“ວັນທີ 27 ເດືອນທັນວາ–ວັນທີ 2 ເດືອນມັງກອນ. ໂມເຊ 1; ອັບຣາຮາມ 3: ‘ນີ້ຄືວຽກງານຂອງເຮົາ ແລະ ລັດສະໝີພາບຂອງເຮົາ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)

“ວັນທີ 27 ເດືອນທັນວາ–ວັນທີ 2 ເດືອນມັງກອນ. ໂມເຊ 1; ອັບຣາຮາມ 3,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022

ຮູບພາບ

ຮູບພາບດວງດາວຢູ່ໃນທ້ອງຟ້າ

ວັນທີ 27 ເດືອນທັນວາ–ວັນທີ 2 ເດືອນມັງກອນ

ໂມເຊ 1; ອັບຣາຮາມ 3

“ນີ້ຄືວຽກງານຂອງເຮົາ ແລະ ລັດສະໝີພາບຂອງເຮົາ”

ຂະນະທີ່ທ່ານອ່ານສິ່ງທີ່ພຣະເຈົ້າໄດ້ກ່າວກັບໂມເຊ ແລະ ກັບອັບຣາຮາມ, ໃຫ້ໄຕ່ຕອງສິ່ງທີ່ພຣະອົງອາດກ່າວກັບທ່ານ.

ບັນທຶກຄວາມປະທັບໃຈຂອງທ່ານ

ພຣະຄຣິສຕະທຳຄຳພີເລີ່ມຕົ້ນດ້ວຍຄຳວ່າ “ໃນຕອນຕົ້ນພຣະເຈົ້າໄດ້ສ້າງຟ້າສະຫວັນ ແລະ ແຜ່ນດິນໂລກ” (ປະຖົມມະການ 1:1). ແຕ່ມີຫຍັງ ກ່ອນ “ຕອນຕົ້ນ” ນີ້? ແລະ ເປັນຫຍັງ ພຣະເຈົ້າຈຶ່ງສ້າງທຸກສິ່ງເຫລົ່ານີ້? ຜ່ານທາງສາດສະດາໂຈເຊັບ ສະມິດ, ພຣະຜູ້ເປັນເຈົ້າໄດ້ໃຫ້ຄຳຕອບຕໍ່ຄຳຖາມເຫລົ່ານີ້.

ຍົກຕົວຢ່າງ, ພຣະອົງໄດ້ມອບບັນທຶກໃຫ້ເຮົາກ່ຽວກັບພາບນິມິດ ຊຶ່ງໃນນັ້ນອັບຣາຮາມໄດ້ເຫັນການເປັນຢູ່ຂອງເຮົາໃນຖານະວິນຍານ “ກ່ອນໂລກເປັນມາ” (ເບິ່ງ ອັບຣາຮາມ 3:22–28). ພຣະຜູ້ເປັນເຈົ້າກໍຍັງໄດ້ມອບການແປທີ່ດົນໃຈ ຫລື ການເປີດເຜີຍຫົກບົດທຳອິດຂອງປະຖົມມະການໃຫ້ເຮົານຳອີກ, ເອີ້ນວ່າໜັງສືໂມເຊ—ຊຶ່ງບໍ່ໄດ້ເລີ່ມຕົ້ນດ້ວຍ “ໃນຕອນຕົ້ນ.” ກົງກັນຂ້າມ, ມັນເລີ່ມຕົ້ນດ້ວຍປະສົບການທີ່ໂມເຊໄດ້ມີ ຊຶ່ງໃຫ້ຄວາມໝາຍທີ່ຮູ້ຈັກກັນດີວ່າເປັນເລື່ອງລາວຂອງການນິລະມິດສ້າງ. ພ້ອມກັນນີ້, ພຣະຄຳພີຂອງຍຸກສຸດທ້າຍນີ້ ຍັງເປັນບ່ອນທີ່ສຳຄັນທີ່ຈະເລີ່ມຕົ້ນການສຶກສາພຣະຄຳພີເດີມຂອງເຮົາ ເພາະວ່າມັນຕອບຄຳຖາມຂັ້ນພື້ນຖານ ທີ່ສາມາດໃຫ້ຄວາມໝາຍແກ່ການອ່ານຂອງເຮົາວ່າ: ພຣະເຈົ້າຄືໃຜ? ພວກເຮົາຄືໃຜ? ວຽກງານຂອງພຣະເຈົ້າຄືຫຍັງ, ແລະ ໜ້າທີ່ຂອງພວກເຮົາຄືຫຍັງໃນນັ້ນ? ບົດທຳອິດຢູ່ໃນປະຖົມມະການສາມາດເຫັນໄດ້ວ່າ ພຣະຜູ້ເປັນເຈົ້າຕອບຮັບຕໍ່ຄຳອ້ອນວອນຂອງໂມເຊ ທີ່ວ່າ: “ຂໍຈົ່ງເມດຕາຜູ້ຮັບໃຊ້ຂອງພຣະອົງດ້ວຍເທີ້ນ, ໂອ້ ພຣະອົງເຈົ້າ, ແລະ ຂໍຈົ່ງບອກຂ້າພຣະອົງກ່ຽວກັບແຜ່ນດິນໂລກນີ້, ແລະ ຜູ້ອາໄສຢູ່ໃນນັ້ນ, ແລະ ຟ້າສະຫວັນນຳອີກ” (ໂມເຊ 1:36).

