“ວັນທີ 18–24 ເດືອນເມສາ. ອົບພະຍົບ 18–20: ‘ພວກເຮົາຈະເຮັດທຸກສິ່ງທີ່ພຣະຜູ້ເປັນເຈົ້າໄດ້ກ່າວ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)

“ວັນທີ 18-24 ເດືອນເມສາ. ອົບພະຍົບ 18–20,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022

ຮູບພາບ

ພູເຂົາ

ພູເຂົາຢູ່ປະເທດເອຢິບທີ່ເຊື່ອວ່າແມ່ນພູເຂົາຊີນາຍ.

ວັນທີ 18–24 ເດືອນເມສາ

ອົບພະຍົບ 18–20

“ພວກເຮົາຈະເຮັດທຸກສິ່ງທີ່ພຣະຜູ້ເປັນເຈົ້າໄດ້ກ່າວ”

ຊິດສະເຕີ ມິແຊວ ເຄຼກ ໄດ້ສິດສອນວ່າ, “ໃນຖານະສານຸສິດທີ່ຊື່ສັດ [ຂອງພຣະເຢຊູຄຣິດ], ທ່ານສາມາດໄດ້ຮັບການດົນໃຈ ແລະ ການເປີດເຜີຍສ່ວນຕົວ, ທີ່ສອດຄ່ອງກັບພຣະບັນຍັດຂອງພຣະອົງ, ອັນທີ່ເໝາະສົມສຳລັບທ່ານ” (“Spiritual Capacity,” Liahona, Nov. 2019, 21). ໃຫ້ບັນທຶກ ແລະ ເຮັດຕາມການດົນໃຈທີ່ທ່ານໄດ້ຮັບ ຂະນະທີ່ທ່ານອ່ານ ອົບພະຍົບ 18–20.

ບັນທຶກຄວາມປະທັບໃຈຂອງທ່ານ

ການເດີນທາງຂອງຊາວອິດສະຣາເອນຈາກປະເທດເອຢິບເຖິງຕີນພູເຂົາຊີນາຍ ແມ່ນເຕັມໄປດ້ວຍການມະຫັດສະຈັນ—ເປັນການສະແດງໃຫ້ປະຈັກເຖິງອຳນາດ, ຄວາມຮັກ, ແລະ ຄວາມເມດຕາອັນຫາທີ່ປຽບບໍ່ໄດ້ຂອງພຣະຜູ້ເປັນເຈົ້າທີ່ປະຕິເສດບໍ່ໄດ້. ເຖິງຢ່າງໃດກໍຕາມ, ພຣະຜູ້ເປັນເຈົ້າຍັງມີພອນສຳລັບເຂົາເຈົ້າຕື່ມອີກທີ່ເກີນກວ່າ ການໜີຈາກປະເທດເອຢິບ ແລະ ການຕອບສະໜອງທາງຄວາມຫິວ ແລະ ຄວາມກະຫາຍທາງຮ່າງກາຍເທົ່ານັ້ນ. ພຣະອົງປະສົງໃຫ້ເຂົາເຈົ້າກາຍເປັນຜູ້ຄົນແຫ່ງພັນທະສັນຍາຂອງພຣະອົງ, ເປັນ “ຊັບສົມບັດພິເສດ,” ຂອງພຣະອົງ ແລະ ເປັນ “ປະຊາຊາດທີ່ບໍລິສຸດ” (ອົບພະຍົບ 19:5–6). ທຸກວັນນີ້, ພອນແຫ່ງພັນທະສັນຍານີ້ໄດ້ຖືກສົ່ງຕໍ່ໃຫ້ຫລາຍກວ່າພຽງແຕ່ປະຊາຊາດດຽວ ຫລື ຜູ້ຄົນກຸ່ມດຽວເທົ່ານັ້ນ. ພຣະເຈົ້າປະສົງໃຫ້ລູກໆທຸກຄົນຂອງພຣະອົງໃຫ້ກາຍເປັນຜູ້ຄົນແຫ່ງພັນທະສັນຍາຂອງພຣະອົງ, ເພື່ອ “ເຊື່ອຟັງ [ພຣະອົງ], ແລະ ຮັກສາພັນທະສັນຍາ [ຂອງພຣະອົງ]” (ອົບພະຍົບ 19:5), ເພາະພຣະອົງສະແດງຄວາມເມດຕາຂອງພຣະອົງ “ຕໍ່ຫລາຍພັນເຊັ່ນຄົນທີ່ຮັກ [ພຣະອົງ], ແລະ ຮັກສາພຣະບັນຍັດ [ຂອງພຣະອົງ]” (ອົບພະຍົບ 20:6).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ອົບພະຍົບ 18:13–26

