ພຣະຄຳພີເດີມ
ການຂຽນຂອງສາດສະດາສະໄໝບູຮານ ຜູ້ໄດ້ກະທຳພາຍໃຕ້ອິດທິພົນຂອງພຣະວິນຍານສັກສິດ ແລະ ໄດ້ເປັນພະຍານເຖິງພຣະຄຣິດ ແລະ ການປະຕິບັດສາດສະໜາກິດຂອງພຣະອົງເປັນເວລາຫລາຍສັດຕະວັດ. ມັນຍັງບັນຈຸປະຫວັດສາດຂອງອັບຣາຮາມ ແລະ ຜູ້ສືບຕະກຸນຂອງເພິ່ນນຳອີກ, ເລີ່ມຈາກອັບຣາຮາມ, ແລະ ພັນທະສັນຍາ, ຫລື ພຣະຄຳພີ, ພຣະຜູ້ເປັນເຈົ້າໄດ້ເຮັດໄວ້ນຳອັບຣາຮາມ ແລະ ລູກຫລານຂອງເພິ່ນ.
ໜັງສືຫ້າເຫລັ້ມທຳອິດຂອງພຣະຄຳພີເດີມ ທີ່ຂຽນໂດຍໂມເຊ. ນັ້ນຄືປະຖົມມະການ, ອົບພະຍົບ, ລະບຽບພວກເລວີ, ຈົດເຊັນບັນຊີ, ແລະ ພຣະບັນຍັດສອງ. ປະຖົມມະການອ້າງເຖິງທີ່ມາຂອງແຜ່ນດິນໂລກ, ມະນຸດຊາດ, ພາສາ, ເຊື້ອຊາດ, ແລະ ການເລີ່ມຕົ້ນຂອງເຊື້ອສາຍອິດສະຣາເອນ.
ໜັງສືປະຫວັດສາດບອກເຖິງເຫດການຕ່າງໆຂອງອິດສະຣາເອນ. ໜັງສືເຫລົ່ານີ້ຄື ໂຢຊວຍ, ພວກຜູ້ປົກຄອງ, ຣຸດ, 1 ແລະ 2 ຊາມູເອນ, 1 ແລະ 2 ກະສັດ, 1 ແລະ 2 ຂ່າວຄາວ, ເອຊະຣາ, ເນເຫມີຢາ, ແລະ ເອສະເທີ.
ປຶ້ມກາບກອນ ບັນທຶກປັນຍາ ແລະ ວັນນະຄະດີຂອງສາດສະດາ. ປຶ້ມເຫລົ່ານັ້ນຄື ໂຢບ, ເພງສັນລະເສີນ, ສຸພາສິດ, ປັນຍາຈານ, ຍອດເພງ, ແລະ ເພງຄ່ຳຄວນ.
ສາດສະດາໄດ້ເຕືອນຊາວອິດສະຣາເອນເຖິງຄວາມຜິດບາບຂອງຕົນ ແລະ ໄດ້ເປັນພະຍານເຖິງພອນທີ່ມາຈາກການເຊື່ອຟັງ. ພວກເພິ່ນໄດ້ທຳນາຍເຖິງການສະເດັດມາຂອງພຣະຄຣິດ, ຜູ້ຈະຊົດໃຊ້ສຳລັບຄວາມຜິດບາບຂອງຜູ້ທີ່ກັບໃຈ, ຮັບພິທີການຕ່າງໆ, ແລະ ດຳລົງຊີວິດຕາມພຣະກິດຕິຄຸນ. ໜັງສືຂອງສາດສະດາແມ່ນ ເອຊາຢາ, ເຢເຣມີຢາ, ເອເຊກຽນ, ດານີເອນ, ໂຮເຊອາ, ໂຢເອນ, ອາໂມ, ໂອບາດີຢາ, ໂຢນາ, ມີກາ, ນາຮູມ, ຮາບາກຸກ, ເສຟານີຢາ, ຮັກກາຍ, ເຊກາຣີຢາ, ແລະ ມາລາກີ.
ໜັງສືພຣະຄຳພີເດີມສ່ວນຫລາຍໄດ້ຖືກຂຽນເປັນພາສາເຮັບເຣີ. ການຂຽນສ່ວນໜ້ອຍໜຶ່ງເປັນພາສາອາຣັບ ທີ່ເປັນພາສາຄ້າຍຄືກັນ.