ຮູບພາບ

Learn More image

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ໂມເຊ 1

ໃນຖານະລູກຂອງພຣະເຈົ້າ, ເຮົາມີຈຸດໝາຍປາຍທາງອັນສູງສົ່ງ.

ປະທານດີເດີ ແອັຟ ອຸກດອບ ໄດ້ສິດສອນວ່າ, “ຄວາມສັບສົນສ່ວນຫລາຍທີ່ເຮົາປະເຊີນໃນຊີວິດນີ້ ມາຈາກການພຽງແຕ່ບໍ່ເຂົ້າໃຈວ່າເຮົາເປັນໃຜ” (“The Reflection in the Water” [Church Educational System fireside for young adults, Nov. 1, 2009], ChurchofJesusChrist.org). ພຣະບິດາເທິງສະຫວັນຮູ້ເຖິງເລື່ອງນີ້, ແລະ ຊາຕານກໍຮູ້ຄືກັນ. ຂ່າວສານທຳອິດຂອງພຣະເຈົ້າຕໍ່ໂມເຊ ແມ່ນລວມທັງຄວາມຈິງທີ່ວ່າ “ເຈົ້າເປັນບຸດຂອງເຮົາ” ແລະ “ເຈົ້າຈະເໝືອນພຣະອົງດຽວທີ່ຖືກຳເນີດຂອງເຮົາ” (ໂມເຊ 1:4, 6). ກົງກັນຂ້າມ, ຊາຕານໄດ້ກ່າວເຖິງໂມເຊວ່າເປັນ “ບຸດມະນຸດ” (ໂມເຊ 1:12). ຊີວິດ ແລະ ການຕັດສິນໃຈຂອງທ່ານ ຈະແຕກຕ່າງແນວໃດ ຖ້າຫາກທ່ານຄິດກ່ຽວກັບຕົວເອງ ດັ່ງທີ່ຊາຕານຢາກໃຫ້ທ່ານຄິດວ່າ “ບຸດ [ຫລື ທິດາ] ມະນຸດ”? ການຮູ້ຈັກ ແລະ ການຈື່ຈຳວ່າທ່ານເປັນລູກຂອງພຣະເຈົ້າ ເປັນພອນໃຫ້ແກ່ຊີວິດຂອງທ່ານແນວໃດ?

ຂໍ້ໃດ ຫລື ວະລີໃດ ຢູ່ໃນ ໂມເຊ 1 ຊ່ວຍທ່ານໃຫ້ຮູ້ສຶກເຖິງຄ່າຄວນແຫ່ງສະຫວັນຂອງທ່ານ?

Christ and the Creation [ພຣະຄຣິດ ແລະ ການນິລະມິດສ້າງ], ໂດຍ ຣໍເບີດ ທີ ບາແຣັດ

ໂມເຊ 1:12–26

ເຮົາສາມາດຕ້ານທານກັບອິດທິພົນຂອງຊາຕານ.