ເຮົາສາມາດຊ່ວຍ “ຮັບແບກພາລະ” ຂອງການເຮັດວຽກງານຂອງພຣະຜູ້ເປັນເຈົ້າ.

ຂະນະທີ່ທ່ານອ່ານຄຳແນະນຳທີ່ໂມເຊໄດ້ຮັບຈາກເຢທະໂຣ ພໍ່ເຖົ້າຂອງເພິ່ນ, ໃຫ້ໄຕ່ຕອງວິທີທີ່ທ່ານສາມາດເປັນ “ຄົນທີ່ໄວ້ວາງໃຈໄດ້” (ບາງເທື່ອກໍແປວ່າ ຄົນທີ່ “ເຊື່ອຖືໄດ້”) ຊຶ່ງບັນຍາຍຢູ່ໃນ ຂໍ້ທີ 21. ທ່ານຈະຊ່ວຍ “ຮັບແບກພາລະ” ຂອງຜູ້ນຳຂອງສາດສະໜາຈັກຂອງທ່ານແນວໃດ? (ຂໍ້ທີ 22). ຍົກຕົວຢ່າງ, ຄຳແນະນຳນີ້ອາດກ່ຽວຂ້ອງກັບຄວາມພະຍາຍາມທີ່ຈະປະຕິບັດສາດສະໜາກິດຂອງທ່ານແນວໃດ?

ທ່ານອາດຢາກພິຈາລະນານຳອີກວ່າ, ມີເວລາໃດບໍທີ່ທ່ານກໍຄືກັນກັບໂມເຊ, ພະຍາຍາມເຮັດຫລາຍເກີນຄວນ. ຄຳແນະນຳຂອງເຢທະໂຣກ່ຽວຂ້ອງກັບທ່ານແນວໃດ?

ເບິ່ງ ໂມໄຊຢາ 4:27; Henry B. Eyring, “The Caregiver,” Liahona, Nov. 2012, 121–24 ນຳອີກ.

ການປະຕິບັດສາດສະໜາກິດຕໍ່ຄົນອື່ນ ເປັນວິທີໜຶ່ງທີ່ເຮົາສາມາດມີພາກສ່ວນໃນວຽກງານຂອງພຣະຜູ້ເປັນເຈົ້າ.

ອົບພະຍົບ 19:3–6

ຜູ້ຄົນແຫ່ງພັນທະສັນຍາຂອງພຣະຜູ້ເປັນເຈົ້າ ເປັນຜູ້ຄົນຂອງພຣະອົງ.

ໃຫ້ພິຈາລະນາວ່າ ມັນມີຄວາມໝາຍຕໍ່ທ່ານແນວໃດ ທີ່ໄດ້ເປັນ “ຊັບສົມບັດພິເສດ” ຂອງພຣະຜູ້ເປັນເຈົ້າ (ອົບພະຍົບ 19:5). ປະທານຣະໂຊ ເອັມ ແນວສັນ ໄດ້ໃຫ້ຄຳອະທິບາຍໜຶ່ງກ່ຽວກັບວະລີນີ້: “ໃນພຣະຄຳພີເດີມ, ຄຳສັບເປັນພາສາເຮັບເຣີ ທີ່ວ່າ ພິເສດ ໄດ້ຖືກແປເປັນ ຊັບສິນ, ຊຶ່ງໝາຍເຖິງ ‘ຊັບສິນທີ່ມີຄ່າ,’ ຫລື ‘ຊັບສົມບັດ.’ … ສຳລັບເຮົາທີ່ຖືກເອີ້ນໂດຍຜູ້ຮັບໃຊ້ຂອງພຣະຜູ້ເປັນເຈົ້າ ວ່າເປັນຜູ້ຄົນ ພິເສດ ຂອງພຣະອົງ ເປັນຄຳຍ້ອງຍໍລະດັບສູງສຸດ” (“Children of the Covenant,” Ensign, May 1995, 34). ການທີ່ຮູ້ວ່າ ການຮັກສາພັນທະສັນຍາຂອງທ່ານ ເຮັດໃຫ້ທ່ານເປັນ “ຊັບສົມບັດພິເສດ” ມີອິດທິພົນຕໍ່ວິທີທີ່ທ່ານດຳລົງຊີວິດແນວໃດ?

