“ວັນທີ 24–30 ເດືອນມັງກອນ. ໂມເຊ 7: ‘ພຣະຜູ້ເປັນເຈົ້າໄດ້ເອີ້ນຜູ້ຄົນຂອງພຣະອົງວ່າ ຊີໂອນ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)
“ວັນທີ 24–30 ເດືອນມັງກອນ. ໂມເຊ 7,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022
Love One Another [ຮັກກັນແລະກັນ], ໂດຍ ເອມມາ ດາໂນສັນ ເທເລີ
ວັນທີ 24–30 ເດືອນມັງກອນ
ໂມເຊ 7
“ພຣະຜູ້ເປັນເຈົ້າໄດ້ເອີ້ນຜູ້ຄົນຂອງພຣະອົງວ່າ ຊີໂອນ”
ຂະນະທີ່ທ່ານອ່ານ ແລະ ໄຕ່ຕອງ ໂມເຊ 7, ໃຫ້ບັນທຶກຄວາມປະທັບໃຈທາງວິນຍານຂອງທ່ານ. ໂດຍການເຮັດສິ່ງນີ້, ທ່ານສະແດງວ່າ ທ່ານນັບຖືການຊີ້ນຳຈາກພຣະຜູ້ເປັນເຈົ້າ ແລະ ວ່າທ່ານຢາກໄດ້ຮັບການຊີ້ນຳເພີ່ມເຕີມຈາກພຣະອົງ.
ບັນທຶກຄວາມປະທັບໃຈຂອງທ່ານ
ຕະຫລອດທົ່ວປະຫວັດສາດ, ຜູ້ຄົນໄດ້ພະຍາຍາມບັນລຸສິ່ງທີ່ເອນົກ ແລະ ຜູ້ຄົນຂອງເພິ່ນໄດ້ປະສົບຄວາມສຳເລັດ: ການສ້າງສັງຄົມໃນອຸດົມຄະຕິ ບ່ອນທີ່ບໍ່ມີຄວາມທຸກຍາກລຳບາກ ຫລື ຄວາມຮຸນແຮງ. ໂດຍທີ່ເປັນຜູ້ຄົນຂອງພຣະເຈົ້າ, ເຮົາແບ່ງປັນຄວາມປາດຖະໜານີ້. ເຮົາເອີ້ນມັນວ່າ ການສ້າງຊີໂອນ, ແລະ ມັນລວມທັງ—ນອກເໜືອໄປຈາກການດູແລຄົນຍາກຈົນ ແລະ ການສົ່ງເສີມຄວາມສະຫງົບ—ການເຮັດພັນທະສັນຍາ, ການຢູ່ນຳກັນໃນຄວາມຊອບທຳ, ແລະ ການກາຍເປັນໜຶ່ງນຳກັນ ແລະ ນຳພຣະເຢຊູຄຣິດ, “ກະສັດແຫ່ງຊີໂອນ” (ໂມເຊ 7:53). ເປັນເພາະວຽກງານແຫ່ງການສະຖາປະນາຊີໂອນດຳເນີນຕໍ່ຢູ່ໃນວັນເວລາຂອງເຮົາ, ມັນຈຶ່ງເປັນປະໂຫຍດທີ່ຈະຖາມວ່າ, ເອນົກ ແລະ ຜູ້ຄົນຂອງເພິ່ນເຮັດແນວໃດ? ເຂົາເຈົ້າໄດ້ກາຍເປັນ “ໃຈດຽວ ແລະ ມີຄວາມຄິດດຽວ” ໄດ້ແນວໃດ (ໂມເຊ 7:18) ເຖິງແມ່ນມີຄວາມຊົ່ວຮ້າຍຢູ່ອ້ອມຮອບເຂົາເຈົ້າກໍຕາມ? ໃນບັນດາລາຍລະອຽດຫລາຍຢ່າງທີ່ ໂມເຊ 7 ໃຫ້ເຮົາຮູ້ຈັກກ່ຽວກັບຊີໂອນ, ຢ່າງໜຶ່ງໂດຍສະເພາະທີ່ມີຄ່າຕໍ່ໄພ່ພົນຍຸກສຸດທ້າຍ ຄົງເປັນສິ່ງນີ້: ຊີໂອນບໍ່ໄດ້ເປັນພຽງແຕ່ເມືອງເທົ່ານັ້ນ—ມັນເປັນສະພາບຂອງໃຈ ແລະ ວິນຍານ. ຊີໂອນ, ດັ່ງທີ່ພຣະຜູ້ເປັນເຈົ້າໄດ້ສິດສອນ, ວ່າເປັນ “ຜູ້ທີ່ມີໃຈບໍລິສຸດ” (ຄຳສອນ ແລະ ພັນທະສັນຍາ 97:21). ດັ່ງນັ້ນ ບາງທີວິທີທີ່ດີທີ່ສຸດທີ່ຈະສ້າງຊີໂອນແມ່ນການເລີ່ມຕົ້ນຢູ່ໃນໃຈ ແລະ ໃນບ້ານເຮືອນຂອງເຮົາ.
