tē pure ra Esetera

Esetera [Esetera], nā James Ioaneson

25–31 nō Tiurai

Esetera

« ’O te mea teie i noa’a ai ia ’oe te hau i teie nei ’anotau »

’A tai’o ai ’outou i te Esetera, ’a ’imi i te fa’aurura’a a te Vārua e tano nō ’outou, ’e ’a pāpa’i i te mau mana’o e tae mai.

Pāpa’i i te mau mana’o e tae mai

E rave rahi ’ohipa i tupu i roto i te buka a Esetera e au ē e mea tano noa ’aore rā e mea hape noa. Nāhea ato’a atu pa’i e parau i teie mea ē, ’ua riro mai te hō’ē tamāhine ’āti Iuda ’e te ’ōtare ho’i ’ei ari’i vahine nō Peresia, i te taime tano mau nō te fa’aora i tōna mau ta’ata i te ha’amoura’a ? Nāhea ato’a pa’i e parau i te mea ē, i fa’aro’oro’o tōna tua’ane fēti’i ’o Moredekai i te ’ōpuara’a e ha’apohe i te ari’i ? E ’ohipa hape noa ānei, ’aore rā e tuha’a nō te hō’ē fa’anahora’a hanahana ? ’Ua parau Elder Ronald A. Rasband : « Te mea e hi’ohia ’ei ’ohipa hape noa atu, tōna vaira’a mau, e ’ohipa ha’apa’ohia ïa e te Metua here i te Ao ra… Tei roto te Fatu i te mau tuha’a na’ina’i o tō tātou orara’a » (« ’Ei ’ōpuara’a hanahana », Liahona, Novema 2017, 56). E’ita paha tātou e ’ite tāmau noa i te fa’aurura’a a te Fatu i roto i teie « mau tuha’a na’ina’i ». Tē ha’api’i nei rā tātou i roto i te ’ohipa i tupu nō Esetera ē, e ti’a iāna ’ia arata’i i tō tātou ’ē’a ’e ’ia fa’aineine ho’i ia tātou nō « teie nei ’anotau » (Esetera 4:14) nō te rirora’a ’ei mauha’a i roto i tōna rima nō te fa’atupu i tāna mau ’ōpuara’a.

Nō te hō’ē hi’ora’a rere ā manu nō te buka a Esetera, hi’o « Esther, book of » i roto i te Bible Dictionary (Fa’atoro parau nō te Bibilia).

ītona tuatāpapara’a a te ta’ata hō’ē

Mau mana’o nō te tuatāpapara’a pāpa’ira’a mo’a a te ta’ata hō’ē

Esetera

E ti’a i te Fatu ’ia fa’ariro iā’u ’ei mauha’a nō te ha’amaita’i ia vetahi ’ē.

’Ua ha’api’i te tuahine Anne C. Pingree : « Te rirora’a ’ei mauha’a i roto i te rima o te Fatu, e faufa’a rahi roa ïa ’e e hōpoi’a mo’a ho’i. Noa atu ā te vāhi e ora nei tātou, noa atu ā te vaira’a, noa atu ā ’ua fa’aipoipo ānei ’aore rā ’aita, noa atu ā te matahiti, ’ua hina’aro te Fatu ia tātou tāta’itahi nō te rave i tā [tātou] tuha’a hō’ē roa i roto i te patura’a i tōna bāsileia i teie tau tu’ura’a hope’a nei » (« Knowing the Lord’s Will for You », Liahona, Nov. 2005, 112).

’A tai’o ai ’oe i te ’ā’amu nō Esetera, ’a feruri nāhea e tano ai teie fa’ahitira’a parau i ni’a iāna. ’A hi’o i te mau rāve’a te Fatu i fa’ati’a ai iāna ’ia fa’aora i te mau ’āti Iuda (hi’o ’ei hi’ora’a, Esetera 2:21–23; 3:10–14; 4:14–16). I muri iho ’a feruri nāhea ’oia i te arata’ira’a i tō ’oe orara’a ’e ’ua noa’a atu ra ia ’oe ’ia ha’amaita’i ia vetahi ’ē. E aha te tahi mau vaira’a ’aore rā te tahi mau tā’amura’a tā ’oe e mana’o ra nāna i arata’i i te reira « i teie nei ’anotau » ? (Esetera 4:14). Mai te mea e ha’amaita’ira’a patereareha tā ’oe, e nehenehe e tai’o i te reira nō te ha’api’i rahi atu ā nō ni’a i te ’ohipa a te Fatu nō ’oe.

Esetera 3; 5:9–14; 7

E arata’i te te’ote’o ’e te riri i te hi’ara’a.

I roto i te buka a Esetera, e noa’a mai te ha’api’ira’a mai roto i te ha’apa’o maita’i o Esetera ’e Moredekai ’e mai roto ato’a i te te’ote’o ’e te riri o Hamana. ’A tai’o ai ’oe i te Esetera 3; 5:9–14, e nehenehe e tāpa’opa’o i te mana’o o Hamana, tāna mau parau ’e tāna mau ’ohipa. E aha tā te reira e parau nei nō ni’a iāna ’e nō ni’a i tōna mau hina’aro ? E aha te mau utu’a tāna i fa’aruru atu ? (hi’o Esetera 7). ’Ia tai’o ’oe i te parau nō Hamana e puta mai paha te mana’o e hi’opo’a i te mau mea e tūra’i nei i tō ’oe mau mana’o ’e tā ’oe mau ’ohipa. ’Ua puta ānei te tahi mana’o e rave i te tahi mau tauira’a ? Nāhea ’oe i te fāriu i ni’a i te Metua i te Ao ra nō te tauturu ?

