E tataekina te Euangkerio Iesu n te Aba n Tamnei, iroun Robert T. Barrett

Nobembwa 20–26

1 ao 2 Betero

“Kakatonga ma te Kimwareirei ae aki kona n Atongaki ao man Onrake n te Mimitong”

Ngkai ko wareka ana Reta Betero, ko na kona ni karekei namakin n tamnei. Waekoa korei ngkai ko mena i aan ana kairiiri te Tamnei” (Reirei ao Berita aika Tabu 76:80) bwa ko aonga ni karekea etin te bwai are e na reireiniko iai te Atua.

Korei Am Namakin

N te tai ae aki maan imwiin Mangautina, te Tia Kamaiu e karaoa te taetae ni burabeti are e a tabeaianga iai nanon Betero. E a kaman tuanga Betero ae e na tiringaki ibukin ana onimaki, ni kairaki “nako ike [e] aki kan nako iai … , e na kaota aron matena are e na neboa te Atua” (Ioane 21:18–19). Ririki ake imwiina, ngke e korea ana reta Betero, e ataia bwa e a kaan ana tai are e taetaeniburabetiia iai aron tiringakina: N na buta iai umwau n rianna aei n te aro are e kaotia ara Uea are Iesu Kristo nako iu” (2 Betero 1:14). Ao irarikina ana taeka Betero a bon aki kaonaki n te maaku ke te akea ni kantaninga. N oneamwiina, e reireiniia Aika Itiaki bwa a na “bati ni kimwareirei,” ao e boni ngae n riai “bwa kam na rawawata naba ni bwaai ni katami aika bati aroia.” E reireiniia Betero bwa a na uringnga ae “kataan [aia] onimaki, e na kairi nakon “karaoiroami ma neboami ma karineami ni manga kaotakin Iesu Kristo” ao nakon “maiun tamnei[a]” (1 Betero 1:6–7, 9). Ana onimaki Betero e rangi ni karaunano nakoia Aika Itiaki n taai ake ngkoa, ngkai e kaunganano nakoia Aika Itiaki ni boong aikai, naake a “ibuokanbwai ni marakini Kristo; ao, ni kimwareirei, bwa e aonga ni kabatiaki [ara] kimwareirei ngkana e kaotaki neboakina” (1 Betero 4:13).

Iango ibukin te Kamatebwai i bon Iroum ni Koroboki aika Tabu

1 Betero 1:3–9; 2:19–24; 3:14–17; 4:12–19

I kona ni kunea te kimwareirei inanon taai ni kataaki ao ni karawawataki.

Te tai are imwiin Taurakin Kristo e bon aki bebete bwa kona riki bwa te Kiritian, ao e kaotaki n anne n ana moan reta Betero. Ni moan mwakoro aika aua, ko na atai taeka ao kibuntaeka ake a kabwarabwara te kanganga: rawawata, kariiri, nanokawaki, kataaki ae korakora, ao korakai (taraa 1 Betero 1:6; 2:19; 4:12–13). Ma kona ataia naba taeka aika a taraa ni kakukurei—kona bae ni kan korei ni karinani bwaai ake ko kunei. N aron te katoto, ngkai ko wareka 1 Betero 1:3–9; 2:19–24; 3:14–17; ao 4:12–19, tera te kantaninga are e anganiko bwa ko na kona ni kunea te kimwareirei ribuakon bwaai aika a kanganga?

Ko na kona naba ni wareka ana rongorongo Beretitenti Russell M. Nelson “Joy and Spiritual Survival” (Riaona, Nob. 2016, 81–84) ao kakaei baika ti te arona imarenan baike e reiakin Betero ao ake e reiakin Beretitenti Nelson. Tera taekan te babaire ni kamaiu ao ana euangkerio Iesu Kristo are e anganiko te kimwareirei?

Taraa naba Ricardo P. Giménez, “Finding Refuge from the Storms of Life,” Riaona, Meei 2020, 101–3.

1 Betero 3:18–20; 4:1–6

E taetaekinaki te euangkerio nakoia maate bwa aonga ni kona ni motikaki taeka inanon te raoiroi.

N te bong teuana ao aomata n tatabemaniia nako a na tei n te kai ni motikitaeka ao “a na taekin aroia nakon Teuare e tae nangina ni motiki taekaia akana maiu ma akana mate” (1 Betero 4:5). E na kanga te Atua ni motiki taekaia aomata ni kabane n te aro ae boraoi ngkai ataakin tibwangaia ao maiuakinan te euangkero a rangi ni kaokoro? Ataia bwa e kanga te reirei are e reireia Betero n 1 Betero 3:18–20; 4:6 ni buoka kaekaan te titiraki aio. A kanga kiibu aikai ni kakorakora am onimaki n ana motiraoi te Atua ae moan te boraoi?

Ni kakaenako riki ibukin te reirei aei, kamatebwaia Reirei ao Berita aika Tabu 138, te kaotioti are e karekea Beretitenti Joseph F. Smith ngkai e iangoi ana koroboki Betero aikai. Tera koaua riki tabeua ae e reiakin Beretitenti Smith?

