“ວັນທີ 11–17 ເດືອນເມສາ. ອີດສະເຕີ: ‘ພຣະອົງຈະທຳລາຍຄວາມຕາຍຕະຫລອດໄປ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)

“ວັນທີ 11–17 ເດືອນເມສາ. ອີດສະເຕີ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022

ຮູບພາບອຸບມຸງທີ່ຫວ່າງເປົ່າ, ໂດຍ ແມຣີນາ ຄະຣຽວເຊັນໂກ

ວັນທີ 11–17 ເດືອນເມສາ

ອີດສະເຕີ

“ພຣະອົງຈະທຳລາຍຄວາມຕາຍຕະຫລອດໄປ”

ຂະນະທີ່ທ່ານອ່ານ ແລະ ໄຕ່ຕອງກ່ຽວກັບການຊົດໃຊ້ຂອງພຣະຜູ້ຊ່ວຍໃຫ້ລອດ ໃນອາທິດນີ້, ໃຫ້ຄິດທີ່ຈະບັນທຶກຄວາມຄິດ ແລະ ຄວາມຮູ້ສຶກຂອງທ່ານກ່ຽວກັບການເສຍສະລະຂອງພຣະອົງ ໃນປຶ້ມບັນທຶກສ່ວນຕົວຂອງທ່ານ ຫລື ໃນຊ່ອງວ່າງທີ່ມີໄວ້ໃຫ້ຢູ່ໃນໂຄງຮ່າງນີ້.

ບັນທຶກຄວາມປະທັບໃຈຂອງທ່ານ

ພຣະຊົນຊີບຂອງພຣະເຢຊູຄຣິດ “ເປັນສິ່ງສຳຄັນຫລາຍທີ່ສຸດໃນປະຫວັດສາດທັງໝົດຂອງມະນຸດ” (“ພຣະຄຣິດທີ່ຊົງພຣະຊົນ: ປະຈັກພະຍານຂອງອັກຄະສາວົກ,” ChurchofJesusChrist.org). ນັ້ນໝາຍຄວາມວ່າແນວໃດ? ສະຫລຸບແລ້ວ, ມັນໝາຍຄວາມວ່າພຣະຊົນຊີບຂອງພຣະຜູ້ຊ່ວຍໃຫ້ລອດເປັນອິດທິພົນໃຫ້ແກ່ຈຸດໝາຍປາຍທາງນິລັນດອນຂອງມະນຸດທຸກຄົນ ທີ່ເຄີຍມີຊີວິດຢູ່ ຫລື ຈະມີຊີວິດຢູ່. ທ່ານອາດເວົ້າອີກວ່າ ພຣະຊົນຊີບ ແລະ ພາລະກິດຂອງພຣະເຢຊູຄຣິດ, ຊຶ່ງນຳໄປສູ່ການຟື້ນຄືນພຣະຊົນຂອງພຣະອົງໃນວັນອີດສະເຕີເທື່ອທຳອິດນັ້ນ, ແມ່ນກ່ຽວຂ້ອງກັບຜູ້ຄົນຂອງພຣະເຈົ້າທຸກຄົນ ຕະຫລອດທົ່ວປະຫວັດສາດ: ຜູ້ທີ່ໄດ້ເກີດກ່ອນພຣະຄຣິດ ໄດ້ຄອຍຖ້າພຣະອົງດ້ວຍສັດທາຢ່າງກະຕືລືລົ້ນ (ເບິ່ງ ຢາໂຄບ 4:4), ແລະ ຜູ້ທີ່ໄດ້ເກີດລຸນພຣະອົງ ໄດ້ລະນຶກເຖິງສິ່ງທີ່ພຣະອົງໄດ້ກະທຳດ້ວຍສັດທາ. ຂະນະທີ່ເຮົາອ່ານເລື່ອງລາວ ແລະ ຄຳທຳນາຍໃນພຣະຄຳພີເດີມ, ເຮົາຈະບໍ່ເຫັນພຣະນາມຂອງພຣະເຢຊູຄຣິດ, ແຕ່ເຮົາຈະເຫັນຫລັກຖານເຖິງສັດທາຂອງຜູ້ທີ່ເຊື່ອໃນສະໄໝບູຮານ ໃນພຣະເມຊີອາ ແລະ ພຣະຜູ້ໄຖ່ຂອງເຂົາເຈົ້າ ແລະ ຢາກເຫັນພຣະອົງ. ດັ່ງນັ້ນ ເຮົາຜູ້ທີ່ຖືກເຊື້ອເຊີນໃຫ້ ລະນຶກ ເຖິງພຣະອົງ ສາມາດຮູ້ສຶກຖືກເຊື່ອມຕໍ່ເຂົ້າກັບຜູ້ທີ່ ຄອຍຖ້າ ພຣະອົງດ້ວຍຄວາມກະຕືລືລົ້ນ. ເພາະພຣະເຢຊູຄຣິດໄດ້ຮັບເອົາ “ໂທດກຳທັງໝົດທີ່ເຮົາ ທຸກຄົນ ສົມຄວນໄດ້ຮັບແທ້ໆ” (ເອຊາຢາ 53:6; ເນັ້ນຄຳເນີ້ງ), ແລະ “ຄົນ ທັງປວງ ຈະຖືກບັນດານໃຫ້ມີຊີວິດ ເພາະກ່ຽວເນື່ອງກັບພຣະຄຣິດສັນນັ້ນ” (1 ໂກຣິນໂທ 15:22; ເນັ້ນຄຳເນີ້ງ).