ດັ່ງທີ່ ໂມເຊ 1 ສະແດງໃຫ້ເຫັນຢ່າງແຈ່ມແຈ້ງວ່າ, ປະສົບການທາງວິນຍານບໍ່ໄດ້ຍົກເວັ້ນເຮົາຈາກການລໍ້ລວງ. ຕາມຈິງແລ້ວ, ໜຶ່ງໃນຍຸດທະວິທີຂອງຊາຕານແມ່ນທີ່ຈະລໍ້ລວງເຮົາໃຫ້ສົງໄສປະສົບການເຫລົ່ານັ້ນ ຫລື ສິ່ງທີ່ເຮົາໄດ້ຮຽນຮູ້ຈາກປະສົບການເຫລົ່ານັ້ນ. ຂະນະທີ່ທ່ານອ່ານກ່ຽວກັບການຕອບຮັບຂອງໂມເຊຕໍ່ຊາຕານ ຢູ່ໃນ ຂໍ້ທີ 12–26, ທ່ານຮຽນຮູ້ຫຍັງແດ່ທີ່ສາມາດຊ່ວຍທ່ານໃຫ້ຍຶດໝັ້ນຢູ່ໃນຄວາມຈິງໃຈຕໍ່ປະຈັກພະຍານທີ່ທ່ານໄດ້ຮັບ? ແມ່ນຫຍັງທີ່ຊ່ວຍທ່ານໃຫ້ຕ້ານທານກັບການລໍ້ລວງຢ່າງອື່ນໆຂອງຊາຕານ? (ເບິ່ງ, ຍົກຕົວຢ່າງ, ຂໍ້ທີ 15 ແລະ 18).

ອີງຕາມສິ່ງທີ່ທ່ານຮຽນຮູ້, ທ່ານສາມາດວາງແຜນສຳລັບການຕ້ານທານກັບການລໍ້ລວງໄດ້. ຍົກຕົວຢ່າງ, ທ່ານສາມາດປະກອບຂໍ້ຄວາມນີ້ໃຫ້ຄົບຖ້ວນ “ເມື່ອເຮົາຖືກລໍ້ລວງໃຫ້ , ເຮົາຈະ .”

ເບິ່ງ ມັດທາຍ 4:1–11; ຮີລາມັນ 5:12; Gary E. Stevenson, “Deceive Me Not,” Liahona, Nov. 2019, 93–96; ວິດີໂອ “I Am a Son of God”, ChurchofJesusChrist.org ນຳອີກ.

ໂມເຊ 1:27–39; ອັບຣາຮາມ 3

ວຽກງານ ແລະ ລັດສະໝີພາບຂອງພຣະເຈົ້າ ຄືການຊ່ວຍເຮົາໃຫ້ໄດ້ຮັບຊີວິດນິລັນດອນ.

ຫລັງຈາກໄດ້ເຫັນພາບນິມິດເຖິງການນິລະມິດສ້າງຂອງພຣະເຈົ້າແລ້ວ, ໂມເຊໄດ້ທູນຖາມພຣະຜູ້ເປັນເຈົ້າວ່າ: “ຂໍຊົງບອກຂ້າພຣະອົງແດ່ທ້ອນ ດ້ວຍເຫດໃດສິ່ງເຫລົ່ານີ້ຈຶ່ງເປັນເຊັ່ນນີ້” (ໂມເຊ 1:30). ແມ່ນຫຍັງທີ່ປະທັບໃຈທ່ານກ່ຽວກັບການຕອບຮັບຂອງພຣະເຈົ້າໃນ ໂມເຊ 1:31–39?

ອັບຣາຮາມກໍໄດ້ມີປະສົບການທາງພາບນິມິດນຳອີກ, ຊຶ່ງບັນທຶກຢູ່ໃນ ອັບຣາຮາມ 3. ທ່ານພົບເຫັນຫຍັງແດ່ຢູ່ໃນ ຂໍ້ທີ 22–26 ທີ່ສາມາດຊ່ວຍຕອບຄຳຖາມຂອງໂມເຊ?

