laj Eliseo naxk’uteb’ li kawaay re xam chiru xmoos

Xjalam-uuch laj Eliseo naq naxk’uteb’ li kawaay re xam chiru xmoos, © Review & Herald Publishing/licensed from goodsalt.com

4–10 julio

2 Reyes 2–7

“Wan jun profeet arin Israel”

Naq yookat chirilb’al ru li loq’laj hu, li Santil Musiq’ej naru tatxmusiq’a chixk’eeb’al reetal junaq ch’ol aatin malaj raqal. Naru taatz’iib’a k’a’ut naq ninqeb’ xwankil li raqal a’an choq’ aawe.

Tz’iib’a li nakak’oxla

Lix tz’aqal k’anjel jun profeet, a’an xk’utb’al ut xch’olob’ankil xyaalal li Kolonel Jesukristo. A’b’anan, li seraq’ chirix li profeet laj Eliseo ink’a’ mas na’aatinak chirix lix k’utum chi moko xch’olob’ahom. Wan b’an resil li ninqi sachb’a-ch’oolej kixb’aanu laj Eliseo, jo’ xwaklesinkil chi yo’yo jun li ch’ina al (chi’ilmanq 2 Reyes 4:18–37), xch’olaninkileb’ k’iila kristiaan rik’in b’ayaq ajwi’ li wa (chi’ilmanq 2 Reyes 4:42–44), ut xk’irtesinkil jun saqlep rix (chi’ilmanq 2 Reyes 5:1–14). Us ta moko tz’iib’anb’il ta resil li ch’olob’ank kixb’aanu laj Eliseo chirix li Kristo, wan resil, sa’ xk’anjel laj Eliseo, lix k’utb’esinkil lix wankilal li Qaawa’ re k’ehok yu’am, re ch’olanink, ut re k’irtesink. Neke’ux li sachb’a-ch’oolej a’in chi kok’ aj xsa’ sa’ li qayu’am us ta maare ink’a’ naqak’e reetal. Re xk’eeb’al reetaleb’, tento taqasik’ li sachb’a-ch’oolej li kixsik’ laj Eliseo naq kitijok choq’ re lix moos li yoo xxiw, “At Qaawa’, chate xsa’ li ru re naq taa’iloq” (2 Reyes 6:17).

Re xtzolb’al k’a’ru wan sa’ li hu 2 Reyes, chi’ilmanq “Reyes (eb’ li awa’b’ej)” sa’ li K’utul Raqal reheb’ li Loq’laj Hu.

reetalil li tzolok aajunes

Li na’leb’ re xtzolb’aleb’ li loq’laj hu aajunes

2 Reyes 2–6

Li Dios naru tixb’aanu li sachb’a-ch’oolej sa’ lin yu’am.

Eb’ li sachb’a-ch’oolej nokohe’xtenq’a chi numtaak sa’ xb’een li ch’a’ajkilal—sa’ xkutankil laj Eliseo, ki’ajman naq taachalq li hab’ sa’ jun chaqi ch’och’, ut ki’ajman naq taatawe’q jun li maal li sachenaq (chi’ilmanq 2 Reyes 2:19–22; 6:4–7). A’b’an eb’ li sachb’a-ch’oolej neke’xsutq’isi ajwi’ qach’ool rik’in li Qaawa’ ut neke’xk’ut li musiq’ejil na’leb’ chiqu. Naq nakawil 2 Reyes 2–6, maare taatz’iib’aheb’ li sachb’a-ch’oolej nakawil, ut taak’oxla li musiq’ejil na’leb’ nakatzol rik’in li junjunq. K’a’ru neke’xk’ut li sachb’a-ch’oolej a’in chawu chirix li Qaawa’ ut li naru naxb’aanu sa’ laa yu’am?

Chi’ilmanq ajwi’ 2 Nefi 26:12–13; 27:23; Mormon 9:7–21; Moroni 7:35–37; Donald L. Hallstrom, “Ma x’oso’ tab’i’ xkutankil li sachb’a-ch’oolej?” Jolomil ch’utub’aj-ib’ re octubre 2017.

