Iakwe Eweppān, jān Del Parson

Nobōm̧ba 27–Tijem̧ba 3

1–3 Jon; Jud

“Anij Yokwe”

Ilo am̧ riiti Leta ko an Jon im Jud, kappukot im̧we kōn wāween am̧ kwaļo̧k iakwe eo am̧ n̄an Anij. Je en̄jake im̧we kein im kōm̧m̧an ekkar n̄ani.

Je En̄jake ko Rej Im̧we Eok

Ke Jon im Jud rekar je leta ko aer, bōd in katak ko rekar kadede jino tōl elōn̄ Armej ro Rekwojarjar bwe ren bun̄ jān tōmak. Jet rūkaki ro reriab rekar bar kajjitōkin eļan̄n̄e Jisōs Kraist ekar lukkun waļo̧k “ilo kanniōk” (lale, n̄an waanjon̄ak, 1 Jon 4:1–3; 2 Jon 1:7). Ta eo juon ritōl an Kabun̄ in emaron̄ kōm̧m̧an ilo kain jekjek rot in? Rijilōk Jon ekar uwaak ilo an kwaļo̧k kam̧ool eo an make kōn Rilo̧mo̧o̧r: “Men eo ear jān jinoin, eo kōm ar ron̄jake, eo kōm ar loe kōn mejem, eo kōm kar kalimjeke, im peim raar un̄ūri kōn Naan in mour” (Josep Smith Ukook, 1 Jon 1:1 [in 1 Jon 1:1, footnote a]). Innem Jon ekar katakin kōn iakwe: Iakwe eo an Anij n̄an kōj im iakwe eo jej aikuj kwaļo̧k n̄an E im aolep ajri ro Nejin. Ālkin aolep men kein, Jon ekar juon rikam̧ool kōn menin, barāinwōt. E make ekar en̄jaek iakwe eo an Rilo̧mo̧o̧r (lale Jon 13:23; 20:2), im ekar kōņaan bwe Armej ro Rekwojarjar rne en̄jake ejja iakwe eo wōt. Naan in kam̧ool eo an Jon im katak ko kōn iakwe remenin aikuj āinwōt ilo raan kein, n̄e tōmak ilo Jisōs Kraist armej rej bere im elōn̄ katak ko reriab. Riit leta ko an Jon emaron̄ jipan̄ kōj jelm̧ae apan̄ ko rainin kōn peran, bwe “ejjeļo̧k lōļn̄o̧n̄ ilo yokwe; a yokwe e weepān ej joļo̧k lōļn̄o̧n̄” (1 Jon 4:18).

Ļōmņak ko n̄an Ekkatak Jeje Ko Rekwojarjar Ippam̧ Make

1 Jon; 2 Jon

Anij ej meram, im Anij iakwe.

Eļan̄n̄e kwe eo kwoj kāālet juon ak ruo naan n̄an kōmeļeļeik Anij, en kar naan rōt? Ilo leta ko an, Jon ekkā an kōjerbal naan ko “meram” im “yokwe” (lale, n̄an waanjon̄ak, 1 Jon 1:5; 2:8–11; 3:16, 23–24; 4:7–21). Ilo am̧ riiti leta ko ruo jinoin an Jon, kejokļo̧kjeņ kōn en̄jake ko an Jon kōn meram im iakwe eo an Rilo̧mo̧o̧r. N̄an waanjon̄ak, ļōmņak kōn ta eo Jon ekar ekkatak jān katak ko an Jisōs ilo Jon 3:16–17; 12:35–36, 46; 15:9–14; 19:25–27. Kwoj ke lo men ko reiten juon wōt ikōtaan katak kein im ta eo 1 Jon ej katakin kōj kōn meram im iakwe eo an Anij? Ta en̄jake ko rekar katakin eok ke Anij ej meram im iakwe?

1 Jon 2–4; 2 Jon

“Eļan̄n̄e jej yokwe doon, Anij ej pād ilo kōj.”

Kwonaaj bar lo naan ko āinwōt “pād wōt” im “pād” elōn̄ kōttan āliji ilo aolep leta ko an Jon. Kappukot naan kein, eļaptata ilo am̧ riiti 1 Jon 2–4 im 2 Jon. Ta eo kwoj ļōmņak ej meļeļe in n̄an “pād wōt” ak “pād” ilo Anij im katak ko An? (lale 2 Jon 1:9). Ta meļeļein n̄an eok n̄an kōm̧m̧an bwe Anij en “pād wōt” ak “pād” ilo kwe?

1 Jon 2:24–3:3

Imaron̄ erom̧ āinwōt Jisōs Kraist.

Kōttōpar in n̄an erom̧ āinwōt Kraist eļap ke n̄an kwe? Ļōmņak kōn kapilōk in kōketak eo an Jon: “Ajri ro nejū, kom̧win pād wōt ilo E, bwe eļan̄n̄e Enaaj weaaktok, jen peran … [im] jenaaj āinwōt E” (1 Jon 2:28; 3:2). Ta eo kwoj loe ilo 1 Jon 2:24–3:3 me ej letok n̄an eok lōke im aeņōm̧m̧an āinwōt juon rikaļoor an Jisōs Kraist? Ilo am̧ ekkatak leta ko an Jon, kappukot pedped in katak ko jet ak kapilōk ko me remaron̄ jipan̄ eok ilo kijejeto ko am̧ n̄an erom̧ āinwōt Kraist.

