Jikin eo n̄an Indeeo, jān Keith Larson

Tijem̧ba 25=31

Revelesōn 15-22

“Eo ej Bōk Anjo̧ enaaj Jolōt Men Kein”

Jet iien mellijon̄n ko reļļap n̄an ekkatak ej ad jokālet me jejjab kōņaan ekkatak—me em̧ōj kadede ad jeļā. Ilo am̧ riiti eoon kein, ļōmņak kōn kein kam̧ool ko me Irooj eaar kōnan liwaj n̄an kwe.

Je En̄jake ko Rej Im̧we Eok

Ilo am̧ bar kakeememejļo̧k, bok in Revelesōn ej jino ippān Rilo̧mo̧o̧r ej kwaļo̧k ke E make ej “jinoin im jem̧ļo̧kin” (Revelesōn 1:8). N̄an kakkare, ej jem̧ļo̧k kōn naan kein rej eierļo̧k wōt juon: “N̄a ij … jinoin im jem̧ļo̧kin” (Revelesōn 22:13). Ta meļeļe in menin? Jinoin im jem̧ļo̧kin ta? Bok in Revelesōn ekajoor ilo an kam̧ool bwe Jisōs Kraist ej jinoin im jem̧ļo̧kin men otemjeļo̧k—ilo mour an armej me ekabwilōn̄lōn̄ im eļap im lo̧mo̧o̧r. E ej “Lamb eo em̧ōj m̧an E jān jinoin kōm̧anm̧an laļ” (Revelesōn 13:8). Im E ej kiin̄ ioon kiin̄ro me rej bōktok juon jem̧ļo̧k n̄an nanan ko, burom̧ōj, im barāinwōt mej im rijineete kōj ilo “lan̄ e kāāl im laļ e kāāl” (Revelesōn 21:1).

Aaet m̧okta jān lan̄ im laļ ko rekāāl tōpar tok, ekanooj lōn̄ men ko n̄an kōj n̄an anjo̧ jāni: kaen̄tanaan ko, pata ko, ajedeed in nana ko—aolepen men ko me Revelesōn ekajoor ilo an kōmeļeļeiki. Ak Jisōs Kraist ej pād ippād ilo bar m̧ōttan in. E ej “iju raan e rabōlbōl” me ej romaak ilo lan̄ emarok āinwōt juon kallim̧ur ke jimarok epaak tok (Revelesōn 22:16). Epaak an itok. E ej itok. Em̧ool ilo An kūr kōj, “Itok n̄an ippa” (Matu 11:28), Ej barāinwōt itok ippād. “Ij iwōj m̧ōkaj,” Ekar ba. Im kōn kōjatdikdik im tōmak me em̧ōj karreoik kōj ilo kijeel ko an apan̄ ko ilo raan ko āliktata, jej uwaak, “Aet, itok, Irooj Jisōs” (Revelesōn 22:20).

Ļōmņak ko n̄an Ekkatak Jeje Ko Rekwojarjar Ippam̧ Make

Revelesōn 16–18; 21–22

Irooj ej karuwaineneik eō n̄an em̧akūt jān Babilon im jolete “jikin kweilo̧k eo e kwōjarjar.”

Ālkin kam̧ool kōn jorrāān eo im kauwōtata ko ilo raan ko āliktata, Jon ekar lo juon ilju im jekļaj eo em̧m̧an me maron̄ kōmeļeļeiki ilo kean̄ eo an Irooj “Lo, Ij kōm̧m̧an men otemjej bwe ren kāāl” (Revelesōn 21:5). Juon wāween n̄an meļeļe ta meļeļe ej n̄an keidi oktakin kōmeļeļe eo an Jon kōn Babilon, kōkaļļe eo kōn men ko an laļ in im nana ko (lale Revelesōn 16–18), kōn kōmeļeļe eo an kōn Jerusalem eo ekāāl, kōkaļļe in aibojooj eo an celestial ilo aelōn̄ eo an Anij (lale Revelesōn 21–22). Jaat in itulaļ emaron̄ jipan̄ eok

Babilon	Jerusalem Ekāāl
Babilon Revelesōn 16:3-6	Jerusalem Ekāāl Revelesōn 21:6; 22:1–2, 17
Babilon Revelesōn 16:10; 18:23	Jerusalem Ekāāl Revelesōn 21:23–24; 22:5
Babilon Revelesōn 17:1–5	Jerusalem Ekāāl Revelasōn 21:2
Babilon Revelesōn 18:11, 15	Jerusalem Ekāāl Revelasōn 21:4
Babilon Revelesōn 18:12–14	Jerusalem Ekāāl Revelesōn 21:18–21; 22:1–2

Ta oktak ko jet kwoj loi?

Kwomaron̄ bar kejokļo̧kjeņ kōn ta meļeļein n̄an eok n̄an “kom̧win diwōjtok jān” Babiļon (Revelesōn 18:4). Ta eo kwoj loe ilo Revelesōn 21–22 me ej im̧we eok n̄an bar kōm̧m̧ane āindein?

Kōjota Eo Āliktata, jān Jon Scott

Revelesōn 20:12–15; 21:1–4

Aolep ajri ro nejin Anij naaj ekajet er jān bok in mour eo.