2 Reyes 4:8–17; 7:1–16

Li aatin naxye li Qaawa’ reheb’ lix profeet taatz’aqloq ru.

Jo’ tz’iib’anb’il sa’ 2 Reyes 4:8–17; 7:1–16, li Qaawa’ kixmusiq’a laj Eliseo chixyeeb’al resil li k’a’ru taak’ulmanq—li k’a’ru k’oxlanb’il xb’aaneb’ li kristiaan naq maajo’q’e taak’ulmanq. Naq nakawileb’ ru li raqal a’in, k’oxla chan ru nakak’ul li raatin li Qaawa’ rik’in xtz’uumaleb’ re lix profeet sa’ li kutan a’in. K’a’ru li na’leb’, li profeetil aatin, ut li yeechi’ihom xawab’iheb’ li yo’yookil profeet chixyeeb’al? K’a’ru yookat chixb’aanunkil re xyu’aminkileb’ li aatin a’an rik’in paab’aal?

Chi’ilmanq ajwi’ 3 Nefi 29:6; Tzol’leb’ ut Sumwank 1:37–38.

2 Reyes 5

Wi nintuulanob’resi wib’ ut nin’ab’in, li Jesukristo naru tinixk’irtesi.

Wan naq naru xtawb’al li na’leb’ choq’ qe sa’eb’ li loq’laj hu naq naqajuntaq’eeta li ruchich’och’il k’a’q re ru sa’ li seraq’ rik’in li musiq’ejil k’a’aq re ru. Naq yookat chirilb’al 2 Reyes 5, naru taajuntaq’eeta li saqlep rix re laj Nahaman rik’in jun musiq’ejil ch’a’ajkilal yookat chixnumsinkil. Jo’ laj Nahaman, maare xawaj naq li Qaawa’ tixb’aanu li k’a’ru q’axal nim (chi’ilmanq raqal 13) re aatenq’ankil. K’a’ru naxk’ut lix numsihom laj Nahaman chawu? Sa’ laa yu’am, k’a’ru naru taajuntaq’eeta rik’in li na’leb’ “Ayu chi ch’ajok ut tatch’ajob’resiiq”?

K’e reetal chan ru naq kik’i xpaab’aal laj Nahaman chirix li Dios re Israel (chi’ilmanq li raqal 15). K’a’ru ak xak’ul li xkawob’resi laa paab’aal chirix li Dios?

Chi’ilmanq ajwi’ Lukas 4:27; 1 Pedro 5:5–7; Alma 37:3–7; Eter 12:27; L. Whitney Clayton, “B’aanuhomaq li k’a’ru tixye eere,” Jolomil ch’utub’aj-ib’ re abril 2017; “Naamán y Eliseo” (video), ChurchofJesusChrist.org.

2 Reyes 6:8–23

“Jwal naab’aleb’ li wankeb’ qik’in laa’o chiruheb’ a’an.”

Ma xaweek’a jun sutaq naq naab’aleb’ laa ch’a’ajkilal ut xatxuwak, xak’oxla jo’ lix moos laj Eliseo, “K’a’ru taqab’aanu?” (chi’ilmanq 2 Reyes 6:8–23). K’a’ru naxwaklesi aach’ool sa’ lix sumehom laj Eliseo? Chan ru naq li seraq’ a’in naxjal li nakak’oxla ut nakaweek’a chirixeb’ laa ch’a’ajkilal, laa teneb’ankil, malaj lix yalb’al aaq’e chixyu’aminkil li evangelio?