ເບິ່ງ Gerrit W. Gong, “Covenant Belonging,” Liahona, Nov. 2019, 80–83 ນຳອີກ.

ອົບພະຍົບ 19:10–11, 17

ປະສົບການທີ່ສັກສິດຮຽກຮ້ອງການກະກຽມ.

ພຣະຜູ້ເປັນເຈົ້າໄດ້ບອກໂມເຊວ່າ ລູກຫລານອິດສະຣາເອນຕ້ອງກະກຽມກ່ອນພວກເຂົາຈະສາມາດ “ເຂົ້າເຝົ້າພຣະເຈົ້າ” (ອົບພະຍົບ 19:10–11, 17) ແລະ ຮັກສາພັນທະສັນຍາທີ່ເຮັດໄວ້ກັບພຣະອົງ (ເບິ່ງ ອົບພະຍົບ 19:5). ທ່ານກະກຽມແນວໃດແດ່ສຳລັບປະສົບການທີ່ສັກສິດໃນຊີວິດຂອງທ່ານ, ດັ່ງເຊັ່ນການໄປພຣະວິຫານ ຫລື ການຮັບສ່ວນສິນລະລຶກ? ທ່ານສາມາດເຮັດຫຍັງແດ່ ເພື່ອກະກຽມຫລາຍກວ່າເກົ່າສຳລັບປະສົບການເຫລົ່ານີ້? ໃຫ້ຄິດກ່ຽວກັບກິດຈະກຳທາງວິນຍານຢ່າງອື່ນໆ ທີ່ຮຽກຮ້ອງການກະກຽມ, ແລະ ໃຫ້ໄຕ່ຕອງວິທີທີ່ທ່ານກະກຽມ ສາມາດເປັນຜົນກະທົບຕໍ່ປະສົບການທີ່ທ່ານມີແນວໃດ.

ອົບພະຍົບ 20

ພຣະເຈົ້າມີເມດຕາ.

ຂະນະທີ່ທ່ານອ່ານ ອົບພະຍົບ 20, ໃຫ້ຄິດທີ່ຈະສັງເກດເບິ່ງວ່າ ພຣະບັນຍັດຂໍ້ໃດໃນພຣະບັນຍັດສິບປະການ ທີ່ທ່ານຮູ້ສຶກວ່າ ທ່ານກຳລັງເຊື່ອຟັງ ແລະ ຂໍ້ໃດທີ່ທ່ານຮູ້ສຶກວ່າທ່ານສາມາດເຊື່ອຟັງຢ່າງຊື່ສັດໄດ້ຫລາຍກວ່າເກົ່າ. ທ່ານສາມາດເລືອກເອົາພຣະບັນຍັດຂໍ້ໜຶ່ງ ເພື່ອເຊື່ອຟັງ ແລະ ແລ້ວໃຫ້ສຶກສາມັນຢ່າງລະອຽດ ໂດຍການອ່ານຂໍ້ພຣະຄຳພີທີ່ກ່ຽວຂ້ອງ (ເບິ່ງ ຄູ່ມືພຣະຄຳພີ ທີ່ scriptures.ChurchofJesusChrist.org) ຫລື ຂ່າວສານຈາກກອງປະຊຸມໃຫຍ່ (ເບິ່ງ topics section ຂອງ conference.ChurchofJesusChrist.org). ໃຫ້ຄິດທີ່ຈະລວມພອນທີ່ມາສູ່ຜູ້ທີ່ເຊື່ອຟັງພຣະບັນຍັດ ໃສ່ກັບການສຶກສາຂອງທ່ານ. ພອນເຫລົ່ານີ້ສະແດງໃຫ້ເຫັນເຖິງຄວາມເມດຕາ ແລະ ຄວາມຮັກຂອງພຣະເຈົ້າຕໍ່ທ່ານແນວໃດ?

