“Nobōm̧ba 27–Tijem̧ba 3. 1–3 Jon; Jud: ‘Anij Yokwe,’” Itok, Ļoor Eō—N̄an Būraimere: 2023 (2021)
“Nobōm̧ba 27–Tijem̧ba 3. 1–3 Jon; Jud,” Itok, Ļoor Eō—N̄an Būraimere: 2023
Iakwe eo Ewāppen, jān Del Parson
Nobōm̧ba 27–Tijem̧ba 3
1–3 Jon; Jud
“Anij Yokwe”
Leta eo an Jon im Jud rej kwaļo̧k kōn iakwe im meram̧ eo an Jemedwōj Ilan̄. Ilo am̧ ekkatak wiik in, kōļmenļo̧kjeņ etke ajri ro kwoj katakin raikuj meram im iakwe eo An ilo mour ko aer. Keememej in kōjerbal aolep m̧akūtkūtk ko kalikari ilo laajrak in, ejjab baj ro ilo iiō in kurup ko kwoj katakin.
Kajjitōk bwe ren Kwaļo̧k
Kajjitōk ippān ajri ro n̄an kwaļo̧k elmen aer en̄jake iakwe eo an Jemedwōj Ilan̄ im Jisōs ak etke rej ļōmņak Jemedwōj im Jisōs rej meram n̄an kōj.
Katakin Katak eo: Ajri ro Reddikļo̧k
Ļoor Jisōs ej bōktok meram n̄an mour e aō.
Jon ekar je kōn meram n̄an kwaļo̧k kōn im̧we eo an Jemedwōj Ilan̄ im Jisōs ilo mour ko ad. Ļōmņake elmen am̧ maron̄ jipan̄ ajri ro jeļā kōn meram eo Rej letok.
M̧akūtkūt ko Maron̄ Kōm̧m̧ani
-
Kajjitōk ippān ajri ro n̄an kwaļo̧k etan men ko me rej kwaļo̧k meram. Kōnono ippāer kōn jeraam̧m̧an eo kōn meram, āinwōt jipan̄ kaddōk mennin eddōk ko, kōtļo̧k ad loe, im letok māņeen. N̄an meļeļe elmen an Jisōs bōktok meram n̄an kōj, remaron̄ bōk koņaer kōmeram juon teen̄ki ilo pijain Jisōs Kraist ilo aer ba, “Anij e meram” (1 Jon 1:5). Kam̧ool bwe Jemedwōj Ilan̄ im Jisōs Kraist remaron̄ bōktok meram n̄an mour ko ad n̄e jej kajjieon̄ in ļoore ta eo Rej ba.
-
Kajjitōk ippān ajri ro n̄an bōk koņaer kotak pijain juon tōm̧a ak kāāntōļ. Ilo an kajjojo ajri ro kotak pija eo, jipan̄ e ļōmņaki wāween ko jemaron̄ bōk meram in Jisōs Kraist ilo mour ko ad.
Ij kwaļo̧k aō iakwe n̄an Anij n̄e ij kwaļo̧k iakwe n̄an ro jet.
Jipan̄ ajri ro lo ekkejel eo ikōtaan iakwe eo rej en̄jake kōn Jemedwōj Ilan̄ im iakwe eo rej kwaļo̧k n̄an ro Nejin.
M̧akūtkūt ko Maron̄ Kōm̧m̧ani
-
Riiti 1 Jon 4:11 n̄an ajri ro, im al juon al kōn iakwe eo an Anij, āinwōt “My Heavenly Father Loves Me” (Bok in Al an Ajiri Jidik Ro, 228). Kajjitōk ippān ajri ro n̄an kwaļo̧k ekōjkan aer jeļā bwe Jemedwōj Ilan̄ ej iakwe er. Ālkin kajjojo uwaak, kajjitōk ippān ajri ro n̄an bakwuj er make im ba “Anij e yokwe, im Anij ej yokwe eō.”
