“ວັນທີ 17–23 ເດືອນມັງກອນ. ປະຖົມມະການ 5; ໂມເຊ 6: ‘ໃຫ້ສິດສອນສິ່ງເຫລົ່ານີ້ຢ່າງເປັນອິດສະລະກັບລູກໆຂອງເຈົ້າ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)
“ວັນທີ 17–23 ເດືອນມັງກອນ. ປະຖົມມະການ 5; ໂມເຊ 6,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022
Better than Paradise [ດີກວ່າທີ່ສຸຂະເສີມ], ໂດຍ ເຄັນໂດ ເຣ ຈອນສັນ
ວັນທີ 17–23 ເດືອນມັງກອນ
ປະຖົມມະການ 5; ໂມເຊ 6
“ໃຫ້ສິດສອນສິ່ງເຫລົ່ານີ້ຢ່າງເປັນອິດສະລະກັບລູກໆຂອງເຈົ້າ”
ຂະນະທີ່ທ່ານອ່ານ ແລະ ໄຕ່ຕອງ ປະຖົມມະການ 5 ແລະ ໂມເຊ 6, ໃຫ້ບັນທຶກຄວາມປະທັບໃຈທາງວິນຍານທີ່ທ່ານໄດ້ຮັບ. ມີຂ່າວສານໃດແດ່ທີ່ທ່ານພົບເຫັນ ທີ່ມີຄ່າຕໍ່ທ່ານ ແລະ ຄອບຄົວຂອງທ່ານ?
ບັນທຶກຄວາມປະທັບໃຈຂອງທ່ານ
ພຣະທຳ ປະຖົມມະການ 5 ສ່ວນຫລາຍແມ່ນບັນທຶກລຳດັບເຊື້ອສາຍລະຫວ່າງອາດາມ ແລະ ເອວາ ແລະ ໂນອາ. ເຮົາອ່ານລາຍຊື່ຂອງຫລາຍຄົນ, ແຕ່ເຮົາບໍ່ຮູ້ຫຍັງຫລາຍກ່ຽວກັບເຂົາເຈົ້າ. ແລ້ວເຮົາອ່ານກ່ຽວກັບເອນົກ, ຫົກລຸ້ນຄົນຈາກອາດາມ, ຜູ້ຖືກບັນຍາຍດ້ວຍປະໂຫຍກທີ່ໜ້າສົນໃຈ ແລະ ບໍ່ຖືກອະທິບາຍນີ້ວ່າ: “ແລະ ເອນົກໄດ້ດຳເນີນຊີວິດກັບພຣະເຈົ້າ: ແລະ ລາວກໍໄດ້ຫາຍຕົວໄປ; ເພາະພຣະເຈົ້າໄດ້ຮັບເອົາລາວໄປ” (ປະຖົມມະການ 5:24). ແນ່ນອນ ຄົງມີເລື່ອງລາວຢູ່ເບື້ອງຫລັງ. ແຕ່ປາດສະຈາກຄຳອະທິບາຍເພີ່ມເຕີມ, ກໍມີລາຍຊື່ຂອງຫລາຍລຸ້ນຄົນໄດ້ຖືກລະບຸໄວ້ຕໍ່ໄປ.
