Jisōs ej kōnono n̄an ajri jidikdik eo

Jeptōm̧ba 18–24

2 Korint 8–13

“Anij ej Yokwe eo e M̧ōņōņō in Leļo̧k”

Ilo am̧ je en̄jake ko am̧ ilo jetōb enaaj jipan̄ eok keememej ta eo kwoj ekkatak ilo iien ekkatak jeje ko rekwojarjar. Kwomaron̄ je ilo juon jōōņal in ekkatak, je ņoot ko ilo turin eoon ko im kakobaik ņoot ko ilo Gospel Library app, ak kōm̧m̧ane juon rekoot in ainikiem kōn ļōmņak ko am̧.

Je En̄jake ko Rej Im̧we Eok

Ta eo kwonaaj kōm̧m̧ane eļan̄n̄e kwoj ron̄ bwe juon jarlepjuon in Armej ro Rekwojarjar ilo bar juon eria rej apan̄ ilo mour in jeram̧ōļ? Menin ekar juon jekjek eo me Paul ekar kōm̧eļeļeiki n̄an Armej ro Rekwojarjar ilo Korint ilo 2 Korint 8–9. Ekar kōjatdikdik n̄an kipel Armej ro Rekwojarjar ilo Korint n̄an leļo̧k jet iaan ram̧oļo̧k in m̧weiuk ak jabdewōt n̄an Rikwojarjar ro rej aikuj. Ak ilōn̄inļo̧k juon kajjitōk n̄an leļo̧k jipan̄/donations, naan ko an Paul ebar pād ie m̧ool ko rekabwilōn̄lōn̄ kōn leļo̧k: “Jabdewōt armej āinwōt ear pepe ilo būruon, āindein en leļo̧k: bwe Anij ej yokwe eo e m̧ōņōņō in leļo̧k” (2 Korint 9:7). Ilo raan kein ad, ej lōn̄ wōt Armej ro Rekwojarjar ipeļaakin laļ in ro rej pād ilo aikuj. Jet iien men eo eļaptata jemaron̄ kōm̧m̧ane n̄an er ej n̄an jitlo̧k im leļo̧k menin joortak. Ilo bar jet wāween, ad leļo̧k emaron̄ kajju im ittino n̄an armej en. Jabdewōt jekjek ko wūjlepļo̧k ko ad rej kōm̧m̧an, eļap tokjen etale itok limo ko ad n̄an leļo̧k. Wūjlepļo̧k ko ad rej ke kwaļo̧k ad iakwe? Ālkin aolep men kein, ej iakwe men eo me ej kōm̧m̧an bwe jen m̧ōņōņō in leļo̧k.

pija ej bōk jikin ekkatak an juon make

Ļōmņak ko n̄an Ekkatak Jeje Ko Rekwojarjar Ippam̧ Make

2 Korint 8:1–15; 9:5–15

Imaron̄ m̧ōņōņō in jeer ta eo ewōr ippa n̄an kōjeraam̧m̧an ro rej rijeram̧ōļ im riaikuj.

Elōn̄ armej ro rej aikuj ipeļaakin laļ in. Ewi wāween ad maron̄ kōm̧m̧ane juon oktak? Elder Jeffrey R. Holland ekar letok kapilōk in: “M̧weie ak jeram̧ōl, jej aikuj in ‘kōm̧m̧ane ta eo jemaron̄e’ n̄e ro jet rej aikuj [lale Mark 14:6, 8]. … [Anij] enaaj jipan̄ im tōl kom̧ ilo jerbal in meanwōd ko an rikaļoor eļan̄n̄e kom̧ij kanooj kōņaan im jar im pukōt wāween ko n̄an kōjparok kien eo Eaar letok im bar letok n̄an kōj” (“Jej Jab Aolep Ruwo̧o̧r Ke?,” Liaona, No̧b. 2014, 41).

Riiti 2 Korint 8:1–15; 9:6–15, je ņoot ko an pedped in katak ko me Paul ekar katakin kōn kea kōn ro rijeram̧ōļ im riaikuj. Ta eo ej im̧we eok kōn kapilōk eo an Paul? Jar eo am̧ emaron̄ kōn tōl kōn ta eo kwomaron̄ kōm̧m̧ane n̄an kōjeraam̧m̧an juon eo ej pād ilo aikuj. Lukkuun lale im Rekoote im̧we ko kwoj būki im kōm̧m̧an ekkar n̄an im̧we ko.

Bar lale Mosaia 4:16–27; Alma 34:27–29; Russell M. Nelson, “Kien eo Eļap Kein Karuo,” Liaona, Nob. 2019, 96–100; Henry B. Eyring, ““E Jab En̄in Jitlo̧k eo Iar Kāālōte?,” Liaona, Māe 2015, 22–25.

2 Korint 11:1–6, 13–15; 13:5–9

“Kom̧win make mālejjon̄ kom̧ make, eļan̄n̄e kom̧ pād ilo tōmak.”

Rainin, āinwōt ilo raan ko an Paul, elōn̄ ro rej kappukot n̄an kōjebwebweik kōj “jān kwōjarjar im erreo eo ilo Kraist” (2 Korint 11:3). N̄an unin in, eaorōk n̄an kōm̧m̧ane elmakot in an Paul: “Kom̧win make mālejjon̄ kom̧ make eļan̄n̄e kom̧ pād ilo tōmak” (2 Korint 13:5). Komaron̄ jino jerbal in ilo am̧ ļōmņak kōn ta meļeļein n̄an “pād ilo tōmak eo.” Ekōjkan am jeļā eļan̄n̄e kwōj pād ilo tōmak eo? Kappukot iien ko rem̧m̧an n̄an etale eok make.