ໃຫ້ຄິດທີ່ຈະຂຽນຄວາມຈິງຢ່າງອື່ນໆທີ່ໂມເຊ ແລະ ອັບຣາຮາມໄດ້ຮຽນຮູ້ ຢູ່ໃນພາບນິມິດລົງໄວ້: ຄວາມຈິງກ່ຽວກັບພຣະເຈົ້າ, ກ່ຽວກັບຕົວພວກເພິ່ນເອງ, ແລະ ກ່ຽວກັບຈຸດປະສົງຂອງການນິລະມິດສ້າງຂອງພຣະເຈົ້າ. ຄວາມຈິງເຫລົ່ານີ້ມີຜົນກະທົບຕໍ່ວິທີທີ່ທ່ານຄິດກ່ຽວກັບຕົວເອງ ແລະ ກ່ຽວກັບໂລກທີ່ຢູ່ອ້ອມຮອບທ່ານແນວໃດ?

ເບິ່ງ Dieter F. Uchtdorf, “You Matter to Him,” Liahona, Nov. 2011, 19–22; Gospel Topics, “Premortality,” topics.ChurchofJesusChrist.org ນຳອີກ.

ອັບຣາຮາມ 3:22–23

ມີຄົນອື່ນທີ່ນອກເໜືອໄປຈາກອັບຣາຮາມບໍ່ ທີ່ “ຖືກເລືອກກ່ອນ [ພວກເພິ່ນ] ໄດ້ມາເກີດ”?

“ໃນໂລກກ່ອນເກີດ, ພຣະເຈົ້າໄດ້ກຳນົດດວງວິນຍານໃດໜຶ່ງໂດຍສະເພາະ ໃຫ້ບັນລຸພາລະກິດໃດໜຶ່ງໂດຍສະເພາະລະຫວ່າງຊີວິດໃນຊ່ວງມະຕະຂອງເຂົາເຈົ້າ. ສິ່ງນີ້ຖືກເອີ້ນວ່າ ການແຕ່ງຕັ້ງລ່ວງໜ້າ. … ຄຳສອນຂອງການແຕ່ງຕັ້ງລ່ວງໜ້າກ່ຽວຂ້ອງກັບສະມາຊິກທຸກຄົນຂອງສາດສະໜາຈັກ, ບໍ່ພຽງແຕ່ພຣະຜູ້ຊ່ວຍໃຫ້ລອດ ແລະ ສາດສະດາຂອງພຣະອົງເທົ່ານັ້ນ” (Gospel Topics, “Foreordination,” topics.ChurchofJesusChrist.org).

ເຮົາໄດ້ຮັບໜັງສືໂມເຊ ແລະ ໜັງສືອັບຣາຮາມມາໄດ້ແນວໃດ?

ໜັງສືໂມເຊເປັນພາກສ່ວນທຳອິດຂອງການແປພຣະຄຣິສຕະທຳຄຳພີທີ່ດົນໃຈຂອງໂຈເຊັບ ສະມິດ. ໜັງສືອັບຣາຮາມໄດ້ຖືກເປີດເຜີຍຕໍ່ໂຈເຊັບ ສະມິດ ລະຫວ່າງທີ່ເພິ່ນເຮັດວຽກກັບໃບລານພະພາຍຣັສຂອງເອຢິບ. ໜັງສືເຫລົ່ານີ້, ຊຶ່ງມີຢູ່ໃນໄຂ່ມຸກອັນລ້ຳຄ່າໃນທຸກວັນນີ້, ບັນຈຸຂໍ້ມູນຢ່າງຫລວງຫລາຍກ່ຽວກັບໂມເຊ, ອັບຣາຮາມ, ແລະ ສາດສະດາຄົນອື່ນໆ ທີ່ບໍ່ພົບເຫັນຢູ່ໃນພຣະຄຳພີເດີມ. ເພື່ອຮຽນຮູ້ຕື່ມອີກກ່ຽວກັບວິທີທີ່ເຮົາໄດ້ປຶ້ມເຫລົ່ານີ້ມາ, ໃຫ້ເບິ່ງ “Joseph Smith Translation of the Bible” (Church History Topics, ChurchofJesusChrist.org/study/history/topics) ແລະ “Translation and Historicity of the Book of Abraham” (Gospel Topics, topics.ChurchofJesusChrist.org).