ໂຊກດີແຕ່, ໂມເຊ 6 ເປີດເຜີຍຂໍ້ມູນເພີ່ມເຕີມກ່ຽວກັບເລື່ອງລາວຂອງເອນົກ—ແລະ ມັນເປັນເລື່ອງລາວຈົບດີ. ເຮົາຮຽນຮູ້ເຖິງຄວາມຖ່ອມຕົວຂອງເອນົກ, ເຖິງຄວາມບໍ່ໝັ້ນຄົງຂອງເພິ່ນ, ເຖິງສັກກະຍະພາບທີ່ພຣະເຈົ້າເຫັນໃນຕົວເພິ່ນ, ແລະ ເຖິງວຽກງານອັນຍິ່ງໃຫຍ່ທີ່ເພິ່ນໄດ້ເຮັດໃນຖານະສາດສະດາຂອງພຣະເຈົ້າ. ເຮົາກໍເຫັນພາບທີ່ແຈ່ມແຈ້ງຫລາຍກວ່າເກົ່າ ເຖິງຄອບຄົວຂອງອາດາມ ແລະ ເອວາ ຂະນະທີ່ມັນຄືບໜ້າຕະຫລອດທົ່ວຫລາຍລຸ້ນຄົນ. ເຮົາອ່ານກ່ຽວກັບ “ອຳນາດຢ່າງຫລວງຫລາຍ” ຂອງຊາຕານ ແລະ ອ່ານກ່ຽວກັບພໍ່ແມ່ທີ່ສິດສອນລູກໆຕາມ “ວິທີທາງຂອງພຣະເຈົ້າ” ແລະ “ສັ່ງສອນຄວາມຊອບທຳ” ຜູ້ “ໄດ້ກ່າວ ແລະ ໄດ້ທຳນາຍ” (ໂມເຊ 6:15, 21, 23). ໂດຍສະເພາະມີຄ່າຢ່າງຍິ່ງ ແມ່ນສິ່ງທີ່ເຮົາຮຽນຮູ້ກ່ຽວກັບຄຳສອນທີ່ພໍ່ແມ່ ແລະ ຜູ້ປະກາດໄດ້ສິດສອນ: ສັດທາ, ການກັບໃຈ, ບັບຕິສະມາ, ແລະ ການຮັບເອົາຂອງປະທານແຫ່ງພຣະວິນຍານບໍລິສຸດ (ເບິ່ງ ໂມເຊ 6:50–52). ຄຳສອນນັ້ນ, ຄືກັນກັບຖານະປະໂລຫິດທີ່ມາກັບມັນ, “ຢູ່ໃນຕອນຕົ້ນ [ແລະ] ຈະຢູ່ໃນຄາວສິ້ນສຸດໂລກຄືກັນ” (ໂມເຊ 6:7).
ແນວຄິດສຳລັບການສຶກສາພຣະຄຳພີເປັນສ່ວນຕົວ
ສາດສະດາເປັນຜູ້ພະຍາກອນ.
ຂະນະທີ່ທ່ານສຶກສາ ໂມເຊ 6:26–36, ທ່ານຮຽນຮູ້ຫຍັງແດ່ກ່ຽວກັບຕາ, ຄວາມມືດ, ແລະ ການຫລຽວເຫັນ? ໃນວັນເວລາຂອງເອນົກ, ແມ່ນໃຜທີ່ “ຫລຽວເຫັນໄດ້ບໍ່ໄກ”? ເປັນຫຍັງຜູ້ຄົນເຫລົ່ານີ້ຈຶ່ງບໍ່ສາມາດຫລຽວເຫັນຄວາມຈິງ? ເອນົກສາມາດຫລຽວເຫັນສິ່ງໃດ? ແມ່ນຫຍັງໄດ້ສ້າງສັດທາຂອງທ່ານ ວ່າສາດສະດາໃນສະໄໝໃໝ່ເປັນຜູ້ພະຍາກອນ? (ເບິ່ງ ຂໍ້ທີ 36; ຄູ່ມືພຣະຄຳພີ, “ຜູ້ພະຍາກອນ,” scriptures.ChurchofJesusChrist.org).
ພຣະເຈົ້າເອີ້ນເຮົາໃຫ້ເຮັດວຽກງານຂອງພຣະອົງ ເຖິງແມ່ນວ່າເຮົາບໍ່ພຽບພ້ອມກໍຕາມ.
