua ’ite ’outou i te tahi ta’ata ’aita i mātau i tōna Metua i te ao ra ’aore rā tāna ’evanelia. Pēnei a’e ’ua « aroha roa atu ra [tō ’outou] vārua i roto ia [’outou] » nō te fa’a’itera’a ia rātou i tā ’outou i ’ite nō ni’a iāna (Te ’Ohipa 17:16). Mai te mea e pe’e ’outou i te hi’ora’a nō te ha’eha’a ’e te itoito rahi o Paulo, nō te fa’a’itera’a i te ’evanelia, e ’ite mai paha ’outou i te hō’ē ta’ata tei « ha’amahorahorahia ihora tōna ’ā’au e te Fatu » (Te ’Ohipa 16:14).

Mau mana’o nō tā’u iho tuatāpapara’a pāpa’ira’a mo’a

Te ’Ohipa 16–21

E arata’i mai te Vārua iā’u i roto i tā’u mau tauto’ora’a e fa’a’ite i te ’evanelia.

’Ua parau te peropheta Iosepha Semita : « E’ita roa e nehenehe i te ta’ata ’ia poro i te ’Evanelia mai te mea ’aita te Vārua Maita’i » (Te Mau Ha’api’ira’a a te Mau Peresideni o te ’Ēkālesia :Iosepha Semita [2007], 379). ’Ia tai’o ’oe i Te ’Ohipa 16–21, ’a feruri nō te aha e parau mau te fa’ahitira’a a te peropheta. ’A hi’o ta’a ’ē i te mau taime ’ua tauturu te Vārua ia Paulo ’e tōna mau hoa. E aha te mau ha’amaita’ira’a i tae mai maoti tō rātou pe’era’a i te Vārua ? E aha te taime ’oe i te ’itera’a i te muhumuhura’a a te Vārua i roto i tā ’oe mau tauto’ora’a nō te fa’a’itera’a i te ’evanelia ?

Te ’Ohipa 16–21

E nehenehe iā’u ’ia fa’a’ite i te ’evanelia noa atu te huru taime ato’a.

E nehenehe e mana’o ē, ’ia hurihia ’oe i roto i te fare tāpe’ara’a nō te poro-haere-ra’a ’oe i te ’evanelia, e tumu tano ïa nō te fa’aea i te reira. Nō Paulo rā ’e ’o Sila, ’ua riro ïa ’ei rāve’a nō te fa’afāriu i te hō’ē tīa’i fare tāpe’ara’a (hi’o Te ’Ohipa 16:16–34). I roto i Te ’Ohipa 16–21, e hi’o i te tahi atu mau hi’ora’a nō te ineine o Paulo ’ia fa’a’ite i te mea tāna i ’ite i te mau ta’ata ato’a. I tō ’oe mana’o, e aha te tumu ’oia i itoito roa ai ’e i mata’u ’ore ai ? E aha te ha’api’ira’a tā ’oe e ’apo nei i roto i te hi’ora’a o Paulo ?

E rave rahi atu ā parau nō ni’a i te fa’a’itera’a i te ’evanelia i roto i te mau pene 16–21. ’A tuatāpapa ai ’oe i teie mau pene, ’a hi’o mai i te mau mea e tano ta’a ’ē ia ’oe.

Hi’o ato’a Dieter F. Uchtdorf, « ’Ohipa misiōnare : Fa’a’itera’a i te mea i roto i tō ’outou ’ā’au », Liahona, Mē 2019, 15–18.

E mau tamari’i tātou tāta’itahi nā te Atua.

Te ’Ohipa 17:16–34

« E tamari’i tātou nā te Atua ».

I Ateno, ’ua ’ite atu Paulo i te ta’ata mana’o rau ’e te hi’ora’a rau i te pae nō te fa’aro’o. E ’imi noa rātou ’ia « fa’aro’o […] i te parau ri’i ’āpī », ’e tā Paulo e hina’aro e fa’a’ite ia rātou, e parau ’āpī mau ïa nō rātou (hi’o Te ’Ohipa 17:19–21). E ha’amori rātou e rave rahi atua, mai te hō’ē tā rātou i pi’i « te Atua ’itea ’ore » (Te ’Ohipa 17:23), ’āre’a rā, e ti’aturi rātou ē, e mana ’e e pūai te mau atua, e ’ere i te hō’ē mea ora ’e te ta’a ’ē, e ’ere roa atu ïa i tō tātou Metua. ’A feruri i tā Paulo i parau atu ia rātou nō te tauturu ia rātou ’ia ’ite i te Atua. E aha te aura’a nō ’oe te parau « e tamari’i… nā te Atua » ? (Te ’Ohipa 17:29). I tō ’oe mana’o, e aha te ta’a-’ē-ra’a i roto i te hi’ora’a ia tātou ’ei tamari’i nā te Atua ’e te hi’ora’a ia tātou ’ei hāmanira’a nāna ? E nāhea te hāro’aro’ara’a i teie parau mau i te fa’auru i te huru tātou e hi’o nei ia tātou ’e ia vetahi ’ē ?

