Abentekiti

Katauraoaia Natim nakon Maiuakinan ana Kawai ni Berita te Atua

Ibukina bwa E tangiriko, e onimakiniko, ao e ataa am konabwai, E a tia Tamara i Karawa n anganiko tibwangam ae buokakia natim bwa a na toua man waaki nako n te kawai ae tabu, are kaeineti nakon te maiu ae akea tokina (taraa Reirei ao Berita aika Tabu 68:25–28). Kanoan aei bon katauraoan nanoia nakon karaoan ao kawakinan berita aika tabu, n aron berita n te bwabetito ao berita ake a karaoaki n te tembora. Bon berita aikai, ake a na kabaeaki iai natim ma aia Tia Kamaiu, Iesu Kristo.

A bati kawai ni katauraoia natim inanon mwanangaia n te kawai ae tabu, ao bon Tamara are i Karawa are e na kaoti kawai aika moan te tamaroa are e na rang n ibuobuoki nakoia. Inanon ukoran te kairi ae tabu, uringnga bwa e aki tii reke te reirei inanon taian kiraati ake a kakaraoaki. E koaua, bwa te mweenga bon te tabo n reirei ae tamaroa ibukina bwa a nooraki iai banna ni katooto aika tamaroa ni baika a uarereke—e nooraki aei ni maiura ni katoa bong. Katein touan kawain te berita ae tabu bon te teimatoa, botumwaka, bon ti te arona ma kamatebwaian kawain te berita. (Taraa “Home and Family,” Reirei n Ana Kawai te Tia Kamaiu [2022], 30–31.)

A bati kawai ni katauraoaia natim inanon mwanangaia n te kawai ae tabu.

Aikai tabeua iango ake a kaira te marooro. A kona n reke riki kawai n reireia ataei aika kaain te Moanrinan n te boki ae “Katauraoaia Natim nakon Maiuakinan ana Kawai ni Berita te Atua” n Nakomai, Iriirai—Ibukin te Moanrinan.

Bwabetito ao te Kamatoa

E reirei Nibwaai bwa “te mataroa are [ti] na rin iai” te kawai n te berita ae tabu “bon te rairannano ma te bwabetito inanon te ran” (2 Nibwaai 31:17). Karaoan tabem ni katauraoia am ataei nakon te bwabetito ao te kamatoa bon kamatoatoaaia n te kawai anne. Tibwanga aikai a moanaki ma te reirei iaon taekan te onimaki iroun Iesu Kristo ao te rairannano. E noraki naba iai reiakinan aron kaboouan ara berita n te bwabetito man kanakin te toa ni katoa wiiki.

Aikai tabeua bwaai n ibuobuoki aika a na kona ni buokiko: 2 Nibwaai 31Gospel Topics, “Bwabetito,” topics.ChurchofJesusChrist.org.

• Ngkana iai te waaki ae ko rinanona ae kakorakoraaki iai am onimaki iroun Tamara i Karawa ao Iesu Kristo, karakinna nakoia am ataei. Buoka te ataei bwa e na ataia ae te onimaki bon te bwai ae e kona n rikirake man korakora inanon te maiu aei. Tera ae e na karaoia te ataei ni kakorakora ana onimaki iroun Kristo imwain ae e bwabetitoaki?

• Ngkana e karaoa ae kairua am ataei, tibwauaia ma te kukurei taekan te bwaintangira ae te rairannano. Ao ngkana ko karaoa ae kairua, tibwaua te kukurei ae reke man te rairannano. Kaota am koaua bwa E maraki man mate Iesu Kristo ibukin ara bure, E anganira te korakora ni bitaki. Ngkana e kabwara ana bure natim, waekoa kabwaraa ana bure ma te kukurei.

• Reireina am ataei taekan te bwabetito. Kaoti tamnei ao tibwai ururing. Kabwarabwara am namakin, ao ana ibuobuoki am berita ao a kanga am berita n te bwabetito ni buokiko n ukoran kinaakin Iesu Kristo iroum, ao te kakabwaia ae teimatoa inanon maium. Kaungaa natim bwa e na titiraki.

• Ngkana iai te bwabetito n am utu ke uoote, kaira natim bwa e na iria. Maroroakin baike kam noria man namakin. Ngkana e kona ni karaoaki, reitaki ma te aomata are bwabetitoaki ao tabeka te titiraki ae kangai: “Bukin tera ko bwabetitoaki? E kanga arom ni katauraoiko?”

