“ວັນທີ 4–10 ເດືອນເມສາ. ອົບພະຍົບ 14–17: ‘ຕັ້ງໃຈໃຫ້ດີ, ແລະ ພວກເຈົ້າຈະໄດ້ເຫັນສິ່ງທີ່ພຣະຜູ້ເປັນເຈົ້າກະທຳ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)
“ວັນທີ 4–10 ເດືອນເມສາ. ອົບພະຍົບ 14–17,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022
ທະເລແດງ
ວັນທີ 4–10 ເດືອນເມສາ
ອົບພະຍົບ 14–17
“ຕັ້ງໃຈໃຫ້ດີ, ແລະ ພວກເຈົ້າຈະໄດ້ເຫັນສິ່ງທີ່ພຣະຜູ້ເປັນເຈົ້າກະທຳ”
ພຣະເຈົ້າໄດ້ບັນຊາໃຫ້ໂມເຊຂຽນກ່ຽວກັບປະສົບການຂອງເພິ່ນວ່າ “ຈົ່ງບັນທຶກເລື່ອງໄຊຊະນະນີ້ໄວ້ ເພື່ອຈະໄດ້ຈົດຈຳຕະຫລອດໄປ” ຕໍ່ໂຢຊວຍ (ອົບພະຍົບ 17:14). ຄ້າຍຄືກັນນັ້ນ, ການບັນທຶກປະສົບການທາງວິນຍານຂອງທ່ານຈະຊ່ວຍທ່ານ ແລະ ຄົນທີ່ທ່ານຮັກໃຫ້ລະນຶກເຖິງພຣະກະລຸນາທິຄຸນຂອງພຣະຜູ້ເປັນເຈົ້າ.
ບັນທຶກຄວາມປະທັບໃຈຂອງທ່ານ
ຊາວອິດສະຣາເອນໝົດທາງໄປ. ທະເລແດງຢູ່ເບື້ອງໜຶ່ງ, ແລະ ອີກເບື້ອງໜຶ່ງ ກອງທັບຂອງຟາຣາໂອກຳລັງມຸ້ງໜ້າເຂົ້າມາໃກ້. ການໜີຈາກປະເທດເອຢິບຂອງພວກເຂົາ, ເບິ່ງແລ້ວ, ຄືວ່າຈະມີອາຍຸສັ້ນ. ແຕ່ພຣະເຈົ້າມີຂ່າວສານສຳລັບຊາວອິດສະຣາເອນ ທີ່ພຣະອົງປະສົງໃຫ້ພວກເຂົາລະນຶກເຖິງເປັນເວລາຫລາຍລຸ້ນຄົນວ່າ: “ຢ່າຢ້ານເລີຍ. … ພຣະຜູ້ເປັນເຈົ້າຈະສູ້ຮົບຕາງພວກເຈົ້າ” (ອົບພະຍົບ 14:13–14).
ນັບແຕ່ເວລານັ້ນມາ, ເມື່ອຜູ້ຄົນຂອງພຣະເຈົ້າຕ້ອງການສັດທາ ແລະ ຄວາມກ້າຫານ, ພວກເຂົາມັກຈະຫັນໄປຫາເລື່ອງລາວຂອງການປົດປ່ອຍຊາວອິດສະຣາເອນທີ່ມະຫັດສະຈັນນີ້. ເມື່ອນີໄຟຢາກດົນໃຈພວກອ້າຍຂອງເພິ່ນ, ເພິ່ນໄດ້ກ່າວວ່າ, “ຂໍໃຫ້ເຮົາຈົ່ງເຂັ້ມແຂງເໝືອນດັ່ງໂມເຊ; ເພາະເພິ່ນໄດ້ເວົ້າກັບນ້ຳທະເລແດງແທ້ໆ ແລະ ນ້ຳກໍໄດ້ແຍກອອກໄປທາງນັ້ນທາງນີ້, ແລະ ບັນພະບຸລຸດຂອງພວກເຮົາໄດ້ເດີນຜ່ານມາເທິງແຜ່ນດິນແຫ້ງອອກຈາກການເປັນຊະເລີຍ” (1 ນີໄຟ 