“ວັນທີ 10–16 ເດືອນມັງກອນ. ປະຖົມມະການ 3–4; ໂມເຊ 4–5: ການຕົກຂອງອາດາມ ແລະ ເອວາ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)

“ວັນທີ 10–16 ເດືອນມັງກອນ. ປະຖົມມະການ 3–4; ໂມເຊ 4–5,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022

ຮູບພາບ

ອາດາມ ແລະ ເອວາ ຍ່າງໄປນຳກັນ

Adam and Eve [ອາດາມ ແລະ ເອວາ], ໂດຍ ດັກລັສ ເອັມ ຟຣາຍເອີ

ວັນທີ 10–16 ເດືອນມັງກອນ

ປະຖົມມະການ 3–4; ໂມເຊ 4–5

ການຕົກຂອງອາດາມ ແລະ ເອວາ

ຂະນະທີ່ທ່ານສຶກສາ ປະຖົມມະການ 3–4 ແລະ ໂມເຊ 4–5, ໃຫ້ພິຈາລະນາສິ່ງທີ່ພຣະຜູ້ເປັນເຈົ້າພະຍາຍາມສິດສອນທ່ານ. ໃຫ້ບັນທຶກຄວາມຈິງເຫລົ່ານີ້ ແລະ ຄວາມປະທັບໃຈທາງວິນຍານຂອງທ່ານ, ແລະ ສະທ້ອນຄິດກ່ຽວກັບມັນລະຫວ່າງອາທິດ.

ບັນທຶກຄວາມປະທັບໃຈຂອງທ່ານ

ທຳອິດ, ເລື່ອງລາວກ່ຽວກັບການຕົກຂອງອາດາມ ແລະ ເອວາ ອາດເບິ່ງຄືວ່າເປັນສິ່ງໂສກເສົ້າ. ອາດາມ ແລະ ເອວາໄດ້ຖືກຂັບໄລ່ອອກຈາກສວນເອເດນທີ່ສວຍງາມ. ເຂົາເຈົ້າຖືກສົ່ງໄປຫາໂລກບ່ອນທີ່ມີຄວາມເຈັບປວດ, ຄວາມໂສກເສົ້າ, ແລະ ຄວາມຕາຍ (ເບິ່ງ ປະຖົມມະການ 3:16–19). ແລະ ເຂົາເຈົ້າໄດ້ຖືກແຍກອອກຈາກພຣະບິດາເທິງສະຫວັນຂອງເຂົາເຈົ້າ. ແຕ່ເປັນເພາະຄວາມຈິງທີ່ຖືກຟື້ນຟູຜ່ານທາງສາດສະດາໂຈເຊັບ ສະມິດ ຢູ່ໃນໜັງສືໂມເຊ, ພວກເຮົາຮູ້ວ່າ ເລື່ອງລາວກ່ຽວກັບອາດາມ ແລະ ເອວາ ຕາມຈິງແລ້ວເປັນໜຶ່ງໃນຄວາມຫວັງ—ແລະ ເປັນພາກສ່ວນທີ່ຈຳເປັນໃນແຜນຂອງພຣະເຈົ້າສຳລັບລູກໆຂອງພຣະອົງ.