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ໂມເຊ 1:2–6; ອັບຣາຮາມ 3:11–12.ທ່ານສາມາດເຊື້ອເຊີນສະມາຊິກໃນຄອບຄົວໃຫ້ຊອກຫາວະລີຢູ່ໃນເພງ “ເຮົາເປັນລູກຂອງພຣະເຈົ້າ” (ເພງສວດ ແລະ ເພງຂອງເດັກນ້ອຍ, 64) ທີ່ກ່ຽວຂ້ອງກັບຄວາມຈິງ ຊຶ່ງສິດສອນຢູ່ໃນພຣະຄຳພີເຫລົ່ານີ້.

ໂມເຊ 1:4, 30–39.ຄອບຄົວຂອງທ່ານຈະມັກເບິ່ງ “ຝີມື [ຂອງພຣະເຈົ້າ]” ບາງຢ່າງບໍ່? (ຂໍ້ທີ 4). ບາງທີທ່ານສາມາດອ່ານຂໍ້ເຫລົ່ານີ້ຢູ່ເດີ່ນຫລິ້ນສາທາລະນະ ຫລື ຢູ່ໃຕ້ໝູ່ດວງດາວໃນຕອນກາງຄືນ. ແລ້ວພວກທ່ານສາມາດເວົ້າລົມກັນກ່ຽວກັບເຫດຜົນທີ່ພຣະເຈົ້າໄດ້ນິລະມິດສ້າງໂລກ ແລະ ກ່ຽວກັບວິທີທີ່ເຮົາເປັນພາກສ່ວນຢູ່ໃນ “ວຽກງານ ແລະ ລັດສະໝີພາບ [ຂອງພຣະອົງ]” (ຂໍ້ທີ 39).

ໂມເຊ 1:18.ມີຄຳແນະນຳໃດແດ່ທີ່ເຮົາສາມາດແບ່ງປັນ ເພື່ອຊ່ວຍກັນ “ຈຳແນກໄດ້ລະຫວ່າງ” ພຣະເຈົ້າ ແລະ ຊາຕານ? (ເບິ່ງ ໂມໂຣໄນ 7:12–18; ຄຳສອນ ແລະ ພັນທະສັນຍາ 50:23–24 ນຳອີກ.)

ອັບຣາຮາມ 3:24–26.ທ່ານສາມາດມອບໜ້າທີ່ບາງຢ່າງທີ່ສະໜຸກສະໜານ ແຕ່ທ້າທາຍໃຫ້ສະມາຊິກໃນຄອບຄົວ ເພື່ອໃຫ້ເຂົາເຈົ້າພິສູດວ່າ ເຂົາເຈົ້າສາມາດເຮັດຕາມຄຳແນະນຳໄດ້, ດັ່ງເຊັ່ນ ການພັບເຈ້ຍເຮັດເປັນເຮືອບິນ ຫລື ເຮັດຕາມສູດອາຫານ. ກິດຈະກຳນີ້ຄ້າຍຄືກັນກັບຈຸດປະສົງໃນຊີວິດມະຕະຂອງເຮົາແນວໃດ ດັ່ງທີ່ບັນຍາຍຢູ່ໃນຂໍ້ເຫລົ່ານີ້?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ “ເຮົາເປັນລູກຂອງພຣະເຈົ້າ,” ເພງສວດ ແລະ ເພງຂອງເດັກນ້ອຍ, 64.

ການປັບປຸງການສຶກສາສ່ວນຕົວ

ຊອກຫາຄວາມຈິງຂອງພຣະກິດຕິຄຸນ. ໃນພຣະຄຳພີ, ບາງເທື່ອຄວາມຈິງຂອງພຣະກິດຕິຄຸນຈະຖືກກ່າວແບບໂດຍກົງ; ບາງເທື່ອກໍຖືກບອກກ່າວຜ່ານທາງຕົວຢ່າງ ຫລື ເລື່ອງລາວ. ໃຫ້ຖາມຕົວເອງວ່າ, “ຄວາມຈິງນິລັນດອນຢ່າງໃດທີ່ສິດສອນຢູ່ໃນຂໍ້ເຫລົ່ານີ້?”