“ວັນທີ 3–9 ເດືອນມັງກອນ. ປະຖົມມະການ 1–2; ໂມເຊ 2–3; ອັບຣາຮາມ 4–5: ‘ໃນຕອນຕົ້ນພຣະເຈົ້າໄດ້ນິລະມິດສ້າງຟ້າສະຫວັນ ແລະ ແຜ່ນດິນໂລກ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)

“ວັນທີ 3–9 ເດືອນມັງກອນ. ປະຖົມມະການ 1–2; ໂມເຊ 2–3; ອັບຣາຮາມ 4–5,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022

ຮູບພາບ

ຮູບພາບແຜ່ນດິນໂລກ ແລະ ດວງເດືອນ

ວັນທີ 3–9 ເດືອນມັງກອນ

ປະຖົມມະການ 1–2; ໂມເຊ 2–3; ອັບຣາຮາມ 4–5

“ໃນຕອນຕົ້ນພຣະເຈົ້າໄດ້ນິລະມິດສ້າງຟ້າສະຫວັນ ແລະ ແຜ່ນດິນໂລກ”

ແມ່ນແຕ່ຖ້າຫາກທ່ານເຄີຍໄດ້ອ່ານກ່ຽວກັບການນິລະມິດສ້າງມາແລ້ວ, ແຕ່ກໍມີສິ່ງທີ່ຈະຮຽນຮູ້ຕື່ມອີກຈາກພຣະຄຳພີ. ໃຫ້ອະທິຖານເພື່ອການຊີ້ນຳຈາກພຣະວິນຍານບໍລິສຸດ ເພື່ອຊ່ວຍທ່ານໃຫ້ພົບຄວາມເຂົ້າໃຈໃໝ່.

ບັນທຶກຄວາມປະທັບໃຈຂອງທ່ານ

ເປັນເພາະໂລກທີ່ຢູ່ອ້ອມຮອບເຮົາສວຍງາມ ແລະ ສະຫງ່າລາສີຫລາຍ, ມັນຈຶ່ງຍາກທີ່ຈະວາດພາບເຫັນໂລກວ່າເປັນແນວໃດ ຕອນມັນຍັງ “ບໍ່ທັນມີຮູບຮ່າງ, ແລະ ແປນ,” “ວ່າງເປົ່າ ແລະ ຮ້າງ” (ປະຖົມມະການ 1:2; ອັບຣາຮາມ 4:2). ສິ່ງໜຶ່ງທີ່ເລື່ອງເລົ່າກ່ຽວກັບການນິລະມິດສ້າງສິດສອນເຮົາແມ່ນວ່າ ພຣະເຈົ້າສາມາດເຮັດບາງສິ່ງທີ່ຍິ່ງໃຫຍ່ຈາກບາງສິ່ງທີ່ບໍ່ເປັນລະບຽບ. ມັນຈະຊ່ວຍໄດ້ຫລາຍທີ່ຈະຈື່ຈຳສິ່ງນັ້ນ ເມື່ອຊີວິດເຕັມໄປດ້ວຍຄວາມວຸ້ນວາຍ. ພຣະບິດາເທິງສະຫວັນ ແລະ ພຣະເຢຊູຄຣິດເປັນພຣະຜູ້ສ້າງ, ແລະ ການນິລະມິດສ້າງຂອງພວກພຣະອົງກັບພວກເຮົາຍັງບໍ່ສຳເລັດເທື່ອ. ພວກພຣະອົງສາມາດເຮັດໃຫ້ແສງສະຫວ່າງສ່ອງໃສ່ຊີວິດຂອງເຮົາຕອນມັນມືດມົວ. ພວກພຣະອົງສາມາດປະກອບແຜ່ນດິນທີ່ແຂງແກ່ນ ໃນທ່າມກາງທະເລມໍລະສຸມຊີວິດຂອງເຮົາ. ພວກພຣະອົງສາມາດບັນຊາທາດຕ່າງໆ, ແລະ ຖ້າຫາກເຮົາເຊື່ອຟັງພຣະຄຳຂອງພວກພຣະອົງ ຄືກັນກັບທາດເຫລົ່ານັ້ນໄດ້ເຊື່ອຟັງ, ແລ້ວພວກພຣະອົງຈະສາມາດປ່ຽນແປງເຮົາໃຫ້ກາຍເປັນການນິລະມິດສ້າງອັນສວຍງາມ ທີ່ເຮົາຄວນເປັນ. ນັ້ນຄືພາກສ່ວນໜຶ່ງຂອງຄວາມໝາຍທີ່ໄດ້ຖືກນິລະມິດສ້າງຂຶ້ນຕາມຮູບລັກສະນະຂອງພຣະເຈົ້າ, ຕາມແບບຢ່າງຂອງພຣະອົງ (ເບິ່ງ ປະຖົມມະການ 1:26). ເຮົາມີສັກກະຍະພາບທີ່ຈະກາຍເປັນເໝືອນດັ່ງພຣະອົງ: ຖືກເຮັດໃຫ້ສູງສົ່ງ, ສະຫງ່າລາສີ, ເປັນບຸກຄົນຂອງສະຫວັນຊັ້ນສູງ.