4:2). ເມື່ອກະສັດລິມໄຮຢາກໃຫ້ຜູ້ຄົນຂອງເພິ່ນທີ່ເປັນຊະເລີຍ “ເງີຍໜ້າ [ຂອງພວກເຂົາ] ຂຶ້ນ, ແລະ ປິຕິຍິນດີ,” ເພິ່ນໄດ້ເຕືອນພວກເຂົາເຖິງເລື່ອງລາວດຽວກັນນີ້ (ໂມໄຊຢາ 7:19). ເມື່ອແອວມາຢາກເປັນພະຍານຕໍ່ລູກຊາຍຂອງເພິ່ນເຖິງອຳນາດຂອງພຣະເຈົ້າ, ເພິ່ນໄດ້ອ້າງເຖິງເລື່ອງນີ້ຄືກັນ (ເບິ່ງ ແອວມາ 36:28). ແລະ ເມື່ອເຮົາຕ້ອງການ ການປົດປ່ອຍ—ເມື່ອເຮົາຕ້ອງການສັດທາຕື່ມອີກໜ້ອຍໜຶ່ງ, ເມື່ອເຮົາຕ້ອງ “ຕັ້ງໃຈໃຫ້ດີ, ແລະ ພວກເຈົ້າຈະໄດ້ເຫັນສິ່ງທີ່ພຣະຜູ້ເປັນເຈົ້າກະທຳ”—ເຮົາສາມາດລະນຶກເຖິງວິທີທີ່ “ໃນວັນນັ້ນ ພຣະຜູ້ເປັນເຈົ້າໄດ້ໂຜດຊ່ວຍປະຊາຊົນອິດສະຣາເອນ ໃຫ້ພົ້ນຈາກການຕິດຕາມທຳລາຍຂອງຊາວເອຢິບ” (ອົບພະຍົບ 14:13, 30).
ແນວຄິດສຳລັບການສຶກສາພຣະຄຳພີເປັນສ່ວນຕົວ
ພຣະເຈົ້າມີອຳນາດທີ່ຈະປົດປ່ອຍເຮົາ.
ຂະນະທີ່ທ່ານອ່ານ ອົບພະຍົບ 14:1–10, ໃຫ້ວາດພາບເຫັນວິທີທີ່ຊາວອິດສະຣາເອນ ອາດຮູ້ສຶກຂະນະທີ່ພວກເຂົາໄດ້ເຫັນກອງທັບຂອງຟາຣາໂອມຸ້ງໜ້າເຂົ້າມາໃກ້. ບາງທີທ່ານອາດຮູ້ສຶກວ່າ ທ່ານຕ້ອງການ ການມະຫັດສະຈັນທີ່ຈະເອົາຊີວິດລອດຈາກການທ້າທາຍທີ່ຫຍຸ້ງຍາກ ທີ່ທ່ານກຳລັງປະເຊີນຢູ່. ທ່ານຮຽນຮູ້ຫຍັງແດ່ຈາກ ອົບພະຍົບ 14:13–31 ທີ່ສາມາດຊ່ວຍທ່ານສະແຫວງຫາການປົດປ່ອຍຂອງພຣະເຈົ້າ ໃນຊີວິດຂອງທ່ານ? ທ່ານໄດ້ຮຽນຮູ້ຫຍັງແດ່ກ່ຽວກັບວິທີທີ່ພຣະເຈົ້າຈັດຫາການປົດປ່ອຍຈາກຄວາມຍາກລຳບາກ? ໃຫ້ໄຕ່ຕອງວິທີທີ່ທ່ານໄດ້ເຫັນອຳນາດແຫ່ງການປົດປ່ອຍຂອງພຣະອົງ ໃນຊີວິດຂອງທ່ານ.
ເບິ່ງ ຄຳສອນ ແລະ ພັນທະສັນຍາ 8:2–3; L. Tom Perry, “The Power of Deliverance,” Liahona, May 2012, 94–97; Bible Maps, no. 2, “Israel’s Exodus from Egypt and Entry into Canaan ນຳອີກ.”
ພຣະຜູ້ເປັນເຈົ້າສາມາດເຮັດໃຫ້ຄວາມຂົມກາຍເປັນຄວາມຫວານໄດ້.
