“Ritembwa 11–17. Te Kaotioti 6–14: ‘A Kataea Ana Kai… Man Raran te Tiibutetei,’” Nakomai, Iriirai—Ibukiia Aomata n Tatabemaniia ao Utu: O Tetemanti 2023 (2022)
“Ritembwa 11–17. Te Kaotioti 6–14,” Nakomai, Iriirai—Ibukiia Aomata n Tatabemaniia ao Utu: 2023
Composite art by Eric Johnson: The Grand Council, by Robert T. Barrett; star cluster courtesy of European Space Agency
Ritembwa 11–17
Te Kaotioti 6–14
“A Kataea Ana Kai… Man Raran te Tiibutetei”
Beretitenti Boyd K. Packer, e reirei: “Ngkana te taetae inanon koroboki aika tabu n te moan tai e taraa e aki nang ota nakoim, teimatoa ni wareware. Ni waekoa ko na bon roko n tamaroan ao mwaaka ni kuneaki iaon iteraniba akanne” (“The Key to Spiritual Protection,” Riaona, Nob. 2013, 27).
Korei Am Namakin
Iangoa te aine “ao e ariiri, ao e maraki ba e na bung.” Ngkai iangoa “te rakon ae korakora ae e uraura, ao itua atuna ao tengaun korona” e tei iaon te aine, “ba e na kana natina ngkana e a tia ni bung” (Te Kaotioti 12:2–4). Kaotaakira man kiibu aikai n te kaotioti iroun Ioane, uringnga bwa banna aikai a tei ibukin te Ekaretia ao abanuean te Atua ao te mate are a na kaitaraa. Ibukiia aika Itiaki ake a rinanon te karawawataaki n ana bong Ioane, te tokanikai iaon te buakaka e na bon taraa n tiaki arona. Te tokanikai aei e kona naba ni kangaanga kaman noorakina inanona ara bong, ngkana teuare e buakaka e bon “buaka ma aika Itiaki” ao iai mwaakana …iaoia botanaomata ni kabane, ao neewe, ao aba” (Te Kaotioti 13:7). Ma n tokin te kaotioti iroun Ioane te kakabwaia are e kaotaki bwa te raoiroi e na taonanako te buakaka. Baburon e na bwaka. Ao aika Itiaki a na roko n “otinako man te karawawata ae korakora” ma kunikainiia n te mainaina—tiaki bukina aia kunikai aki kona ni memea ma bukina aika Itiaki a “tia n tebokaki aia kunikai, ao ni kamainainaaki inanon raraan te Tibutetei” (Te Kaotioti 7:14).
Iango ibukin te Kamatebwai i bon Iroum ni Koroboki aika Tabu
Ioane e noori bwaai aika a mwaiti taai ma bwaai aika riki n rongorongon te aonaaba, riki ake ana riki ni boong aika kaitira.
Inanon mwakoro aikai ko na wareka taekan te boki ma kabae ake ituua. Ngkana ko na miimi bwa tera nanona, ko aki maroaa. Te Burabeti Iotebwa Timiti e miimi naba bwa tera nanon te boki ma kabaeana aika itiua. Te Uea e kaota nakon Iotebwa bwa te boki aei ao kabaeana a tei ibukin karakinan te aonaaba “maanna n tiku n te maiu n rabwata,” ma kabaeana n tatabeua a tei ibukin te ngaa te ririki (taraa Reirei ao Berita aika a Tabu 77:6–7). Ko na bon kukurei ni kan ataia bwa taai ma bwaai aika riki man te moan kababae ake aua ake a katereaki ni miin Ioane ni burabeti inanon ti te kiibu waniua (Te Kaotioti 6:1–8). Kiibu ake teniua are imwina e kabwarabwara te kanimaua ni kabaebae (kiibu 9–11). Taai ma bwaai aika riki n te kabanea ni kabaebae ake uoua e a taekina kanoan te boki man te Te Kaotioti. N taekana tabeua, oin te kataratara ni miin Ioane ni burabeti bon te kabanea ni bong—n ara bong. Ngkana ko warekia, iangoia bwa bukin tera e kakawaki n ataia bwa tera ae e koreia Ioane iaon taekan te kabanea ni bong.
Ngkana ko wareki bwaai aika riki are e taetae ni burabetiia Ioane, iangoi taekaia ao titiraki aika imwina:
-
Wareka Te Kaotioti 7 ma te mwakuri n ikotakiia Iteraera n am iango. Tera am iango iroum iaon taekan te mwakuri aei? (taraa naba Reirei ao Berita aika Tabu 77:8–11). Tera ae ko reiakinna man kiibu 13–17 taekan esu Kristo ao ake a roko Nakoina?
-
Tera ni mwakoro 8; 9; ao 11 ae reireiniko n taekan taai ma bwaai aika ana riki n te kabanea ni bong? (taraa naba Reirei ao Berita aika Tabu 77:12–13, 15). Ti na kanga ni tarauraoi n tamnei ibukin taai ma bwaai aika ana riki aikai?
-
Te Kaotioti 10 taekan te boki are te anera e anga nakon Ioane ao n tuangnga bwa e na kanna. Tera taekan te kanikina aei? (taraa Reirei ao Berita aika Tabu 77:14).
Te buaka i Karawa e reitinako iaon te aonaaba.