ສຳລັບພາບລວມຂອງໜັງສືປະຖົມມະການ, ໃຫ້ເບິ່ງ “ປະຖົມມະການ” ໃນ Bible Dictionary.

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ປະຖົມມະການ 1:1–25; ໂມເຊ 2:1–25; ອັບຣາຮາມ 4:1–25

ພາຍໃຕ້ການຊີ້ນຳຂອງພຣະບິດາເທິງສະຫວັນ, ພຣະເຢຊູຄຣິດໄດ້ນິລະມິດສ້າງແຜ່ນດິນໂລກ.

ແອວເດີ ດີ ທອດ ຄຣິສໂຕເຟີສັນ ໄດ້ກ່າວວ່າ, “ບໍ່ວ່າລາຍລະອຽດຂອງຂັ້ນຕອນຂອງການນິລະມິດສ້າງນັ້ນຈະເປັນອັນໃດກໍຕາມ, ເຮົາຮູ້ວ່າ ມັນບໍ່ໄດ້ເປັນເລື່ອງບັງເອີນ ແຕ່ວ່າມັນໄດ້ຖືກຊີ້ນຳໂດຍພຣະເຈົ້າອົງເປັນພຣະບິດາ ແລະ ຖືກປະຕິບັດຕາມໂດຍພຣະເຢຊູຄຣິດ” (“Why Marriage, Why Family,” Liahona, May 2015, 51). ຂະນະທີ່ມີຫລາຍສິ່ງຫລາຍຢ່າງທີ່ເຮົາບໍ່ຮູ້ຈັກແນ່ນອນກ່ຽວກັບວິທີທີ່ໂລກຖືກນິລະມິດສ້າງ, ແຕ່ໃຫ້ໄຕ່ຕອງສິ່ງທີ່ທ່ານຮຽນຮູ້ກ່ຽວກັບການນິລະມິດສ້າງຈາກສິ່ງທີ່ພຣະເຈົ້າໄດ້ເປີດເຜີຍຢູ່ໃນ ປະຖົມມະການ 1:1–25; ໂມເຊ 2:1–25; ແລະ ອັບຣາຮາມ 4:1–25. ມີສິ່ງໃດແດ່ທີ່ທ່ານສັງເກດເຫັນຢູ່ໃນເລື່ອງເຫລົ່ານີ້ ທີ່ຄ້າຍຄືກັນ? ມີສິ່ງໃດແດ່ທີ່ທ່ານສັງເກດເຫັນວ່າແຕກຕ່າງກັນ? ທ່ານຄິດແນວໃດກ່ຽວກັບພຣະບິດາເທິງສະຫວັນ ແລະ ພຣະເຢຊູຄຣິດ ຂະນະທີ່ທ່ານອ່ານກ່ຽວກັບການນິລະມິດສ້າງ?

ເບິ່ງ ຄຳສອນ ແລະ ພັນທະສັນຍາ 101:32–34 ນຳອີກ.