ມັນບໍ່ເປັນເລື່ອງແປກແນວໃດທີ່ຈະຮູ້ສຶກເປັນຫ່ວງກັບສິ່ງທີ່ພຣະຜູ້ເປັນເຈົ້າໄດ້ເອີ້ນທ່ານໃຫ້ເຮັດ. ແມ່ນແຕ່ເອນົກກໍຍັງຮູ້ສຶກແບບນັ້ນ ເມື່ອພຣະຜູ້ເປັນເຈົ້າໄດ້ເອີ້ນເພິ່ນໃຫ້ເປັນສາດສະດາ. ຂະນະທີ່ທ່ານອ່ານ ໂມເຊ 6:26–36, ໃຫ້ຊອກຫາເຫດຜົນທີ່ເອນົກຮູ້ສຶກເປັນຫ່ວງ ແລະ ຊອກຫາສິ່ງທີ່ພຣະຜູ້ເປັນເຈົ້າໄດ້ກ່າວ ເພື່ອໃຫ້ກຳລັງໃຈແກ່ເພິ່ນ. ໃນ ຂໍ້ທີ 37–47, ໃຫ້ຊອກຫາວິທີທີ່ພຣະຜູ້ເປັນເຈົ້າສະໜັບສະໜູນເອນົກ ແລະ ມອບອຳນາດໃຫ້ແກ່ເພິ່ນ ເພື່ອເຮັດວຽກງານຂອງພຣະອົງ (ເບິ່ງ ໂມເຊ 7:13 ນຳອີກ). ທ່ານອາດຢາກປຽບທຽບປະສົບການຂອງເອນົກກັບປະສົບການຂອງສາດສະດາຄົນອື່ນໆ ທີ່ຮູ້ສຶກບໍ່ພຽບພ້ອມ, ດັ່ງເຊັ່ນໂມເຊ (ເບິ່ງ ອົບພະຍົບ 4:10–16), ເຢເຣມີຢາ (ເບິ່ງ ເຢເຣມີຢາ 1:4–10), ນີໄຟ (ເບິ່ງ 2 ນີໄຟ 33:1–4), ແລະ ໂມໂຣໄນ (ເບິ່ງ ອີເທີ 12:23–29). ທ່ານຮູ້ສຶກວ່າ ພຣະເຈົ້າປະສົງໃຫ້ທ່ານຮຽນຮູ້ສິ່ງໃດຈາກຂໍ້ພຣະຄຳພີເຫລົ່ານີ້ ກ່ຽວກັບວຽກງານທີ່ພຣະອົງໄດ້ມອບໃຫ້ທ່ານເຮັດ?
ເບິ່ງ ຢາໂຄບ 4:6–8 ນຳອີກ.
ຄຳສອນຂອງພຣະຄຣິດເປັນສູນກາງຕໍ່ແຜນແຫ່ງຄວາມລອດຂອງພຣະເຈົ້າ.
ເປັນເພາະເຮົາມີໜັງສືໂມເຊ, ເຮົາຈຶ່ງຮູ້ວ່າ ພຣະເຈົ້າໄດ້ສິດສອນລູກໆຂອງພຣະອົງຕະຫລອດມາ ເຖິງວິທີຊອກຫາການໃຫ້ອະໄພ ແລະ ການໄຖ່ ນັບຕັ້ງແຕ່ຕອນຕົ້ນ ເປັນຕົ້ນມາ. ໃນພຣະຄຳພີ, ຄຳສອນເຫລົ່ານີ້ບາງເທື່ອຖືກເອີ້ນວ່າ ຄຳສອນຂອງພຣະຄຣິດ (ເບິ່ງ 2 ນີໄຟ 31:13–21). ຂະນະທີ່ທ່ານສຶກສາ ໂມເຊ 6:48–68, ໃຫ້ຄົ້ນຫາສິ່ງທີ່ເຮົາຕ້ອງຮູ້ ແລະ ເຮັດເພື່ອຈະໄດ້ຮັບການໄຖ່. ທ່ານອາດພົບເຫັນວ່າມັນເປັນປະໂຫຍດທີ່ຈະຂຽນຂໍ້ສະຫລຸບຂອງທ່ານເອງໄວ້ ເຖິງສິ່ງທີ່ເອນົກໄດ້ສິດສອນ. ເປັນຫຍັງມັນຈຶ່ງສຳຄັນທີ່ຈະຮູ້ວ່າ ຄວາມຈິງເຫລົ່ານີ້ໄດ້ຖືກສິດສອນນັບຕັ້ງແຕ່ວັນເວລາຂອງອາດາມ ແລະ ເອວາເປັນຕົ້ນມາ? ທ່ານຮູ້ສຶກໄດ້ຮັບການກະຕຸ້ນໃຫ້ເຮັດສິ່ງໃດ ຕາມຜົນຂອງການສຶກສາຄຳສອນເຫລົ່ານີ້?
“ໃຫ້ສິດສອນສິ່ງເຫລົ່ານີ້ຢ່າງເປັນອິດສະລະກັບລູກໆຂອງເຈົ້າ.”
