lam eo ej jijet ioon ujooj ko

Tijem̧ba 4–10

Revelesōn 1–5

“Aiboojoj, im Kajoor, N̄an … Lamb eo n̄an Indeeo”

Ļōmņak n̄an je kajjitōk ko am̧ kōn ta eo kwar riiti ilo Revelesōn. Innem kwomaron̄ kappukot uwaak ko n̄an kajjitōk ko am̧ ak kōmeļeļeiki ippān juon uwaan baam̧le eo ak ilo kūlaaj ko an Kabun̄ in.

Je En̄jake ko Rej Im̧we Eok

Em̧ōj ke an kar pen am̧ kwaļo̧k n̄an ro jet ta eo kwar en̄jake ilo juon en̄jake in jetōb ekajoor? Aolep kajin ko remaron̄ jabwe n̄an kōmeļeļeiki en̄jake ko ilo jetōb im im̧we ko. Bolen en̄in ej unin an Jon kar kōjerbal eļap kōkaļļe im pija ak annan̄ ko n̄an kōmeļeļeik revelesōn ko an reļļap im kabwilōn̄lōn̄. Emaron̄ kar kwaļo̧k ilo tupidodoin ke ekar lo Jisōs Kraist, ak n̄an jipan̄ kōj meļeļe en̄jake ko an, ekar kōmeļeļeiki Rilo̧mo̧o̧r ilo an kōjerbal naan kein: “Mejān rej āinwōt urur in kijeek,” “jān lo̧n̄iin jāje ekkan̄ im ruo mejān ej ilo̧k,” im “turun mejān āinwōt aļ ke ej romaak ilo an kajoor” (Revelesōn 1:14–16). Ilo am̧ riiti bok in Revelesōn, kajjieon̄ kappukot ennaan ko an Jon me ekar kōņaan bwe kwon ekkatak kaki im en̄jake, men̄e kwojjab meļeļe meļeļein aolep kōkaļļe ko. Etke emaron̄ kar keidi jarlepju ko ilo Kabun̄ n̄an kāāntōļ ko, Setan n̄an juon dragon, im Jisōs Kraist n̄an juon lamb? Āliktata, kwojjjab aikuj meļeļe aolep kōkaļļe ilo Revelesōn n̄an meļeļe aorōk unin tōl ko, ekoba unin tōl ko relukkun aorōk: Jisōs Kraist im Rikaļooran renaaj anjo̧ ioon aelōn̄ in kiin̄ an armej im an Setan.

pija ej bōk jikin ekkatak an juon make

Ļōmņak ko n̄an Ekkatak Jeje Ko Rekwojarjar Ippam̧ Make

Visōn eo an Jon ej katakin kōn karōk eo an Jemedwōj Ilan̄ n̄an lo̧mo̧o̧ren ajri ro nejin.

Bok in Revelesōn emaron̄ pen n̄an meļeļe ak jab ebbweer. Kallim̧ur ko an Jon emaron̄ im̧we eok n̄an kajjieon̄ wōt: “Em̧ōņōņō ro rej kōnono jān bok, im ro rej ron̄jake im meļeļe naan ko an kanaan in, im kōjparok men ko me kar jeje ie, bwe iien itok eo an Irooj ej epaaktok” (Ukok eo an Josep Smith, Revelesōn 1:3 [ilo Bible appendix], emphasis added).

Juon wāween n̄an ekkatak jān Revelesōn ej n̄an kappukot koneekjen ko n̄an karōk in lo̧mo̧o̧r. Kōmeļeļe in eļap emaron̄ jipan̄ eok:

• Jebta 5 im 12 ej kōmeļeļeiki m̧akūtkūt ko ilo mour in.

• Jebta ko 6–11, 13–14, 16–19 ej kōmeļeļeiki mour in im m̧akūtkūt ko ilo bwebwenato in laļ in.

• Jebta ko 2–3, 15, 20–22 ej kōmeļeļeiki Ekajet eo Āliktata im aibojooj eo me ej kōttar ro rej tiljek im m̧ool.

Ilo am̧ riiti, kajjitōkin eok make, “Ta eo menin ej katakin eō kōn karōk eo an Anij? Ta eo Anij ekar kōm̧m̧an n̄an jipan̄ eō eļļā ioon nana im jepļaak n̄an E? Ta kallim̧ur ko An n̄an ro rej m̧ool?”

Emaron̄ barāinwōt lukkun jipan̄ n̄an jeļā ke Katak im Bujen Ko 77 ej kōmeļeļeiki jet iaan kōkaļļe ko kar kōjerbali ilo Revelesōn. N̄an kakobaba, Ukook eo an Josep Smith ej kōmeļeļeik jejjo eoon ko ilo Revelesōn, kōn menin lale footnotes im bible appendix eo aolep iien.

Bar lale Bible Dictionary, “Jon,” “Revelation of Jon.”

Revelesōn 1

Jisōs Kraist ej Nejin Anij Emour.

Jebta eo jinoin tata ilo Revelesōn ej kōmeļeļeiki paaktokin Jisōs Kraist n̄an Jon ilo juon visōn. Bolen kwomaron̄ kōm̧m̧an juon laajrak in men ko ilo jebta in me ej ba kōn Jisōs Kraist, ekoba wōn E, im ta eo E kōm̧m̧ane n̄an kōj, im E ej āinwōt ta.

Jet men kwoj ekkatak enaaj itok jān kōkaļļe ko. Kejokļo̧kjeņ kōn ta eo Irooj emaron̄ kar kajjieon̄e n̄an katakin eok kōn E make kōn kōkaļļe kein. N̄an waanjon̄ak, kile bwe Rilo̧mo̧o̧r ej kūr an̄inn̄in E make “Alpa im Omega” im “m̧oktata im eo āliktata.” Etke kwoj ļōmņak taitōļ kein raorōk? Ta eo taitōļ kein rej katakin eok kōn Rilo̧mo̧o̧r?