ແນວຄິດສຳລັບການສຶກສາພຣະຄຳພີເປັນສ່ວນຕົວ

ພຣະຄຳພີເດີມເປັນພະຍານເຖິງການເສຍສະລະຊົດໃຊ້ຂອງພຣະຜູ້ຊ່ວຍໃຫ້ລອດ.

ຂ່າວສານຫລາຍຂໍ້ຢູ່ໃນພຣະຄຳພີເດີມ ຊີ້ບອກເຖິງການປະຕິບັດສາດສະໜາກິດ ແລະ ການເສຍສະລະຊົດໃຊ້ຂອງພຣະຜູ້ຊ່ວຍໃຫ້ລອດ. ຕາຕະລາງຢູ່ຂ້າງລຸ່ມນີ້ ບັນຈຸຂ່າວສານບາງຢ່າງເຫລົ່ານີ້. ຂະນະທີ່ທ່ານອ່ານຂໍ້ເຫລົ່ານີ້, ແມ່ນຫຍັງທີ່ປະທັບໃຈທ່ານກ່ຽວກັບພຣະຜູ້ຊ່ວຍໃຫ້ລອດ?

ພຣະຄຳພີເດີມ	ພຣະຄຳພີໃໝ່
ພຣະຄຳພີເດີມ ເຊກາຣີຢາ 9:9	ພຣະຄຳພີໃໝ່ ມັດທາຍ 21:1–11
ພຣະຄຳພີເດີມ ເຊກາຣີຢາ 11:12–13	ພຣະຄຳພີໃໝ່ ມັດທາຍ 26:14–16
ພຣະຄຳພີເດີມ ເອຊາຢາ 53:4	ພຣະຄຳພີໃໝ່ ມັດທາຍ 8:16–17; 26:36–39
ພຣະຄຳພີເດີມ ເອຊາຢາ 53:7	ພຣະຄຳພີໃໝ່ ມາຣະໂກ 14:60–61
ພຣະຄຳພີເດີມ ເພງສັນລະເສີນ 22:16	ພຣະຄຳພີໃໝ່ ໂຢຮັນ 19:17–18; 20:25–27
ພຣະຄຳພີເດີມ ເພງສັນລະເສີນ 22:18	ພຣະຄຳພີໃໝ່ ມັດທາຍ 27:35
ພຣະຄຳພີເດີມ ເພງສັນລະເສີນ 69:21	ພຣະຄຳພີໃໝ່ ມັດທາຍ 27:34, 48
ພຣະຄຳພີເດີມ ເພງສັນລະເສີນ 118:22	ພຣະຄຳພີໃໝ່ ມັດທາຍ 21:42
ພຣະຄຳພີເດີມ ເອຊາຢາ 53:9, 12	ພຣະຄຳພີໃໝ່ ມັດທາຍ 27:57–60; ມາຣະໂກ 15:27–28
ພຣະຄຳພີເດີມ ເອຊາຢາ 25:8	ພຣະຄຳພີໃໝ່ ມາຣະໂກ 16:1–6; ລູກາ 24:6
ພຣະຄຳພີເດີມ ດານີເອນ 12:2	ພຣະຄຳພີໃໝ່ ມັດທາຍ 27:52–53