• Ngkana ko noria bwa e karaoi ana motinnano natim, kaota am kamoamoa. Katerea bwa karaoan motinnano a buokira ni kawakin berita aika tabu ake ti na karaoi n te bwabetito. Tera ara berita nakon te Atua ngke ti bwabetitoaki? Tera Ana berita nakoira? (taraa Motiaea 18:8–10, 13).

• Ngkana ko namakina te tamnei ae raoiroi ma natim (n te taromauri, ni warekan booki aika tabu, ke ni buokan raomi), tuangiia natim am namakin n tamnei ke namakin ake ko karekei. Tuanga natim bwa e na tibwaua ana namakin. Uringnga bwa a bati kawai aika e kona n taetae iai te Tamnei nakoia aomata, n ai aron are E taetae nakoim. Buoka am ataei bwa e na kinai taai ake e namakina iai korakoran te Tamnei ae Raoiroi.

• Kaai ni mataku n tabeua witeo man te Gospel Library iaan te atu ni iango ae “Ongo Irouna!” Maroroakini kawai aika kakaokoro ake a ongo bwanaan te Uea ana toro. Tuanga am ataei bwa e na korea te tamnei ke ni karaoa te witeo ae boboto iaon arona n ongo bwanaan te Tia Kamaiu.

• Marooro iaon kakabwaia aika reke man kaainakin Ana Ekaretia Iesu Kristo ibukiia Aika Itiaki ni Boong aika Kaitira. E kanga arom ni kaaniaki ma Tamara i Karawa ao Iesu Kristo ngkana ko beku ibukiia tabemwaang ao ngkana a beku ibukim? Buoka am ataei bwa e na iangoi kawai n ibuobuoki ao ni kakorakoraia tabemwaang ngkai ngkoe kaain te Ekaretia.

• Karika te toa bwa te tai ae tabu ma ni kakukurei inanon am utu. Buoka am ataei ni barongai kawai n iangoa Iesu Kristo n tain te bootaki n toa. Tera arora ni kaotia bwa e tabu iroura te bootaki n toa?

• Te maekatiin ae te Rao n taainako ao a kanoaaki n taian karaki, ao waaki ni kakukurei ake a na buokiia ataei ni katauraoia nakon te bwabetito ao te kamatoa. Anga te tai nakon am ataei bwa e na wareki tabeua booki ma ngkoe. (Tara naba te boki “Katauraoi nakon te Bwabetito” n aia iteraniba ataei n te Gospel Library.)

  

  E reirei Nibwaai bwa “te mataroa are [ti] na rin iai” te kawai n te berita ae tabu “bon te rairannano ma te bwabetito inanon te ran” (2 Nibwaai 31:17).

Reireinia Natim te Nakoanibonga

Te nakoanibonga bon te kariaia ao mwaakan te Atua are E karaoi ana mwakuri ni kakabwaiaia iai Natina. Ana nakoanibonga te Atua iai ngkai n te aonaaba n te bong aei n Ana Ekaretia Iesu Kristo Ibukiia Aika Itiaki ni Boong Aika Kaitira. Ni kabane kaain te Ekaretia ake a kawakin aia berita a kakabwaiaaki ma mwaakan te nakoanibonga mairoun te Atua inanon mweengaia ni kakorakoraia i bon irouia ao n aia utu (taraa Aeniboki ni Kabuta: Te Beku n Ana Ekaretia Iesu Kristo ibukiia Aika Itiaki ni Boong aika Kaitira, 3.5, ChurchofJesusChrist.org). Te mwaaka aei e na buokiia membwa bwa a na karaoa ana mwakuri ni kamaiu ao ni karietaata te Atua inanon maiuia ao aia utu (taraa Aeniboki ni Kabuta, 2.2).

Ti karekei otenanti man ana kariaia te nakoanibonga. A karaoi tibwangaia mmwaane ao aine n te Ekaretia man ana kariaia te nakoanibonga, iaan aia kaetieti naake iai irouia kingin te nakoanibonga. Ni kabane natin Tamara i Karawa—Natina mmwaane ao aine—a na boni kakabwaiaki ngkana e raka riki aia atatai iaon te nakoanibonga.

N reiakina riki taekan te nakoanibonga, tara Russell M. Nelson, “Kaubwai aika Tabu,” Riaona, Nobembwa. 2019, 76–79; Russell M. Nelson, “Boon Mwaakan te Nakoanibonga,” Riaona, Meei 2016, 66–69; “Tuan te Nakoanibonga,” mwakoro 3 n te Aeniboki ni Kabuta.

