“Manatu e Nofouta i Ai: O le Falefetafa’i ma le Taulaga,” Sau, Mulimuli Mai ia te A’u—Mo Tagata Taitoatasi ma Aiga: Feagaiga Tuai 2022 (2021)
“Manatu e Nofouta i Ai: O le Falefetafa’i ma le Taulaga,” Sau, Mulimuli Mai ia te A’u—Mo Tagata Taitoatasi ma Aiga: 2022
Manatu e Nofouta i Ai
O le Falefetafa’i ma le Taulaga
A o tatou faitau i le Feagaiga Tuai, o nisi taimi tatou te tau ai i fuaitau uumi e uiga i mea sa mautinoa lava le taua i le Alii ae atonu [tatou] te le lagona i le taimi lava lea le taua ia i tatou i aso nei. O ni faataitaiga o le Esoto 25–30; 35–40; Levitiko 1–9; 16–17. O mataupu nei o loo faamatala auiliili mai ai le falefetafa’i a Isaraelu i le vao ma taulaga e osi i manu e tatau ona faatinoina ai iina.1 O le falefetafa’i sa o se malumalu feaveai, o le nofoaga e afio ai le Alii faatasi ma Lona nuu.
O a tatou malumalu i onapo nei e i ai mea e tutusa ai ma le falefetafa’i o Isaraelu, ae mautinoa lava e le tutusa ma lona faamatalatalaga i le Esoto. Ma tatou te le tafasiina ni manu i totonu o o tatou malumalu—o le Togiola a le Faaola na faamutaina ai taulaga e osi i manu i le silia ma le 2,000 tausaga ua mavae. Ae e ui lava i nei eseesega, o loo i ai se taua tele i aso nei o le faitau e uiga i ituaiga o tapuaiga a Isaraelu anamua, ae maise lava pe a tatou vaai i ai i le ala na [vaai] ai le nuu o le Atua i le Tusi a Mamona—o se ala “e faamalosi ai lo latou faatuatua ia Keriso” (Alema 25:16; tagai foi i le Iakopo 4:5; Iaroma 1:11). A tatou malamalama i lenei faafaailoga o le falefetafa’i ma taulaga e osi i manu, e mafai ona tatou maua ni malamalamaaga loloto faaleagaga o le a faapea foi ona faamalosia ai o tatou faatuatua ia Keriso.
Atatusi o tagata Isaraelu o loo aumai se tamai mamoe i le falefetafa’i, saunia e Robert T. Barrett
O le Falefetafa’i e Faamalosia Faatuatua ia Iesu Keriso
Ina ua poloaiina e le Atua ia Mose e fau se falefetafa’i i le tolauapiga a Isaraelu, sa Ia fofoga mai lona faamoemoega: “ou te nofo Ai faatasi ma i latou” (Esoto 25:8). I totonu o le falefetafa’i, sa fai ai le atolaau o le feagaiga ma sui o le afio ai o le Atua—o se pusa laupapa, na ufitia i le auro, na i ai faamaumauga tusitusiga o le feagaiga a le Atua ma Lona nuu (tagai i le Esoto 25:10–22). O le atolaau sa teuina i le potu aupito paia ma maototonu, na vavaeeseina mai le falefetafa’i atoa i se veli. O lenei veli ua faatusa i lo tatou vavaeeseina mai le afioaga o le Atua ona o le Pa’u.
E ese mai lo o Mose, ua na’o le toatasi se tagata ua tatou iloa e mafai ona ulu atu i lena “mea e sili ona paia” (Esoto 26:34)—o le ositaulaga. E pei o isi ositaulaga, e tatau ona mulumuluina ma faauuina muamua o ia (tagai i le Esoto 40:12–13) ma faaofuina i ofu paia ua faatusa i lona tofi (tagai i le Esoto 28). E taitasi i le tausaga i se aso e ta’u o le Aso o le Togiola, e osi ai e le faitaulaga sili ia taulaga e fai ma sui o tagata a’o le’i ulufale atu na’o ia i totonu o le falefetafa’i. I le veli, na te faamuina ai mea manogi (tagai i le Levitiko 16:12). O le asu manogi e alu a’e i le lagi na faatusaina i tatalo a tagata e alu a’e i le Atua (tagai i le Salamo 141:2). Ona alu atu lea o le faitaulaga sili, e ui atu i le veli o loo aveina le toto mai le manu na osi ai le taulaga, ma alu atu i le nofoalii o le Atua, na faatusaina i le atolaau o le feagaiga (tagai i le Levitiko 16:14–15).