ແນວຄິດສຳລັບການສຶກສາພຣະຄຳພີເປັນສ່ວນຕົວ
ຄວາມພະຍາຍາມຂອງເອນົກ ເປັນແບບແຜນສຳລັບການສ້າງຊີໂອນໃນຊີວິດຂອງເຮົາເອງ.
ເພາະ ໂມເຊ 7 ເປັນບັນທຶກເຖິງວິທີທີ່ຜູ້ຕິດຕາມພຣະເຈົ້າໄດ້ປະສົບຄວາມສຳເລັດໃນການສ້າງຊີໂອນ, ມັນຈຶ່ງສາມາດໃຫ້ຄຳແນະນຳ ແລະ ດົນໃຈເຮົາທຸກວັນນີ້ ຂະນະທີ່ເຮົາພະຍາຍາມເຮັດແບບດຽວກັນນັ້ນ. ໃຫ້ຄິດທີ່ຈະໃຊ້ຕາຕະລາງອັນໜຶ່ງ ຄືກັນກັບຕາຕະລາງອັນນີ້ ເພື່ອບັນທຶກສິ່ງທີ່ທ່ານໄດ້ຮຽນຮູ້ກ່ຽວກັບຊີໂອນ ຈາກ ໂມເຊ 7:16–21, 27, 53, 62–69.
|
ຂໍ້ທີ |
ທ່ານຮຽນຮູ້ຫຍັງແດ່ກ່ຽວກັບຊີໂອນ? |
ສິ່ງນີ້ແນະນຳທ່ານໃຫ້ເຮັດສິ່ງໃດກ່ຽວກັບຄວາມພະຍາຍາມຂອງທ່ານທີ່ຈະສ້າງຊີໂອນ? |
|---|---|---|
ຂໍ້ທີ | ທ່ານຮຽນຮູ້ຫຍັງແດ່ກ່ຽວກັບຊີໂອນ? ຜູ້ຄົນຂອງຊີໂອນ “ມີໃຈດຽວ ແລະ ມີຄວາມຄິດດຽວ.” | ສິ່ງນີ້ແນະນຳທ່ານໃຫ້ເຮັດສິ່ງໃດກ່ຽວກັບຄວາມພະຍາຍາມຂອງທ່ານທີ່ຈະສ້າງຊີໂອນ? ເຮົາຕ້ອງສາມັກຄີກັນເປັນຄອບຄົວ ແລະ ເປັນສາດສະໜາຈັກ. |
ຂໍ້ທີ | ທ່ານຮຽນຮູ້ຫຍັງແດ່ກ່ຽວກັບຊີໂອນ? “ຕາມຄວາມສົມຄວນຂອງເວລາ, [ຊີໂອນ] ໄດ້ຖືກເອົາຂຶ້ນໄປສະຫວັນ.” | ສິ່ງນີ້ແນະນຳທ່ານໃຫ້ເຮັດສິ່ງໃດກ່ຽວກັບຄວາມພະຍາຍາມຂອງທ່ານທີ່ຈະສ້າງຊີໂອນ? ການສ້າງຊີໂອນເປັນຂັ້ນຕອນທີ່ດຳເນີນໄປເທື່ອລະເລັກເທື່ອລະນ້ອຍ. |
ຂໍ້ທີ | ທ່ານຮຽນຮູ້ຫຍັງແດ່ກ່ຽວກັບຊີໂອນ? | ສິ່ງນີ້ແນະນຳທ່ານໃຫ້ເຮັດສິ່ງໃດກ່ຽວກັບຄວາມພະຍາຍາມຂອງທ່ານທີ່ຈະສ້າງຊີໂອນ? |
ຂໍ້ທີ | ທ່ານຮຽນຮູ້ຫຍັງແດ່ກ່ຽວກັບຊີໂອນ? | ສິ່ງນີ້ແນະນຳທ່ານໃຫ້ເຮັດສິ່ງໃດກ່ຽວກັບຄວາມພະຍາຍາມຂອງທ່ານທີ່ຈະສ້າງຊີໂອນ? |
ຜູ້ຄົນຂອງພຣະເຈົ້າຄວນພະຍາຍາມໃຫ້ “ມີໃຈດຽວ ແລະ ມີຄວາມຄິດດຽວ.”