ເບິ່ງ Carole M. Stephens, “If Ye Love Me, Keep My Commandments,” Liahona, Nov. 2015, 118–20 ນຳອີກ.

ອົບພະຍົບ 20:1–7

ມັນສຳຄັນທີ່ຈະເອົາໃຈໃສ່ຕໍ່ພຣະຜູ້ເປັນເຈົ້າກ່ອນໃນຊີວິດຂອງເຮົາ.

ການອ່ານ ອົບພະຍົບ 20:1–7 ອາດກະຕຸ້ນທ່ານໃຫ້ຄິດກ່ຽວກັບລຳດັບຄວາມສຳຄັນໃນຊີວິດຂອງທ່ານ—ທ່ານສາມາດຂຽນສິ່ງເຫລົ່ານັ້ນລົງໄວ້. ອາດມີ “ພະ” ຫລື “ຮູບເຄົາລົບ” ອື່ນໆໃດແດ່ (ອົບພະຍົບ 20:3–4) ທີ່ທ່ານອາດຄິດຢາກເອົາໃຈໃສ່ຕໍ່ຫລາຍກວ່າພຣະເຈົ້າ? ການເອົາໃຈໃສ່ຕໍ່ພຣະຜູ້ເປັນເຈົ້າກ່ອນ ຊ່ວຍທ່ານກັບຄວາມສຳຄັນຢ່າງອື່ນໆໃນຊີວິດຂອງທ່ານແນວໃດ? ທ່ານຖືກດົນໃຈໃຫ້ເຮັດຫຍັງແດ່ ເພື່ອເພີ່ມຄວາມເອົາໃຈໃສ່ໃຫ້ຫລາຍກວ່າເກົ່າຕໍ່ພຣະບິດາເທິງສະຫວັນ ແລະ ພຣະເຢຊູຄຣິດ?

ເບິ່ງ Dallin H. Oaks, “No Other Gods,” Liahona, Nov. 2013, 72–75 ນຳອີກ.

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ອົບພະຍົບ 18:8–12.ປະຈັກພະຍານຂອງໂມເຊເຖິງການປົດປ່ອຍຂອງພຣະເຈົ້າມີຜົນກະທົບຢ່າງໃດແດ່ຕໍ່ເຢທະໂຣ? ພຣະຜູ້ເປັນເຈົ້າໄດ້ເຮັດສິ່ງທີ່ຍິ່ງໃຫຍ່ຢ່າງໃດແດ່ເພື່ອຄອບຄົວຂອງເຮົາ? ເຮົາສາມາດແບ່ງປັນປະຈັກພະຍານຂອງເຮົາກັບໃຜແດ່? ເຮົາຈະຮັກສາປະສົບການເຫລົ່ານັ້ນໄວ້ໃຫ້ຄົນລຸ້ນຫລັງໄດ້ແນວໃດ?

ອົບພະຍົບ 18:13–26.ຂໍ້ເຫລົ່ານີ້ອາດດົນໃຈຄອບຄົວຂອງທ່ານໃຫ້ຄິດກ່ຽວກັບການຮັບໃຊ້ຜູ້ນຳຂອງສາດສະໜາຈັກຢູ່ໃນທ້ອງຖິ່ນຂອງທ່ານ, ດັ່ງເຊັ່ນ ອະທິການ, ຜູ້ນຳກຸ່ມຊາວໜຸ່ມ, ຫລື ຄູສອນຊັ້ນປະຖົມໄວ. ມີໜ້າທີ່ຮັບຜິດຊອບຢ່າງໃດແດ່ທີ່ເຂົາເຈົ້າມີ ທີ່ເບິ່ງຄືວ່າ “ໜັກເໜືອກຳລັງ” (ອົບພະຍົບ 18:18) ສຳລັບຄົນໜຶ່ງທີ່ຈະແບກຫາບຄົນດຽວໄດ້? ເຮົາສາມາດເຮັດຫຍັງແດ່ ເພື່ອຊ່ວຍຮັບແບກພາລະຂອງເຂົາເຈົ້າ?

