Pikja droing blong Elisa i soem wokman blong hem ol wilkat wetem faea, © Review & Herald Publishing/oli karem laesens long goodsalt.com

4–10 Julae

2 King 2–7

“I Gat Wan Profet I Stap Long Isrel”

Taem yu stap ridim olgeta skripja, Tabu Spirit i save tekem i kam long tingting blong yu samfala sentens o fulap ves. Tingting blong raetemdaon from wanem ol skripja oli gat mining long yu.

Raetemdaon Ol Filing mo Tingting blong Yu

Stamba misin blong wan profet hem i blong tijim mo testifae long Sevya Jisas Kraes. Rekod blong yumi long saed blong profet Elisa, i no gat tumas tijing o testemoni. Wanem we rekod i gat, hem i ol merikel we Elisa i mekem, we i tekem tu we hem i mekem wan pikinini i girap bakegen long ded (luk long 2 King 4:18–37), i fidim fulap man wetem wan smol basket kaekae (luk long 2 King 4:42–44), mo i hilim wan we i gat leprosi (luk long 2 King 5:1–14). Mekem se, long wan saed yumi no gat toktok blong Elisa we i talem witnes blong hem abaot Kraes, be wanem we yumi gat, truaot long seves blong Elisa, i bigfala taem we Lod i bin soemaot paoa blong Hem blong givim laef, blong givim kaekae, mo paoa blong hilim man. Paoa we i kamaot olsem, i moa plante long laef blong yumi bitim we yumi luksave. Blong luk olgeta, i nidim blong yumi lukaotem merikel we Elisa i askem taem hem i prea long bihaf blong yangfala wokman ia: “Hae God. Plis yu openem ae blong man ya, blong hem i luk paoa blong yu” (2 King 6:17).

Blong moa infomesen abaot 2 King, luk long “King, books of” insaed long Bible Dictionary.

Ol Aedia blong Skripja Stadi blong Yuwan

2 King 2–6

God i save mekem ol merikel insaed long laef blong mi.

Ol merikel oli save helpem yumi blong winim ol hadtaem blong wol ia—long taem blong Elisa, wan graon we samting i no save gro long hem i nidim wota we i klin, mo wan akis we i lus i nid blong oli faenembak (luk long 2 King 2:19–22; 6:4–7). Be oli merikel oli tanem hat blong yumi i go long Lod mo i tijim yumi ol lesen long saed blong spirit. Taem yu stap ridim 2 King 2–6, tingting blong mekem wan lis blong ol merikel we yu faenem, mo tingting hevi long ol lesen long saed blong spirit we yu lanem aot long wanwan long olgeta. ?Wanem nao ol merikel oli tijim yu abaot Lod mo wanem Hem i save mekem long laef blong yu?

Luk tu long 2 Nifae 26:12–13; 27:23; Momon 9:7–21; Moronae 7:35–37; Donald L. Hallstrom, “Has the Day of Miracles Ceased?” Liahona, Nov. 2017, 88–90.

2 King 4:8–17; 7:1–16

Ol toktok blong Lod tru long ol profet blong Hem bae oli kamtru.

Olsem we oli rekodem long 2 King 4:8–17; 7:1–16, Lod i givim insperesen long Elisa blong profesae long ol samting we bae oli kam—ol samting we oli stap, from ol defren tingting blong ol man, we bae i no save hapen. Taem yu stap ridim ol ves ia, tingting long olsem wanem bae yu ansa long Lod tru long ol profet blong Hem tedei. ?Wanem nao ol tijing, ol profesi, o ol promes we yu harem long wan profet we i stap laef? ?Wanem nao yu stap mekem blong tekem aksen folem ol promes ia?

Luk tu long 3 Nifae 29:6.; Doktrin mo Ol Kavenan 1:37–38.

2 King 5

Sapos mi putum tingting blong mi i stap daon mo mi stap obei, bae Jisas Kraes i save hilim mi.

Samtaem hem i isi blong faenem wan mining blong yuwan long olgeta skripja taem we yu komperem ol samting blong wol wetem ol samting long saed blong spirit. Eksampol, taem yu stap ridim 2 King 5, maet yu wantem komperem leprosi blong Neman wetem wan jalenj long saed blong spirit we yu stap fesem. Olsem Neman, ating yu hop se Lod bae i mekem “wan strong samting” (ves 13) blong i helpem yu. ?Wanem nao, eksperiens blong Neman, i stap tijim yu? Long laef blong yu, ?wanem nao bae i semmak long simpol kaonsel ia blong “go swim … , blong bodi blong yu kam gud bakegen”?

Tekem not long wei we eksperiens blong Neman i tajem gud fet blong hem long God blong Isrel? (luk long ves 15). ?Wanem oli ol eksperiens blong yu we oli mekem fet blong yu long God i kam moa strong?