O le iloa ai o mea ua e iloa e uiga ia Iesu Keriso ma Lana matafaioi i le fuafuaga a le Tama Faalelagi, o mafai ona e vaaia le ala e faasino atu ai e le falefetafa’i i tatou i le Faaola? E pei lava o le falefetafa’i, o le atolaau o loo i ai i totonu, na faatusaina i le afio ai o le Atua i totonu o Lona nuu, o Iesu Keriso sa afio ai le Atua i totonu o Lona nuu (tagai i le Ioane 1:14). E pei o le faitaulaga sili, o Iesu Keriso o le Puluvaga i le va o i tatou ma le Atua le Tama. Sa Ia ui atu i le veli e fautua mo i tatou ona o le toto o Lana lava taulaga (tagai i le Eperu 8–10).
O nisi o vaega o le falefetafa’i a Isaraelu atonu ua e masani ai, ae maise lava pe afai ua e alu atu i le malumalu ia maua ou lava sauniga. E pei o le mea e sili ona paia o le falefetafa’i, o le potu selesitila o le malumalu ua fai ma sui o le afioaga o le Atua. Ina ia ulu atu i ai, e ao ona mulumuluina ma faauuina muamua i tatou. Tatou te ofuina ni ofu paia. Tatou te tatalo i se fata faitaulaga lea e o a’e ai tatalo i le Atua. Ma mulimuli lava tatou ui atu i se veli i totonu o le afioaga o le Atua.
Atonu o le mea e tutusa ai e sili ona taua i le va o malumalu i aso nei ma le falefetafa’i i aso anamua o le, pe afai e malamalama tonu i ai, e tau fai faamalosia ai o tatou faatuatua ia Iesu Keriso ma faatumulia ai i tatou i le agaga faafetai mo Lana taulaga togiola. E finagalo le Atua ia ulu atu Ana fanau uma i Lona afioaga; e finagalo o Ia i se “malo o ositaulaga” ma faitaulaga tamaitai (Esoto 19:6). Peitai, o a tatou agasala e taofia ai i tatou mai le mauaina o lena faamanuiaga, ona “e leai se mea e lē mamā e mafai ona nofo faatasi ma le Atua” (1 Nifae 10:21). O lea na auina mai ai e le Atua le Tama ia Iesu Keriso, o lo tatou “faitaulaga sili i mea lelei atali” (Eperu 9:11). Na te susuea le veli mo i tatou ma faamalosiau i le nuu uma o le Atua ia “faalatalata atu ai ma le faamalosi i le nofoalii o le alofa tunoa, ina ia alofaina ai o i tatou” (Eperu 4:16).
O aso nei, o le faamoemoega o malumalu ua sili atu nai le mauaina o le faaeaga mo i tatou lava. A uma ona maua o tatou lava sauniga, e mafai ona tatou tutu e fai ma sui o o tatou augatuaa, e sui i le mauaina o sauniga mo i latou. I se itu, e mafai ona avea i tatou e pei o se faitaulaga sili anamua—ma le Faitaulaga Silisili—e tatalaina le ala i le afioaga o le Atua mo isi.