ຂະນະທີ່ທ່ານອ່ານ ອົບພະຍົບ 15:22–27 ກ່ຽວກັບການເດີນທາງຂອງຊາວອິດສະຣາເອນມຸ້ງໜ້າໄປຫາແຜ່ນດິນແຫ່ງຄຳສັນຍາ, ໃຫ້ຄິດກ່ຽວກັບສິ່ງທີ່ຢູ່ໃນຊີວິດຂອງທ່ານ ທີ່ເບິ່ງຄືວ່າ “ຂົມ” ຄືກັນກັບນ້ຳຢູ່ທີ່ດິນແດນມາຣາ. ໃຫ້ພິຈາລະນາຄຳຖາມດັ່ງຕໍ່ໄປນີ້ ຂະນະທີ່ທ່ານໄຕ່ຕອງຂໍ້ເຫລົ່ານີ້: ພຣະຜູ້ເປັນເຈົ້າສາມາດເຮັດໃຫ້ສິ່ງທີ່ຂົມກາຍເປັນຫວານໃນຊີວິດຂອງທ່ານແນວໃດ? ປະສົບການເຫລົ່ານີ້ມີຄ່າແນວໃດໃນຊີວິດຂອງທ່ານ? ຂໍ້ທີ 26 ແລະ 27 ແນະນຳຫຍັງແດ່ກ່ຽວກັບວິທີທີ່ ພຣະຜູ້ເປັນເຈົ້າອວຍພອນເຮົາ ເມື່ອເຮົາເຊື່ອຟັງສຸລະສຽງຂອງພຣະເຈົ້າ?
ອົບພະຍົບ 15:23–27; 16:1–15; 17:1–7
ເຮົາສາມາດໄວ້ວາງໃຈໃນພຣະຜູ້ເປັນເຈົ້າ, ແມ່ນແຕ່ໃນເວລາທີ່ຫຍຸ້ງຍາກ.
ມັນງ່າຍທີ່ຈະຕຳນິຊາວອິດສະຣາເອນ ເພາະພວກເຂົາໄດ້ເວົ້າຈົ່ມ ຫລື ຮ້ອງທຸກ ເວລາພວກເຂົາຕົກຢູ່ໃນສະຖານະການທີ່ຫຍຸ້ງຍາກ, ແມ່ນແຕ່ຫລັງຈາກທຸກສິ່ງທີ່ພຣະເຈົ້າໄດ້ກະທຳເພື່ອພວກເຂົາ. ແຕ່ຂະນະທີ່ທ່ານອ່ານ ອົບພະຍົບ 15:23–27; 16:1–15; 17:1–7, ໃຫ້ພິຈາລະນາວ່າ ທ່ານເຄີຍເຮັດແບບດຽວກັນນັ້ນຫລືບໍ່. ທ່ານຮຽນຮູ້ຫຍັງແດ່ຈາກປະສົບການຂອງຊາວອິດສະຣາເອນ ທີ່ສາມາດຊ່ວຍທ່ານເວົ້າຈົ່ມໜ້ອຍລົງ ແລະ ໄວ້ວາງໃຈໃນພຣະເຈົ້າຫລາຍກວ່າເກົ່າ? ຍົກຕົວຢ່າງ, ທ່ານສັງເກດເຫັນສິ່ງແຕກຕ່າງຢ່າງໃດແດ່ກ່ຽວກັບວິທີທີ່ຊາວອິດສະຣາເອນຕອບຮັບຄວາມຫຍຸ້ງຍາກ ແລະ ວິທີທີ່ໂມເຊຕອບຮັບ? ຂໍ້ເຫລົ່ານີ້ສິດສອນທ່ານຫຍັງແດ່ກ່ຽວກັບພຣະເຈົ້າ?
ເບິ່ງ 1 ນີໄຟ 2:11–12; ວິດີໂອ “Sin of Murmuring”, ChurchofJesusChrist.org ນຳອີກ.
ມານາຈາກພຣະເຈົ້າໄດ້ລ້ຽງດູຊາວອິດສະຣາເອນທາງຮ່າງກາຍ; ເຮົາກໍຕ້ອງການ ການລ້ຽງດູທາງວິນຍານໃນແຕ່ລະວັນຄືກັນ. ຮູບພາບຊະນິດໃຊ້ປູນປຽກໂດຍ ລຽວໂພ ບະຣັກເນີ
ເຮົາຄວນສະແຫວງຫາການລ້ຽງດູທາງວິນຍານໃນແຕ່ລະວັນ.