ອາດາມ ແລະ ເອວາໄດ້ຖືກສິດສອນເຖິງຄວາມຈິງອັນມີຄ່າຂອງພຣະກິດຕິຄຸນຂອງພຣະເຢຊູຄຣິດ. ແຕ່ພຣະຄຳຂອງພຣະຜູ້ເປັນເຈົ້າໃນ ໂມເຊ 6:27–28 ໄດ້ໃຫ້ຄວາມແຈ່ມແຈ້ງວ່າ ໃນຫລາຍລຸ້ນຄົນກ່ອນເອນົກ, ຫລາຍຄົນບໍ່ໄດ້ດຳລົງຊີວິດຕາມຄວາມຈິງເຫລົ່ານັ້ນເລີຍ. ພຣະຜູ້ເປັນເຈົ້າປະສົງໃຫ້ເອນົກຟື້ນຟູຄວາມຈິງທີ່ສູນຫາຍໄປ—ພ້ອມທັງພຣະບັນຍັດດັ້ງເດີມທີ່ມອບໃຫ້ອາດາມ ທີ່ວ່າ: “ໃຫ້ສິດສອນສິ່ງເຫລົ່ານີ້ຢ່າງເປັນອິດສະລະກັບລູກໆຂອງເຈົ້າ” (ໂມເຊ 6:58). ຂະນະທີ່ທ່ານອ່ານ ໂມເຊ 6:51–62, ທ່ານຮຽນຮູ້ຫຍັງແດ່ກ່ຽວກັບພຣະເຢຊູຄຣິດ? ທ່ານພົບເຫັນຫຍັງແດ່ທີ່ຈະມີຄ່າຕໍ່ຄົນລຸ້ນໃໝ່ໂດຍສະເພາະ? ທ່ານສາມາດເຮັດຫຍັງໄດ້ແດ່ ເພື່ອຊ່ວຍສົ່ງຕໍ່ຄວາມຈິງເຫລົ່ານີ້ໄປໃຫ້ຄົນລຸ້ນຫລັງ?
ພໍ່ແມ່ຄວນສິດສອນພຣະກິດຕິຄຸນໃຫ້ແກ່ລູກໆຂອງຕົນ.
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
ປະຖົມມະການ 5; ໂມເຊ 6:5–25, 46.ການອ່ານກ່ຽວກັບ “ປຶ້ມແຫ່ງຄວາມຊົງຈຳ” ທີ່ຄອບຄົວຂອງອາດາມ ແລະ ເອວາໄດ້ຮັກສາ ອາດດົນໃຈຄອບຄົວຂອງທ່ານໃຫ້ເຮັດປຶ້ມແຫ່ງຄວາມຊົງຈຳຂອງພວກທ່ານເອງ. ໃຫ້ສົນທະນາເປັນຄອບຄົວເຖິງສິ່ງທີ່ທ່ານຢາກລວມໄວ້ໃນນັ້ນ. ບາງທີພວກທ່ານມີຮູບຖ່າຍ, ເລື່ອງເລົ່າ, ຫລື ບົດຄວາມຕ່າງໆຈາກປະຫວັດຄອບຄົວຂອງພວກທ່ານ. ພວກທ່ານອາດເລືອກທີ່ຈະລວມສິ່ງທີ່ກຳລັງເກີດຂຶ້ນໃນຄອບຄົວຂອງທ່ານໃນເວລານີ້ໃສ່ນຳ. ຄົນລຸ້ນຫລັງຈະພົບເຫັນຫຍັງແດ່ທີ່ມີຄ່າ? ພວກທ່ານສາມາດສົນທະນາເຖິງວິທີທີ່ວະລີທີ່ວ່າ “ໂດຍວິນຍານແຫ່ງການດົນໃຈ” (ໂມເຊ 6:5) ແລະ “ແບບແຜນທີ່ມອບໃຫ້ໂດຍນິ້ວພຣະຫັດຂອງພຣະເຈົ້າ” (ໂມເຊ 6:46) ສາມາດນຳພາຄວາມພະຍາຍາມຂອງພວກທ່ານແນວໃດ. ໃຫ້ຄິດທີ່ຈະເກັບຮັກສາຂໍ້ມູນຈາກປຶ້ມແຫ່ງຄວາມຊົງຈຳຂອງທ່ານ ໄວ້ໃນ FamilySearch.org.