Creation [ການນິລະມິດສ້າງ], ໂດຍ ໂຈແອນ ຮິບເບີດ ເດີຊິ

ປະຖົມມະການ 1:27–28; 2:18–25; ໂມເຊ 3:18, 21–25; ອັບຣາຮາມ 5:14–19

ການແຕ່ງງານລະຫວ່າງຊາຍ ແລະ ຍິງ ໄດ້ຖືກແຕ່ງຕັ້ງໄວ້ໂດຍພຣະເຈົ້າ.

“ອາດາມ ແລະ ເອວາໄດ້ເຂົ້າຮ່ວມກັນໃນການແຕ່ງງານສຳລັບການເວລາ ແລະ ຊົ່ວນິລັນດອນ ໂດຍອຳນາດຂອງຖານະປະໂລຫິດອັນເປັນນິດ” (Russell M. Nelson, “Lessons from Eve,” Ensign, Nov. 1987, 87). ເປັນຫຍັງຄວາມຈິງນີ້ຈຶ່ງສຳຄັນທີ່ຈະຮູ້ຈັກ? ໃຫ້ໄຕ່ຕອງຂະນະທີ່ທ່ານອ່ານ ປະຖົມມະການ 1:27–28; 2:18–25; ໂມເຊ 3:18, 21–25; ແລະ ອັບຣາຮາມ 5:14–19. ຖ້າຫາກທ່ານຢາກຮຽນຮູ້ຕື່ມອີກກ່ຽວກັບການແຕ່ງງານຢູ່ໃນແຜນຂອງພຣະເຈົ້າ, ໃຫ້ອ່ານ ແລະ ໄຕ່ຕອງແຫລ່ງຕ່າງໆທີ່ຢູ່ຂ້າງລຸ່ມນີ້. ແຫລ່ງເຫລົ່ານີ້ກະຕຸ້ນທ່ານໃຫ້ເຮັດສິ່ງໃດ ເພື່ອປັບປຸງການແຕ່ງງານ ຫລື ເພື່ອກະກຽມສຳລັບການແຕ່ງງານໃນອະນາຄົດຂອງທ່ານ?

ເບິ່ງ ມັດທາຍ 19:4–6; 1 ໂກຣິນໂທ 11:11; Linda K. Burton, “We’ll Ascend Together,” Liahona, May 2015, 29–32; “ຄອບຄົວ: ການປະກາດຕໍ່ໂລກ,” ChurchofJesusChrist.org ນຳອີກ.

ປະຖົມມະການ 2:2–3; ໂມເຊ 3:2–3; ອັບຣາຮາມ 5:2–3

ພຣະເຈົ້າອວຍພອນ ແລະ ເຮັດໃຫ້ວັນຊະບາໂຕສັກສິດ.

ພຣະເຈົ້າເຮັດໃຫ້ວັນຊະບາໂຕສັກສິດ, ແລະ ພຣະອົງຂໍໃຫ້ເຮົາຮັກສາມັນໃຫ້ສັກສິດ. ແອວເດີ ເດວິດ ເອ ແບ໊ດນາ ໄດ້ສິດສອນວ່າ, “ວັນຊະບາໂຕເປັນເວລາຂອງພຣະເຈົ້າ, ເປັນ ເວລາສັກສິດ ທີ່ຕັ້ງໄວ້ໂດຍສະເພາະ ເພື່ອໃຫ້ນະມັດສະການພຣະອົງ ແລະ ເພື່ອໃຫ້ລະນຶກເຖິງຄຳສັນຍາທີ່ຍິ່ງໃຫຍ່ ແລະ ປະເສີດຂອງພຣະອົງ” (“Exceeding Great and Precious Promises,” Liahona, Nov. 2017, 92). ທ່ານຈະສາມາດໃຊ້ບົດຄວາມນີ້ ແລະ ປະຖົມມະການ 2:2–3; ໂມເຊ 3:2–3; ຫລື ອັບຣາຮາມ 5:2–3 ເພື່ອອະທິບາຍຕໍ່ບາງຄົນ ເຖິງເຫດຜົນທີ່ທ່ານເລືອກທີ່ຈະເຄົາລົບວັນຊະບາໂຕແນວໃດ? ພຣະຜູ້ເປັນເຈົ້າໄດ້ອວຍພອນທ່ານ ສຳລັບການຮັກສາວັນສັກສິດຂອງພຣະອົງແນວໃດ?

