ສານຂອງໂປໂລ
ໜັງສືສິບສີ່ເຫລັ້ມໃນພຣະຄຳພີໃໝ່ ຊຶ່ງຕົ້ນສະບັບເປັນສານທີ່ອັກຄະສາວົກໂປໂລໄດ້ສົ່ງໄປຫາສະມາຊິກຂອງສາດສະໜາຈັກ. ສານເຫລົ່ານີ້ຖືກແຍກເປັນຫລາຍກຸ່ມດັ່ງຕໍ່ໄປນີ້:
1 ແລະ 2 ເທສະໂລນິກ (ຄ.ສ. 50–51)
ໂປໂລໄດ້ຂຽນສານເຖິງຊາວເທສະໂລນິກຈາກໂກຣິນໂທລະຫວ່າງການໄປສອນສາດສະໜາເທື່ອທີສອງຂອງລາວ. ວຽກງານຂອງລາວຢູ່ເທສະໂລນິກໄດ້ຖືກບັນຍາຍໄວ້ ໃນກິດຈະການ 17. ລາວຢາກກັບຄືນໄປ ເທສະໂລນິກ, ແຕ່ລາວກໍບໍ່ສາມາດເຮັດ (1 ທສນ 2:18). ສະນັ້ນລາວຈຶ່ງໄດ້ສົ່ງຕີໂມທຽວໄປໃຫ້ກຳລັງໃຈຜູ້ປ່ຽນໃຈເຫລື້ອມໃສ ແລະ ມາລາຍງານລາວກ່ຽວກັບຄວາມທຸກສຸກຂອງສະມາຊິກ. ສານສະບັບທຳອິດ ແມ່ນກ່ຽວກັບຄວາມຂອບພຣະໄທຂອງລາວສຳລັບການກັບຄືນມາຂອງຕີໂມທຽວ. ສານສະບັບທີສອງ ແມ່ນຖືກຂຽນບໍ່ດົນຫລັງຈາກນັ້ນ.
1 ແລະ 2 ໂກຣິນໂທ, ຄາລາເຕຍ, ໂຣມ (ຄ.ສ. 55–57)
ໂປໂລໄດ້ຂຽນສານເຖິງຊາວໂກຣິນໂທລະຫວ່າງການເດີນທາງໄປສອນສາດສະໜາເທື່ອທີສາມຂອງລາວ ເພື່ອຕອບຄຳຖາມ ແລະ ດັດແປງຄວາມບໍ່ເປັນລະບຽບໃນບັນດາໄພ່ພົນຂອງພຣະເຈົ້າຢູ່ໂກຣິນໂທ.
ສານເຖິງຊາວຄາລາເຕຍ ອາດຖືກຂຽນເຖິງໜ່ວຍສາດສະໜາຈັກຫລາຍແຫ່ງຕະຫລອດທົ່ວຄາລາເຕຍ. ສະມາຊິກບາງຈຳນວນຂອງສາດສະໜາຈັກໄດ້ປະຖິ້ມພຣະກິດຕິຄຸນໄປ ຕາມຄວາມເຫັນຊອບກົດໝາຍຂອງຊາວຢິວ. ໃນຈົດໝາຍສະບັບນີ້, ໂປໂລໄດ້ອະທິບາຍຈຸດປະສົງຂອງກົດຂອງໂມເຊ ແລະ ຄຸນຄ່າຂອງສາດສະໜາທີ່ເຊີດຊູທາງວິນຍານ.
ໂປໂລໄດ້ຂຽນສານເຖິງຊາວໂຣມຈາກເມືອງໂກຣິນໂທ, ໃນການຕຽມໄພ່ພົນຂອງພຣະເຈົ້າຊາວໂຣມ ສຳລັບການຢ້ຽມຢາມຂອງລາວ ທີ່ລາວຫວັງຈະໄປຫາພວກເຂົາ. ຈົດໝາຍສະບັບນີ້ກໍຍັງຢືນຢັນຄຳສອນ ທີ່ຊາວຢິວບາງຈຳນວນຜູ້ໄດ້ປ່ຽນໃຈເຫລື້ອມໃສເປັນຊາວຄຣິດສະຕຽນ ກຳລັງໂຕ້ຖຽງກັນຢູ່.
ຟີລິບປອຍ, ໂກໂລຊາຍ, ເອເຟໂຊ, ຟີເລໂມນ, ເຮັບເຣີ (ຄ.ສ. 60–62)
ໂປໂລໄດ້ຂຽນສານໃນຂະນະທີ່ລາວຢູ່ໃນຄຸກເທື່ອທຳອິດຢູ່ໃນກຸງໂຣມ.
ໂປໂລໄດ້ຂຽນສານເຖິງຊາວຟິລິບປອຍ ສ່ວນຫລາຍແລ້ວແມ່ນສະແດງຄວາມກະຕັນຍູ ແລະ ຄວາມຮັກແພງຂອງລາວຕໍ່ໄພ່ພົນຂອງພຣະເຈົ້າຊາວຟີລິບປອຍ ແລະ ໃຫ້ກຳລັງໃຈພວກເຂົາ ເນື່ອງດ້ວຍຄວາມຜິດຫວັງຂອງພວກເຂົາກັບການຕິດຄຸກຂອງລາວເປັນເວລາດົນນານ.
