“21–27 Fēpueli. Sēnesi 24–27: ʻOku Fakafoʻou ʻa e Fuakavá,” Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: Fuakava Motuʻá 2022 (2021)
“21–27 Fēpueli. Sēnesi 24–27,” Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: 2022
Tā fakatātā ʻo Lepeká ʻe Dilleen Marsh
21–27 Fēpueli
Sēnesi 24–27
ʻOku Fakafoʻou ʻa e Fuakavá
ʻI hoʻo lau ʻa e Sēnesi 24–27, tokanga ki he ngaahi fakakaukau fakalaumālie ʻokú ke maʻú. Lotua ke ke ‘ilo ʻa e founga ʻoku kaunga ai ki hoʻo moʻuí ʻa e ngaahi tefitoʻi moʻoni ʻokú ke maʻú.
Lekooti e Ngaahi Ongo ʻOkú ke Maʻú
Naʻe kau ʻi he fuakava ʻa e ʻOtuá mo ʻĒpalahamé ʻa e talaʻofa ko ia ʻe fakafou ʻia ʻĒpalahame mo hono hakó “ʻe tāpuekina ʻa e ngaahi faʻahinga kotoa pē ʻo e māmaní” ( ʻĒpalahame 2:11). ‘Oku ʻikai ko ha talaʻofa ia ʻe lava ʻo fakahoko ʻi he toʻu tangata ʻe taha: ko e Tohi Tapú ko e talanoa ia ʻo e hokohoko atu hono fakahoko ʻe he ʻOtuá ʻa ʻEne talaʻofá, ʻi he ngaahi founga lahi. Pea naʻá Ne kamata ʻaki hono fakafoʻou e fuakavá mo e fāmili ʻo ʻAisake mo Lepeká. ʻOku tau ako ʻi heʻenau ngaahi aʻusiá ha meʻa fekauʻaki mo e hoko ko ha konga ʻo e fuakavá. ‘Oku akoʻi kitautolu ʻe heʻenau ngaahi sīpingá fekauʻaki mo e angaʻofá, faʻa kātakí, mo e falala ki he ngaahi tāpuaki ʻa e ʻOtuá kuo talaʻofa maí. Pea ʻoku tau ako ʻoku mahuʻinga hono liʻaki ha faʻahinga “lū” (Sēnesi 25:30) fakamāmani kae lava ʻo maʻu e ngaahi tāpuaki ʻa e ʻOtuá maʻatautolu mo ʻetau fānaú ʻi he laui toʻu tangata ka hoko maí.
Ngaahi Fakakaukau ki Hono Ako Fakataautaha ʻo e Folofolá
ʻOku mahuʻinga ʻa e malí ki he palani taʻengata ʻa e ʻOtuá.
ʻOku hanga ʻe he kakai tokolahi ʻi he kuongá ni ʻo fakasiʻia e mahuʻinga ʻo e malí pe fakakaukau ko ha kavenga fakamafasia ia. Na‘e kehe e fakakaukau ʻa ʻĒpalahamé—naʻe mātuʻaki mahuʻinga kiate ia ʻa e mali ʻa hono foha ko ʻAisaké. ‘Okú ke pehē ko e hā naʻe mātuʻaki mahuʻinga ai ia kiate iá? ʻI hoʻo lau e Sēnesi 24, fakakaukau ki he mahuʻinga ʻo e malí ʻi he palani ʻo e fakamoʻui ʻa e ʻOtuá. Mahalo te ke fie lau foki e pōpoaki ʻa ʻEletā D. Toti Kulisitofasoní ko e “ ʻUhinga ʻo e Malí, ʻUhinga ʻo e Fāmilí” (Liahona, Mē 2015, 50–53) pea fakakaukau ki he ʻuhinga ko ia “ʻoku ʻomi ʻe ha fāmili naʻe langa ʻi he mali ʻa ha tangata mo ha fefiné, ʻa e tuʻunga lelei taha ke tupulaki ai e palani ʻa e ʻOtuá” (peesi 52).