ມັນມີບົດຮຽນທາງວິນຍານຫລາຍຢ່າງທີ່ເຮົາສາມາດຮຽນຮູ້ຈາກການມະຫັດສະຈັນຂອງມານາ, ຢູ່ໃນ ອົບພະຍົບ 16. ໃຫ້ສັງເກດເບິ່ງຄຳແນະນຳທີ່ໄດ້ມອບໃຫ້ແກ່ຊາວອິດສະຣາເອນກ່ຽວກັບການເກັບ, ການໃຊ້, ແລະ ການຮັກສາມານາ (ເບິ່ງ ອົບພະຍົບ 16:16, 19, 22–26). ທ່ານພົບເຫັນຫຍັງແດ່ຢູ່ໃນຄຳແນະນຳເຫລົ່ານີ້ ທີ່ກ່ຽວຂ້ອງກັບທ່ານ ຂະນະທີ່ທ່ານສະແຫວງຫາການລ້ຽງດູທາງວິນຍານໃນແຕ່ລະວັນ?
ເບິ່ງ ໂຢຮັນ 6:31–35, 48–58 ແລະ ວິດີໂອ “Daily Bread: Pattern,” “Daily Bread: Experience,” ແລະ “Daily Bread: Change” (ChurchofJesusChrist.org ນຳອີກ).
ພຣະເຢຊູຄຣິດເປັນຫີນສີລາທາງວິນຍານ ແລະ ເປັນນ້ຳທີ່ປະກອບດ້ວຍຊີວິດຂອງເຮົາ.
ໃຫ້ຄິດກ່ຽວກັບພຣະຜູ້ຊ່ວຍໃຫ້ລອດຂະນະທີ່ທ່ານອ່ານ ອົບພະຍົບ 17:1–7. ພຣະເຢຊູຄຣິດເປັນເໝືອນດັ່ງຫີນສີລາຕໍ່ທ່ານແນວໃດ? (ເບິ່ງ ເພງສັນລະເສີນ 62:6–7; ຮີລາມັນ 5:12). ພຣະອົງເປັນເໝືອນດັ່ງນ້ຳແນວໃດ? (ເບິ່ງ ໂຢຮັນ 4:10–14; 1 ໂກຣິນໂທ 10:1–4; 1 ນີໄຟ 11:25).
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
ອົບພະຍົບ 14:13–22.ສະມາຊິກໃນຄອບຄົວຂອງທ່ານອາດມັກທີ່ຈະພະຍາຍາມ “ແຍກ” ນ້ຳຢູ່ໃນຊາມ ຫລື ຢູ່ໃນອ່າງອາບນ້ຳ, ຄືກັນກັບທີ່ໂມເຊໄດ້ແຍກນ້ຳທະເລແດງ. ຈົ່ງຊ່ວຍເຂົາເຈົ້າໃຫ້ເຂົ້າໃຈວ່າ ບໍ່ມີໃຜສາມາດແຍກນ້ຳທະເລແດງອອກໄດ້ ປາດສະຈາກອຳນາດຂອງພຣະເຈົ້າ. ເຮົາໄດ້ເຫັນອຳນາດຂອງພຣະເຈົ້າແນວໃດແດ່ໃນຊີວິດຂອງເຮົາ ແລະ ໃນຊີວິດຂອງບັນພະບຸລຸດຂອງເຮົາ?
-
ອົບພະຍົບ 15:1–21.ຫລັງຈາກການຂ້າມນ້ຳທະເລແດງຢ່າງມະຫັດສະຈັນແລ້ວ, ຊາວອິດສະຣາເອນໄດ້ຮ້ອງເພງສັນລະເສີນ ຊຶ່ງຮູ້ກັນວ່າເພງຂອງໂມເຊ, ຢູ່ໃນ ອົບພະຍົບ 15:1–21. ນຳກັນເປັນຄອບຄົວ, ໃຫ້ຄົ້ນຄວ້າຂໍ້ເຫລົ່ານີ້ສຳລັບວະລີທີ່ເປັນພະຍານເຖິງສິ່ງທີ່ພຣະເຈົ້າໄດ້ກະທຳເພື່ອຊາວອິດສະຣາເອນ ແລະ ວະລີອື່ນໆທີ່ມີຄວາມໝາຍ. ແລ້ວພວກທ່ານສາມາດຮ້ອງເພງສວດທີ່ເຕືອນຄອບຄົວຂອງທ່ານເຖິງສິ່ງທີ່ພຣະເຈົ້າໄດ້ກະທຳເພື່ອພວກທ່ານ.