’Āhani i ti’a ’oe i pīha’i iho ia Paulo ’a hōro’a ai ’oia i tōna ’itera’a pāpū, e aha tā ’oe e parau i tō Heleni i tahito ra nō ni’a i tō tātou Metua i te ao ra ? E ta’ata ānei tā ’oe e ’ite ra e ho’onahia ’ia fa’aro’o i tō ’oe ’itera’a pāpū ?

Hi’o ato’a Roma 8:16 ; 1 Ioane 5:2 ; « We Are the Offspring of God [E tamari’i tātou nā te Atua] » (video), ChurchofJesusChrist.org.

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

Te ’Ohipa 16–21.Nō te māramarama atu ā tō ’outou ’utuāfare i Te ’Ohipa 16–21, e nehenehe tā ’outou e tuatāpapa i te hōho’a fenua i te hope’a o teie arata’i ha’api’ira’a, ma te ’imi i te mau ’oire i reira Paulo i te porora’a i te ’evanelia, i roto i teie mau pene. E aha tā tātou mau rāve’a i teie mahana nō te tauturu i te ’āfa’ira’a i te ’evanelia i te mau fenua ato’a ?

’Ei fa’aurura’a i te ’utuāfare ’ia fa’a’ite i te ’evanelia, e nehenehe e fa’a’ite i te hō’ē video, ’aore rā hau atu, e vai ra i roto i te tuha’a « Sharing the Gospel [Fa’a’itera’a i te ’Evanelia] » nō te Vaira’a buka ’evanelia.

Te ’Ohipa 17:10–12 ; 18:24–28.Nāhea tātou e riro rahi ai mai te feiā mo’a i roto i teie mau ’īrava ? E aha te aura’a nō te parau ra « fāri’i noa ho’i […] i te parau ma te ’ā’au mahora » ? (Te ’Ohipa 17:11). E aha tā tātou e nehenehe e rave ’ia « pa’ari ho’i [tātou] i te parau i pāpa’ihia ra » ? (Te ’Ohipa 18:24).

Te ’Ohipa 19:1–7.E nehenehe teie mau ’īrava e tauturu i te ’utuāfare ’ia paraparau nō ni’a i te faufa’a rahi ’ia bāpetizo ia tātou ’e ’ia ha’amauhia. Nō te māramarama maita’i a’e i te parau mau i roto i Te ’Ohipa 19:1–7, e nehenehe ’outou e ’āparau nō ni’a i te tahi mau tao’a e mea faufa’a ’ore ’ia ’ere ana’e te tahi atu mea tāpiri, mai te niuniu ’āfa’ifa’i ’aita e putu uira. ’Aita ana’e, e nehenehe e fa’a’ite i teie ha’api’ira’a a te peropheta Iosepha Semita : « Te bāpetizora’a i te pape e ’āfara’a ïa nō te bāpetizora’a, ’e ’aore tōna e maita’i mai te mea ’aita te tahi ’āfa—’oia ho’i, te bāpetizora’a a te Vārua Maita’i. » (Te mau Ha’api’ira’a : Iosepha Semita, 109). Nō te aha te bāpetizora’a « ’aore tōna e maita’i » ’aita ana’e te hōro’a nō te Vārua Maita’i e fāri’ihia ? (hi’o 3 Nephi 27:19–20 ; Mose 6:59–61).

Te ’Ohipa 19:18–20.’Ia tai’o ’outou i Te ’Ohipa 19:18–20, ’a hi’o na i te tao’a rahi o te mau mea tā te ta’ata i ineine e fa’aru’e nō te fāri’i i te ’evanelia (hi’o ’īrava 19). E mau tao’a tāhuti ānei ’aore rā e mau ’ohipa ānei tei tītauhia ia tātou ’ia vaiiho nō te fāri’i i te mau ha’amaita’ira’a a te ra’i ?

Te ’Ohipa 20:32–35.A hea tō te ’utuāfare tāmatara’a i te ha’api’ira’a a te Mesia e nā ’ō ra : « E mea maita’i te hōro’a atu i te rave mai » ? (Te ’Ohipa 20:35). E ta’ata ānei tē nehenehe e fāna’o i tā tō ’outou, ’utuāfare tāvinira’a ’aore rā taime ’aore rā mau tao’a hōro’a ? E paraparau te ’utuāfare i te tahi mau rāve’a nō te tāvini i te hō’ē ta’ata ma te fa’anaho roa i te reira. E aha te mana’o e tae mai ’ia tāvini tātou i te ta’ata ? Nō te aha e mea maita’i te hōro’a atu i te rave mai ?

Nō te mau mana’o hau atu nō te ha’api’ira’a i te mau tamari’i, ’a hi’o te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Hīmene tei mana’ohia : « E tamari’i au nā te Atua ra », Te mau hīmene, N°185.

Ha’amaita’i i tā’u iho tuatāpapara’a pāpa’ira’a mo’a

Tāpa’o i te mau mana’o e tae mai. « ’Ia tāpa’o ana’e ’outou i te mau mana’o pae vārua, tē fa’a’ite ra ïa ’outou i te Fatu ē tē ha’afaufa’a nei ’outou i tāna arata’ira’a, ’e e ha’amaita’i mai ’oia ia ’outou i te tahi atu ā heheura’a pinepine » (Ha’api’ira’a mai tā te Fa’aora, 12 ; hi’o ato’a te ’api 30).

Te mau tere misiōnare a te ’āpōsetolo Paulo.