ʻE lava ke tokoni ʻa e ngaahi fehuʻi hangē ko ʻení ke ke fakakaukau ki ha ngaahi tefitoʻi moʻoni mahuʻinga kehe ʻi he vahe ko ʻení:
Sēnesi 24:1–14. Ko e hā naʻe fakahoko ʻe ʻĒpalahame mo ʻene tamaioʻeikí ke fakakau ʻa e ʻEikí ʻi heʻena feinga ke maʻu ha uaifi ʻo ʻAisaké?
Sēnesi 24:15–28, 55–60. Ko e hā ha ngaahi ʻulungaanga ʻokú ke maʻu meia Lepeka te ke fie muimui ki aí?
Ko e hā ha ngaahi fakakaukau kehe ʻokú ke maʻu?
Vakai foki, Tokāteline mo e Ngaahi Fuakava 131:1–4; “Ko e Fāmilí: Ko ha Fanongonongo ki Māmani,” ChurchofJesusChrist.org.
Te u lava ʻo fili ʻi he fakafiemālie taimi nounoú pea mo e ngaahi meʻa ʻoku mahuʻinga lahi angé.
‘I he ʻulungaanga fakafonua ʻo ʻĒpalahamé, naʻe angamaheni ʻaki ke maʻu ʻe he foha lahi taha ʻi ha fāmilí ha tuʻunga fakatakimuʻa mo e lāngilangi naʻe ui ko e tofiʻa ʻa e ʻuluaki fānaú. Naʻe maʻu ʻe hono fohá ha tofiʻa lahi ange mei heʻene ongomātuʻá, fakataha mo ha ngaahi fatongia lahi ange ki hono tokangaʻi e toenga ʻo e fāmilí.
ʻI hoʻo lau e Sēnesi 25:29–34, fakakaukau ki he ʻuhinga naʻe loto-fiemālie ai ʻa ʻĪsoa ke foaki hono tofiʻá ke fakafetongi ʻaki ha meʻatokoní. Ko e hā ha ngaahi lēsoni ʻokú ke maʻu maʻau ʻi he fakamatala ko ʻení? Hangē ko ʻení, ʻoku ʻi ai nai ha faʻahinga “lū” ʻokú ne tohoakiʻi koe mei he ngaahi tāpuaki ʻoku mahuʻinga taha kiate koé? Ko e hā ʻokú ke fakahoko ke tokanga taha ai mo fakahoungaʻi ʻa e ngaahi tāpuaki ko ʻení?
Vakai foki, Mātiu 6:19–33; 2 Nīfai 9:51; M. Russell Ballard, “What Matters Most Is What Lasts Longest,” Liahona, Nov. 2005, 41–44.
Na‘e toe fakafoʻou e fuakava faka-ʻĒpalahamé ʻia ʻAisake.
Naʻe fakataumuʻa e fuakava naʻe fakahoko ʻe he ʻOtuá mo ʻĒpalahamé ke hokohoko atu ʻi he ngaahi toʻu tangata lahi, ko ia ai ʻe fie maʻu ke hoko atu e tukufakaholo ʻo e tauhi fuakava ʻa ʻĒpalahame mo Selá kia ʻAisake, Sēkope, mo e kakai fefine mo e tangata faivelenga kehe ʻi hona hakó. ʻI hoʻo lau e Sēnesi 26:1–5, kumi ha niʻihi ʻo e ngaahi tāpuaki ʻo e fuakavá naʻe folofola ʻaki ʻe he ʻOtuá. Ko e hā ʻokú ke ako fekauʻaki mo e ʻOtuá mei he ngaahi veesi ko ʻení?
Ko Sīsū Kalaisi ko e vaikeli ʻo e vai ʻo e moʻuí.