Ti aki ata taekan te Buaka i Karawa, ma iai bebeten norana e ngae ngke e kimototo kabwaraana Te Kaotioti 12:7–11. Ngkai ko wareki kiibu aikai, katamneiko bwa ngkoe mwakoron te kakaitara n te aba n tamnei. Tera ko reiakinna n taekan Tatan bwa e na kanga ni kataeaki ana kai? (taraa kibu 11).
Te buaka are i karawa e reitinako iaon te aba, ngkai Tatan e teimatoa ni “buaka ma [koraki ake] iai irouiia kakoauaan Iesu Kristo” (Te Kaotioti 12:17). Tera ae ko reiakinna man Te Kaotioti 13 n taekan bwa e kanga n reitanako te buaka anne n te bong aei? E kanga “raraan te Tibuteteei” ao “te taeka man [am] kakoaua” (Te Kaotioti 12:11) n reitinako ni buokiko n te buaka aei?
Taraa naba 1 Nibwaai 14:12–14; Moronaai 7:12–13; Mote 4:1–4; Reirei ao Berita aika Tabu 29:36–37; Gospel Topics, “Te Buaka i Karawa,” topics.ChurchofJesusChrist.org.
“I noora te anera temanna … iai irouna te euangkerio ae akea tokina.”
Teuana koron bukin te taeka ni burabeti inanon kiibu aikai ae e riki ngke Moronaai e kaoti nakon Iotebwa Timiti ao kairia nakon taian rekooti are e rairi ao boreetin ngkai ae Ana Boki Moomon. Te Boki aei iai nanona te “euangkerio ae ake tokina” are ti kabaeaki ma kabwarabwara nakon “aaba ni kabane, ao botannaomata ni kabane, reeti, neewe ao aomata” (Te Kaotioti 14:6).
N reiakinan taekaia tabeman anera ake a tia n ira nanon kaokan te euangkerio ae ake tokina, taraa Reirei ao Berita aika Tabu 13; 27:5–13; 110:11–16; 128:20–21.
Taraa naba “The Restoration of the Fulness of the Gospel of Jesus Christ: A Bicentennial Proclamation to the World,” ChurchofJesusChrist.org.
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
Te Kaoitoti 7:9, 13–15.Tera ae a reireiniira kiibu aikai bwa bukin tera ti na bainii mainaina ibukin te bwabetito ao otenanti n te tembora?
-
Te Kaotioti 7:14–17.Iangoia ni kaoiia kaain te utu n tibwauai aia namakin iaon ana berita te Uea inanon kiibu aikai. E na kanga Ana berita ni buokiira ngkana ti a mena inanon “karawawata ae korakora”? (kibu 14).
-
Te Kaotioti 12:7–11; 14:6.Tabeman kaain te utu a na kukurei ni korei tamnein mii ni burabeti a kabwarabwaraki n Te Kaotioti. Ibukin te katooto, koreakin tamnei ni boboto iaon Te Kaotioti 12 kona ni kairi nakon te marooro iaon te Buaka i Karawa (taraa kiibu 7–11). Tamnei a boboto iaon Te Kaotioti 14:6 kona ni kairi nakon te marooro iaon Kaokan te euangkerio.
Imwin warekan Te Kaotioti 14:6 ikotaki, iangoia ni kaoti tamneiia anera Moronaai ao tabeman anera ake a buoka kaokan te euangkerio inanon ara bong (taraa tamnei ni banen te kamataata aei). Tao kaain te utuu a kona n ikaruoruo n taui rake teuana te tamnei ao n tibwaua taekana are a kakaitauiia anera n rokoia “karekean te euangkerio ae akea tokina ni kabwarabwaraaki nako [ira].”
-
Te Kaotioti 12:11.Tera nanon te kibuntaeka “taeka man aia kakoaua”? E kanga ara kakoaua iroun Iesu Kristo ni buokiira ao tabeman n tokanikai iaon Tatan?
-
Te Kaotioti 13:11–14.Tera aia iango kaain te utu n taekan te man are e mwamwanaia aomata? Ti na kanga ni kinaa ao totokoi mwamwanaki ake ti noori inanon te aonaaba n te bong aei?
Ibukin iango aika a mwaiti rikiibukin reireinakiia ataei, taraa kamataata n te wiiki aei n Nakomai, Iriirai—Ibukin te Moanrinan.
Te Anene ae rineaki: “I Will Be Valiant,” Aia Boki n Anene Ataei, 162.
Kanakoraoan Am Kamatebwai I Bon Iroum
Kamwarakeko ni koroboki aika tabu. Beretitenti Russell M. Nelson e reirei, “Amwarake ni katoa bong n ana taeka te Atua e bon kakawaki ibukin kamaiuan te tamnei, riki inanon boong aikal man rikiraken kamangaongao” (“Hear Him,” Riaona, Meei 2020, 89). Tera ae nanonaki nakoim n “amwarake n ana taeka te Atua”?
Mwaing te maing nako eta: Moroni Delivering the Golden Plates, iroun Gary L. Kapp; Upon You My Fellow Servants, iroun Linda Curley Christensen and Michael T. Malm (Ioane te tia Bwabetito e katoka te Nakoanibonga ae te Aaroniki iaon Iotebwa Timiti); Keys of the Kingdom, iroun Linda Curley Christensen and Michael T. Malm (BeteroI, Iakobo, ao Ioane katoka te Nakoanibonga ae te Merekitereka iaon Iotebwa Timiti; Mii Ni Burabeti inanon te Kirtland Tembora, iroun Gary E. Smith (Mote, Eriati, ao Eria a kaoti nakon Iotebwa Timiti.Timiti ao Sidney Rigdon).