• Kariki otenanti n te nakoanibonga bwa boton maiun am utu. N aron aei, buoka natim bwa e na tauraoi tamneina ibukin te toa ni katoa wiiki. Kaunga am ataei bwa e na kakabwaiaaki ngkana e aoraki ke e kainnanoa te karaunano ao te kairiri. Karikia bwa anuam kaotan ana kakabwaia te Uea nakoia am utu rinanon mwaakan te nakoanibonga.

• N ami tai ni wareki koroboki aika tabu, karekea am tai ni maroroakin ana kakabwaia te Atua nakoia aomata rinanon Mwaakana. Tibwaua rongorongom ike ko kakabwaiaki iroun te Atua rinanon te nakoanibonga. Katooto ibukin kakabwaia ake ti karekei mairoun te Atua rinanon te nakoanibonga, taraa Aeniboki ni Kabuta, 3.2, 3.5.

• Reiakina waakin karekean te kariaia n te nakoanibonga iroun temanna n am utu. (A kona kaain te Nakoanibonga ae te Merekitereka ni karekei kaobiin kariaiakakiia n te mwaaka are a na anganaki man kanakoan aia i-meeri nakon [e-mail]; taraa naba “Request a Priesthood Line of Authority” n te Tienta n Ibuobuoki iaon ChurchofJesusChrist.org.) Maroroakinna bwa bukin tera e kakawaki te ataibwai bwa te kariaia n te nakoanibonga e roko mairoun Iesu Kristo. Bukin tera E tibwauaia ma ngaira?

• Reireina natim bwa imwin te bwabetito, a kona ni karekei mwaakan te nakoanibonga man kawakinan ana berita ni bwabetito. Bootaki n rinanon ana rongorongo Beretitenti Russell M. Nelson “Kaubwai aika Tabu” (Riaona, Nobembwa. 2019, 76–79). Tuangngiia natim aron rokon mwaakan te Atua inanon maium man otenanti n te nakoanibonga. Ibukin rinanin tabeua kawai ake ti kakabwaiaki iai man mwaakan te nakoanibonga, taraa Aeniboki ni Kabuta, 3.5.

• Maroroakina te titiraki ae “Tera aron ana toro te Uea?” Bootaki ni wareka Reirei ao Berita aika Tabu 121:36–42, ao kakaei kaeka. Ngkana ko noora te mwakuri ae karaoia am ataei (ke temanna) ni kakoroi nanon reirei ma katei ni kiibu aikai, katerea.

• Ngkana ngkoe ke natim e kauka te mataroa n te kiing ke e kamaiua te kaa, anaa te tai ae tau ni kabotaui kiing akanne nakon kiing ake iai irouia taan kairiiri n te nakoanibonga. (Ibukin nanon kingin nakoanibonga, taraa Aeniboki ni Kabuta, 3.4.1). Tera ae “kaukia” ke “kamaiui” kiingin te nakoanibonga ibukira? Taraa naba Gary E. Stevenson, “A Ngaa Kiing ao te kariaia n te Nakoanibonga?,” Riaona, Meei 2016, 29–32; “Where are the Keys?” (witeo), ChurchofJesusChrist.org.

• Ngkana ko katabuaki nakon nakoam, kaoa natim bwa e na nooria, ngkana e riai. Kaira natim bwa e na noora am mwakuri ni karaoa tibwangam. Ko kona naba ni kakaei kawai aika a nakoraoi are e kona teuanne ke neienne ni buokiko iai. Kabwarabwara namakinan mwakaan te Uea iroum inanon tibwangam.

Kawaran te Tembora—Bwabetito ao te Kamatoa ibukiia Maate

Te tembora bon kanoan ana babaire Tamara i Karawa ibukiia Natina. Inanon tembora, ti karaoi berita aika tabu ma Tamara i Karawa ngke ti karaoi otenanti aika tabu, ake a kairiira nakon Iesu Kristo. E a tia Tamara i Karawa ni katauraoa te kawai ibukiia Natina ni bane bwa a na karaoi berita aika tabu inanon otenanti, ai uana naba ma naake a aki karekei inanon te maiu aei. Bon moan te ririki are e koro iai 12 ana ririki, e a roro natim nakon te bwabetito ao te kamatoa inanon tembora ibukiia ana bakatibu ake a tia ni mate.