ໂມເຊ 7:18–19 ບັນຈຸບຸກຄະລິກລັກສະນະທີ່ສຳຄັນກ່ຽວກັບຜູ້ຄົນທີ່ພຣະຜູ້ເປັນເຈົ້າເອີ້ນວ່າຊີໂອນ. ທ່ານຄິດວ່າເປັນຫຍັງບຸກຄະລິກລັກສະນະເຫລົ່ານີ້ຈຶ່ງຈຳເປັນຕໍ່ການສ້າງຊີໂອນ? ດັ່ງທີ່ບັນຍາຍຢູ່ໃນບົດນີ້, ຊີໂອນແຕກຕ່າງຈາກກຸ່ມ ຫລື ອົງການອື່ນທີ່ເປັນໜຶ່ງດຽວກັນ ຢູ່ໃນໂລກແນວໃດ? ຂະນະທີ່ທ່ານໄຕ່ຕອງຄຳຖາມນີ້, ທ່ານອາດຄິດກ່ຽວກັບພຣະຄຳເຫລົ່ານີ້ເຖິງພຣະເຢຊູຄຣິດ ຢູ່ໃນ ຂໍ້ທີ 53: “ພຣະເມຊີອາ, ກະສັດແຫ່ງຊີໂອນ.” ການມີພຣະເຢຊູຄຣິດເປັນກະສັດຂອງເຮົາ ໝາຍຄວາມວ່າແນວໃດ? ພຣະອົງຊ່ວຍເຮົາໃຫ້ພັດທະນາບຸກຄະລິກລັກສະນະຂອງຊີໂອນແນວໃດ?
ເບິ່ງ ຟີລິບປອຍ 2:1–5; 4 ນີໄຟ 1:15–18; ຄຳສອນ ແລະ ພັນທະສັນຍາ 97:21; 105:5 ນຳອີກ.
ເຮົາຄວນພະຍາຍາມ “ມີໃຈດຽວ ແລະ ມີຄວາມຄິດດຽວ” (ໂມເຊ 7:18).
ມີຫຍັງເກີດຂຶ້ນກັບເມືອງຂອງເອນົກ?
ວະລີທີ່ວ່າ “ຖືກເອົາຂຶ້ນໄປ” (ໂມເຊ 7:21, 23), “ຖືກຍົກຂຶ້ນ” (ໂມເຊ 7:24), “ຖືກຮັບຂຶ້ນໄປ” (ໂມເຊ 7:27), ແລະ “ຫລົບໜີ” (ໂມເຊ 7:69) ກ່າວເຖິງຊີໂອນ ແລະ ຜູ້ຄົນຂອງເອນົກ ຖືກປ່ຽນສະພາບ ແລະ ຖືກເອົາຂຶ້ນໄປສະຫວັນ. ຜູ້ຄົນທີ່ຖືກປ່ຽນສະພາບ “ໄດ້ປ່ຽນແປງເພື່ອວ່າເຂົາເຈົ້າຈະບໍ່ປະສົບກັບຄວາມເຈັບປວດ ຫລື ຄວາມຕາຍ” ຕອນເປັນມະນຸດ (ຄູ່ມືພຣະຄຳພີ, “ບຸກຄົນທີ່ຖືກປ່ຽນສະພາບ,” “ຊີໂອນ,” scriptures.ChurchofJesusChrist.org; ເບິ່ງ 3 ນີໄຟ 28:4–9, 15–18, 39–40 ນຳອີກ).
ພຣະເຈົ້າກັນແສງເພາະລູກໆຂອງພຣະອົງ.