O le Ositaulaga e Faamalosia ai le Faatuatua ia Iesu Keriso
O mataupu faavae o le togiola ma le faaleleiga na malosi le aoaoina i faiga anamua o le osi o taulaga i manu, lea na leva ona i ai muamua i le tulafono a Mose. Ona o le talalelei toefuataiina, ua tatou iloa ai sa osia e Atamu ma Eva ia taulaga, malamalama i lona faatatauga faafaatusa i le taulaga a le Faaola, ma na aoaoina ai a laua fanau (tagai i le Mose 5:4–12; tagai foi i le Kenese 4:4).
O le faafaatusa o taulaga e osi i manu atonu e foliga mai na faapitoa ona mafua ai ni lagona faanoanoa tele i le Aso o le Togiola (“Yom Kippur” i le faaEperu). O le manaomia o lenei sauniga faaletausaga sa faaleoina mai i le Levitiko 16:30: “O le aso lea e fai ai le togiola mo outou e faamamaina ai outou, ina ia mama outou i luma o Ieova i a outou agasala.” Ina ia faapea ona tumau ai le afio ai o le Atua faatasi ma tagata. O lenei togiola sa ausiaina e ala i ni sauniga eseese. I se tasi o nei [sauniga], na fasimate ai se ‘oti o se taulaga mo agasala a tagata, ona avatu lea e le faitaulaga sili le toto o le ‘oti i totonu o le mea e sili ona paia. Mulimuli ane, ona tuu lea e le faitaulaga sili ona lima i luga o se ‘oti ola ma tautau atu agasala a le fanauga a Isaraelu—e siita’i faafaatusa ai na agasala i le ‘oti. Ona tuliese ai lea i fafo le ‘oti mai le tolauapiga a Isaraelu.
I lenei sauniga, o ‘oti na faatusa ia Iesu Keriso, na avea le tulaga o le nuu agasala. E le tatau ona faatagaina le agasala i totonu o le afioaga o le Atua. Ae nai lo o le faatamaia po o le tutuliese i fafo o tagata agasala, na tuuina mai e le Atua se isi auala—nai lo o lena, o le a fasimateina pe tuliese i fafo se ‘oti. “E ave foi e le ‘oti i ona luga a latou amio leaga uma” (Levitiko 16:22).
O le faafaatusa o nei sauniga e faasino atu i le ala ua tuuina mai ai e le Atua e toe avatu ai i tatou i Lona afioaga—o Iesu Keriso ma Lana Togiola. O le Faaola ua na “tauave o tatou tiga, ma na tauave o tatou faanoanoa,” faapea foi “le amioleaga o i tatou uma” (Isaia 53:4, 6). Sa tu o Ia i lo tatou tulaga, tuuina mai Lona soifua e totogi ai le sala o le agasala, ona manumalo lea i le oti e ala i Lona Toetu (tagai i le Mosaea 15:8–9). O le taulaga a Iesu Keriso sa o le “taulaga tele ma mulimuli; ioe, e le o se taulaga o se tagata, pe o se manu vaefa” ae nai lo o lena “o se taulaga e ao ina le gata ma faavavau” (Alema 34:10). O Ia o le faataunuuga o mea uma na faasino agai atu i ai taulaga anamua.
Mo lenei mafuaaga, ina ua faamaeaina Lana osigataulaga, sa Ia fetalai mai ai, “Ia outou le toe osia mai ia ia te au se taulaga i le faamaligiina o le toto; ioe o a outou taulaga … ia faauma ese. … Ma ia outou osi mai mo se taulaga ia te au le loto momomo ma le agaga salamo” (3 Nifae 9:19–20)
O lea la, a e tau i fuaitau i le Feagaiga Tuai e uiga i taulaga ma le falefetafa’i (pe mulimuli ane, o le malumalu)—ma o le a tele ia mea e te tau i ai—ia manatua o le faamoemoega autu lava o ia mea uma, o le faamalosia o lou faatuatua i le Mesia, o Iesu Keriso. Tau ina ia liliu atu lou loto ma lou mafaufau ia te Ia. Mafaufau loloto i mea na Ia faia e toe avatu ai oe i le afioaga o le Atua—ma mea o le a e faia e mulimuli ai ia te Ia.