Nobembwa 13–19

Iakobo

“Ao Kam na Riki Bwa Taan Tou Mwin ana Taeka te Atua, ao Tiaki ti Taan Ongo”

Ngkai ko wareka ana Reta Iakobo, taratara raoi nakon kibuntaeka ake a raka taraaia iroum. E kanga n anaaki nanom bwa ko na riki bwa te “tia tou mwiin” taeka aikai? (Iakobo 1:22).

Korei Am Namakin

N tabetai tii teuana kibun booki aika tabu ae kona ni bita te aonaaba. Iakobo 1:5 taraakin ae kanga te reirei ae bebete—ngkana ko kainanoa te rabakau, butia te Atua. Ma ngke 14-ana ririki ni maiu Iotebwa Timiti e wareka te kibu anne, “e taraa n ae rin ma te mwaaka ae korakora nakon ana namakin ni kabane [i] nanona” (Iotebwa Timiti—Rongorongo 1:12). N aron kairana iroun te tamnei, e mwakuri Iotebwa iaon ana kauring Iakobo ao n ukera te wanawana mairoun te Atua rinanon te tataro. Ao ni koauana te Atua e bon anga ma te tituaraoi, n angan Iotebwa teuana kawarana ae moan te kamimi mai karawa n te rongorongo ibukiia botanaomata—te Moan Mii ni burabeti. Te mii aei e bita kawain maiun Iotebwa ao ni kairiri nakon Kaokan ana Ekaretia Iesu Kristo ibukiia Aika Itiaki ni Boog aika Kaitira i aon te aba. Ti bane ni kakabwaiaki ni boong aikai ibukina bwa Iotebwa Timiti e wareka ao e mwakuriia Iakobo 1:5.

Tera ae kona kunea ngkai ko kamatebwaia ana Reta Iakobo? Tao teuana ke uoua te kibu e na bitiko ke temanna ae ko tangiria. Ko na kona ni kunea kairam ngkai ko ukera kakoroan nanon am mition inanon maium. Ko na kona ni kunea te ungannano n taetae n akoi ke n rangi taotaona riki nanom. E na kona n anaaki nanom iroun te tamnei ni kaboraoa am mwakuri ma am onimaki. Baikara ake e kaungaaki nanom iai, anai taeka aikai “kaki … nakon namakin ni kabane [i] nanom.” Ao ngkanne, ngkana kam “nimamanei ni kaki te … taeka,” n aron are e koreia Iakobo, n riki bwa taan toua mwin te taeka, tiaki ti taan ongo (taraa Iakobo 1:21–22).

Iango ibukin te Kamatebwai i bon Iroum ni Koroboki aika Tabu

Antai ae Iakobo?

E kakoauaki irouia aika a mwaiti bwa te tia korea ana Reta Iakobo bon natin Maria te mwaane, are tinan Iesu Kristo, mangaia bon tarin te Tia Kamaiu. E taekinaki Iakobo ni Mataio 13:55; Mareko 6:3; Mwakuri 12:17; 15:13; 21:18; ao I-Karatia 1:19; 2:9. E kaotaki man booki aika tabu aikai bwa Iakobo bon te tia kairiiri n te Ekaretia i Ierutarem ao n tia riki bwa te Abotoro (taraa I-Karatia 1:19).

Iakobo 1:2–4; 5:7–11

Te teimatoa n taotaonakinnano e kairiiri nakon te kororaoi.

Imwiin warekan Iakobo 1:2–4; 5:7–11, te bwai are kona taekinna bon oin ana rongorongo Iakobo n taekan te taotaonakinnano? E na kona n ibuobuoki n iangoa te bwai are a reiakinna ana utu Unimwaane Jeremy R. Jaggi ibukin te taotaonakinnano man kiibu aikai (taraa “Ma E na Katia Raoi Ana Mwakuri te Nanomwaaka, ao ni Kabatiai Ami Kimwareirei!,” Riaona, Nob. 2020, 99–101). Tera te ”moaniba n raoiroi” n te nanomwaaka? (Iakobo 1:4). Ko na kanga ni kaotia nakon te Uea bwa ko tauraoi n taotaona nanom?

Iakobo 1:3–8, 21–25; 2:14–26; 4:17

Te onimaki e kainnanoa te mwakuri.

Ko na kanga n ataia bwa iai am onimaki iroun Iesu Kristo? Ana kanga am mwakuri ni kaota am onimaki iroun te Atua? Iangoi titiraki aikai ngkai ko kamatebwaia ana reirei Iakobo iaon te onimaki. E na kakukurei warekan naba rongorongon Aberaam ao Raaba, uoua katoto ake e taekin Iakobo (taraa Karikiani Bwaai 22:1–12; Iotua 2). A kanga ni kaotia bwa iai aia onimaki iroun te Atua?

Warekan Iakobo 1:3–8, 21–25; 2:14–26; 4:17 e na buokiko n iangoi kawai are kona riki bwa te tia tou mwin taeka ae nakoraoi riki. Korei namakin ake ko karekei, ao karaoa am babaire ni mwakuri iaoia.

Taraa naba Aramwa 34:27–29; 3 Nibwaai 27:21.