Luk tu long Luk 4:27; 1 Pita 5:5–7; Alma 37:3–7; Ita 12:27; L. Whitney Clayton, “Whatsoever He Saith unto You, Do It,” Liahona, May 2017, 97–99; “Naaman and Elisha” (video), ChurchofJesusChrist.org.

2 King 6:8–23

“Yu no fraet. Olgeta long saed blong yumi oli plante moa, i winim olgeta ia.”

?I bin gat wan taem we yu bin filim se namba long saed blong yu i smol mo yu bin fraet, mo yu stap askem yuwan, semmak olsem yang Elisa se: “?Olsem wanem nao bae yumi mekem?” (luk long 2 King 6:8–23). ?Wanem insperesen nao yu gat abaot ansa blong Elisa? ?Olsem wanem nao stori ia i jenisim wei we yu tingting mo filim abaot ol hadtaem blong yu, ol responsabiliti blong yu, o ol efot blong yu blong laef folem gospel?

Taem yu stap tingting hevi, tingting long ol toktok blong Presiden Henry B. Eyring: “Olsem wokman blong Elisa, i gat plante we oli stap wetem yu, bitim olgeta we oli go agens long yu. Sam long olgeta we oli stap wetem yu, bae yu no save luk olgeta wetem ae blong bodi blong yu. Bae Lod i karem yu antap, mo bae i gat sam taem we, bae Hem i singaotem ol narawan blong stanap wetem yu” (“O Ye That Embark,” Liahona, Nov. 2008, 58).

Luk tu long Ol Sam 121; Doktrin mo Ol Kavenan 84:88.

Ol Aedia blong Famli Skripja Stadi mo Haos Naet

2 King 2:1–14.Tingbaot ol pipol we oli luk Elisa i “pikimap” kot blong Elaeja (we i wan simbol blong koling blong hem olsem wan profet). ?Olsem wanem hemia i save jenisim wei we oli luk o folem seves blong Elisa? (Luk tu long 1 King 19:19.) Maet ol memba blong famli wanwan i werem “kot” mo testifae long ol wei we oli luk Lod i sapotem mo mekem olgeta we Lod i singaotem olgeta blong givim seves long Jos blong Hem oli kam strong moa.

2 King 4.Yu save invaetem ol memba blong famli i rid abaot wan long ol merikel ia long 2 King 4 (luk long ol ves 1–7, 14–17, 32–35, 38–41, 42–44) mo raetem wan saen blong helpem ol narafala memba blong famli i faenem wij merikel nao hem i stap traem blong talem. ?Wanem nao yumi lanem abaot Lod mo ol merikel blong Hem long japta ia? ?Wanem ol merikel—bigwan o smolwan—yumi luk long laef blong yumi?

2 King 5:1–15.Taem yu stap ridim ol ves ia mo tingting hevi long simpol samting we oli askem Neman blong i mekem, tingting long ol simpol samting we profet blong yumi i askem yumi blong mekem. ?Olsem wanem nao famli blong yumi i save folem ol kaonsel blong hem?

Famli blong yu i save wajem vidio blong “Naaman and Elisha” (ChurchofJesusChrist.org) o ridim “Elisa I Hilim Neman” (long Ol Stori long OlTesteman).

2 King 5:20–27.Olsem wanem nao Gehasi bae i lanem taem hem i ridim “Fasin blong Stap Ones mo Fasin blong Stap Strong mo Tru” insaed long Blong Ol Yut Oli Kam Strong? (pej 19). ?Olsem wanem nao fasin blong no stap ones i spolem yumi? ?Olsem wanem nao yumi kasem blesing taem yumi stap ones?

2 King 6:13–17.Ol memba blong famli oli glad blong droem wan pikja blong eksperiens blong Elisa mo wokman blong hem long ol ves ia. ?Olsem wanem ol ves ia oli helpem yumi taem yumi filim se yumi stap yumiwan o yumi lus?

Blong gat moa aedia blong stap tijim ol pikinini, luk long aotlaen blong wik ia insaed long Kam Folem Mi—Blong Praemeri.

Wan singsing: “Dearest Children, God Is Near You,” Hymns, no. 96.

Stap Kam Antap long Fasin blong Yumi blong Stap Tij

Askem ol kwestin. Ol kwestin we oli kam long ol pikinini, i minim se oli rere blong lanem samting. Sapos yu no save ol ansa long kwestin blong olgeta, lukaotem ol ansa ia wetem olgeta. (Luk long Teaching in the Savior’s Way, 25–26.)

Pikja droing blong Neman we i kam gud bakegen long leprosi, we i kam long Paul Mann