Mahalo te ke fakatokangaʻi ʻoku ʻi ai ha ngaahi fatongia mahuʻinga ʻo e vaikelí mo e matavaí mo e ngaahi maʻuʻanga vai kehé ʻi he ngaahi talanoa lahi he Fuakava Motuʻá. ʻOku ʻikai fakaʻohovale ʻeni, koeʻuhí ko e lahi taha ʻo e ngaahi talanoá ni naʻe hoko ia ʻi ha ngaahi feituʻu mōmoa. ʻI hoʻo lau ʻi he Sēnesi 26 fekauʻaki mo e ngaahi vaikeli ʻa ʻAisaké, fakalaulauloto ki he meʻa ʻe ala fakataipe ʻe he vaí ʻi he folofolá. Ko e hā ha ngaahi fakakaukau ʻokú ke maʻu fekauʻaki mo e ngaahi vaikeli fakalaumālie ʻo e “vai moʻuí”? (vakai, Sione 4:10–15). ʻOkú ke keli fēfē ʻa e ngaahi vaikeli fakalaumālié ʻi hoʻo moʻuí? Ko e hā e founga ʻoku hangē ai ʻa e Fakamoʻuí ha vai moʻui kiate koé? Fakatokangaʻi ange naʻe hanga ʻe he kau Filisitiá ʻo “tanu” ʻa e ngaahi vaikelí (vakai, Sēnesi 26:18). ‘Oku ʻi ai nai ha meʻa ʻi hoʻo moʻuí ʻokú ne tanu ho ngaahi vaikeli ʻo e vai moʻuí?
Ko ha vaikeli ʻi Peasipa motuʻa, ko e feituʻu naʻe keli ai ʻe ʻĒpalahame mo ʻAisake ʻa e ngaahi vaí.
Na‘e hala nai ke kākaaʻi ʻe Lepeka mo Sēkope ʻa ʻAisake?
‘Oku ʻikai ke tau ʻilo ʻa e ngaahi ʻuhinga ki he founga naʻe fakaʻaongaʻi ʻe Lepeka mo Sēkope ke maʻu ʻaki ha tāpuaki maʻa Sēkopé. ʻOku tokoni ke manatuʻi ʻoku taʻekakato ʻa e Fuakava Motuʻa ʻoku tau maʻu he taimi ní (vakai, Mōsese 1:23, 41). Mahalo ʻoku mole ha fakamatala mei he ngaahi lekooti totonú ʻe fakamatalaʻi ai e meʻa ʻoku tau ngali hohaʻa ki aí. Ka neongo ia, ʻoku tau ʻiloʻi ko e finangalo ia ʻo e ʻOtuá ke maʻu ʻe Sēkope ʻa e tāpuakí meia ʻAisake koeʻuhí naʻe maʻu ʻe Lepeka ha fakahā ʻe pule ʻa Sēkope kia ʻĪsoa (vakai, Sēnesi 25:23). Hili hono ʻilo ʻe ʻAisake naʻá ne tāpuakiʻi ʻa Sēkope kae ʻikai ko ʻĪsoá, naʻá ne fakahā ai “ʻe monūʻia” (Sēnesi 27:33) ʻa Sēkope—ʻo fokotuʻu mai ai kuo fakahoko e finangalo ʻo e ʻOtuá.
Ngaahi Fakakaukau ki Hono Ako Fakafāmili ʻo e Folofolá mo e Efiafi ʻi ʻApí
-
Sēnesi 24:2–4, 32–48.Na‘e kole ʻe ʻĒpalahame ki ha tamaioʻeiki falalaʻanga ke ne kumi ha uaifi ʻo ʻAisake, pea naʻe fuakava ʻa e tamaioʻeikí mo ʻĒpalahame te ne fakahoko ia. Na‘e fakahaaʻi fēfē ʻe he tamaioʻeiki ʻa ʻĒpalahamé ʻa ʻene faivelenga ʻi hono tauhi ʻene fuakavá? Te tau lava fēfē ʻo muimui ki heʻene sīpingá?
