ນີໄຟ, ລູກຊາຍຂອງລີໄຮ
ໃນພຣະຄຳພີມໍມອນ, ລູກຊາຍທີ່ຊອບທຳຂອງລີໄຮກັບນາງຊາໄຣຢາ (1 ນຟ 1:1–4; 2:5). ນີໄຟມີສັດທາອັນແຮງກ້າໃນພຣະຄຳຂອງພຣະເຈົ້າ (1 ນຟ 3:7) ແລະ ກາຍເປັນສາດສະດາທີ່ຍິ່ງໃຫຍ່, ເປັນຜູ້ຮັກສາບັນທຶກ, ແລະ ຜູ້ນຳຂອງຜູ້ຄົນຂອງເພິ່ນ.
ໜັງສືນີໄຟສະບັບທີໜຶ່ງ
ບົດທີ 1 ເຖິງ 18:8 ສ່ວນຫລາຍແລ້ວແມ່ນກ່ຽວກັບສາດສະດາລີໄຮ ແລະ ຄອບຄົວຂອງເພິ່ນ ທີ່ໜີຈາກເຢຣູຊາເລັມ. ເຂົາເຈົ້າໄດ້ເດີນທາງຜ່ານຖິ່ນແຫ້ງແລ້ງກັນດານທີ່ແຫ້ງແລ້ງ ຈົນກວ່າເຂົາເຈົ້າໄດ້ໄປເຖິງທະເລ. 1 ນຟ 18:9–23 ບອກເຖິງການເດີນທາງຂອງເຂົາເຈົ້າໄປຫາແຜ່ນດິນແຫ່ງຄຳສັນຍາ, ຕາມການຊີ້ນຳຂອງພຣະຜູ້ເປັນເຈົ້າ, ເຖິງແມ່ນເລມັນກັບເລມູເອນໄດ້ກໍ່ການກະບົດກໍຕາມ. ບົດທີ 19–22 ບອກເຖິງຈຸດປະສົງຂອງນີໄຟ ກ່ຽວກັບການຮັກສາບັນທຶກ (1 ນຟ 6; 19:18)—ເພື່ອຊັກຊວນທຸກຄົນໃຫ້ລະນຶກເຖິງ ພຣະຜູ້ເປັນເຈົ້າ ພຣະຜູ້ໄຖ່ຂອງພວກເຂົາ. ເພິ່ນໄດ້ອ້າງເຖິງເອຊາຢາ (1 ນຟ 20–21) ແລະ ໄດ້ແປຄວາມໝາຍຂ່າວສານຂອງເອຊາຢາ, ດ້ວຍຄວາມຫວັງທີ່ຈະໃຫ້ທຸກຄົນມາຮູ້ຈັກພຣະເຢຊູຄຣິດ ວ່າເປັນ ພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງພວກເຂົາ (1 ນຟ 22:12).
ໜັງສືນີໄຟສະບັບທີສອງ
ບົດທີ 1–4 ບັນຈຸຄຳສອນສຸດທ້າຍຂອງລີໄຮ ແລະ ຄຳທຳນາຍກ່ອນເພິ່ນເສຍຊີວິດໄປ, ລວມທັງພອນທີ່ເພິ່ນໄດ້ມອບໃຫ້ແກ່ລູກຊາຍ ແລະ ຜູ້ສືບຕະກຸນຂອງເພິ່ນ. ບົດທີ 5 ອະທິບາຍວ່າເປັນຫຍັງຊາວນີໄຟຈຶ່ງແຍກຕົວອອກຈາກຊາວເລມັນ. ຊາວນີໄຟໄດ້ສ້າງພຣະວິຫານ, ໄດ້ສອນກົດຂອງໂມເຊ, ແລະ ຮັກສາບັນທຶກ. ບົດທີ 6–10 ບັນຈຸຄຳຂອງຢາໂຄບ, ນ້ອງຊາຍຂອງນີໄຟ. ຢາໂຄບໄດ້ທົບທວນປະຫວັດສາດຂອງຢູດາ ແລະ ໄດ້ທຳນາຍກ່ຽວກັບພຣະເມຊີອາ, ຊຶ່ງບາງສ່ວນໄດ້ຖືກເອົາອອກມາຈາກການຂຽນຂອງສາດສະດາ ເອຊາຢາ. ໃນ ບົດທີ 11–33 ນີໄຟໄດ້ບັນທຶກປະຈັກພະຍານຂອງເພິ່ນເຖິງພຣະຄຣິດ, ປະຈັກພະຍານຂອງຢາໂຄບ, ຄຳທຳນາຍກ່ຽວກັບຍຸກສຸດທ້າຍ, ແລະ ຫລາຍບົດຈາກພຣະທຳເອຊາຢາໃນພຣະຄຳພີເດີມ.