N reiakina riki taekan rongorongon te bwabetito ao te kamatoa ibukiia maate“, taraa “Taekan te Bonomwi ni Bwabetito ao te Kamatoa ibukiia Maate,” temples.ChurchofJesusChrist.org.

• Kamwaita kawaran te tembora nakon angaraoina. Marooro ma natim iaon bukin mwanangam ao ana mwakuri te tembora ni kaaniko ma Tamara i Karawa ao Iesu Kristo.

• Rinanoa ao maroroakin titiraki ibukin karekean te kariaia nakon te tembora ni kabane. Marooro ma natim iaon baike a taekinaki inanon te intawiu ni karekean te beeba ni kariaia nakon te tembora. Tibwauaia bwa bukin tera e kakawaki iroum te beeba ni kariaia nakon te tembora.

• Ikotaki wareka Maraki 4:6. Marooro iaon rairakin nanom nakoia am bakatibu. Ukera rongorongoia am bakatibu man kakaean rikim n te FamilySearch.org. Kakaeiia am bakatibu ake a riai ni bwabetito ao ni kamatoaki. E kona ni buokiko te tia rabakau n te tembora ao n rongorongon te utu n te uoote.

• Wareki tabeua buokan te reirei ae atuunaki n “Tembora” n aia iteraniba ataei n te Gospel Library. (Taraa naba “Katauraoan Natim nakon Bwabetito ao Kamatoa n te Tembora” ChurchofJesusChrist.org.)

Karekean te Kakabwaia n te Tamanuea

Te kakabwaia n te tamanuea e kona n riki bwa oin te kairi, bwaai ni karaunano, ao ni kaungaunga. Iai i nanona te reirei ae onoti mairoun Tamara i Karawa nakoira ao e na buokira n ataa rikira ae akea tokina ma bukin karuoara. Buoka natim bwa e na tauraoi ni karekea te kakabwaia n te tamanuea man am reirei nakoina ke kakawakin ao tabun te kakabwaia n te tamanuea.

N reiakina riki rongorongona, taraa Gospel Topics, “Kakabwaia n te Tamanuea,” topics.ChurchofJesusChrist.org.

• Tibwauaia nakon natim arom ni karekea am kakabwaia n te tamanuea. Ko kona n tibwauai bwaai n aron ae ko kanga ni katauraoiko nako iai, e kanga ni buokiko ni kaan riki ma te Atua, ao ko kanga ni kabonganaa te kakabwaia inanon maium. Ko kona naba ni kaoa natim bwa e na reitaki ma ami koraki ake a tia ni karekea aia kakabwaia n te tamanuea.

• Kabanea ami tai n wareki tabeua buokan te reirei man Gospel Topics, “Kakabwaia n Tamanuea.” Rongorongon aron karekean te kakabwaia n te tamanuea, taraa Aeniboki ni Kabuta, 18.17.

• Ngkana iai am bakatibu ae reke ana kakabwaia n te tamanuea, e tamaroa warekana tabeua ma natim. Ni bubuti ibukin aia kakabwaia ara bakatibu ake a tia ni mate, kariniko man ChurchofJesusChrist.org, taona te akaunti icon ane ieta n te angatai ni koonan te tikuriin, ao rinea “Kakabwaia n Tamanuea.”

• Ngke e karekea natim ana kakabwaia n te tamanuea, kaoia am koraki ake a mena n te tai anne ni korei aia namakin ao n tibwauaia ma natim.

Kawaran te Tembora—te Entaumente

E tangiria te Atua n katabua, ke ni kakabwaiaia, Natina ni kabane ma “te mwaaka mai i eta” (Reirei ao Berita aika Tabu 95:8). Ti kawara te tembora ibukin karekean ara entaumente te taina n tai, ma berita ake ti karaoi ma te Atua ao korakoran te tamnei are E anganira bwa kanoan te entaumente e na kakabwaiaira ni katoa bongin maiura.

N reiakina riki rongorongon te entaumente n te tembora, taraa “About the Temple Endowment,” temples.ChurchofJesusChrist.org; Russell M. Nelson, “Prepare for the Blessings of the Temple,” Ensign,, Okitobwa 2010, 41–51.

• Kaota tamnein te tembora ni mweengam. Tuanga natim am namakin ake ko karekei n te tembora. Marooro iaon tangiran te Uea ao Ana auti iroum ao berita aika tabu ake ko karaoi inanona.