ເບິ່ງ ເອຊາຢາ 58:13–14; ຄຳສອນ ແລະ ພັນທະສັນຍາ 59:9–13; ວິດີໂອ “The Sabbath Is a Delight”, ChurchofJesusChrist.org ນຳອີກ.

ຮູບພາບ

family study icon

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ປະຖົມມະການ 1:1–25; ໂມເຊ 2:1–25; ອັບຣາຮາມ 4:1–25.ທ່ານຈະສາມາດເຮັດໃຫ້ການຮຽນຮູ້ກ່ຽວກັບການນິລະມິດສ້າງເປັນສິ່ງທີ່ມ່ວນຊື່ນສຳລັບຄອບຄົວຂອງທ່ານໄດ້ແນວໃດ? ທ່ານສາມາດພາຄອບຄົວຂອງທ່ານອອກໄປຊອກຫາບາງສິ່ງຢູ່ນອກເຮືອນ ທີ່ໄດ້ຖືກນິລະມິດສ້າງຂຶ້ນໃນແຕ່ລະໄລຍະ, ດັ່ງເຊັ່ນ ດວງດາວ, ຕົ້ນໄມ້, ຫລື ສັດສາວາສິ່ງ. ທ່ານກໍສາມາດສະແດງຮູບພາບເຖິງການນິລະມິດສ້າງໃນແຕ່ລະໄລຍະນຳອີກ ແລະ ເຊື້ອເຊີນສະມາຊິກໃນຄອບຄົວໃຫ້ລຽງຮູບຕາມລຳດັບ ຫລັງຈາກການອ່ານແຕ່ລະເລື່ອງກ່ຽວກັບການນິລະມິດສ້າງນຳກັນ. ການນິລະມິດສ້າງເຫລົ່ານີ້ສິດສອນເຮົາຫຍັງແດ່ກ່ຽວກັບພຣະບິດາເທິງສະຫວັນ ແລະ ພຣະເຢຊູຄຣິດ?

ປະຖົມມະການ 1; ໂມເຊ 2; ອັບຣາຮາມ 4.ວິທີໜຶ່ງທີ່ຈະເຂົ້າຫາເລື່ອງເລົ່າຂອງການນິລະມິດສ້າງ ແມ່ນໃຫ້ເຊື້ອເຊີນຄອບຄົວຂອງທ່ານໃຫ້ຊອກຫາຫລາຍສິ່ງຢູ່ໃນ ປະຖົມມະການ 1 ຫລື ໂມເຊ 2 ຊຶ່ງພຣະເຈົ້າເອີ້ນສິ່ງທີ່ພຣະອົງໄດ້ນິລະມິດສ້າງວ່າ “ດີ.” ສິ່ງນີ້ແນະນຳຫຍັງແດ່ກ່ຽວກັບວິທີທີ່ເຮົາຄວນປະຕິບັດຕໍ່ການນິລະມິດສ້າງຂອງພຣະເຈົ້າ—ລວມທັງຕົວເຮົາເອງ? ເຮົາຮຽນຮູ້ຫຍັງແດ່ຈາກວິທີທີ່ເຫດການເຫລົ່ານີ້ ຖືກບັນທຶກໄວ້ຢູ່ໃນ ອັບຣາຮາມ 4?

ປະຖົມມະການ 1:26–27; ໂມເຊ 2:26–27; ອັບຣາຮາມ 4:26–27.ເປັນຫຍັງມັນຈຶ່ງສຳຄັນທີ່ຮູ້ວ່າເຮົາໄດ້ຖືກນິລະມິດສ້າງຂຶ້ນໃນຮູບລັກສະນະຂອງພຣະເຈົ້າ? ມັນມີຜົນກະທົບຕໍ່ວິທີທີ່ເຮົາຮູ້ສຶກກ່ຽວກັບຕົວເຮົາເອງ, ກັບຄົນອື່ນ, ແລະ ກັບພຣະເຈົ້າແນວໃດ?