Āinwōt m̧ōttan ļo̧k etale eo am̧ make, kwomaron̄ bar kejokļo̧kjeņ kōn naan in “jān kwōjarjar im erreo eo ilo Kraist” (2 Korint 11:3). Ewi wāween lo kwojarjar im erreo ilo Kraist im gospel eo An? Ewi wāween an kōļmenļo̧kjeņ eo am̧i “ren ettoonļo̧k jān kwōjarjar [eo]”? Ta kapilōk eo kwoj lo an lukkuun jipan̄ ilo 2 Korint 11:1–6, 13–15?

Ļōmņan kōn bar kapilōk in jān Būreejtōn Dieter F. Uchtdorf: “Eļan̄n̄e kom̧ kar ļōmņak bwe gospel eo ejjab kanooj em̧m̧an an jerbal n̄an kom̧, ij kūr kom̧ n̄an kātok jidik, etale mour eo am jān juon baluun epād iju eutiej, im kapidodoik jibadōk lo̧k eo ami n̄an kaļoor. Mije wōt katak ko, pedped ko, im kajjitōk m̧oktata an gospel in. Ij kallim̧ur bwe Anij enaaj tōl im kōjeram̧m̧an kom̧ ilo iaļ eo ami n̄an kakūm̧ool mour, im gospel eo enaaj kanooj jerbal em̧m̧an ļo̧k n̄an kom̧” (“Eaiboojoj an Jerbal!,” Liaona, No̧b. 2015, 22).

2 Korint 12:5–10

Jouj eo an Rilo̧mo̧o̧r ebwe n̄an jipan̄ eō lo kajoor ilo m̧ōjņo ko aō.

Jejjab jeļā kar “kalōklōk in kanniōk” an Paul, ak kōj aolep elōn kalōklōk ko me jej kōņaan bwe Anij en juļo̧ki jān mour ko ad. Ļōmņak kōn kalōklōk ko ilo ad riiti 2 Korint 12:5–10, im kejokļo̧kjeņ kōn ta eo kwoj ekkatak kōn Jisōs Kraist ilo eoon kein. Ta eo Paul ej katakin ilo eoon kein kōn mellijon̄ im m̧ōjņo ko? Ta meļeļe in n̄an kwe bwe “jouj [an Anij] e bwe” n̄an kom̧?

Bar lale Mosaia 23:21–24; 24:10–15; Ether 12:27; Moronai 10:32–33.

pija eo ej bōk jikin ekkatak an baam̧le

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

2 Korint 8–9.Ta eo jej loe ilo jebta kein me ej im̧we kōj n̄an tōpar ro rej jeramōl im ro jet rej aikuj? Emaron̄ juon iien em̧m̧an n̄an karōke juon m̧akūtkūt n̄an jerbal in jipan̄ āinwōt juon baam̧le n̄an juon eo ej pād ilo aikuj.

2 Korint 9:6–7.Baam̧le eo am̧ jeļā kōn wōn eo jemaron̄ kōmeļeļeiki āinwōt “eo e M̧ōņōņō in Leļo̧k” Ewi wāween ad kōm̧m̧an bwe jerbal in jipan̄ ko ad n̄an ro jet ren kam̧ōņōņō? Ro uwaan baam̧le eo me em̧m̧an dettaer remaron̄ kōm̧m̧an badge me ej ba “N̄a juon eo em̧ōņōņō in leļo̧k.” Kwomaron̄ leļo̧k nōbar kajjojo uwaan baam̧le in n̄e kwoj loe aer mōņōņō in jipan̄ ro jet.

2 Korint 10:3–7.Ewi wāween am̧ maron̄ jipan̄ baam̧le eo am̧ ekkatak kōn “tarinae” ņae ro renana? Baam̧le eo am̧ enaaj ke m̧ōņōņō in kalōk wall ak juon jikin bōbrae rinana kōn jea im būļan̄kōj ko? Menin emaron̄ tōl n̄an juon arto artak kōn wāween julaļļo̧k men ko me rej tōlļo̧k kōj jān Anij im wāween “[bōktok] im kajipo̧kwe ļōmņak ko otemjej n̄an pokake Kraist.” Ta “kein tariņae ko” jej kōjerbali n̄an kōjebwebweik ļōmņak ko? (lale Epesōs 6:11–18).

2 Korint 11:3.Ta eo baam̧le eo am̧ emaron̄ kōm̧m̧ane n̄an kōļapļo̧k aer mije “erreo eo ilo Kraist.”

N̄an ļōmņak ko reļļapļo̧k n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Al eo kar elmakote: “‘Give,’ Said the Little Stream,” Children’s Songbook, 236.

Kōkōm̧anm̧anļo̧k Ekkatak Ippam̧ Make

Je Men ko Reim̧we. Elder Richard G. Scott ekar ba: “Jeļāļo̧kjeņ eo kar kōjparok je ej jeļāļo̧kjeņ eo ej pād ilo iien aikuj. … [Je im̧we ko ilo jetōb] ej kōkōm̧anm̧anļo̧k āinwōt eo kōn am bōk eļapļo̧k meram” (“Acquiring Spiritual Knowledge,” Ensign, Nob. 1993, 88; bar lale Teaching in the Savior’s Way, 12, 30).

rūm̧m̧an ded ro rej jipan̄ kōn juon būrajāāk in jipan̄

“Jabdewōt armej āinwōt ear pepe ilo būruon, āindein en leļo̧k: bwe Anij ej yokwe eo e m̧ōņōņō in leļo̧k” (2 Korint 9:7).