ສວນເອເດນສວຍງາມ. ແຕ່ອາດາມ ແລະ ເອວາຕ້ອງການບາງສິ່ງທີ່ເກີນກວ່າຄວາມສວຍງາມທີ່ຢູ່ອ້ອມຮອບ. ເຂົາເຈົ້າຕ້ອງການ—ແລະ ພວກເຮົາທຸກຄົນຕ້ອງການ—ໂອກາດເພື່ອເຕີບໂຕ. ການໜີຈາກສວນເອເດນເປັນບາດກ້າວທຳອິດທີ່ຈຳເປັນ ເພື່ອກັບໄປຫາພຣະເຈົ້າ ແລະ ໃນທີ່ສຸດກາຍເປັນເໝືອນດັ່ງພຣະອົງ. ນັ້ນໝາຍຄວາມວ່າການປະເຊີນກັບການກົງກັນຂ້າມ, ການເຮັດຄວາມຜິດ, ການຮຽນຮູ້ທີ່ຈະກັບໃຈ, ແລະ ການໄວ້ວາງໃຈໃນພຣະຜູ້ຊ່ວຍໃຫ້ລອດ, ຊຶ່ງການຊົດໃຊ້ຂອງພຣະອົງເຮັດໃຫ້ຄວາມກ້າວໜ້າ ແລະ “ຄວາມສຸກຂອງການໄຖ່” ເປັນໄປໄດ້ (ໂມເຊ 5:11). ດັ່ງນັ້ນ ເມື່ອທ່ານອ່ານກ່ຽວກັບການຕົກຂອງອາດາມ ແລະ ເອວາ, ຢ່າເອົາໃຈໃສ່ຕໍ່ສິ່ງທີ່ເບິ່ງຄືວ່າເປັນສິ່ງໂສກເສົ້າ ແຕ່ໃຫ້ເອົາໃຈໃສ່ຕໍ່ສິ່ງທີ່ເປັນໄປໄດ້—ຢ່າເອົາໃຈໃສ່ຕໍ່ທີ່ສຸຂະເສີມ ບ່ອນທີ່ອາດາມ ແລະ ເອວາໄດ້ສູນເສຍ ແຕ່ໃຫ້ເອົາໃຈໃສ່ຕໍ່ລັດສະໝີພາບທີ່ການເລືອກຂອງເຂົາເຈົ້າໄດ້ຊ່ວຍເຮົາໃຫ້ສາມາດໄດ້ຮັບ.

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ປະຖົມມະການ 3:1–7; ໂມເຊ 4; 5:4–12

ການຕົກເປັນພາກສ່ວນທີ່ຈຳເປັນໃນແຜນຂອງພຣະເຈົ້າ ເພື່ອໄຖ່ລູກໆຂອງພຣະອົງ.

ການຕົກຂອງອາດາມ ແລະ ເອວາໄດ້ນຳຄວາມຕາຍທາງໂລກ ແລະ ທາງວິນຍານມາສູ່ໂລກ. ມັນກໍຍັງໄດ້ນຳຄວາມຍາກລຳບາກ, ຄວາມໂສກເສົ້າ, ແລະ ຄວາມຜິດບາບມາສູ່ໂລກນຳອີກ. ທຸກສິ່ງເຫລົ່ານີ້ເບິ່ງຄືວ່າເປັນເຫດຜົນທີ່ເສຍໃຈກັບການຕົກ. ແຕ່ການຕົກໄດ້ເປັນພາກສ່ວນໜຶ່ງໃນແຜນຂອງພຣະບິດາເທິງສະຫວັນ ເພື່ອໄຖ່ ແລະ ນຳຄວາມສູງສົ່ງມາໃຫ້ລູກໆຂອງພຣະອົງ ຜ່ານທາງ “ການເສຍສະລະຂອງພຣະອົງດຽວທີ່ຖືກຳເນີດຈາກພຣະບິດາ” (ໂມເຊ 5:7). ຂະນະທີ່ທ່ານສຶກສາ ປະຖົມມະການ 3:1–7; ໂມເຊ 4; 5:4–12, ຄວາມຈິງໃດແດ່ທີ່ທ່ານພົບເຫັນ ທີ່ຊ່ວຍທ່ານໃຫ້ເຂົ້າໃຈກ່ຽວກັບການຕົກ ແລະ ວິທີທີ່ການຊົດໃຊ້ຂອງພຣະຄຣິດໄດ້ເອົາຊະນະມັນ? ຄຳຖາມແບບດັ່ງຕໍ່ໄປນີ້ອາດຊ່ວຍໄດ້:

ການຕົກມີຜົນກະທົບຕໍ່ອາດາມ ແລະ ເອວາແນວໃດ? ມັນມີຜົນກະທົບຕໍ່ເຮົາແນວໃດ?
ເປັນຫຍັງອາດາມ ແລະ ເອວາຈຶ່ງທຳການຖວາຍ? ການຖວາຍເຫລົ່ານັ້ນເປັນສັນຍາລັກໃຫ້ສິ່ງໃດ? ເຮົາສາມາດຮຽນຮູ້ຫຍັງແດ່ຈາກຖ້ອຍຄຳຂອງທູດ ຢູ່ໃນຂໍ້ເຫລົ່ານີ້?
ເປັນຫຍັງອາດາມ ແລະ ເອວາຈຶ່ງ “ຍິນດີ” ຫລັງຈາກການຕົກຂອງເຂົາເຈົ້າ? ເຮົາຮຽນຮູ້ຫຍັງແດ່ຈາກເລື່ອງນີ້ກ່ຽວກັບແຜນຂອງພຣະເຈົ້າ ເພື່ອໄຖ່ເຮົາຜ່ານທາງພຣະເຢຊູຄຣິດ?

ເປັນເພາະພຣະຄຳພີມໍມອນ ແລະ ການເປີດເຜີຍໃນຍຸກສຸດທ້າຍອື່ນໆ, ເຮົາຈຶ່ງມີທັດສະນະພິເສດກ່ຽວກັບການຕົກ. ຍົກຕົວຢ່າງ, ໃຫ້ພິຈາລະນາສິ່ງທີ່ສາດສະດາລີໄຮໄດ້ສິດສອນຄອບຄົວຂອງເພິ່ນກ່ຽວກັບອາດາມ ແລະ ເອວາໃນ 2 ນີໄຟ 2:15–27. ການສິດສອນຂອງລີໄຮໄດ້ໃຫ້ຄວາມແຈ່ມແຈ້ງກ່ຽວກັບສິ່ງທີ່ໄດ້ເກີດຂຶ້ນຢູ່ໃນສວນເອເດນ ແລະ ຊ່ວຍເຮົາໃຫ້ເຂົ້າໃຈວ່າເປັນຫຍັງມັນຈຶ່ງສຳຄັນ?

ເບິ່ງ 1 ໂກຣິນໂທ 15:20–22; ໂມໄຊຢາ 3:19; ແອວມາ 12:21–37; ຄຳສອນ ແລະ ພັນທະສັນຍາ 29:39–43; ຫລັກແຫ່ງຄວາມເຊື່ອ 1:3; Dallin H. Oaks, “The Great Plan,” Liahona, May 2020, 93–96; Dallin H. Oaks, “Opposition in All Things,” Liahona, May 2016, 114–17; Jeffrey R. Holland, “Where Justice, Love, and Mercy Meet,” Liahona, May 2015, 104–6 ນຳອີກ.

Leaving Eden [ການໜີຈາກສວນເອເດນ], ໂດຍ ແອນນີ ເຮັນຣີ ເນເດີ

ປະຖົມມະການ 3:16; ໂມເຊ 4:22

ຄຳວ່າອາດາມຈະ “ປົກຄອງເໜືອ” ເອວາ ໝາຍຄວາມວ່າແນວໃດ?