Bar lale Moronai 7:48; Katak im Bujen Ko 88:67–68; Scott D. Whiting, “Erom̧ Āinwōt E,” Liaona, Nob. 2020, 12–14.

1 Jon 4:12

Ejjeļo̧k “armej ear … lo Anij jabdewōt iien”?

Ukok eo an Josep Smith, 1 Jon 4:12 ej kwaļo̧k bwe that “ejjeļok armej ear lo Anij jabdewōt iien, ijjeļo̧kin wōt ro rej tōmak” (ilo 1 Jon 4:12, footnote a; bar lale Jon 6:46; 3 Jon 1:11). Jeje ko rekwojarjar rej rekoote jejjo waanjon̄ak k ke Anij Jemed ekar kwaļo̧k E make n̄an armej ro kajjojo me rej tōmak, ekoba Jon make (lale Revelesōn 4; bar lale Jerbal 7:55–56; 1 Nipai 1:8; Katak im Bujen Ko 76:23; Josep Smith—Bwebwenato 1:16–17).

1 Jon 5

Ilo aō kōjerbal tōmak eo aō ilo Jisōs Kraist im bar ļotak, imaron̄ anjo̧ jān laļ in.

Ilo am̧ riiti 1 Jon 5, kappukot ta eo jej aikuj kōm̧m̧an n̄an anjo̧ ioon laļ in im bōk mour indeeo. Enej elmen jekjekin ilo mour eo am̧ n̄e kwoj anjo̧ ioon laļ in? Kwomaron̄ bar kappukot uwaak ko im en̄jake ko ilo ennaan eo an Elder Andersen “Anjo̧ jān Laļ” (Liaona, Māe 2017, 58–62).

Jud 1

“[Kalōk] kom̧ ioon ami tōmak e kwōjarjar.”

Ta eo Jud 1:10–19 ej katakin eok kōn ro me rej tariņae ņae Anij im jerbal eo An? Ta eo kwoj ekkatak jān eoon ko 20–25 kōn wāween dāpij wōt ilo kajoor tōmak eo am̧ ilo Jisōs Kraist?

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

1 Jon 2:8–11.N̄an jipan̄ baam̧le eo am̧ kejokļo̧kjeņ kōn katak ko an Jon, aiin doon ilo juon room emarok bwe ro uwaan baam̧le eo ren en̄jake oktak eo ikōtaan “ilo marok” im etetal “ilo meram.” Ewi wāween an dike im kōjdat kōm̧m̧an bwe jen etetal ilo maron̄ im tippok? Ewi wāween an iakwe doon bōktok meram n̄an mour ko ad?

1 Jon 3:21–22.Ta eo ilo eoon kein me ej kōļapļo̧k ad “lōke” ilo Anij im ilo maron̄ ko ad n̄an bōk uwaak ko n̄an jar ko ad?

Kōjparok kien ko an Anij ej jipan̄ kōj anjo̧ jān laļ in.

1 Jon 5:2–3.Elōn̄ ke jabdewōt kein ko me jej ļōmņak “juon men enana” ak epen n̄an ļoore? Ewi wāween an iakwe eo ad n̄an Anij ukot wāween eo jej en̄jake kōn kien ko An?

3 Jon 1:4.Ta meļeļe in n̄an “etetal ilo m̧ool”? Kwomaron̄ bōk iien in em̧m̧an n̄an ba n̄an ro uwaan baam̧le eo wāween am̧ kar lo er aer etetal ilo m̧ool im kōnono kōn lan̄lōn̄ eo me ej bōktok n̄an eok. Ro uwaan baam̧le eo remaron̄ en̄jake lan̄lōn̄ ilo aer jeje kōn ak jin̄n̄aiki m̧ool ko me rekar ekkatak ioon pepa annan̄ in ne im kōjerbali n̄an kōm̧m̧an juon iaļ bwe baam̧le eo am̧ en maron̄ etetal ippān doon ie.

Jud 1:3–4.Elōn̄ ke kauwōtata ko ilo jetōb me rekar “deļo̧n̄tok ilo ittino” n̄an mour ko ad im baam̧le? (Jud 1:4). Ewi wāween ad ļoor katak ko an Jud n̄an “kate kom̧ kōn tōmak” im anjo̧ ioon kauwōtata kein? (Jud 1:3). Ta eo jemaron̄ kōm̧m̧ane n̄an lukkuun lale bwe “aeņōm̧m̧an, kab yokwe en lōn̄ļo̧k” ilo baam̧le ko ad? (Jud 1:2).

N̄an meļeļe ko reļļapļo̧k ikkijeen katakin ajrio, lale unin tōl eo an wiik in ilo Itok, Ļoor Eō—N̄an Būraimere.

Al eo kar elmakote: “Where Love Is,” Children’s Songbook, 138–39.

Kōkm̧anm̧anļo̧k Am̧ Ekkatak Ippam̧ Make

Pukot iakwe eo an Anij. Būreejtōn M. Russell Ballard eaar katakin, “Gospel [eo] ej juon gospel in iakwe—iakwe n̄an Anij im iakwe n̄an doon” (“God’s Love for His Children,” Ensign, Māe 1988, 59). Ilo am̧ riiti jeje ko rekwojarjar, ļōmņak in je ak kakōļļeik kein kam̧ool ko kōn iakwe eo an Anij.

Etetal Ippa, jān Greg K. Olsen