ຄຳທຳນາຍ ແລະ ການສິດສອນກ່ຽວກັບພຣະຜູ້ຊ່ວຍໃຫ້ລອດມີຫລາຍກວ່ານັ້ນຢູ່ໃນພຣະຄຳພີມໍມອນ. ໃຫ້ພິຈາລະນາກ່ຽວກັບສັດທາຂອງທ່ານຖືກເຮັດໃຫ້ເຂັ້ມແຂງໂດຍຂໍ້ຄວາມທີ່ຄືກັນກັບຂໍ້ຄວາມເຫລົ່ານີ້ແນວໃດ: 1 ນີໄຟ 11:31–33; 2 ນີໄຟ 25:13; ໂມໄຊຢາ 3:2–11.

ເຮົາສາມາດພົບເຫັນຄວາມສະຫງົບ ແລະ ຄວາມສຸກຜ່ານທາງການຊົດໃຊ້ຂອງພຣະຜູ້ຊ່ວຍໃຫ້ລອດ.

ຕະຫລອດເວລາ, ຜ່ານທາງການເສຍສະລະຊົດໃຊ້ຂອງພຣະອົງ, ພຣະເຢຊູຄຣິດໄດ້ສະເໜີມອບຄວາມສະຫງົບ ແລະ ຄວາມສຸກໃຫ້ແກ່ທຸກຄົນທີ່ມາຫາພຣະອົງ (ເບິ່ງ ໂມເຊ 5:9–12). ໃຫ້ຄິດທີ່ຈະສຶກສາຂໍ້ພຣະຄຳພີດັ່ງຕໍ່ໄປນີ້ ທີ່ເປັນພະຍານເຖິງຄວາມສະຫງົບ ແລະ ຄວາມສຸກທີ່ພຣະອົງສະເໜີມອບໃຫ້, ແລະ ເມື່ອທ່ານເຮັດເຊັ່ນນັ້ນ, ໃຫ້ຄິດກ່ຽວກັບວິທີທີ່ທ່ານສາມາດຮັບເອົາຄວາມສະຫງົບ ແລະ ຄວາມສຸກທີ່ພຣະອົງນຳມາໃຫ້: ເພງສັນລະເສີນ 16:8–11; 30:2–5; ເອຊາຢາ 12; 25:8–9; 40:28–31; ໂຢຮັນ 14:27; 16:33; ແອວມາ 26:11–22.

ເບິ່ງ Dallin H. Oaks, “Strengthened by the Atonement of Jesus Christ,” Liahona, Nov. 2015, 61–64; Sharon Eubank, “Christ: The Light That Shines in Darkness,” Liahona, May 2019, 73–76; “ຂ້າເຝົ້າພິສະຫວົງ,” ເພງສວດ ແລະ ເພງຂອງເດັກນ້ອຍ, 24 ນຳອີກ.

ພຣະຄຣິດຢູ່ເທິງໄມ້ກາງແຂນ — Grey Day Golgotha [ໂຄລະໂຄທາວັນທີ່ມືດມົວ], ໂດຍ ເຈ ເຄີກ ຣິເຈີດສ໌

ຜ່ານທາງການຊົດໃຊ້ຂອງພຣະອົງ, ພຣະເຢຊູຄຣິດມີອຳນາດທີ່ຈະຊ່ວຍເຮົາໃຫ້ເອົາຊະນະບາບ, ຄວາມຕາຍ, ການທົດລອງ, ແລະ ຄວາມອ່ອນແອຂອງເຮົາ.

ຕະຫລອດທົ່ວພຣະຄຳພີ, ສາດສະດາໄດ້ເປັນພະຍານເຖິງອຳນາດຂອງພຣະເຢຊູຄຣິດ ທີ່ຈະປົດປ່ອຍເຮົາຈາກບາບ ແລະ ຄວາມຕາຍ ແລະ ຊ່ວຍເຮົາໃຫ້ເອົາຊະນະການທົດລອງ ແລະ ຄວາມອ່ອນແອຂອງເຮົາ. ພຣະຄຣິດໄດ້ສ້າງຄວາມແຕກຕ່າງໃນຊີວິດຂອງທ່ານແນວໃດ? ເປັນຫຍັງພຣະອົງຈຶ່ງສຳຄັນຕໍ່ທ່ານ? ໃຫ້ໄຕ່ຕອງຄຳຖາມເຫລົ່ານີ້ ຂະນະທີ່ທ່ານອ່ານຂໍ້ເຫລົ່ານີ້, ແລະ ບັນທຶກຄວາມຄິດ ແລະ ຄວາມຮູ້ສຶກຂອງທ່ານກ່ຽວກັບພຣະຜູ້ຊ່ວຍໃຫ້ລອດ:

ເບິ່ງ Walter F. González, “The Savior’s Touch,” Liahona, Nov. 2019, 90–92 ນຳອີກ.