-
ໂມເຊ 6:53–62.ເຮົາຈະຕອບຄຳຖາມຂອງອາດາມ ຢູ່ໃນ ໂມເຊ 6:53 ແນວໃດ? ຄຳຕອບໃດແດ່ທີ່ເຮົາພົບເຫັນ ຢູ່ໃນ ຂໍ້ທີ 57–62?
-
ໂມເຊ 6:59.ຄຳວ່າ “ເກີດໃໝ່ອີກໃນອານາຈັກສະຫວັນ” ໝາຍຄວາມວ່າແນວໃດ? ເຮົາສາມາດເຮັດຫຍັງໄດ້ແດ່ ເພື່ອສືບຕໍ່ເກີດໃໝ່ ຕະຫລອດຊົ່ວຊີວິດຂອງເຮົາ? ສຳລັບຄວາມຊ່ວຍເຫລືອ, ໃຫ້ເບິ່ງ ແອວມາ 5:7–14, 26; ຄູ່ມືພຣະຄຳພີ, “ເກີດໃໝ່, ເກີດໃໝ່ຈາກພຣະເຈົ້າ” scriptures.ChurchofJesusChrist.org; David A. Bednar, “Always Retain a Remission of Your Sins” (Liahona, May 2016, 59–62).
-
ໂມເຊ 6:61.ເຮົາຮຽນຮູ້ຫຍັງແດ່ກ່ຽວກັບພຣະວິນຍານບໍລິສຸດຈາກຂໍ້ເຫລົ່ານີ້?
-
ໂມເຊ 6:63.ມີສິ່ງໃດແດ່ທີ່ “ເປັນພະຍານເຖິງ [ພຣະຄຣິດ]”? (ເບິ່ງ 2 ນີໄຟ 11:4 ນຳອີກ). ໃຫ້ຄິດທີ່ຈະເຊື້ອເຊີນສະມາຊິກໃນຄອບຄົວໃຫ້ແບ່ງປັນບາງສິ່ງທີ່ເຂົາເຈົ້າເຫັນ “ຢູ່ໃນຟ້າສະຫວັນເບື້ອງເທິງ” ຫລື “ເທິງແຜ່ນດິນໂລກ” ທີ່ຊ່ວຍເຂົາເຈົ້າໃຫ້ຮຽນຮູ້ກ່ຽວກັບພຣະເຢຊູຄຣິດ. ຍົກຕົວຢ່າງ, ຕົ້ນໄມ້, ກ້ອນຫີນ, ຫລື ຕາເວັນ ເຕືອນເຮົາເຖິງພຣະຜູ້ຊ່ວຍໃຫ້ລອດແນວໃດ? ຄຳວ່າ “ນ້ຳທີ່ປະກອບດ້ວຍຊີວິດ” ແລະ “ເຂົ້າຈີ່ແຫ່ງຊີວິດ” ສິດສອນເຮົາກ່ຽວກັບພຣະອົງແນວໃດ? (ໂຢຮັນ 4:10–14; 6:35).
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ເພງແນະນຳ: “ເຮົາຈະໄປທີ່ພຣະອົງບັນຊາ,” ເພງສວດ ແລະ ເພງຂອງເດັກນ້ອຍ, 50.
ການປັບປຸງການສຶກສາສ່ວນຕົວ
ຊອກຫາສັນຍາລັກ. ສ່ວນຫລາຍແລ້ວ ໃນພຣະຄຳພີ, ສິ່ງຂອງ ຫລື ເຫດການຕ່າງໆເປັນຕົວແທນ ຫລື ເປັນສັນຍາລັກໃຫ້ແກ່ຄວາມຈິງທາງວິນຍານ. ສັນຍາລັກເຫລົ່ານີ້ສາມາດຊ່ວຍທ່ານໃຫ້ເຂົ້າໃຈຫລາຍກວ່າເກົ່າກ່ຽວກັບຄຳສອນ. ຍົກຕົວຢ່າງ, ທ່ານຮຽນຮູ້ຫຍັງແດ່ຈາກສັນຍາລັກຂອງຕາ ແລະ ຂີ້ຕົມ ຢູ່ໃນ ໂມເຊ 6:35?
Adam and Eve Teaching Their Children [ອາດາມ ແລະ ເອວາສິດສອນລູກໆຂອງເຂົາເຈົ້າ], ໂດຍ ແດວ ພາສັນ