-
Sēnesi 24:15–28, 55–60.ʻE lava homou fāmilí ʻo fekumi ʻi he ngaahi vēsí ni ki ha ngaahi ʻulungaanga naʻe taau ai ʻa Lepeka ke hoko ko ha hoa taʻengata ʻo ʻAisaké. Poupou‘i e kau mēmipa ʻo e fāmilí ke fili ha taha ʻo e ngaahi ʻulungāngá ni ʻoku nau ongoʻi ʻoku totonu ke nau fakatupulakí.
-
Sēnesi 25:19–34; 27.Ke toe vakaiʻi e ngaahi talanoa ki he founga naʻe foaki ai e tofiʻa ʻo e ʻuluaki fānaú mo e tāpuaki ʻo ʻĪsoá kia Sēkopé, te mou lava ʻo hiki ʻa e ngaahi sētesi mei he “Sēkope pea mo ʻĪsoa” (ʻi he Ngaahi Talanoa mei he Fuakava Motuʻá) ʻi ha fanga kiʻi laʻipepa. ʻE lava e kau mēmipa ʻo e fāmilí ʻo ngāue fakataha ke fokotuʻutuʻu ʻa e ngaahi sētesí ʻi he hokohoko totonú.
‘I hoʻomou aleaʻi e fakatau ʻe ʻĪsoa hono tofiʻa ʻo e ʻuluaki fānaú, mahalo te mou fie talanoa foki ki he meʻa ʻoku mahuʻinga taha ki homou fāmilí, ʻo hangē ko homou vā fetuʻutaki mo e Tamai Hēvaní mo Sīsū Kalaisí. Mahalo ʻe lava e kau mēmipa ʻo e fāmilí ʻo kumi ha ngaahi meʻa pe ʻū tā ʻoku fakafofongaʻi ai e meʻa ʻoku nau lau ʻoku mahuʻinga taʻengatá. Tuku ke nau fakamatala‘i e ʻuhinga naʻa nau fili ai e ngaahi meʻa ko iá.
-
Sēnesi 26:3–5.Ke tokoni ke mahino ki homou fāmilí ʻa e fuakava faka-ʻĒpalahamé, te ke lava ʻo fakaafeʻi kinautolu ke kumi ʻa e ngaahi talaʻofa naʻe fakamatalaʻi ʻi he ngaahi veesi ko ʻení. Ko e hā ʻoku mahuʻinga ai ke tau ʻilo kau ki he ngaahi talaʻofá ni ʻi he ʻaho ní? (vakai, “Ngaahi Fakakaukau ke Manatuʻí: Ko e Fuakavá,” ʻi he maʻuʻanga tokoni ko ʻení).
-
Sēnesi 26:18–25, 32–33.Ko e hā ʻoku mahuʻinga ai e ngaahi vaikelí? ‘Oku founga fēfē ʻa e hangē ʻa Sīsū Kalaisi ko ha vaikelí?
Ke maʻu ha ngaahi fakakaukau lahi ange ki hono akoʻi ʻo e fānaú, vakai, fokotuʻutuʻu fakalēsoni ʻo e uike ní ʻi he Haʻu, ʻo Muimui ʻIate Au—Maʻá e Palaimelí.
Hiva ʻoku fokotuʻu atú: “Fili ʻa e Moʻoní,” Ngaahi Himí, fika 146.
Fakatupulaki e Ako Fakatāutahá
Ako maʻuloto ha potufolofola. Naʻe akonaki ʻa ʻEletā Lisiate G. Sikoti ʻo pehē, “ʻOku hoko ʻa e potufolofola ʻoku ako maʻulotó ko ha kaungāmeʻa mamae he ʻikai fakavaivaiʻi ʻi he taʻau ʻo taimí” (“Ko e Mālohi ʻo e Folofolá,” Liahona, Nōvema 2011,6).
Esau Sells His Birthright to Jacob (Ko e Fakatau ʻe ʻĪsoa Hono Tofiʻa ʻo e ʻUluaki Fānaú kia Sēkopé), tā fakatātaaʻi ʻe Glen S. Hopkinson