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ອົບພະຍົບ 12:1–28.ຂະນະທີ່ທ່ານສະເຫລີມສະຫລອງບຸນອີດສະເຕີ, ຄອບຄົວຂອງທ່ານສາມາດທົບທວນສິ່ງທີ່ພວກທ່ານໄດ້ຮຽນຮູ້ກ່ຽວກັບງານປັດສະຄາ ໃນຕົ້ນເດືອນນີ້. ເປັນຫຍັງມັນຈຶ່ງສຳຄັນທີ່ການເສຍສະລະຂອງພຣະຜູ້ຊ່ວຍໃຫ້ລອດໄດ້ເກີດຂຶ້ນໃນເວລາດຽວກັນກັບງານປັດສະຄາ?

ສຳລັບການສະຫລຸບກ່ຽວກັບສິ່ງທີ່ໄດ້ເກີດຂຶ້ນລະຫວ່າງອາທິດສຸດທ້າຍຂອງພຣະຊົນຊີບຂອງພຣະຜູ້ຊ່ວຍໃຫ້ລອດ, ເບິ່ງ “Holy Week” ທີ່ ComeuntoChrist.org/2016/easter/easter-week. ສຳລັບຂໍ້ພຣະຄຳພີກ່ຽວກັບເຫດການທີ່ໄດ້ເກີດຂຶ້ນລະຫວ່າງອາທິດສຸດທ້າຍຂອງພຣະຜູ້ຊ່ວຍໃຫ້ລອດ, ໃຫ້ເບິ່ງ “ອາທິດສຸດທ້າຍ: ການຊົດໃຊ້ ແລະ ການຟື້ນຄືນພຣະຊົນ” ໃນ ຄວາມກົມກຽວຂອງພຣະກິດຕິຄຸນ (ໃນ ພຣະຄຣິສຕະທຳຄຳພີ ພາກຫ້ອຍທ້າຍ).

ເອຊາຢາ 53.ການອ່ານຄຳທຳນາຍກ່ຽວກັບພຣະເຢຊູຄຣິດຢູ່ໃນ ເອຊາຢາ 53 ສາມາດຊ່ວຍສະມາຊິກໃນຄອບຄົວໃຫ້ເຂົ້າໃຈເຖິງການເສຍສະລະຊົດໃຊ້ຂອງພຣະຜູ້ຊ່ວຍໃຫ້ລອດ. ຂໍ້ໃດ ຫລື ສຳວະລີໃດທີ່ຄອບຄົວຂອງທ່ານພົບເຫັນວ່າມີພະລັງໂດຍສະເພາະ? ໃຫ້ຄິດທີ່ຈະມີການປະຊຸມສະແດງປະຈັກພະຍານເປັນຄອບຄົວ ຊຶ່ງໃນນັ້ນ ພວກທ່ານສະແດງປະຈັກພະຍານເຖິງການຊົດໃຊ້ຂອງພຣະຜູ້ຊ່ວຍໃຫ້ລອດ.

“Special Witnesses of Christ.”ແອພ ຫ້ອງສະໝຸດພຣະກິດຕິຄຸນ ແລະ ChurchofJesusChrist.org ມີວິດີໂອຊຸດທີ່ເອີ້ນວ່າ “Special Witnesses of Christ,” ຊຶ່ງໃນນັ້ນສະມາຊິກແຕ່ລະຄົນໃນຝ່າຍປະທານສູງສຸດ ແລະ ກຸ່ມອັກຄະສາວົກສິບສອງ ແບ່ງປັນການເປັນພະຍານຂອງພວກເພິ່ນເຖິງພຣະເຢຊູຄຣິດ. ບາງທີຄອບຄົວຂອງທ່ານສາມາດເບິ່ງວິດີໂອບາງເລື່ອງເຫລົ່ານີ້ ແລະ ເວົ້າລົມກັນກ່ຽວກັບສິ່ງທີ່ພວກທ່ານໄດ້ຮຽນຮູ້ກ່ຽວກັບພຣະເຢຊູຄຣິດ ຈາກຜູ້ຮັບໃຊ້ທີ່ຖືກເລືອກຂອງພຣະອົງ. ນຳກັນເປັນຄອບຄົວ, ໃຫ້ເວົ້າລົມກັນກ່ຽວກັບວິທີທີ່ພວກທ່ານສາມາດແບ່ງປັນການເປັນພະຍານຂອງພວກທ່ານເຖິງພຣະຄຣິດ. ຍົກຕົວຢ່າງ, ພວກທ່ານອາດເຊື້ອເຊີນບາງຄົນໃຫ້ໄປນະມັດສະການກັບພວກທ່ານຢູ່ທີ່ໂບດ ໃນວັນອາທິດບຸນອີດສະເຕີນີ້.