ຄຳນີ້ຂອງພຣະຄຳພີໄດ້ຖືກເຂົ້າໃຈຜິດມາເປັນເວລາດົນນານ ທີ່ວ່າ ສາມີບໍ່ມີຄວາມຜິດທີ່ຈະປະຕິບັດຕໍ່ພັນລະຍາແບບບໍ່ອ່ອນໂຍນ. ໃນວັນເວລາຂອງເຮົາ, ສາດສະດາຂອງພຣະຜູ້ເປັນເຈົ້າໄດ້ສິດສອນວ່າ ຂະນະທີ່ສາມີຄວນປົກຄອງບ້ານເຮືອນດ້ວຍຄວາມຊອບທຳ, ແຕ່ລາວຄວນເຫັນວ່າ ພັນລະຍາຂອງລາວເປັນຫຸ້ນສ່ວນທີ່ເທົ່າທຽມກັນກັບລາວ (ເບິ່ງ “ຄອບຄົວ: ການປະກາດຕໍ່ໂລກ” [ChurchofJesusChrist.org]). ແອວເດີ ແດວ ຈີ ເຣັນລັນ ແລະ ຊິດສະເຕີ ຣຸດ ລິບເບີດ ເຣັນລັນ ໄດ້ອະທິບາຍວ່າ ສາມີທີ່ຊອບທຳ “ຈະສະແຫວງຫາທີ່ຈະປະຕິບັດ; ລາວຈະຍອມຮັບຄວາມຜິດພາດ ແລະ ສະແຫວງຫາການໃຫ້ອະໄພ; ລາວຈະກ່າວຄຳຍ້ອງຍໍຢ່າງວ່ອງໄວ; ລາວຈະມີຄວາມເກງໃຈຕໍ່ການເລືອກຂອງສະມາຊິກໃນຄອບຄົວ; ລາວຈະຮູ້ສຶກໜັກໜ່ວງກັບໜ້າທີ່ຮັບຜິດຊອບ ທີ່ຈະຈັດຫາ ‘ສິ່ງທີ່ຈຳເປັນຕໍ່ຊີວິດ ແລະ ການປົກປ້ອງ’ ສຳລັບຄອບຄົວຂອງລາວ; ລາວຈະປະຕິບັດກັບພັນລະຍາຂອງລາວດ້ວຍຄວາມນັບຖື ແລະ ດ້ວຍການຍິນຍອມຫລາຍທີ່ສຸດ. … ລາວຈະເປັນພອນໃຫ້ແກ່ຄອບຄົວຂອງລາວ” (The Melchizedek Priesthood: Understanding the Doctrine, Living the Principles [2018], 23).

ໂມເຊ 5:4–9, 16–26

ພຣະເຈົ້າຈະຮັບເອົາການເສຍສະລະຂອງເຮົາ ຖ້າຫາກເຮົາຖວາຍມັນດ້ວຍຄວາມເຕັມໃຈ ແລະ ດ້ວຍໃຈທີ່ເຊື່ອຟັງ.

ອາດາມ ແລະ ເອວາໄດ້ຮຽນຮູ້ວ່າ ການຖວາຍສັດເປັນສັນຍາລັກເຖິງການເສຍສະລະຊົດໃຊ້ຂອງພຣະຄຣິດ, ແລະ ເຂົາເຈົ້າໄດ້ເຮັດສິ່ງນີ້ໃຫ້ເປັນທີ່ “ຮູ້ຈັກແກ່ພວກລູກຊາຍ ແລະ ລູກສາວ [ຂອງເຂົາເຈົ້າ]” (ໂມເຊ 5:12). ຂະນະທີ່ທ່ານສຶກສາ ໂມເຊ 5:4–9, 16–26, ໃຫ້ພິຈາລະນາເຖິງຄວາມແຕກຕ່າງໃນປະຕິກິລິຍາຂອງກາອິນ ແລະ ອາເບັນ ລູກຊາຍສອງຄົນຂອງເຂົາເຈົ້າ, ກ່ຽວກັບການຖວາຍນີ້. ເປັນຫຍັງພຣະຜູ້ເປັນເຈົ້າຈຶ່ງຮັບເອົາການຖວາຍຂອງອາເບັນ ແຕ່ບໍ່ໄດ້ຮັບເອົາການຖວາຍຂອງກາອິນ?

ພຣະຜູ້ເປັນເຈົ້າຮຽກຮ້ອງທ່ານໃຫ້ຖວາຍສິ່ງໃດ? ມີສິ່ງໃດບໍ ຢູ່ໃນ ໂມເຊ 5:4–9, 16–26 ທີ່ປ່ຽນແປງວິທີທີ່ທ່ານຄິດກ່ຽວກັບການຖວາຍເຫລົ່ານັ້ນ?

