Ata tusi o Elisaia o loo faaali atu i ana auauna ia kariota afi, © Review & Herald Publishing/licensed from goodsalt.com

4–10 Iulai

2 Tupu 2–7

“O Loo ia Isaraelu le Perofeta”

A o e faitau i mau, e mafai ona aumaia e le Agaga ia te oe ni fasifuaitau po o ni fuaitau patino. Mafaufau e tusi i lalo pe aisea e taua ai na fuaitau ia te oe.

Tusifaamaumau Ou Lagona Uunai

O le misiona autu a se perofeta o le aoao atu ma le molimau atu e uiga i le Faaola o Iesu Keriso. Ae peitai, o a tatou faamaumauga o le perofeta o Elisaia, e le o tele ni ana aoaoga po o ni molimauga o loo aofia ai. Ae o mea o loo aofia ai i faamaumauga o vavega na faia e Elisaia, e aofia ai le faatuina mai o se tamaitiiti mai le oti (tagai i le 2 Tupu 4:18–37), fafagaina o se motu o tagata i ni meaai itiiti (tagai i le 2 Tupu 4:42–44), ma le faamaloloina o se lepela (tagai i le 2 Tupu 5:1–14). E ui lava la ina le o ia i tatou ni upu a Elisaia o tuuina atu ai le molimau ia Keriso, ae ua ia i tatou, i le auaunaga atoa a Elisaia, ni faaaliaina mamana o le tuuina mai e le Alii o le ola, fafagaina, ma le mana faamalolo. O faaaliaina faapena e sili atu le tele i o tatou olaga nai lo o mea tatou te iloa i ni isi o taimi. Ina ia iloa na faaaliaina, e tatau ona tatou sailia le vavega na sailia e Elisaia ina o tatalo o ia e fai ma sui o lana auauna talavou lotomata’u, “Ieova e, ia e faapupula i ona mata ina ia na iloa” (2 Tupu 6:17).

Mo nisi faamatalaga e uiga ia i le 2 Tupu, tagai i le “Kings, books of” i le Bible Dictionary.

Manatu mo Suesuega Faaletagata Lava Ia o Tusitusiga Paia

2 Tupu 2–6

E mafai e le Atua ona galueaina vavega i lo’u olaga.

E masani ona fesoasoani vavega tatou te faatoilalo ai faigata o le olaga nei—i le taimi o Elisaia, o se fanua lafulafua na manaomia ai se vai mama ma se to’i na leiloa sa manaomia ona toe maua mai (tagai i le 2 Tupu 2:19–22; 6:4–7). Ae o vavega e liliu ai foi o tatou loto i le Alii ma aoao mai ai ia i tatou ni lesona faaleagaga. Ao e faitau i le 2 Tupu 2–6, mafaufau e fai se lisi o vavega e te maua, ma mafaufau loloto i lesona faaleagaga e mafai ona e aoao mai ai i na vavega taitasi. O a ni mea ua aoao mai e nei vavega ia te oe e uiga i le Alii ma mea e mafai ona Ia faia i lou olaga?

Tagai foi i le 2 Nifae 26:12–13; 27:23; Mamona 9:7–21; Moronae 7:35–37; Donald L. Hallstrom, “Pe Ua Uma Ea le Aso o Vavega?” Liahona, Nov. 2017, 88–90.

2 Tupu 4:8–17; 7:1–16

O le a faataunuuina lava afioga a le Alii e ala mai i Ana perofeta.

E pei ona tusifaamaumauina i le 2 Tupu 4:8–17; 7:1–16, na musuia e le Alii ia Elisaia e vavalo atu i mea o le a oo mai—o mea na foliga mai, mai le vaaiga a isi, e le ono tutupu. A o e suesueina nei fuaiupu, mafaufau pe o faapefea ona e tali atu i le upu a le Alii e ala i Ana perofeta i aso nei. O a ni aoaoga, valoaga, po o folafolaga ua e faalogo i ai mai perofeta soifua? O le a se mea o loo e faia e galue ai i le faatuatua i na folafolaga?

Tagai foi i le 2 Nifae 29:6; Mataupu Faavae ma Feagaiga 1:37–38.

2 Tupu 5

Afai ou te lotomaualalo ma usiusitai, e mafai ona faamalolo a’u e le Alii.

O ni isi taimi e faigofie ai ona maua le uiga patino i tusitusiga paia pe a e faatusatusaina mea faaletino i se tala ma mea faaleagaga. Mo se faataitaiga, ao faitau le 2 Tupu 5, atonu e te faatusatusaina le lepela o Naamanu ma se luitau faaleagaga o loo feagai ma oe. E pei o Naamanu, atonu na e faamoemoe o le a “faia [e le Alii] se mea tele” (fuaiupu 13) e fesoasoani ai ia te oe. O le a se mea ua aoao atu e le aafiaga a Naamanu ia te oe? I lou olaga, o le a se mea e tutusa ma le mulimuli i se fautuaga faatauvaa e “taele ma ia mama ai”?

