Te Tangira ae Kororaoi, iroun Del Parson

Nobembwa 27–Ritembwa 3

1–3 Ioane; Iuta

“Te Atua Bon te Tangira”

Ngkana ko wareka aia Reta Ioane ao Iuta, ukora te kairi mai ieta bwa ko na kanga ni kaota am tangira nakon te Atua. Korei mwiin namakin aikai ao mwakuri iaoia.

Korei Am Namakin

Ngke Ioane ao Iuta a korei aia reta, reirei aika bure a kaman tia ni waaki ni kairiia aika Itiaki nakon kitanan te koaua. Tabeua reirei aika bure a riki bwa titiraki bwa tao Iesu Kristo e bon tia n roko “n iriko” (taraa, ibukin te katooto, 1 Ioane 4:1–3; 2 Ioane 1:7). Tera ae e kona ni karaoia te tia kairiiri n te Ekaretia n aron aroaro aikaii? Te Abotoro Ioane e kaeka n tibwaua ana kakoaua iroun te Tia Kamaiu: “Te baere iai, ma ngke a tuai ni karikaki bwai, are ti ongo, are ti noria ni matara, are ti tarataraia are e rinnga naba baira, ae taekin te Rokou are te maiu” (Ana Rairairi Iotebwa Timiti, 1 Ioane 1:1 [n 1 Ioane 1:1, footnote a]). Ao ngkanne Ioane e reirei taekan te tangira: Ana tangira te Atua ibukira ao te tangira are ti riai ni karekea Ibukina ao ni kabane Natina. E ngae n anne, Ioane bon te tia kakoaua iaona ni bane, naba. E a tia i bon irouna n taneiai ma ana tangira te Tia Kamaiu (taraa Ioane 13:23; 20:2), ao e tangiriia aika Itiaki bwa a na namakina naba te tangira anne. Ana kakoaua Ioane ma ana reirei iaon te tangira bon aron naba ae kainnanoaki n te bong aei, ngkana iai te titiraki iaon te onimaki iroun Iesu Kristo ao reirei aika kairua. Wawarekan ana reta Ioane e kona ni buokiira ni kaitarai karawawata ma te ninikoria, ibukina bwa “akea te maaku inanon te tangira, ma e kaaki te maaku te tangira ae kororaoi” (1 Ioane 4:18).

Iango ibukin te Kamatebwai i bon Iroum ni Koroboki aika Tabu

1 Ioane; 2 Ioane

Te Atua bon te oota, ao te Atua bon te tangira.

Ngkana ko bon rinea teuana ke uoua taeka ni kabwarabwara te Atua, tera taeka akanne? Inanon ana reta, Ioane e aki toki ni kabonganai taeka aika “oota” ao “tangira” (taraa, ibukin te katooto, 1 Ioane 1:5; 2:8–11; 3:16, 23–24; 4:7–21). Ngkana ko wareka te moan reta ake uoua mai iroun Ioane, iangoi ana taneiai Ioane are karekea ma ootan ao ana tangira te Tia Kamaiu. Ibukin te katooto, iangoia bwa tera ae reiakinna Ioane man ana reirei Iesu n Ioane 3:16–17; 12:35–36, 46; 15:9–14; 19:25–27. Ko noori boraoin reirei aikai ma are n 1 Ioane are e reirei iaon ootan ao ana tangira te Atua? Tera taneiai aika e a tia n reireiniko bwa te Atua bon te oota ao te tangira?

1 Ioane 2–4; 2 Ioane

“Ngkana ti itangitangiri, E maeka te Atua inanora.”

Ko kona naba ni kunei taeka n aron “memena” ao “maeka” n okioki rinanon ana reta Bauro. Tarai taeka aikai, riki ngkana ko wareka 1 Ioane 2–4 ao 2 Ioane. Tera am iango n ae nanonaki nakon “memena” ke “maeka” inanon te Atua ao Ana reirei? (taraa 2 Ioane 1:9). Tera ae nanonaki iroum ni karekea te Atua ni “memena” ke “maeka” iroum?

1 Ioane 2:24–3:3

I kona n riki n ai aron Iesu Kristo.

Am kouru n riki n aron Kristo e tara ni kangaanga katiaana iroum? Iangoa ana reirei Ioane ni kaungaunga: “Ataei aika kam uarereke, maeka ma ngaia; bwa, ngkana E na kaotaki, ti na aki maaku … [ao] ti na riki n ai arona” (1 Ioane 2:28; 3:2). Tera ae ko kunea inanon 1 Ioane 2:24–3:3 are e anganiko te aki maaku ao kabebeteaki ngkai ana reirei Iesu Kristo? Ngkai ko kamatebbwaia ana reta Ioane, tarai tabeua moan reirei ke reirei are e kona ni buokiko inanon am kekeiaki n riki n aron Kristo.

Taraa naba Moronaai 7:48; Reirei ao Berita aika Tabu 88:67–68; Scott D. Whiting, “Becoming like Him,” Riaona, Nob. 2020, 12–14.