-
ອົບພະຍົບ 16:1–5; 17:1–7.ການອ່ານ ອົບພະຍົບ 16:1–5 ແລະ 17:1–7 ສາມາດນຳພາໄປຫາການສົນທະນາກ່ຽວກັບພຣະຜູ້ຊ່ວຍໃຫ້ລອດ ວ່າເປັນເຂົ້າຈີ່ແຫ່ງຊີວິດ, ເປັນເໝືອນດັ່ງນ້ຳທີ່ປະກອບດ້ວຍຊີວິດ, ແລະ ເປັນເໝືອນດັ່ງຫີນສີລາຂອງເຮົາແນວໃດ. ເລື່ອງລາວເຫລົ່ານີ້ເຕືອນເຮົາເຖິງສິ່ງທີ່ພຣະເຢຊູຄຣິດໄດ້ກະທຳເພື່ອເຮົາແນວໃດ? ພາກສ່ວນໜຶ່ງໃນການສົນທະນາຂອງພວກທ່ານ, ພວກທ່ານອາດຢາກອ່ານ ໂຢຮັນ 4:10–14; 6:29–35, 48–51; ຮີລາມັນ 5:12; ຄຳສອນ ແລະ ພັນທະສັນຍາ 20:77, 79.
-
ອົບພະຍົບ 17:8–16.ພວກທ່ານອາດຢາກສະແດງຕາມເລື່ອງ ຕອນທີ່ອາໂຣນກັບຮູເຣຈັບແຂນໂມເຊຍົກຂຶ້ນ ແລະ ສົນທະນາກ່ຽວກັບສິ່ງນີ້ວ່າເປັນສັນຍາລັກເຖິງວິທີທີ່ເຮົາສະໜັບສະໜູນຜູ້ທີ່ພຣະເຈົ້າໄດ້ເອີ້ນເພື່ອໃຫ້ນຳພາເຮົາແນວໃດ. ພວກທ່ານອາດຢາກປຽບທຽບຕົວຢ່າງຂອງອາໂຣນກັບຮູເຣ ໃສ່ກັບຊາວອິດສະຣາເອນໄດ້ເວົ້າຈົ່ມໃຫ້ໂມເຊ (ມີບັນຍາຍຕະຫລອດທົ່ວ ບົດທີ 15–17). ມີວິທີທາງບາງຢ່າງໃດແດ່ທີ່ເຮົາສາມາດຊ່ວຍ ແລະ ສະໜັບສະໜູນຜູ້ນຳຂອງເຮົາ? ພອນຢ່າງໃດແດ່ໄດ້ມາສູ່ເຮົາ ແລະ ຜູ້ນຳຂອງເຮົາ ເມື່ອເຮົາເຮັດເຊັ່ນນັ້ນ?
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ເພງແນະນຳ: “ພຣະຜູ້ໄຖ່ແຫ່ງອິດສະຣາເອນ,” ເພງສວດ ແລະ ເພງຂອງເດັກນ້ອຍ, 5.
ການປັບປຸງການສຶກສາສ່ວນຕົວ
ສະແຫວງຫາຄວາມຮູ້ທາງວິນຍານຂອງທ່ານເອງ. ໃນການສຶກສາເປັນສ່ວນຕົວ ແລະ ເປັນຄອບຄົວຂອງທ່ານ, ຢ່າຈຳກັດຕົວເອງພຽງແຕ່ກັບຂໍ້ທີ່ມີສີໝາຍໄວ້ເທົ່ານັ້ນ ຢູ່ໃນໂຄງຮ່າງການສຶກສາເຫລົ່ານີ້. ສ່ວນຫລາຍແລ້ວພຣະຜູ້ເປັນເຈົ້າມີຂ່າວສານສຳລັບທ່ານຢູ່ໃນບົດເຫລົ່ານີ້ ທີ່ບໍ່ຖືກເນັ້ນຢູ່ໃນນີ້. ໃຫ້ອະທິຖານເພື່ອສະແຫວງຫາການດົນໃຈ.
ຮູບພາບໂມເຊແຍກນ້ຳທະເລແດງ, ໂດຍ ຣໍເບີດ ທີ ແບແຣັດ