ປະຖົມມະການ
ພຣະທຳປະຖົມມະການເປັນໜັງສືເຫລັ້ມທຳອິດຢູ່ໃນພຣະຄຳພີເດີມ ແລະ ສາດສະດາໂມເຊເປັນຄົນຂຽນ. ມັນໃຫ້ເລື່ອງລາວກ່ຽວກັບການເລີ່ມຕົ້ນ, ດັ່ງເຊັ່ນການສ້າງແຜ່ນດິນໂລກ, ການເນລະມິດສ້າງສັດສາວາສິ່ງ ແລະ ມະນຸດໄວ້ເທິງແຜ່ນດິນໂລກ, ການຕົກຂອງອາດາມ ແລະ ເອວາ, ການເປີດເຜີຍເລື່ອງພຣະກິດຕິຄຸນຕໍ່ອາດາມ, ການເລີ່ມຕົ້ນຂອງເຜົ່າ ແລະ ເຊື້ອສາຍ, ການເລີ່ມຕົ້ນຂອງພາສາຕ່າງໆທີ່ບາເບນ, ແລະ ການເລີ່ມຕົ້ນຂອງຄອບຄົວອັບຣາຮາມທີ່ພາໄປສູ່ການສ້າງຕັ້ງເຊື້ອສາຍອິດສະຣາເອນ. ບົດບາດຂອງໂຢເຊັບໃນຖານະທີ່ເປັນຜູ້ຊ່ວຍກູ້ຊາວອິດສະຣາເອນກໍໄດ້ຖືກເນັ້ນໜັກຢູ່ໃນໜັງສືປະຖົມມະການນີ້ຄືກັນ.
ການເປີດເຜີຍຍຸກສຸດທ້າຍຢືນຢັນ ແລະ ໃຫ້ຄວາມແຈ່ມແຈ້ງກ່ຽວກັບໜັງສືປະຖົມມະການ (1 ນຟ 5; ອທ 1; ມຊ 1–8; ອຣຮ 1–5).
ໃນພຣະທຳປະຖົມມະການ, ບົດທີ 1–4 ກ່ຽວຂ້ອງກັບການສ້າງໂລກ ແລະ ການເຕີບໃຫຍ່ຂະຫຍາຍຕົວຂອງຄອບຄົວຂອງອາດາມ. ບົດທີ 5–10 ບັນທຶກປະຫວັດຂອງໂນອາ. ບົດທີ 11–20 ບອກເຖິງອັບຣາຮາມ ແລະ ຄອບຄົວຂອງເພິ່ນ ຈົນເຖິງສະໄໝຂອງອີຊາກ. ບົດທີ 21–35 ຕິດຕາມຄອບຄົວຂອງອີຊາກ. ບົດທີ 36 ບອກເຖິງເອຊາວ ແລະ ຄອບຄົວຂອງລາວ. ບົດທີ 37–50 ບອກເຖິງຄອບຄົວຂອງຢາໂຄບ ແລະ ໃຫ້ເລື່ອງລາວກ່ຽວກັບໂຢເຊັບຖືກຂາຍໄປປະເທດເອຢິບ ແລະ ບົດບາດຂອງລາວໃນການຊ່ວຍກູ້ເຊື້ອສາຍອິດສະຣາເອນ.