1 Ioane 4:12

Akea “te aomata n tia … noora te Atua n taai tabetai”?

Ana rairairi Iotebwa Timiti, 1 Ioane 4:12 katereaki bwa “ake te aomata n tia noora te Atua n taai tabetai, ti nakoia ake a kakoaua” (n 1 Ioane 4:12, footnote a; taraa naba Ioane 6:46; 3 Ioane 1:11). Koroboki aika tabu a korei tabeua bwaai aika riki ngke te Atua te Tama e kaotia bon Ngaia nakoia ake a kakaonimaki n tatabeman, n ikotaki ma Ioane boni ngaia (taraa Te Kaotioti 4; taraa naba Mwakuri 7:55–56; 1 Nibwaai 1:8; Reirei ao Berita aika Tabu 76:23; Iotebwa Timiti—Rongorongo 1:16–17).

1 Ioane 5

Ngkai I kamwakura te onimaki iroun Iesu Kristo ao ni manga bungiaki riki, I kona n tokanikai n te aonaaba.

Ngkana ko wareka 1 Ioane 5, taraia bwa tera ti riai ni karaoia n tokanikai n te aonaaba ao ni karekea te maiu ae akea tokina. Tera aron taraakin te tokanikai n te aonaaba aika ti te arona inanon maium? Ko kona ni kunei taian kaeka ao noonori ni mataata inanon ana rongorongo Unimwaane Neil L. Andersen “Overcoming the World” (Riaona, Meei 2017, 58–62).

Iuta 1

“[Katei] ami onimaki iaon ami kabanea n onimaki ae tabu.”

Tera ae inanon Iuta 1:10–19 reireiniko n taekan koraki ake a un ni kaitara te Atua ao Ana mwakuri? Tera ae ko reiakinna man kiibu 20–25 iaon aron kawakinan am onimaki bwa e na matoatoa iroun Iesu Kristo?

Iango ibukin Kamatebwai ni Koroboki aika Tabu n te Utu ao te Bootaki n te Tairiki

1 Ioane 2:8–11.Ni buokiia am utu n iangoa ana reirei Ioane, ikotaki n te ruu ae roo n te aro are kaain te utu a na kona n rinanon te kaokoro imarenan te nakonanko “inanon te roo” ao te nakonako “inanon te oota.” E na kanga te kairiribai ni karikiira n nakonako inanon te roo ao ni bwaka? E kanga te itangitangiri ni uota te oota inanon maiura?

1 Ioane 3:21–22.Tera inanon kiibu aika ae karikirakea te “koaua raoi” bwa iai te Atua iroura ao inanon ara atatai ti na karekei kaeka nakon ara tataro?

Kawakinan ana tua te Atua e buokiira n tokanikai n te aonaaba.

1 Ioane 5:2–3.Iai tuua aika ko iangoia bwa “kakamaaku” ke kangaanga iriirakina? E kanga ara tangira ibukin te Atua e bita te kawai are ti namakina iai taekan Ana tua?

3 Ioane 1:4.Tera ae nanonaki n “nakonako inanon te koaua”? Ko riai n anaa te tai aei n tuangiia kaain te utu e kanga are ko a tia n nooraki n nakonako inanon te koaua ao n taetae iaon te kimwareirei aei are uotaki nakoim. Kaain te utu a riai ni kukurei ni korei taekan ke korotamneia taian koaua are a tia n reiakinna iaon mwaneka aika beeba ao kabonganai ni karaoa te tabo n nakonako are am utu a na kona n nakonako iaona n ikotaki.

Iuta 1:3–4.Iai kangaanga n tamnei ake a tia ni “kawakawa n” roko inanon maiura ao ara utu? (Iuta 1:4). Ti na kanga n tou mwiin ana kauring Iuta “ma nanora ni kauntaeka ibukin te onimaki” ao n totokoi kangaanga aikai? (Iuta 1:3). Tera ae ti na karaoia ni kakoaua raoi bwa te ”rau, ao te tangira, e kamwaitaki” inanon ara utu? (Iuta 1:2).

Ibukin iango aika a mwaiti riki ibukin reiakinaia ataei, taraa te kamataata n te wiiki aei n Nakomai, Iriirai—Ibukin te Moanrinan.

Te anene ae rineaki: “Where Love Is,” Aia Boki n Anene Ataei,138–39.

Kanakoraoan Am Kamatebwai

Ukoukora ana tangira te Atua. E reirei Beretitenti M. Russell Ballard, “[Te] euangkerio bon te euangkerio n tangira—te tangira ibukin te Atua ao te tangira bon i marenara” (“Ana Tangira te Atua ibukiia Natina,” Ensign,, Meei 1988, 59). Ngkai ko wareki koroboki aika tabu, korei mwiin kakoauaan ana tangira te Atua.

Nakonako ma Ngai, iroun Greg K. Olsen