ບາງຄົນເຫັນພຣະເຈົ້າວ່າ ພຣະອົງຢູ່ຫ່າງເຫີນ ແລະ ບໍ່ຮູ້ສຶກກະທົບກະເທືອນໃນສິ່ງທີ່ເກີດກັບເຮົາ. ແຕ່ເອນົກໄດ້ເຫັນພາບນິມິດ ຊຶ່ງໃນນັ້ນພຣະເຈົ້າໄດ້ກັນແສງເພາະລູກໆຂອງພຣະອົງ. ຂະນະທີ່ທ່ານອ່ານ ໂມເຊ 7:28–40, ໃຫ້ຊອກຫາເຫດຜົນທີ່ພຣະອົງໄດ້ກັນແສງ. ໃນພາກສ່ວນທີ່ເຫລືອຢູ່ຂອງພາບນິມິດຂອງເອນົກ, ຊຶ່ງບັນຍາຍຢູ່ໃນ ໂມເຊ 7:41–69, ທ່ານເຫັນຫລັກຖານຢ່າງໃດແດ່ ທີ່ພຣະເຈົ້າ “ມີເມດຕາ ແລະ ກະລຸນາຕະຫລອດການ”? (ໂມເຊ 7:30; ເບິ່ງ ຂໍ້ທີ 43, 47, ແລະ 62 ສຳລັບຕົວຢ່າງ).
ໃນຍຸກສຸດທ້າຍ ພຣະເຈົ້າຈະເຕົ້າໂຮມຜູ້ທີ່ພຣະອົງເລືອກໄວ້.
ຂໍ້ທີ 62 ບັນຍາຍເຫດການຂອງຍຸກສຸດທ້າຍ. ໃຫ້ພິຈາລະນາວະລີເຫລົ່ານີ້ ວ່າມັນມີຄວາມໝາຍແນວໃດ: “ຄວາມຊອບທຳຈະຖືກສົ່ງລົງມາຈາກສະຫວັນ,” “ເຮົາຈະສົ່ງຄວາມຈິງຂຶ້ນມາຈາກແຜ່ນດິນໂລກ,” “ເຮົາຈະເຮັດໃຫ້ຄວາມຊອບທຳ ແລະ ຄວາມຈິງກວາດແຜ່ນດິນໂລກດັ່ງນ້ຳຖ້ວມ.” ວະລີເຫລົ່ານີ້ສິດສອນທ່ານຫຍັງແດ່ກ່ຽວກັບວຽກງານຂອງພຣະເຈົ້າ ໃນຍຸກສຸດທ້າຍ?
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
ໂມເຊ 7:18–19.ເພື່ອຊ່ວຍສະມາຊິກໃນຄອບຄົວໃຫ້ເຂົ້າໃຈຄວາມໝາຍທີ່ວ່າ “ມີໃຈດຽວ,” ທ່ານສາມາດຕັດເຈ້ຍເຮັດເປັນຮູບຫົວໃຈ ແລະ ຕັດມັນເປັນຫລາຍໆຕ່ອນເພື່ອປະກອບເຂົ້າກັນເປັນຮູບ, ໃຫ້ພໍສຳລັບທຸກຄົນທີ່ຈະໄດ້ຮັບໜຶ່ງຕ່ອນ. ສະມາຊິກໃນຄອບຄົວສາມາດຂຽນຊື່ຂອງຕົນໃສ່ໃນຕ່ອນເຈ້ຍ ແລະ ຊ່ວຍກັນປະກອບໃຫ້ເປັນຮູບຫົວໃຈ. ເມື່ອປະກອບຕ່ອນເຈ້ຍຮຽບຮ້ອຍແລ້ວ ພວກທ່ານອາດເວົ້າລົມກັນເຖິງສິ່ງທີ່ພວກທ່ານມັກກ່ຽວກັບສະມາຊິກໃນຄອບຄົວແຕ່ລະຄົນ.
-
ໂມເຊ 7:28–31, 35.ເຮົາຮຽນຮູ້ຫຍັງແດ່ກ່ຽວກັບພຣະເຈົ້າ ຈາກຂໍ້ເຫລົ່ານີ້?
-
ໂມເຊ 7:32.ເປັນຫຍັງພຣະເຈົ້າຈຶ່ງມອບອຳເພີໃຈໃຫ້ເຮົາ? ເຮົາຈະເວົ້າແນວໃດກັບຜູ້ທີ່ຄິດວ່າ ພຣະບັນຍັດຂອງພຣະເຈົ້າຈຳກັດອຳເພີໃຈຂອງເຮົາ? ການອ່ານ 2 ນີໄຟ 2:25–27 ອາດຊ່ວຍໃຫ້ມີການສົນທະນາເພີ່ມເຕີມ.