ຖ້າຫາກທ່ານມີລູກນ້ອຍ, ພວກທ່ານອາດຢາກອ່ານ ໂມເຊ 2:27 ນຳກັນ ແລະ ຫລິ້ນເກມທີ່ງ່າຍໆ: ສະແດງຮູບກ່ຽວກັບພຣະບິດາເທິງສະຫວັນ ແລະ ພຣະເຢຊູຄຣິດ, ດັ່ງເຊັ່ນ ຮູບເລກທີ 90 ໃນ ປຶ້ມຮູບພາບພຣະກິດຕິຄຸນ (2009), ແລະ ຂໍໃຫ້ສະມາຊິກໃນຄອບຄົວປ່ຽນຜຽນກັນຊີ້ໃສ່ພາກສ່ວນຂອງພຣະກາຍຂອງພຣະບິດາເທິງສະຫວັນ ຫລື ພຣະກາຍຂອງພຣະເຢຊູ. ແລ້ວສະມາຊິກໃນຄອບຄົວຄົນອື່ນໆ ສາມາດຊີ້ໃສ່ຮ່າງກາຍພາກສ່ວນດຽວກັນນັ້ນຂອງຕົນ.

ປະຖົມມະການ 1:28; ໂມເຊ 2:28; ອັບຣາຮາມ 4:28.“ພຣະບັນຍັດຂອງພຣະເຈົ້າຕໍ່ລູກໆຂອງພຣະອົງໃຫ້ມີລູກໃນແຜ່ນດິນໂລກ ຍັງເປັນພຣະບັນຍັດທີ່ໃຊ້ໄດ້ຢູ່.” (“ຄອບຄົວ: ການປະກາດຕໍ່ໂລກ,” ChurchofJesusChrist.org). ສະມາຊິກໃນຄອບຄົວສາມາດຫລິ້ນລະຄອນກ້ອມ ເຖິງວິທີທີ່ເຮົາອະທິບາຍຄວາມເຊື່ອຂອງເຮົາໃນພຣະບັນຍັດຂໍ້ນີ້ກັບຜູ້ທີ່ບໍ່ຮູ້ຈັກຄວາມຈິງນີ້ ຫລື ຜູ້ທີ່ບໍ່ເຊື່ອຄືກັບເຮົາ.

ປະຖົມມະການ 1:28; ໂມເຊ 2:28; ອັບຣາຮາມ 4:28.ຄຳວ່າ “ປົກຄອງ … ເໜືອທຸກສິ່ງເທິງແຜ່ນດິນໂລກນີ້” ໝາຍຄວາມວ່າແນວໃດ? (ເບິ່ງ ຄຳສອນ ແລະ ພັນທະສັນຍາ 59:16–21) ນຳອີກ. ຄອບຄົວຂອງເຮົາຈະສາມາດບັນລຸໜ້າທີ່ຮັບຜິດຊອບຂອງເຮົາ ທີ່ຈະດູແລແຜ່ນດິນໂລກໄດ້ແນວໃດ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ໂອ້ພຣະບິດາ,” ເພງສວດ ແລະ ເພງຂອງເດັກນ້ອຍ, 46.

ການປັບປຸງການສິດສອນຂອງເຮົາ

ນຳໃຊ້ພຣະຄຳພີໃນຊີວິດຂອງເຮົາ. ຫລັງຈາກໄດ້ອ່ານຂໍ້ພຣະຄຳພີແລ້ວ, ໃຫ້ເຊື້ອເຊີນສະມາຊິກໃນຄອບຄົວໃຫ້ນຳໃຊ້ມັນໃນຊີວິດຂອງເຂົາເຈົ້າ. ຍົກຕົວຢ່າງ, ໂມເຊ 3:1–3 ກ່ຽວຂ້ອງກັບການນະມັດສະການໃນວັນຊະບາໂຕຂອງເຮົາແຕ່ລະອາທິດແນວໃດ? (ເບິ່ງ Teaching in the Savior’s Way, 21.)