Revelesōn 2–3

Jisōs Kraist elukkuun jeļā kōn eō im enaaj jipan̄ eō eļļā jān apan̄ ko aō.

Naan ko an Rilo̧mo̧o̧r ilo Revelesōn 2–3 ej kwaļo̧k bwe E ekar meļeļe kōn jeraam̧m̧an im apan̄ ko rejenoļo̧k n̄an kajjojo branch ko an Kabun̄ in ilo tōre ko an Jon. Ekar nōbar kijejeto ko an ro Rekwojarjar im barāinwōt kakkōļ er kōn men ko me rekar menin aikuj n̄an ukōti. Ta eo kwoj ekkatak jān nōbar im kakkōļ ko an Rilo̧mo̧o̧r?

Rilo̧mo̧o̧r ekar barāinwōt meļeļe jeraam̧m̧an ko am̧ im am̧ apan̄, im Ekōņaan bwe en jipan̄ eok. Rekoote kallim̧ur eo ekkā An kar letok n̄an ro rej anjo̧. Ta eo ej im̧we eok kōn kallim̧ur kein? Ta eo Irooj emaron̄ kōņaan bwe jān anjo̧ jān e? Ta eo jej aikuj kōm̧m̧ane n̄an bōk An jipan̄?

Revelesōn 4–5

Jisōs Kraist wōt emaron̄ kakūrm̧ool karōk eo an Jemedwōj Ilan̄.

Ta eo jej ekkatak kōn Jemedwōj Ilan̄ jān Revelesōn 4 im kōn Jisōs Kraist jān Revelesōn 5? Ļōmņak ta eo ej āinwōt n̄e jej aolep kile bwe Jisōs Kraist (“Lamb” eo) enaaj kakūrm̧ool karōk eo an Anij (Rilo̧mo̧o̧r emaron̄ “kapeļļo̧k bok eo im … jiljilimjuon sil ko an” [Revelesōn 5:5]). Etke Jisōs Kraist emaron̄ kar kōm̧m̧ane menin make iaan? Ewi wāween am̧ maron̄ kwaļo̧k tōmak eo am̧ ilo E āinwōt am̧ Rilo̧mo̧o̧r?

Bar lale Job 38:4–7; Katak im Bujen Ko 77:1–7.

pija eo ej bōk jikin ekkatak an baam̧le

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Revelesōn 1:20.Etke Jisōs ekar keidi Kabun̄ eo An n̄an juon kāāntōļ? (lale Matu 5:14–16). Al juon al kōn wāween ad maron̄ āinwōt juon meran ilo juon kāātōļ, āinwōt “Shine On” (Children’s Songbook, 144).

Revelesōn 2–3.Kwon kōm̧m̧an tarin ke Jon ekar kajjitōk n̄an leļo̧k juon ennaan n̄an baam̧le eo am̧ āinwōt ko me ekar leļo̧k n̄an kabun̄ ko ilo tōre eo an. Ta eo ej ba enaaj em̧m̧an? Ewi wāween am̧ em̧m̧anļo̧k?

Revelesōn 3:15–16.Ālkin riiti eoon kein, baam̧le eo am̧ remaron̄ daake juon dān emeneen me eņņoļo̧k n̄e ej bwil ak m̧ōļo. Ta meļeļein n̄an kōmeneen ilo mour in jetōb?

Revelesōn 3:20.Kwaļo̧k pija in Rilo̧mo̧o̧r an kōlaļlaļ ilo kōjem̧ eo (lale jem̧ļo̧kin unin tōl in) āinwōt an baam̧le eo am̧ riiti Revelesōn 3:20. Etke Jisōs ej kōlaļlaļ ijjeļo̧kin an kajju deļon̄e? Ro uwaan baam̧le eo remaron̄ kajjojo kōlaļlaļ ilo juon kōjem. Innem juon armej ilo baam̧le eo emaron̄ leļo̧k juon ļōmņak kōn wāween ad maron̄ “kapeļļo̧k kōjem eo” n̄an Rilo̧mo̧o̧r im kōtļo̧k bwe eo uwaan baam̧le eo en deļo̧n̄. Elmen en̄jake eo n̄e Rilo̧mo̧o̧r enaaj pād ilo m̧weo im̧ōd?

Revelesōn 4:10–11.Ta meļeļein kabun̄ jar n̄an Jemedwōj Ilan̄? Ta eo jejeļā kōn E me ej kōm̧m̧an bwe jen kōņaan kabun̄ jar n̄an E?

Revelesōn 5:6, 12–13.Etke Jisōs Kraist kar kūr e “Lamb”? Ta eo taitōļ in ej katakin kōj kōn E?

N̄an ļōmņak ko reļļapļo̧k ikkijeen katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Al eo kar elmakote: “Jesus, Once of Humble Birth,” Hymns, no. 196.

Kōkm̧anm̧anļo̧k Ad Katakin

Kōketak kōm̧m̧an kajjitōk. Kajjitōk ko rej juon kōkaļļe ke ro uwaan baam̧le eo repojak n̄an ekkatak im leļo̧k aer ļōmņak n̄an wāween aer uwaake ta eo kar katakin er kake. Katakin baam̧le eo am̧ wāween n̄an kappukot uwaak ko ilo jeje ko rekwojarjar. (Lale Teaching in the Savior’s Way, 25–26.)

Kraist ej kōlaļlaļ ilo juon kōjem

Kadeļo̧n̄e E, jān Greg K. Olsen