ອົບພະຍົບ 20:3–17.ໃຫ້ຄິດກ່ຽວກັບວິທີທີ່ມີຄວາມໝາຍ ເພື່ອສົນທະນາກ່ຽວກັບພຣະບັນຍັດສິບປະການ ເປັນຄອບຄົວ. ຍົກຕົວຢ່າງ, ພວກທ່ານອາດຂຽນພຣະບັນຍັດ ໃນ ອົບພະຍົບ 20:3–17 ໃສ່ແຜ່ນເຈ້ຍສິບຕ່ອນ. ແລ້ວສະມາຊິກໃນຄອບຄົວສາມາດລຽງມັນເປັນສອງກຸ່ມ: (1) ການເຄົາລົບພຣະເຈົ້າ (2) ການຮັກຄົນອື່ນໆ (ເບິ່ງ ມັດທາຍ 22:36–40 ນຳອີກ). ໃຫ້ຄິດທີ່ຈະເລືອກເອົາພຣະບັນຍັດໜຶ່ງຂໍ້ ຫລື ສອງຂໍ້ ໃນແຕ່ລະມື້ ລະຫວ່າງອາທິດນີ້ ແລະ ສົນທະນາກ່ຽວກັບມັນຢ່າງລະອຽດນຳກັນ. ຍົກຕົວຢ່າງ, ການເຊື່ອຟັງພຣະບັນຍັດນີ້ເພີ່ມຄວາມເຂັ້ມແຂງໃຫ້ແກ່ຄອບຄົວຂອງເຮົາແນວໃດ? ພຣະຜູ້ຊ່ວຍໃຫ້ລອດເຊື່ອຟັງມັນແນວໃດ?

ອົບພະຍົບ 20:12.ເພື່ອໃຫ້ເຂົ້າໃຈ ອົບພະຍົບ 20:12, ຫລາຍກວ່າເກົ່າ ມັນອາດຊ່ວຍໄດ້ຫລາຍ ຖ້າຫາກຄອບຄົວຂອງທ່ານຊອກຫາຄວາມໝາຍຂອງຄຳວ່າ “ເຄົາລົບ.” ແລ້ວສະມາຊິກໃນຄອບຄົວສາມາດຂຽນສິ່ງທີ່ເຮົາສາມາດເຮັດ ທີ່ເຄົາລົບພໍ່ແມ່ຂອງເຮົາລົງໄວ້. ພວກທ່ານອາດຮ້ອງເພງໜຶ່ງກ່ຽວກັບການເຄົາລົບພໍ່ແມ່, ເຊັ່ນ “ຮັກທີ່ບ້ານ” (ເພງສວດ ແລະ ເພງຂອງເດັກນ້ອຍ, 48), ແລະ ແລ້ວໃຫ້ໃຊ້ແນວຄິດບາງຢ່າງຢູ່ໃນສິ່ງທີ່ທ່ານໄດ້ຂຽນໄວ້ ເພື່ອແຕ່ງເນື້ອເພງວັກໃໝ່.

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ເຮົາຈະໄປທີ່ພຣະອົງບັນຊາ,” ເພງສວດ ແລະ ເພງຂອງເດັກນ້ອຍ, 50.

ການປັບປຸງການສຶກສາສ່ວນຕົວ

ຊອກຫາເວລາທີ່ສະດວກສຳລັບທ່ານ. ສ່ວນຫລາຍແລ້ວ ມັນເປັນສິ່ງງ່າຍກວ່າ ທີ່ຈະຮຽນຮູ້ຈາກພຣະຄຳພີ ເມື່ອທ່ານສາມາດສຶກສາມັນ ໂດຍປາດສະຈາກສິ່ງລົບກວນ. ໃຫ້ຊອກຫາເວລາທີ່ສະດວກສຳລັບທ່ານ, ແລະ ໃຫ້ສຶກສາຢ່າງສະໝ່ຳສະເໝີ ໃນເວລາດຽວກັນນັ້ນທຸກໆວັນ.