ເບິ່ງ ເພງສັນລະເສີນ 4:5; 2 ໂກຣິນໂທ 9:7; ອອມໄນ 1:26; 3 ນີໄຟ 9:19–20; ໂມໂຣໄນ 7:6–11; ຄຳສອນ ແລະ ພັນທະສັນຍາ 97:8; Jeffrey R. Holland, “Behold the Lamb of God,” Liahona, May 2019, 44–46 ນຳອີກ.

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ປະຖົມມະການ 3; ໂມເຊ 4.ທ່ານສາມາດເຮັດຫຍັງແດ່ເພື່ອຊ່ວຍຄອບຄົວຂອງທ່ານ ໃຫ້ເຂົ້າໃຈກ່ຽວກັບການຕົກຂອງອາດາມ ແລະ ເອວາຫລາຍກວ່າເກົ່າ? ທ່ານສາມາດກ໊ອບປີ້ເອົາຮູບຈາກ “ອາດາມ ແລະ ເອວາ” (ໃນ ນິທານພຣະສັນຍາເດີມ) ແລະ ຕັດເອົາຮູບເຫລົ່ານັ້ນ. ແລ້ວພວກທ່ານສາມາດຊ່ວຍກັນລຽງຮູບຕາມລຳດັບ ຂະນະທີ່ສົນທະນາກັນກ່ຽວກັບປະສົບການຂອງອາດາມ ແລະ ເອວາ. ເປັນຫຍັງການຕົກຈຶ່ງຈຳເປັນຢູ່ໃນແຜນແຫ່ງຄວາມລອດຂອງພຣະບິດາເທິງສະຫວັນ? ການເບິ່ງວິດີໂອ “The Fall” (ChurchofJesusChrist.org) ສາມາດຊ່ວຍຕອບຄຳຖາມນີ້ໄດ້.

ໂມເຊ 4:1–4.ເຮົາຮຽນຮູ້ຫຍັງແດ່ກ່ຽວກັບພຣະເຈົ້າ, ພຣະເຢຊູຄຣິດ, ແລະ ຊາຕານ ຈາກຂໍ້ເຫລົ່ານີ້? ເປັນຫຍັງອຳເພີໃຈຈຶ່ງສຳຄັນຕໍ່ແຜນຂອງພຣະເຈົ້າ ຊຶ່ງຊາຕານຢາກທຳລາຍມັນ?

ໂມເຊ 5:5–9.ພຣະເຈົ້າໄດ້ບັນຊາອາດາມ ແລະ ເອວາໃຫ້ເຮັດສິ່ງໃດ ເພື່ອຊ່ວຍຕົວເອງໃຫ້ຄິດກ່ຽວກັບພຣະຜູ້ຊ່ວຍໃຫ້ລອດ? ພຣະເຈົ້າໄດ້ປະທານສິ່ງໃດໃຫ້ເຮົາ ເພື່ອໃຫ້ຄິດກ່ຽວກັບພຣະຜູ້ຊ່ວຍໃຫ້ລອດ?

ໂມເຊ 5:16–34.ຄຳວ່າ ການເປັນ “ຜູ້ດູແລຮັກສານ້ອງຊາຍ” ຂອງເຮົາ ໝາຍຄວາມວ່າແນວໃດ? ເຮົາຈະສາມາດດູແລກັນແລະກັນເປັນຄອບຄົວໄດ້ແນວໃດ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ກ້າເຮັດສິ່ງຖືກ,” ເພງສວດ ແລະ ເພງຂອງເດັກນ້ອຍ, 70.

ການປັບປຸງການສຶກສາສ່ວນຕົວ

ໃຊ້ສິ່ງຊ່ວຍເຫລືອການສຶກສາພຣະຄຳພີ. ຂະນະທີ່ທ່ານສຶກສາພຣະຄຳພີ, ໃຫ້ໃຊ້ໝາຍເຫດຢູ່ທາງລຸ່ມໜ້າປຶ້ມ, Topical Guide, Bible Dictionary, ຄູ່ມືພຣະຄຳພີ, ແລະ ສິ່ງຊ່ວຍສຶກສາຢ່າງອື່ນ ເພື່ອຮັບເອົາຄວາມຮູ້ເພີ່ມເຕີມ.