« Te mau mana’o e tāpe’a noa i roto i te ferurira’a : ‘E parau Iesu i tō ’Īserā’ela tā’āto’a : « Mai haere… i ta’u fare »’ », Mai, pe’e mai—nō te ta’ata hō’ē ’e te ’utuāfare : Faufa’a Tahito 2022 (2021)

Te mau mana’o e tāpe’a noa i roto i te ferurira’a

« E parau Iesu i tō ’Īserā’ela tā’āto’a : ‘Mai haere… i ta’u fare’ »

I roto i te medebara nō Sinai, ’ua ha’aputuputu Mose i te mau tamari’i a ’Īserā’ela i raro i te mou’a. I reira tō te Fatu fa’a’itera’a ē, ’ua hina’aro ’oia e fa’ariro i teie pupu ta’ata tei fa’aorahia i te tītīra’a ’ei nūna’a pūai. ’Ua nā ’ō ’oia : « E riro ā ’outou ’ei bāsileia tahu’a ana’e tā’u, ’ei nūna’a mo’a » (Exodo 19:6). ’Ua parau fafau ’oia ē, e riro rātou i te ’ūa’a ’e i te manuia, noa atu ā e fa’a’atihia rātou e te mau ’enemi rahi a’e ’e te pūa’i a’e (hi’o Deuteronomi 28:1–14).

E tupu te reira mau mea ato’a e ’ere rā nō te naho’a rahi o te mau tamariʼi a ’Īserā’ela ’aore rā tō rātou pūai ’aore rā tō rātou ’aravihi. E tupu ho’i te reira, tē nā ’ō mai ra te Fatu : « ’Ia fa’aro’o mau mai ’outou i ta’u reo, ’e ’ia ha’apa’o māite i tā’u ra faufa’a » (Exodo 19:5). Nā te mana o te Atua, e ’ere tō rātou iho, ’o tē ha’apūai ia rātou.

’Aita rā te mau tamariʼi a ’Īserā’ela i ha’apa’o noa i tōna reo, ē i muri iho, ’ua fa’aea roa i te ha’apa’o i tāna fafaura’a. E rave rahi tei ha’amata i te ha’amori i te tahi atu atua ’ē ’e ’ua rave roa mai i te mau peu nō te mau ta’ere ’ati a’e ia rātou. ’Ua pāto’i rātou i te mea mau i fa’ariro ia rātou ’ei nūna’a, ta’a ’ē i te tahi noa atu nūna’a—tō rātou tā’amura’a fafaura’a i te Fatu. Nō te mea ’aita te mana o te Atua nō te pāruru ia rātou (hi’o 2 Te mau Ari’i 17:6–7), ’aita ïa hō’ē mea nō te tāpe’a i tō rātou mau ’enemi (hi’o 2 Paraleipomeno 36:12–20).

Te ha’apurarara’a

E rave rahi taime mai te matahiti 735 ē 720 HM, ’ua tomo te mau ’āti Asuria i roto i te bāsileia o ’Īserā’ela i te pae apato’erau, te fenua o nā ’ōpū e ’ahuru o nā 12, ’e ’ua hōpoi tītī rātou e rave rahi tauasini ’āti ’Īserā’ela i te mau fenua rau o te hau ’ēmēpera Asuria (hi’o 2 Te mau Ari’i 17:1–7).¹ ’Ua parauhia teie mau ’āti ’Īserā’ela ’ei « mau ’ōpu mo’e », te hō’ē tumu, nō te mea ’ua rave-’ē-hia rātou i tō rātou fenua ’āi’a ’e ’ua ha’apurarahia nā roto i te mau nūna’a. E aura’a hōhonu atu ā rā nō tō rātou mo’era’a : i te roara’a o te tau ’ua mo’e tō rātou hīro’a ’ei nūna’a fafau o te Atua.

Nō te mea e mau taime ’ua rahi a’e te parau ti’a o te bāsileia o Iuda i te pae apato’a, i tō te bāsileia apato’erau, ’ua vai maoro a’e rātou.² I te hope’a rā, ’ua fāriu ’ē ato’a te ta’ata i reira i te Fatu. ’Ua ’aro te mau ’āti Asuria ia rātou ’e ’ua haru i te rahira’a o te bāsileia apato’a ; ’o Ierusalema ana’e tei fa’ahereherehia nā roto i te semeio (hi’o 2 Te mau Ari’i 19 ; Isaia 10:12–13). I muri a’e, mai te matahiti 597 ē 580 HM, ’ua ha’amou te mau ’āti Babulonia ia Ierusalema, ’e tae noa atu i te hiero, ’e ’ua rave tītī atu e rave rahi ta’ata o te ’oire (hi’o 2 Te mau Ari’i 24–25 ; 2 Paraleipomeno 36 ; Ieremia 39 ; 52). Fātata 70 matahiti i muri mai, ’ua fa’ati’ahia te tahi toe’a nō Iuda ’ia ho’i i Ierusalema ’e ’ia patu fa’ahou ā i te hiero. E rave rahi rā tei fa’aea i Babulonia.³