Taraa naba Atuun Reirei n te Euangkerio, “Bwabetito ibukiia Maate,” topics.ChurchofJesusChrist.org.

2 Betero 1:1–11

Rinanon mwaakan Iesu Kristo, I kona ni karikirakea rikiu n te aro n atua.

Ko a tia n namakinna bwa te riki n ai aron Iesu Kristo ao ni karikirakea anuan maiuna e bon kanganga karaoana? Unimwaane Robert D. Hales e anga ana taeka ni kaunganano aei bwa ti na kanga ni karikirakea anuan maiun te Tia Kamaiu: “Anuan maiun te Tia Kamaiu … kateina aika a barongaki raoi, ni kairaki teuana ma teuana, ake a rikirake inanora inanon kawai n reitaki n iwawaki. N taekana teuana, ti aki kona ni karekea teuana anuan katein Kristo n aki karekea ao n anai nanoia aomata. Ngkai teuana te katei e kona n riki ni korakora ao ai arona naba ma aika mwaiti riki” (“Becoming a Disciple of Our Lord Jesus Christ,” Riaona, Meei 2017, 46).

Anuan maiun Kristo ake ti karikirakei a buokiira ni barongai maiura n tamnei n riki bwa a na reirei.

Ngkai ko wareka 2 Betero 1:1–11, iangoi anua ni maiu “n te aro n atua” korei karinani kiibu aikai. N am taneiai, a kanga “ni barongaaki,” n aron ae kabwarabwara Unimwaane Hales? A kanga n nikoi aroia i bon imarenaia? Baikara riki aika ko reiakin man kiibu aikai n taekan te waaki n riki n ai aron Kristo?

Ko kona naba n iangoi “taeka n akoi ake a kakawaki ma ni moa ni kakannato” ake e anganiia Ana Aomata aika Itiaki te Atua - ao bon ngkoe naba (2 Betero 1:4). Ana rongorongo Unimwaane David A. Bednar “Taeka n Akoi ake a Kakawaki ma ni moan Kakanato” (Riaona, Nob. 2017, 90–93) a kona ni buoka kamatataakim bwa tera berita akanne ao ko na kanga ni karekei.

Iango ibukin Kamatebwai ni Koroboki aika Tabu n te Utu ao te Bootaki n te Tairiki

1 Betero 2:5–10.Ngkai ko wareki kiibu aikai ma am utu, iangoia kabonganai atiibu ni buokiia kaain am utu ni katamneia ana anga reirei Betero bwa te Tia Kamaiu bon ara “atibu ae bouan te maninganinga ae moan te kakanato.” E kanga n ae titebo ngaira kanga “atibu aika maiu [ae maiu]” are e kabongana te Atua ni katea Abanueana? Tera ae ti reiakinna mairoun Betero ibukin te Tia Kamaiu ao tabera n Abanueana? Tera ana rongorongo Betero nakoia am utu?

1 Betero 3:8–17.Ti na kanga n “tauraoi n taainako n anga te kaeka” nakoia naake a titirakiniira taekan ara onimaki? A na bae ni kukurei am utu ni karaoa te kaotioti iaon baika a riki ike e roko temanna n titirakiniia ibukin taekan te euangkerio.

1 Betero 3:18–20; 4:6.Tera ae a kona ni karaoia kaain am utu n namakina aia reitaki ma aia bakatibu? Tao ko kona ni bukamarua aia rekenibong am bakatibu ake a tia ni mate man katauraoan kanaia ake a tatangiria, n tarai tamneia, ke ni karaki man anuan maiuia. Ngkana e angaraoi, ko kona ni baireia bwa ko na karekei otenanti ibukiia am bakatibu inanon te tembora (ibukin buokam, nakon FamilySearch.org).

2 Betero 1:16–21.Inanon kiibu aikai, Betero e kauringiia aika Itiaki n ana taneiai ni menana i aon te Maunga n Onikaki (taraa naba Mataio 17:1–9). Tera ae ti reiakinna man kiibu aikai ibukin aia anga reirei burabeti? (taraa naba Reirei ao Berita aika Tabu 1:38). Tera ae anganiira onimakinara bon iroura bwa ti na ririmwiin ara burabeti ae maiu ni boong aikai?

Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.

Te anene ae rineaki: “Family History—I Am Doing It,” Aia Boki n Anene Ataei,, 94.

Kanakoraoan Ara Anga reirei

“Bwaina te tatauraoi n taainako.” Taai n anga reirei aika akea bairean taia n te mweenga a kona n roko ao ni waekoa n nako, ngaia are e kakawaki reken am tai ni kabonganai ngkana a kaoti. Ko na kanga ni kataia n “tatauraoi n taainako” n reireiniia kaain am utu ana koaua te euangkerio ao ni tibwaua “te kantaninga ae mena i nanomi” (1 Betero 3:15) ngkana a kaoti taai n anga reirei? (Taraa Teaching in the Savior’s Way, 16.)

E ngae ngke e kaitara Betero ma te bwainikirinaki ao te kakaitaraaki, e teimatoa n aki kamwaingaki n ana koaua iroun Kristo.