• Ukoria ni kabane temples.ChurchofJesusChrist.org. Kaai ni wareki rongorongo n aron aikai “Rongorongon te Entaumente n te Tembora” ao “Katauraoi nakon Ana Auti te Uea.” Anga te tai nakon natim bwa e na tabeki ana titiraki iaon te tembora. Kairiiri ibukin baika ko kona ni maroroakin itinanikun te tembora, taraa ana marooro Unimwane David A. Bednar “Katauraoi ni Karekei Bwai aika Kainnanoaki” (Riaona, Meei 2019, 101–4; katurua am wareware n te mwakoro are “Home-Centered and Church-Supported Learning and Temple Preparation”).

• Ngkana kam kakoaua ngkoe ma natim otenanti (n aron te toa ke te kakabwaia nakoia aoraki), maroroakin kanikina ake a katereaki inanon te otenanti anne. Tera nanon kanikina akanne? A na kanga ni kakoauaa Iesu Kristo? Aio e kona ni buoka ana katauraoi natim ni iangoi raoi nanon kanikina n otenanti n te tembora, are a kaota naba koauan Iesu Kristo.

• Buoka natim n ataia bwa e kanga ni kawakin ana berita ni bwabetito ae kabwarabwaraaki inanon Motiaea 18:8–10, 13. Buoka naba natim bwa e na nooria bwa e kanga te Uea ni kakabwaiaia. Karikirakea nanomatoan natim ni kawakin berita aika tabu.

• Kabatia te marooro ae kam kona ni karaoia iaon ana mwakuri ni berita aika tabu te tembora ni kaira am rinerine ao ni kaaniko ma Iesu Kristo. Ko kona ni kabongana te Aeniboki ni Kabuta, 27.2, n rinanon berita aika tabu ake ti karaoi inanon te tembora.

Beku ni Mitinare

E reireinira Unimwane David A. Bednar: “Te bwai ae moan te kakawaki ae ko kona ni karaoia ni katauraoi ibukin te wewete nakon te beku ko na riki bwa te mitinare imwaain ae ko mwananga ni mitinare . … Tiaki te kangaanga te aki mitinare, ma, te kanganga bon rikira bwa te mitinare ao ni mwakuri n ibuobuoki inanon maiura ma nanora, marurungira, iango, ao korakorara. … Ko a moanna n riki bwa te mitinare inanon maium” (“Rikim bwa te Mitinare,” Riaona, Nob. 2005, 45–46). Baike e rinanona natim rikim bwa te mitinare bon te kakabwaia nakoina n aki toki, tiaki tii inanon te tai ae uarereke ae na karaoa iai ana mwakuri.

N reiakina riki rongorongona, taraa Russell M. Nelson, “Tataekinan te Euangkerio n Rau,” Riaona, Meei 2022, 6–7; M. Russell Ballard, “I Kabwaiaaki Man te Mwakuri ni Mitinare,” Riaona, Meei 2022, 8–10; Missionary Preparation: Adjusting to Missionary Life, ChurchofJesusChrist.org.

• Kaota aron tibwauaan te euangkerio inanon kawai aika tamaroa. Tauraoi n tainako n tibwaua am namakin ibukin Tamara i Karawa ao te Tia Kamaiu ao kakabwaia ake ko karekei inanon rikim bwa kaain Ana Ekaretia. Kaoia tabeman bwa a na kaea te taromauri ao waaki ni kakukurei ibukiia utu.

• Karekea ana tai am utu n reitaki ma mitinare. Kaoia bwa a na reireiniia raoraomi, ke tuangia bwa a na reireinia aomata ni mwengami. Titirakiniia mitinare rongorongo ao mwakuri ake a noori ao ana ibuobuoki te mwakuri n mitinare ni kaania ma Iesu Kristo. Titirakiniia naba baika a tia ni karaoi (ke baike a iangoia n tangiria bwa a na tia ni kaman karaoia) ni katauraoia n riki bwa mitinare.

• Ngkana ko a tia ni mitinare, kabatiaa ao katabangaka am marooro iaon am taneiai. Ke kaoia raoraom ke am koraki ake a tia ni mitinare bwa a na karakina aia beku. Ko kona naba ni maroroakin kawai n tibwaua te euangkerio nakoia aomata inanon maium. Buoka natim bwa e na iangoi kawai n tibwaua te euangkeiro.