-
Riit 1 Jon 4:21 n̄an ajri ro. Kajjitōk ippān ajri ro n̄an kōnono kake ak ikkure kōn wāween ko remaron̄ kwaļo̧k iakwe n̄an ro m̧ōttaer, āinwōt bakuji ak kōm̧m̧an kaat. Eļmen an ro m̧ōttad en̄jake men kein? Eļmen an Jemedwōj Ilan̄ en̄jake n̄e jej kōm̧m̧an men ko rejouj n̄an ro jet?
Ij kwaļo̧k aō iakwe n̄an Jisōs Kraist ilo kōjparok kien ko An.
Jon ekar kwaļo̧k bwe Anij “kien ko an rejjab eddo” (1 Jon 5:3). Ijoke, ļoor kien ko ej juon wāween n̄an kwaļo̧k n̄an iakwe E.
M̧akūtkūt ko Maron̄ Kōm̧m̧ani
-
Riiti 1 Jon 5:3, im kajjitōk ippān ajri ro n̄an ron̄jake ta eo eoon in ej ba kōn elmen ad kwaļo̧k bwe jej iakwe Anij. Kajjitōk ippān ajri ro n̄an kwaļo̧k etan aolepen kien ko n̄e remaron̄e. Ewi wāween ad en̄jake n̄e jej pokake kien ko an Jemedwōj Ilan̄?
-
Kajjitōk ippān ajri ro n̄an jin̄aiki juon pija ej kwaļo̧k juon wāween remaron̄ kwaļo̧k n̄an Jemedwōj Ilan̄ ke rej iakwe E. N̄an waanjon̄ak, remaron̄ jin̄aiki juon pijain er make kōjparok juon iaan kien ko.
-
Al juon al ippān doon kōn pokake, āinwōt“Kelet ial eo Ejim̧we” (Bok in Al eo an Ajiri Ro, 160–61). Ewi wāween ad en̄jake n̄e jej pokake?
Katakin Katak eo: Ajri ro Rerūttoļo̧k
Ij kwaļo̧k aō iakwe n̄an Anij n̄e ij kwaļo̧k iakwe n̄an ro jet.
Elmen am̧ maron̄ jipan̄ ajri ro meļeļe bwe iakwe Anij ekitbuuj iakwe ro ipeļakid—men̄e armej ro remaron̄ in oktak jān kōj ak pen n̄an iakwe?
M̧akūtkūt ko Maron̄ Kōm̧m̧ani
-
Kajjitōk ippān ajri ro n̄an antoone n̄e juon eo ekāāl ej kab pād ilo jikuuļ ak ward im jab jeļā kajjien aolep ijo. Elmen an armej in en̄jake? Kajjitōk ippān juon ajri n̄an riiti 1 Jon 4:7–8. Ta eo eoon in ej elmakot in kōn ekōjkan wewein ad aikuj in kōm̧m̧an n̄an armej in? Kwaļo̧k jet jekjek ko rej ein juon doon, ak kajjitōk ippān ajri ro n̄an ļōmanke jekjek ko me remaron̄ kwaļo̧k iakwe.
-
Kajjitōk ippān ajri ro n̄an riit 1 Jon 4:7–8, 20–21, im kajjitōk ippāer n̄an je juon jentōj n̄an kōmeļeļei lo tukadu in ewi aer lōmņak kin katak eo eaorōktata ilo eoon kein. Ālkin aer kwaļo̧k jentōj ko aer, kwaļo̧k juon bwebwenato jān mour eo am̧ ak jān juon Jera ak Liaona māākjin ko me kwoj en̄jake rej kōmeļeļeiki ta ko eoon kein rej kwaļo̧ke (lale, n̄an waanjon̄ak, “Ba Iakwe Nan Halim,” Motta, Juun 2019, 8–9; ak Liaona, Juun 2019, F18–F19). Kajjitōk ippāer n̄an kwaļo̧k waanjon̄ok eo aer make. Elmen ad maron̄ kwaļo̧k iakwe n̄an ro ipeļaakid?