ເພງສວດ ແລະ ເພງຕ່າງໆ.ເພງກໍເປັນວິທີໜຶ່ງທີ່ມີພະລັງ ເພື່ອລະນຶກເຖິງພຣະຜູ້ຊ່ວຍໃຫ້ລອດ ແລະ ເຊື້ອເຊີນພຣະວິນຍານໃຫ້ມາສະຖິດຢູ່ໃນບ້ານເຮືອນຂອງເຮົາ. ສະມາຊິກໃນຄອບຄົວສາມາດແບ່ງປັນ ແລະ ຮ້ອງເພງສວດ ຫລື ເພງຕ່າງໆນຳກັນກ່ຽວກັບບຸນອີດສະເຕີ ຫລື ກ່ຽວກັບພຣະເຢຊູຄຣິດ, ດັ່ງເຊັ່ນ “ພຣະຄຣິດເຈົ້າຄືນຊີບວັນນີ້” (ເພງສວດ ແລະ ເພງຂອງເດັກນ້ອຍ, 58) ຫລື “ພຣະອົງຊົງຟື້ນ” (ເພງສວດ ແລະ ເພງຂອງເດັກນ້ອຍ, 60). ເພື່ອຊອກຫາເພງສວດ ແລະ ເພງຂອງເດັກນ້ອຍອື່ນໆ, ໃຫ້ເບິ່ງຢູ່ໃນດັດຊະນີກ່ຽວກັບຫົວຂໍ້ຂອງປຶ້ມ ເພງສວດ ແລະ ເພງຂອງເດັກນ້ອຍ.

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ “ພຣະອົງຊົງຟື້ນ” ເພງສວດ ແລະ ເພງຂອງເດັກນ້ອຍ, 60.

ການປັບປຸງການສິດສອນຂອງເຮົາ

ດຳລົງຊີວິດຕາມພຣະກິດຕິຄຸນຂອງພຣະເຢຊູຄຣິດ. “ເພື່ອເປັນຄູສອນເໝືອນດັ່ງພຣະຄຣິດ [ໃນບ້ານເຮືອນຂອງທ່ານ], ບາງທີສິ່ງທີ່ສຳຄັນທີ່ສຸດທີ່ທ່ານສາມາດເຮັດໄດ້ ແມ່ນທີ່ຈະ … ດຳລົງຊີວິດຕາມພຣະກິດຕິຄຸນດ້ວຍສຸດໃຈຂອງທ່ານ. … ນີ້ຄືວິທີທາງທີ່ສຳຄັນທີ່ສຸດ ທີ່ຈະເໝາະສົມກັບການເປັນເພື່ອນຂອງພຣະວິນຍານບໍລິສຸດ. ທ່ານບໍ່ຈຳເປັນຕ້ອງດີພ້ອມທຸກຢ່າງ, ພຽງແຕ່ໃຫ້ພະຍາຍາມດ້ວຍຄວາມພາກພຽນ—ແລະ ສະແຫວງຫາການໃຫ້ອະໄພ ຜ່ານທາງການຊົດໃຊ້ຂອງພຣະຜູ້ຊ່ວຍໃຫ້ລອດ ເມື່ອໃດກໍຕາມທີ່ທ່ານສະດຸດລົ້ມ” (Teaching in the Savior’s Way, 13).

ພຣະຄຣິດປະທັບຢືນຢູ່ໜ້າອຸບມຸງທີ່ປະຕູເປີດຢູ່ — For This Purpose I Have Come [ເພື່ອຈຸດປະສົງນີ້ເຮົາຈຶ່ງມາ], ໂດຍ ຢອງຊຸງ ຄິມ