Ia maitau pe na faapefea e le aafiaga a Naamanu ona aafia ai lona faatuatua i le Atua o Isaraelu (tagai i le fuaiupu 15). O a aafiaga na faamalosia ai lou faatuatua i le Atua?

Tagai foi i le Luka 4:27; 1 Peteru 5:5–7; Alema 37:3–7; Eteru 12:27; L. Whitney Clayton, “Soo Se Mea Lava E Fai Mai Ai O Ia Ia Te Outou, Ia Outou Faia,” Liahona, Me 2017, 97–99; “Naaman and Elisha” (vitio), ChurchofJesusChrist.org.

2 Tupu 6:8–23

“E toatele ua ia te i tatou i e ua ia te i latou.”

Na i ai se taimi e lagona ai le tu toatasi na’o oe ma fefe, ma mafaufau e pei ona sa faia e le auauna talavou a Elisaia, “Pe faapefea se mea tatou te fai a’i?” (tagai i le 2 Tupu 6:8–23). O le a se mea ua musuia ai oe i le tali a Elisaia? E faapefea ona suia e lenei tali le ala e te mafaufau ma manatu ai e uiga i ou tofotofoga, ou tiutetauave, po o au taumafaiga e ola i le talalelei?

Ao e mafaufau loloto, mafaufau i upu a Peresitene Henry B. Eyring: “E pei foi o lena auauna a Elisaia, e toatele atu o loo faatasi ma oe nai lo i latou e mafai ona e vaaia o loo tetee ia te oe. O nisi o loo faatasi ma oe e le mafai e mata faaletino ona vaaia. O le a sapasapaia oe e le Alii ma e i ai taimi, o le a Ia valaauina foi isi e tutu faatasi ma oe” (“O Outou o ē O Atu,” Liahona, Nov. 2008, 58).

Tagai foi i le Salamo 121; Mataupu Faavae ma Feagaiga 84:88.

Manatu mo Suesuega Faaleaiga o Tusitusiga Paia ma Afiafi Faaleaiga

2 Tupu 5:1–14.Mafaufau i tagata o e na vaai ia Elisaia “ua ofu” i le ofutele o Elia (po o le ofu talaloa—o se faailoga o lona valaauga faaperofeta). E ono faapefea e lenei mea ona aafia ai le ala latou te tali atu ai i le auaunaga a Elisaia? (Tagai foi i le 2 Tupu 19:19.) Atonu e mafai e tagata o le aiga ona auauai e ofu se “ofu tele” ma molimau atu i auala ua latou vaaia ai le lagolago a le Alii ma faamalosia i latou ua valaauina e auauna i Lana Ekalesia.

2 Tupu 4.E mafai ona e valaaulia tagata o le aiga e faitau e uiga i se vavega se tasi i le 2 Tupu 4 (tagai i fuaiupu 1–7, 14–17, 32–35, 38–41, 42–44) ma tusi se faaiteite e fesoasoani ai i isi tagata o le aiga e mate po o le fea le vavega sa faamatalaina e le tagata. O a ni mea ua tatou iloa e uiga i le Alii ma Ana vavega mai lenei mataupu? O a ni vavega—tetele pe laiti—ua tatou vaaia i o tatou olaga?

2 Tupu 5:1–15.Ao e faitau i nei fuaiupu ma mafaufau loloto i le mea faatauvaa na fai atu ia Naamanu e fai, mafaufau i ni mea faigofie ua saunoa mai lo tatou perofeta tatou te faia. E mafai faapefea ona mulimuli lelei lo tatou aiga i lana fautuaga?

E mafai foi ona matamata lou aiga i le vitio “Naaman and Elisha” (ChurchofJesusChrist.org) pe faitau i le “Elisha Heals Naaman” (i le Old Testament Stories).

2 Tupu 5:20–27.Mata e faapefea ona manuia Gehazi mai le faitauina o le “Faamaoni ma le Amiosao” i le Mo Le Malosi o le Autalavou? (itulau 19). E faapefea ona faaleaga i tatou e le le faamaoni? Na faapefea ona faamanuiaina i tatou ona o le faamaoni?

2 Tupu 6:13–17.Atonu e fiafia tagata o le aiga e tusi se ata o le aafiaga a Elisaia ma lana auauna o loo faamatalaina i nei fuaiupu. E mafai faapefea ona fesoasoani nei fuaiupu ia i tatou pe a tatou lagonaina le tuuatoatasi po o le lofituina?

Mo nisi manatu mo le aoaoina o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Fanau, ua Leoleo mai le Atua,” Viiga, nu. 180.

Faaleleia o Lo Tatou Aoao Atu

Uunaia fesili. O fesili mai tamaiti o se faailoga lea ua latou sauni e aoao. Afai e te le iloa tali i a latou fesili, ia outou su’ea faatasi ma i latou ia tali. (Tagai i le Aoao Atu i le Ala o le Faaola, 25–26.)

Atatusi o Naamanu ua faamaloloina i le lepela, na saunia e Paul Mann