ໂປໂລໄດ້ຂຽນສານເຖິງຊາວໂກໂລຊາຍຕາມການລາຍງານທີ່ແຈ້ງບອກວ່າ ໄພ່ພົນຂອງພຣະເຈົ້າຊາວໂກໂລຊາຍ ກຳລັງເຮັດຄວາມຜິດທີ່ຮ້າຍແຮງ. ພວກເຂົາເຊື່ອວ່າຄວາມດີພ້ອມທຸກຢ່າງ ມາເຖິງໂດຍການຮັກສາພິທີການພາຍນອກຝ່າຍດຽວຢ່າງລະມັດລະວັງ ແທນທີ່ຈະພັດທະນາຄຸນລັກສະນະຂອງຕົນໃຫ້ເປັນເໝືອນດັ່ງພຣະຄຣິດ.
ສານເຖິງຊາວເອເຟໂຊເປັນສະບັບທີ່ສຳຄັນຫລາຍ, ເພາະວ່າມັນບັນຈຸຄຳສອນຂອງໂປໂລກ່ຽວກັບສາດສະໜາຈັກຂອງພຣະຄຣິດ.
ສານເຖິງຟີເລໂມນ ເປັນຈົດໝາຍສ່ວນຕົວກ່ຽວກັບໂອເນຊີໂມ ຂ້າທາດຜູ້ທີ່ໄດ້ຂະໂມຍຈາກເຈົ້ານາຍ, ຟີເລໂມນ, ແລະ ໄດ້ລັກໜີໄປກຸງໂຣມ. ໂປໂລໄດ້ສົ່ງໂອເນຊີໂມກັບຄືນໄປຫາເຈົ້ານາຍຂອງລາວ ພ້ອມດ້ວຍຈົດໝາຍຂໍໃຫ້ອະໄພໂທດໃຫ້ແກ່ໂອເນຊີໂມ.
ໂປໂລໄດ້ຂຽນສານເຖິງຊາວເຮັບເຣີ ເຖິງສະມາຊິກຂອງສາດສະໜາຈັກຊາວຢິວ ເພື່ອຊັກຊວນພວກເຂົາວ່າ ກົດຂອງໂມເຊໄດ້ສຳເລັດຄົບຖ້ວນແລ້ວໃນພຣະຄຣິດ ແລະ ວ່າກົດຂອງພຣະກິດຕິຄຸນຂອງພຣະຄຣິດໄດ້ມາແທນກົດຂອງໂມເຊແລ້ວ.
1 ແລະ 2 ຕີໂມທຽວ, ຕີໂຕ (ຄ.ສ. 64–65)
ໂປໂລໄດ້ຂຽນສານເຫລົ່ານີ້ຫລັງຈາກລາວໄດ້ຖືກປ່ອຍອອກຈາກຄຸກຢູ່ກຸງໂຣມເທື່ອທຳອິດ.
ໂປໂລໄດ້ເດີນທາງໄປເມືອງເອເຟໂຊ, ບ່ອນທີ່ລາວໄດ້ປະຕີໂມທຽວໄວ້ທີ່ນັ້ນ ເພື່ອຢຸດຢັ້ງການຂະຫຍາຍຕົວຂອງການຄາດຄະເນບາງຢ່າງ, ໂດຍທີ່ຕັ້ງໃຈຈະກັບຄືນມາ. ລາວໄດ້ຂຽນສານສະບັບທຳອິດເຖິງຕີໂມທຽວ, ບາງທີອາດຈາກເມືອງມາເກໂດເນຍ, ເພື່ອແນະນຳ ແລະ ຊຸກຍູ້ລາວໃນການບັນລຸພາລະກິດຂອງລາວ.
ໂປໂລໄດ້ຂຽນສານເຖິງຕີໂຕ ລະຫວ່າງເວລາທີ່ລາວໄດ້ຖືກປ່ອຍອອກຈາກຄຸກ. ລາວອາດໄດ້ໄປຢ້ຽມຢາມກະເຣເຕ, ບ່ອນທີ່ຕີໂຕຮັບໃຊ້ຢູ່. ຈົດໝາຍສະບັບນີ້ ສ່ວນຫລາຍແລ້ວແມ່ນກ່ຽວກັບການດຳລົງຊີວິດທີ່ຊອບທຳ ແລະ ລະບຽບວິໄນ ພາຍໃນສາດສະໜາຈັກ.
ໂປໂລໄດ້ຂຽນສານສະບັບທີສອງເຖິງຕີໂມທຽວ ໃນຂະນະທີ່ຢູ່ໃນຄຸກເທື່ອທີສອງ, ບໍ່ດົນກ່ອນໂປໂລໄດ້ຖືກຂ້າຍ້ອນຄວາມເຊື່ອຂອງລາວ. ສານສະບັບນີ້ບັນຈຸຖ້ອຍຄຳສຸດທ້າຍຂອງໂປໂລ ແລະ ສະແດງເຖິງຄວາມກ້າຫານທີ່ຍອດຍ້ຽມ ແລະ ຄວາມໄວ້ວາງໃຈຂອງລາວ ຈົນເຖິງຂັ້ນທີ່ລາວໄດ້ຖືກຂ້າຕາຍ.