Ļōmņak n̄e juon rijeje eo ekar letok n̄an je juon bok kōn mour eo am̧. Ta dipdikin meļeļe ko ak en̄jake ko kwonaaj kar kōņaan kobaik waj? Eļan̄n̄e kwar jeļā bwe jerbal ko am̧ ilju im jekļaj renaaj bar jeje ak rekooti, enej elmen am̧ kar ukōt wāween am̧ mour? Ļōmņak kōn menin ilo am̧ riiti Revelesōn 20:12-15 Ta eo kwoj kōjatdikdik kar je kōn eok ilo bok in mour? Ewi wāween am̧ kōmeļeļeiki eddo eo an Rilo̧mo̧o̧r ilo bok in mour eo am̧? Ilo ļōmņak eo am̧ make, etke eaorōk jon̄an kar ņae etan “bok in mour an Lamb eo”? Revelesōn 21:27

Eļan̄n̄e ļōmņak in n̄an jutak im̧aan mejān Anij n̄an ekajet ejjab em̧m̧an ippam̧, ļōmņak in riiti Revelesōn 21:1–4. Kōnono kōn eoon kein, Elder Dieter F. Uchtdorf ekar ba:

Raan in Ekajet eo enaaj juon raan in tūriamo̧ im iakwe—juon raan in un̄ur bōro ko rerub, n̄e dān in kōmjalaal kōn buromōj rej oktak im erom̧ dān in kōmjalaal kōn kam̧m̧oolol n̄e aolep men renaaj emman. Aaet, enaaj ļap buromōj kōn bōd ko ad. Aaet, jenaaj ajļo̧k im metak kōn bōd ko ad make, ad jajeļo̧kjeņ, ad ineļap ekōm̧m̧an bwe jen likjab jān iien ko rem̧m̧an n̄an em̧m̧anļo̧k eo an jeklaj.

“Ak ewōr aō lōke ke jeban mōņōņō wōt kōn ekajet eo an Anij; jenaaj bwilōn̄ im obrak kōn jouj, tūriamo̧, im iakwe eo ejjeļo̧k jem̧ļo̧kin n̄an kōj, ro Nejin” (“O Ewi Jon̄an an Ļap Karōk eo an ad Anij!,” Liaona, Nob. 2016, 21).

Ekōjkan an m̧ool kein jelet wāween am̧ kalimjōk Ekajet eo Āliktata? Ta eo m̧ool kein rej im̧we eok n̄an ukōt mour eo am̧?

Bar lale Bible Dictionary, “Book of life.”

Revelesōn 22:18–19

Eoon kein rej ke meļeļein bwe ejjeļo̧k bar juon eoon ijjeļo̧kin Baibōļ?

Jet armej rekar riiti tok Revelesō 22:18–19 āinwōt juon un n̄an jum̧aer Bok in Mormon im jej ko jet rekwojarjar ilo raan ko āliktata. Kwomaron̄ kappukot juon uwaak n̄an jipadpad eo ilo ennaan eo an “My Words … Never Cease” (Liaona, Māe 2008, 91–94).

Ļōmņak ko n̄an Ekkatak Jeje ko Rekwojarjar an Nokon in Jota an Baam̧le

Revelesōn 15:2–4.Ilo an baam̧le eo am̧ kōmeļeļeiki eoon kein, eo me ej iookļo̧k “al in Moses” im “al in Lamb,” kwomaron̄ riiti al eo an Moses ilo Exodus 15:1–19, ippān ļo̧k al ko jet me rej kōnono kaki ilo jeje ko rekwojarjar Katak im Bujen Ko 84:98–102. Etke ro rej “anjo̧ ioon kidu eo” (Revelesōn 15:2) rej en̄jake aer kōņaan al al kein? Bolen baam̧le eo am̧ emaron̄ al juon al ak al in nōbar an ajri.

Revelesōn 19:7–9Bolen kwomaron̄ kappukote pija in m̧are eo ilo bwebwenato in baam̧le eo am̧ ak kōnono kōn juon iien ke baam̧le eo am̧ ekar pād ilo juon iien m̧are. Etke m̧are ej juon men em̧m̧an n̄an keidi n̄an bujen eo an Irooj ippān Kabun̄ eo An? (Bar lale Matu 22:1–14.)

Revelation 20:2–3.Ewi wāween an 1 Nipai 22:26 jipan̄ kōj meļeļe kōn ta meļeļein n̄an Setan jamin “rōļo̧k”?

Revelesōn 22:1–4.Ta meļeļein n̄an bōk etan Rilo̧mo̧o̧r “ioon [bōrar]”? (Revelesōn 22:4; bar lale Exodus 28:36–38; Mosaia 5:7–9; Alma 5:14; Moronai 4:3; Katak im Bujen Ko 109:22; David A. Bednar, “Honorably Hold a Name and a Standing,” Liaona, Māe 2009, 97–100).

N̄an ļōmņak ko reļļapļo̧k ikkijeen katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Al eo kar elmakote: “When He Comes Again,” Children’s Songbook, 82–83.

Kōkm̧anm̧anļo̧k Ad Katakin

Lale kūr ko eļan̄n̄e kar ļoori. “N̄e kwoj bar roolikļo̧k im kajjitōk kōn juon kūr n̄an eo̧ron̄, kwoj kwaļo̧k n̄an [ro uwaan baam̧le eo am̧] ke kwoj kea kōn er im wāween an gospel eo kōjeraam̧m̧an mour ko aer. Kwomaron̄ bar leļo̧k n̄an er iien ko rem̧m̧an n̄an kwaļo̧k en̄jake ko aer” (Teaching in the Savior’s Way, 35).

Kraist ej kaņōk kobe būrōrō im jijet ioon kidia mouj eo.