Naq yookat chixk’oxlankil a’in, k’oxla ajwi’ li raatin li Awa’b’ej Henry B. Eyring: “Jo’ lix moos laj Eliseo, k’a’jo’ xk’ihaleb’ li neke’wan aawik’in chiruheb’ li neke’xsik’ aaramb’al. Wankeb’ aawik’in li ani moko ilb’ileb’ ta xb’aan xnaq’eb’ ru li winq. Li Qaawa’ tatxwaklesi, ut wan naq tixb’aanu rik’in xb’oqb’al ani li taaxaqliiq chak’atq” (“Oh vosotros que os embarcáis ,” Liahona, noviembre 2008, 58).).

Chi’ilmanq ajwi’ Salmos 121; Tzol’leb’ ut Sumwank 84:88.

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

2 Reyes 2:1–14.K’oxlaheb’ li kristiaan li ke’ril naq laj Eliseo “kixxok” lix b’aatal laj Elias (a’an reetalil lix b’oqb’al jo’ profeet). Chan ru naq a’in maare kixjal li ke’xk’oxla chirix lix k’anjel laj Eliseo? (Chi’ilmanq ajwi’ 1 Reyes 19:19.) Eb’ li komon sa’ laa junkab’al naru te’xk’e jun “b’atb’al” chirixeb’ ut te’xye chan ru xe’ril li Qaawa’ chixtenq’ankil ut chixkawob’resinkileb’ li ani neke’k’anjelak sa’ lix Iglees.

2 Reyes 4.Naru taapatz’ re laa junkab’al naq te’ril ru resil jun reheb’ li sachb’a-ch’oolej sa’ 2 Reyes 4 (che’ilmanq li raqal 1–7, 14–17, 32–35, 38–41, 42–44) ut te’xtz’iib’a jun na’leb’ li tixtenq’aheb’ li komon sa’ li junkab’al chixq’ehinkil k’a’ru li sachb’a-ch’oolej a’an. K’a’ru naqatzol sa’ li ch’ol a’in chirix li Qaawa’ ut eb’ lix sachb’a-ch’oolej? Ma wankeb’ li sachb’a-ch’oolej—li ninq malaj li kok’—li ak xqil sa’ li qayu’am?

2 Reyes 5:1–15.Naq nekerileb’ ru li raqal a’in ut nekek’oxla li kok’ na’leb’ patz’b’il re laj Nahaman naq tixb’aanu, k’oxla li kok’ na’leb’ naxpatz’ li profeet naq taqab’aanu. K’a’ru tixb’aanu li qajunkab’al re xtaaqenkil lix na’leb’?

Jo’ junkab’al, naru teeril ajwi’ li video “Naamán y Eliseo” (ChurchofJesusChrist.org) malaj “El profeta Eliseo: Tres milagros”, “El Tercer Milagro” (sa’ Relatos del Antiguo Testamento).

2 Reyes 5:20–27.K’a’ru li na’leb’ kixtaw raj laj Kejasi wi ta kiril ru “Xmaak’a’il li b’alaq’ ut anchalil ch’oolej” sa’ Choq’ re Xkawilaleb’ li Saaj? (perel 19). Chan ru naq li b’alaq’ink nokoxrahob’tesi? Chan ru noko’osob’tesiik naq maak’a’ li qab’alaq’?

2 Reyes 6:13–17.Maare taawulaq chiru laa junkab’al xyiib’ankil xjalam-uuch li kixk’ul laj Eliseo ut lix moos sa’eb’ li raqal a’in. Chan ru nokohe’xtenq’a li raqal a’in naq qajunes wanko malaj naq nakub’e qach’ool?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Ex kok’al, li Dios texril,” Eb’ li B’ich, 51.

Xkawresinkil qib’ jo’ aj k’utunel

Kanab’eb’ chi patz’ok. Wi wankeb’ xpatz’om li kok’al, a’an naraj naxye naq neke’raj tzolok. Wi ink’a’ nakanaw xsumenkileb’ xpatz’om, sik’omaq xsumenkil sa’ komonil. (Chi’ilmanq Li k’utuk jo’ li Kolonel, 25–26.)

laj Nahaman na’atink sa’ li nima’

Xjalam-uuch laj Nahaman naq nak’irtesiik, xb’aan laj Paul Mann