Ij kwaļo̧k aō iakwe n̄an Jisōs Kraist ilo kōjparok kien ko An.
Pokake kien ko emaron̄ pidodo n̄e jej meļeļe m̧ool ko kar kwaļo̧ki ilo 1 Jon 5:3. Elmen am̧ maron̄ jipan̄ ajri ro lo bwe kien ko rejjab eddo ak ej iien em̧m̧an n̄an kwaļo̧k aer iakwe n̄an Anij?
M̧akūtkūt ko Maron̄ Kōm̧m̧ani
-
Kajjitōk ippān ajri ro n̄an kōlaajraki ioon bo̧o̧t eo wāween ko remaron̄ kwaļo̧k n̄an Anij ke rej iakwe E. Innām̧ riit ippān doon 1 Jon 2:5–6; 5:2–5 n̄an eļapļo̧k meļeļe. Elmen ad pokake kien ko kwaļo̧k ke jej iakwe Jemedwōj Ilan̄?
Kōjparok kien ko an Anij ej jipan̄ kōj anjo̧ ion laļin.
-
Riiti 1 John 4:17, im kōmeļeļeiki n̄an ajri ro bwe n̄an “peran ilo raan in ekajet eo” ej meļeļein bōk leke im aenōm̧m̧an n̄e rej jutak im̧aan Anij n̄an ekajet. Ta eo eoon in ej katakin bwe jej aikuji n̄an bōk peran in? Ta jet men ko jemaron̄ kōm̧m̧ani kiiō n̄an peran im̧aan Anij?
Imaron̄ tiljek men̄e ro jet rej kōm̧m̧an kōjak kōn n̄a.
Kōnke jej rikaļooraņ Jisōs Kraist, ro jet rej kōm̧m̧an kōjak kōn tōmak ko ad ak wāween ad mour jet ien. Eoon kein epād ie kapilōk eo an Jud kin wewein ad tiljek wōt ilo jekjek rot in.
M̧akūtkūt ko Maron̄ Kōm̧m̧ani
-
Kajjitōk ippān ajri ro n̄an kwaļo̧k iien ko n̄e ro jet rej kōm̧m̧an kōjak kake er ak n̄e rejeļa kajjier kōnke rekar kōm̧m̧ane men eo ejim̧we. Kajjitōk ippān ajri ro n̄an riiti Jud 1:18–22 im lale elmen ad maron̄ tiljek wōt n̄e ro jet rej kajjirere im kōm̧m̧an kōjak kōn kōj. Je ta eo rej lo ioon bo̧o̧t eo, im kōnono wāween ko remaron̄ ļoor kapilōk in.
-
Kōmeļeļeiki ettōņak eo an Liai (lale 1 Nipai 8:1–35), kajjitōk n̄an ippān jejjo̧ ajri n̄an riiti eoon ko jān 1 Nipai 8:26–28, 33. Kōnono elmen an armej ro ilo em̧ eo ekilap im aiboojoj kar kajjirere āinwōt an kōnono ko an Jud. Ta eo jemaron̄ kōm̧m̧ane n̄an jab im̧we jān ro rej kōm̧m̧an kōjak kake kōj ak jab errā kake ta eo jej tōmake? (lale 1 Nipai 8:30, 33).
Kōketak Ekkatak ilo M̧weo
Rojan̄ ajri ro n̄an kōm̧m̧an juon karōk n̄an kōm̧m̧an juon men n̄an kwaļo̧k meram eo aer ilo baam̧le ko aer.
Kōkōm̧anm̧an Ad Katakin
Ajri ro reniknik. Ilo jabdewōt iien komaron̄ en̄jake bwe ajri ro rejjab kōņaan ekkatak. Ak komaron̄ kalōk paoktok ko aer n̄an kūrtok er n̄an niknik, jin̄a, ak al kōn juon pedped in gospel. (Lale Katakin Einwot Rilomoor Eo,,25–26.)