’A ma’iri noa ai te mau u’i, ’ua « ha’apuehu[hia te mau tamariʼi a ’Īserā’ela nō te mau ’ōpū ato’a] mai tā te pūāhiohio ra, i roto i te mau fenua ato’a ’aore rātou i ’ite ra » (Zekaria 7:14 ; hi’o ato’a Amosa 9:8–9). Tē vai ra tei ’āfa’i-’ē-hia e te Fatu i te tahi atu mau fenua (2 Nephi 1:1–5 ; Omoni 1:15–16). Tē vai ra vetahi tei fa’aru’e ia ’Īserā’ela ’eiaha rātou ’ia haruhia (hi’o 2 Te mau Ari’i 25:22–26 ; Ieremia 42:13–19 ; 43:1–7) ’aore rā nō te tahi tumu poritita.⁴

Tē parau nei tātou i te reira mau ’ohipa i tupu te ha’apurarara’a o ’Īserā’ela. E rave rahi ho’i tumu e mea faufa’a ’ia ’ite i te parau nō te ha’apurarara’a. Te hō’ē, nō te mea ïa e tumu parau rahi te reira nō te Faufa’a Tahito : E rave rahi peropheta nō te Faufa’a Tahito tei ’ite i tō rātou topatopara’a pae vārua tāviriviri i tupu ai te ha’apurarara’a o ’Īserā’ela. ’Ua ’ite ātea rātou i te reira ha’apurarara’a ’e ’ua fa’aara ho’i nō ni’a i te reira, ’e tē vai ato’a ra tei ora roa i te reira.⁵ E mea maita’i roa ’ia ha’amana’o i te reira ’a tai’o ai i te mau buka nō Isaia, nō Ieremia, nō Amosa, ’e te tahi ato’a mau buka e rave rahi i te pae hope’a o te Faufa’a Tahito. ’A vai noa ai te reira i te ferurira’a, ’ia tai’o ’outou i tā rātou mau tohura’a nō ni’a ia Asuria ’e Babulonia, nō ni’a i te ha’amorira’a ’īdolo ’e te tītīra’a, nō ni’a i tō rātou vai-ano-ra’a ’e te fa’aho’i-fa’ahou-ra’a i muri iho, e ’ite ’outou e aha tā rātou e paraparau ra.

Nā te māramaramara’a i te ha’apurarara’ahia ’o ’Īserā’ela e tauturu i te māramarama maita’i i te Buka a Moromona », inaha ho’i e pāpa’a parau te Buka a Moromona nō te hō’ē ’āma’a nō ’Īserā’ela i purara (1 Nephi 15:12). E ha’amata te reira pāpa’a parau ma te ’utuāfare o Lehi tei horo ’ē i te fenua ra o Ierusalema, i te mau matahiti 600 HM, nā mua noa a’e te mau ’āti Babulonia i tama’i ia rātou. ’O Lehi te hō’ē o te reira mau peropheta tei tohu nō ni’a i te ha’apurarara’a o ’Īserā’ela.⁶ ’E ’ua tauturu tōna ’utuāfare i te fa’atupura’a i te reira tohura’a, ma te ’āfa’i i tā rātou ’āma’a nō te ’utuāfare o ’Īsera’ela e tanu i te tahi atu vāhi o te ao, i te mau Amerika.

te fa’aru’era’a te ta’ata i te ’oire tē pa’apa’a ra — The Destruction of Jerusalem [Te ha’amoura’ahia Ierusalema e Nebuzaradana, nā William Brassey Hole, © Providence Collection/licensed nā goodsalt.com

Te ha’aputuputura’a

Terā rā te ha’apurarara’a o ’Īserā’ela, ’o te ’āfara’a noa ïa o te ’ā’amu. ’Aite te Fatu e ha’amo’e nei i tōna mau ta’ata, e’ita ato’a ’oia e fa’aru’e roa ia rātou, noa atu ā ’ua fa’aru’e mai rātou iāna. Te mau tohura’a e rave rahi ato’a e ha’apurarahia ’o ’Īserā’ela, ’ua ’āpe’ehia ïa e te mau tohura’a e rave rahi e ha’aputuputu te Atua ia rātou, ’ia tae i te hō’ē mahana.⁷