-
ໂມເຊ 7:59–67.ຂະນະທີ່ຄອບຄົວຂອງທ່ານອ່ານ ໂມເຊ 7:59–67, ໃຫ້ພະຍາຍາມໝາຍ ຫລື ຊີ້ບອກເຖິງສິ່ງທີ່ພຣະຜູ້ເປັນເຈົ້າບອກເອນົກກ່ຽວກັບຍຸກສຸດທ້າຍ—ຍົກຕົວຢ່າງ, ວ່າພຣະເຈົ້າຈະ “ເຕົ້າໂຮມຜູ້ທີ່ [ພຣະອົງ] ເລືອກໄວ້” (ຂໍ້ທີ 62) ແລະ ວ່າມັນຈະມີ “ຄວາມທຸກຍາກລຳບາກອັນໃຫຍ່ຫລວງໃນບັນດາຄົນຊົ່ວ” (ຂໍ້ທີ 66). ເຮົາຈະມີສັດທາ ແລະ ມີຄວາມຫວັງ ໃນທ່າມກາງຄວາມຊົ່ວຮ້າຍ ໃນຍຸກສຸດທ້າຍໄດ້ແນວໃດ? ໃນພາກສ່ວນໜຶ່ງຂອງການສົນທະນານີ້, ໃຫ້ຄິດທີ່ຈະອ່ານຂໍ້ຄວາມເຫລົ່ານີ້ ຈາກແອວເດີ ຣອນໂນ ເອ ແຣັສ໌ແບນ ທີ່ວ່າ: “ຂໍໃຫ້ຮັບຮູ້ໄວ້ເຖີດອ້າຍເອື້ອຍນ້ອງທັງຫລາຍ. ແມ່ນແລ້ວ, ເຮົາມີຊີວິດຢູ່ໃນວັນເວລາທີ່ວຸ້ນວາຍ, ແຕ່ເມື່ອເຮົາຍຶດໝັ້ນຢູ່ໃນເສັ້ນທາງແຫ່ງພັນທະສັນຍາ, ເຮົາຈະບໍ່ຢ້ານກົວ. ຂ້າພະເຈົ້າອວຍພອນທ່ານຂະນະທີ່ທ່ານເຮັດດັ່ງນີ້, ທ່ານຈະບໍ່ຢ້ານກົວໂດຍວັນເວລາທີ່ເຮົາອາໄສຢູ່ ຫລື ບັນຫາທີ່ຈະເຂົ້າມາໃນຊີວິດຂອງທ່ານ. ຂ້າພະເຈົ້າອວຍພອນທ່ານໃຫ້ເລືອກທີ່ຈະຢືນຢູ່ໃນສະຖານທີ່ສັກສິດ ແລະ ບໍ່ຫວັ່ນໄຫວ. ຂ້າພະເຈົ້າອວຍພອນທ່ານໃຫ້ເຊື່ອໃນຄຳສັນຍາຂອງພຣະເຢຊູຄຣິດ, ວ່າພຣະອົງຊົງພຣະຊົນ ແລະ ວ່າພຣະອົງຄຸ້ມຄອງເຮົາຢູ່, ຫ່ວງໃຍເຮົາ ແລະ ຢືນຢູ່ຄຽງຂ້າງເຮົາ” (“Be Not Troubled,” Liahona, Nov. 2018, 21).
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ເພງແນະນຳ: “ຮັກທີ່ບ້ານ,” ເພງສວດ ແລະ ເພງຂອງເດັກນ້ອຍ, 48.
ການປັບປຸງການສິດສອນຂອງເຮົາ
ຊ່າງສັງເກດ. ຖ້າຫາກທ່ານເອົາໃຈໃສ່ຕໍ່ສິ່ງທີ່ເກີດຂຶ້ນຢູ່ໃນຊີວິດຂອງລູກໆຂອງທ່ານ, ແລ້ວທ່ານຈະພົບເຫັນໂອກາດທີ່ດີເລີດ ທີ່ຈະສິດສອນ. ຄວາມຄິດຄວາມເຫັນ ແລະ ຄຳຖາມຂອງລູກໆຂອງທ່ານຕະຫລອດມື້ ກໍສາມາດເປັນເຄື່ອງໝາຍເຖິງຊ່ວງເວລາຂອງການສິດສອນ. (ເບິ່ງ Teaching in the Savior’s Way, 16.)
City of Zion Translated [ເມືອງຊີໂອນທີ່ຖືກປ່ຽນສະພາບ], ໂດຍ ແດວ ພາສັນ