“Aberaam e onimakina te Atua, ao e atoatongaki aei bwa ana raoiroi” (Iakobo 2:23). Aberaam n te Tabo ae Aoraoi i Mamre, iroun Grant Romney Clawson

Iakobo 1:26; 3:1–18

Taeka ake I taekini iai mwaakaia ni kamarakiia ao ni kakabwaiaiia aomata.

Ibuakon ana tamnei aika a tamaroa Iakobo ake e kabonganai ni karokoa banen ana reta, tabeua angiin ana taeka aika mataata raoi a kuneaki inanon ana reirei ibukin te taetae. Iangoia korei karinani ni kabane kawai ake e kabwarabwara Iakobo taekan te newe ao te wii. Tera kabotau n tatabeua nako ke tamnei ake a kaoti taeka ake ti taekin? Iangoa te bwai ae ko kona ni karaoia ae na kakabwaia temanna man am taetae (taraa Reirei ao Berita aika Tabu 108:7).

Iakobo 2:1–9

Ngkai ana reirei Iesu Kristo, I riai n tangiriia aomata ni kabane, n aki tabe ma aroia.

Iakobo e kauringiia Aika Itiaki riki ni kaitara tatangiraia riki aika a kaubwai ao n ribaia aika a maiu ni kainnano, ma ana kauring e kona ni kaineti nakon katei n inanonano ke te bangaomata are e reke iroura nakoia aomata. Ngkai ko tataromwaaka ni kamatebwaia Iakobo 2:1–9, ukebwaia nanom ao kakauongo nakon ana wirikiriki te Tamnei ae Raoiroi. E na kona ni ibuobuoki n oneimwiin kibuntaeka inanon kiibu aikai n aron “te aomata ae aki kaubwai ma kunnikaina ae buakaka” (te kibu 2), n tabeua taeka ke kibuntaeka are a kabwarabwara temanna are e kaririaki nanom bwa ko na motika taekana n ae aki raoiroi. Iai namakinan tabeua bitaki ae ko riai ni karaoi n te anga are ko na karaoia ke n iangoia ibukiia aomata?

Iango ibukin Kamatebwai ni Koroboki aika Tabu n te Utu ao te Bootaki n te Tairiki

Iakobo 1:5.Imwiin warekan Iakobo 1:5, a kona kaain am utu ni kakimomotoa rongorongon te Moan Mii ni Burabeti (taraa Iotebwa Timiti—Rongorongo 1:8–20) ke mataku n te witeo “Ask of God: Joseph Smith’s First Vision” (ChurchofJesusChrist.org). Kaoia kaain te utu bwa a na tibwaua aia koaua ibukin te Burabeti Iotebwa ao taneiai ake a karekei ngke a kaekaaki aia tataro iroun te Tama are i Karawa.

Iakobo 1:26–27.Iangoia ni mataku n te witeo “True Christianity” (ChurchofJesusChrist.org). Ngkanne wareka ana kamataata Iakobo n nanon “te aro ni kiritian ae itiaki” n Iakobo 1:26–27, ao maroroakin kawai ake a kona ni karaoi am utu ni maiuakina te aro ni kiritian n rangi n itiaki riki.

Iakobo 3.Iakobo 3 iai inanona tamnei aika mwaiti are a kona ni kaungai reirei ake a airi ma aia katoto aika a ururingaki ni buokiia am utu n taetae ma te akoi. N aron te katoto, ko kona ni uaia ni kaura te ai ao maroroakinna bwa e na kanga te taeka ae uarereke ae aki akoi e kona ni karika te kanganga ae korakora (tarai kiibu 5–6). Ke ko kona n anga te bwai ae kamangingi nakon te bwai ae taneiai ni kabonganaki ibukin te amwarake ae karewerewe—n aron ranin uaan te reemon inanon te bwatoro n aanii. Aio e na kona ni kairiiri nakon maroroakinan taeka aika a karewe man kaunganano (tarai kiibu 9–14).

Iakobo 4:5–8.Bukin tera ngkai ti na “kania te Atua” (Iakobo 4:8) ngkana ti kaitara ma te kariiri?

Iakobo 5:14–16.E reirei Beretitenti Dallin H. Oaks bwa “Kaaro a riai ni kaungai kakabwaia aika a mwaiti riki n te utu” (“Mwaakan te Nakoanibonga,” Riaona, Meei 2018, 67). Tao warekan Iakobo 5:14–16 ao n tibwaakin taneiai ibukin karekean kakabwaia n te nakoanibonga e kona ni kaungai nanoia kaain te utu ni bubuti ibukin te kakabwai ngkana a aoraki ke ni kainanoa te korakora n tamnei.

Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.

Te anene ae rineaki: “Have I Done Any Good?,” Kuna n Taromauri, nambwa 223.

Kanakoraoan Am Kamatebwai

Mwakuriia te bwai ae ko reiakinna. Ngkai ko kamatebwai, kakauongo nakon ana wirikiriki te Tamnei bwa ko na kanga ni maiuakin baike ko reiakin nakon maium. Motinnanoia n irii wirikiriki aikai ao maiuakinan riki te euangkerio n ae bwanin riki. (Taraa Teaching in the Savior’s Way, 35.)

Ana kauring Iakobo ni “butia te Atua” (Iakobo 1:5) e kaungaa nanon Iotebwa Timiti n ukera te rabakau mairoun te Atua. Tamnei iroun Christina Smith.