Terā mahana ra, ’o teie ïa mahana. ’Ua ha’amata a’ena te ha’aputuputura’a. I te matahiti 1836, e rave rahi tauasini matahiti i muri mai i tōna ha’aputuputura’a ia ’Īserā’ela i raro i te mou’a ra Sinai, ’ua fā Mose i roto i te hiero nō Kirtland nō te hōro’a ia Iosepha i « te mau tāviri nō te ha’aputuputura’a o ’Īserā’ela mai te nā tufa’a e maha o te ao nei » (Te Parau Ha’api’ira’a ’e te mau Parau Fafau 110:11). I teienei, i raro a’e i te fa’aterera’a a te feiā e mau nei i teie mau tāviri, tē ha’aputuputuhia nei te mau ’ōpū o ’Īserā’ela nā te mau fenua ato’a i reira te mau tāvini a te Fatu e nehenehe e haere.

’Ua parau te peresideni Russell M. Nelson nō teie ha’aputuputura’a, « te ’ohipa faufa’a roa a’e ’o tē tupu nei i ni’a i te fenua i teie mahana. ʼAita e ʼohipa ʼē atu e faʼa’auhia i te rahi, ʼaita e ʼohipa ʼē atu e faʼa’auhia i te faufaʼa rahi, ʼaita e ʼohipa ʼē atu e faʼa’auhia i te hanahana. ’E mai te mea e māʼiti ʼoutou, mai te mea e hinaʼaro ʼoutou, e nehenehe ʼoutou ʼia riro ʼei tufaʼa faufaʼa rahi nō te reira ».⁸

Nāhea ’outou e nā reira ? E aha te aura’a te ha’aputuputura’a o ’Īserā’ela ? ’O te fa’aho’i-fahou-ra’a ānei i nā ’ōpū e ’ahuru ma piti i te fenua tā rātou i noho na i muta’a ra ? Tōna tanora’a, e aura’a rahi a’e i te reira, e aura’a mure ’ore a’e. Mai tā te peresideni Nelson i fa’ata’a :

ʼIa paraparau anaʼe tātou i te parau nō te haʼaputuputuraʼa, tē parau nei tātou i teie parau mau faufaʼa rahi : E tiʼa i te mau tamariʼi atoʼa a tō tātou Metua i te Ao ra, i nā pae e piti o te pāruru, ʼia faʼaroʼo i te poroʼi nō te ʼevanelia a Iesu Mesia tei faʼahoʼihia mai…

« I te mau taime atoʼa e rave ʼoutou i te tahi mea ʼo tē tauturu i te mau taʼata atoʼa—i nā pae e piti o te pāruru—ʼia rave i te mau fafauraʼa ʼe te Atua ʼe ’ia fāriʼi i tō rātou mau ʼōroʼa faufaʼa rahi nō te bāpetizoraʼa ʼe te mau ʼōroʼa o te hiero, tē tauturu nei ïa ʼoutou i te haʼaputuputura’a ia ’Īserāʼela. Mai te reira te ʼōhie ».⁹

E tupu te reira mai tā Isaia i parau ē, « tāta’itahihia » (Isaia 27:12) ’aore rā mai tā Ieremia i tohu ē, « tāta’ihō’ē… i tō te ’oire hō’ē, ’e tāta’ipiti ho’i i tō te ’ōpū hō’ē » (Ieremia 3:14).

Te ha’aputuputura’a ia ’Īserā’ela, te aura’a ra, e fa’aho’i i te mau tamari’i a te Atua iāna ra. Te aura’a ra, e fa’aho’i fa’ahou ia rātou i tō rātou tā’amura’a fafaura’a ’e ana. Te aura’a ra, e fa’ati’a fa’ahou ā i te « nūna’a mo’a » tāna i parau e fa’ati’a i muta’a roa ra (Exodo 19:6).

Ho’i mai

’Ei ta’ata ha’apa’o fafaura’a, tei roto ’outou i te ’utuāfare o ’Īserā’ela.¹⁰ ’Ua ha’aputuputuhia ’outou, ’e e ta’ata ha’aputuputu ’outou. Tē tāpae ra te ’ā’amu ’ana’anatae rahi o te mau tenetere tei ha’amata ma te fafaura’a i rotopū i te Atua ’e Aberahama i tōna taime rahi roa ’ino, ’e e ta’ata hōpoi’a rahi ’outou i roto i te reira. I teie nei te taime « e poro mai Iesu ma te parau ‘ho’i mai’ ».¹¹

Teie te poro’i a te feiā ha’aputuputu : ’A ho’i mai i te fafaura’a. ’A ho’i mai i Ziona. ’A ho’i mai ia Iesu Mesia, tei Mo’a nō Iseraela, ’e nāna e fa’aho’i ia ’outou i te fare, i te Atua ra, tō ’outou Metua.