• Anga te tai nakon natim bwa e na anga te reirei nakoia ana utu iaon ana reirei te euangkerio. E kona naba natim n kataneiaa ni kaota ana koaua nakoia aomata. N aron aei, ko kona ni maroroakin titiraki n aron “Ti na kanga ni kabwarabwaraa Ana Boki Moomon nakon te aomata ae tuai ongo taekan te boki aei?” ke “A na kanga arora ni kabwarabwaraa kainnanoan te Tia Kamaiu nakon te aomata ae e aki kakoaua Kristo?”

• Buoka natim bwa e na mwengaraoi ngkana e marooro ma aomata. Tera tabeua kawai aika tamaroa ni waakina te marooro? Kaungaa natim bwa e na reireinna n ongora aia taeka aomata, karekea ootana n aia koaua, ao n tibwauai koaua n te euangkeiro ake e kona ni kakabwaiai maeuia.

• Tarai taai ike e kona iai natim n reiakin katei ao onimaki aika kaokoro. Buokiia natim bwa a na kinai man karinei reirei aika tamaroa man aaro ake tabeua.

Te Nako nakon te Tembora—Te Kabaeaki

Inanon te tembora, te buumwaane ao te buuaine a kona ni mareaki ibukin akea tokina. E karaoaki aei n te otenanti ae te kabaebae. E ngae ngke te otenanti aei e na kiriaria n reke iroun natim te aine ke te mmwaane, baike a uarereke, a bebete, ao aika kam teimatoa ni karaoi inanon ririki akanne e kona ni buokiia ni katauraoia nakon te kakabwaia ae moan te tamaroa aei.

N reiakinna riki, taraa Gospel Topics, “Te kabaebae,” topics.ChurchofJesusChrist.org.

• Kaai ni wareka“Te Utu: Te Katanoata nakon te Aonaaba” iaon ChurchofJesusChrist.org. Tera ana reirei te katanoata aei iaon te kukurei ni maiun te utu ao te mare ae nakoraoi? Ngkoe ma natim, rinea te reirei ae koreaki n te katanoata ao kamatebwaia. Ko kona n tarai kiibu ake a irekereke ma te reirei anne inanon Kairi nakon Koroboki aika Tabu. Ko kona naba ni katei kouru ni kakorakora maiuakinan reirei akanne inanon am utu. Ngkai ko mwakuri iaon am kouru, kaai ni maroroakina mwiin korakoran maiuakinan te reirei n am utu.

• Ngkoe ma natim, wareka ana marooro Beretitenti Dieter F. Uchtdorf “In Praise of Those Who Save” (Riaona, Meei 2016, 77–80). Ngkana ko roko n te mwakoro ae atunaki “A Society of Disposables,” ko kona ni kakaei bwaai inanon mweengam ake a kaakarenakoaki ao bwaai ake aki. Maroroakina aron am tararua ae okoro nakon bwaai ngkana ko tangiria bwa a na teimaan. Tera ae anga te reirei aei bwa a na kanga arora n tararuaa ara mare ao reitakira n te utu? Tera riki ae ti reiakinna man ana marooro Beretitenti Uchtdorf n aron te Tia Kamaiu ni kona ni buokiira ni kakorakorai maare ao utu?

• Ngkana ko a tia ni mareaki, reitaki ni marooro ma natim iaon am namakin ni baika a tamaroa, baika ko reiakin, ao baika ko katai ni katamaroai. Ngkana ngkoe ma kainnabam kam a tia ni kabaeaki n te tembora, kaotia nakon natim arom n keiakinna ni kawakin am berita aika tabu imarenami ma te Uea. Tuanga natim bwa ko kanga ni karika Tamara are i Karawa ao te Tia Kamaiu bwa boton ami reitaki ao A kanga ni buoki ngkami.

• Ngkana iai babaire n utu aika a na karaoaki, karaoa te marooro n utu. Taraia bwa a bane n taetae ao man mwaneaki aia marooro kaain te utu n tatabemaniia. Kabonganai marooro aikai bwa te tai ni kaota bannan te reitaki ae tamaroa ao te akoi n reitakin te utu, e ngae ngke e okoro aia taratara kaain te utu n tatabemaniia.

• Ngkana iai te bobuaka ke te kauntaba n te utu, kaota te tataonakinano ma te tangira. Buoka natim bwa e bwaati arona n tobwa te kauntaba ao ana ibuobuoki bannan te Tia Kamaiu ni katauraoia nakon te mare ae kakukurei. Kaai ni wareka Reirei ao Berita aika Tabu 121:41–42, ao marooro iaon reirei inanon kiibu aikai ake a kaineti ma te mare.