Hi’o ato’a Maseli 16:32; Alama 5:28.

Esetera 3–4; 5:2–3; 8:11–12

Tē fa’a’ite nei te ha’apaera’a mā’a i tō’u vaira’a i raro a’e i te Fatu.

’A hi’o maita’i na i te mau mea i ha’apae ai Esetera ’e te toe’a o te mau ’āti Iuda i te mā’a (hi’o Esetera 3:13; 4:1–3, 10–17). Mea nāhea te ha’apaera’a mā’a i te rirora’a ’ei ha’amaita’ira’a nō rātou ? (hi’o Esetera 5:2–3; 8:11–12). Nō te aha te Fatu e ani ai ia tātou ’ia ha’apae i te mā’a ? ’A feruri i te mea e nehenehe e rave nō te fa’ariro i te ha’apaera’a mā’a ’ei ha’amaita’ira’a rahi atu ā i roto i tō ’oe orara’a.

Hi’o ato’a Isaia 58:6–12; Mataio 4:1–4; 17:14–21; « Fasting : Young Single Adult Ward, Amanda [Te ha’apaera’a mā’a : Pāroita feiā ’āpī pa’ari ’ōtahi, Amanda] » (video), ChurchofJesusChrist.org.

Esetera 3:1–11 ; 4:10–17 ; 5:1–4

Nō te rave i te mea ti’a, tītau-pinepine-hia te itoito rahi.

I tō Moredekai rāua Esetera ti’ara’a mai nō tō rāua ti’aturira’a, ’o tō rāua ato’a ïa orara’a tā rāua i tu’u atu. Penei a’e e mau fa’ahope’ara’a māmā a’e e tupu nō tā tātou mau mā’itira’a, e tītau noa rā te ravera’a i te maita’i i te itoito. E aha te ha’api’ira’a tā ’oe e ’apo nei i roto i te Esetera 3:1–4; 4:10–17 nō ni’a i te itoito nō te rave i te maita’i ? ’A pāpa’i i te mau fa’ahope’ara’a tā Moredekai ’e Esetera i fa’aaruru nō te fa’a’itera’a i tō rāua itoito (hi’o Esetera 3:5–11; 5:1–4). E aha te mea tei tītauhia i te hō’ē ta’ata ’ia ’ite nō ni’a i te Atua, nō te rave i te mau mā’itira’a mai ia Esetera ’e Moredekai te huru—nō te rave i te maita’i noa atu ā te mau fa’ahope’ara’a ?

’Ia tae fa’ahou mai te mahana e feruri ’oe i te mau fa’ahope’ara’a nō te rave i te maita’i, e ti’a ia ’oe ’ia fa’a’ohipa i teie mau parau itoito a Esetera i roto i te Esetera 4:16 nō ’oe. ’Ei hi’ora’a, e parau ’oe ia ’oe iho ē : « ’Ia mā’iti au i te maita’i ’e ’ia [’ere au i te hoa ra, ’ere noa atu vau i te hoa] ».

Hi’o ato’a Thomas S. Monson, « ’Ia itoito ’outou », Liahona, Mē 2009, 123–27.

Esetera ’e te ari’i

Esther before the King [Esetera i mua i te ari’i], nā Minerva K. Teichert

ītona tuatāpapara’a a te ’utuāfare

Mau mana’o nō te tuatāpapara’a pāpa’ira’a mo’a a te ’utuāfare ’e te purera’a pō ’utuāfare

Esetera 1–10.I muri iho i te hi’ora’a i te ’ā’amu o Esetera (hi’o « Queen Esther » i roto Old Testament Stories [Te mau ’ā’amu o te Faufa’a Tahito] ’aore rā te video « For Such a Time as This [Nō teie nei ’anotau] », ChurchofJesusChrist.org), e au paha tō ’outou ’utuāfare i te hāmani i te tahi mau ha’uti manimani rima ’ōhie nō te tahi mau ta’ata o te ’ā’amu (hi’o te ’api ’ohipara’a nō teie hepetoma i roto Mai, pe’e mai—nō te Paraimere). ’Ei reira e nehenehe rātou e fa’a’ohipa i te reira nō te fa’ati’a i te ’ā’amu. E nehenehe ato’a e hīmene i te hō’ē hīmene nō ni’a i te vai-mata’u-’ore-ra’a ’e te vai-pāpū-ra’a, mai teie « Fais donc le bien » (Chants pour les enfants, 80) ’aore rā, « ’A ha’apa’o  » (Te mau hīmene, N°143). E aha te mau parau o te hīmene e fa’aha’amana’o ia tātou nō Esetera ?

Esetera 2:5–7.E aha te ha’api’ira’a tā tātou e nehenehe e ’apo mai i roto i te hi’ora’a o Moredekai nō ni’a i te tauturura’a i te mau melo o te ’utuāfare i te taime fifi ? ’O vai i roto i tō tātou ’utuāfare tei tītauhia ’ia tauturu atu tātou ? Hāmani i te fa’anahora’a nō te tauturu ia rātou.

Esetera 4:15–17.E nehenehe te mata’u ’ore o Esetera e fa’auru i te ’āparaura’a nō te ’utuāfare nō ni’a i te huru e fa’atupu i te itoito nō te ti’a atu nō te parau mau i roto i te mau ’ohipa tā rātou e fa’aruru. E aha tā Esetera e parau ra i te nā-’ō-ra’a ’oia ē : « ’E ’ia pohe au ra, pohe noa atu vau » ? E mea nāhea teie mau parau e tano ai nō tātou i te taime e tītauhia ia tātou ’ia vai mata’u ’ore ? Tē hōro’a nei te video ra « Courage » (ChurchofJesusChrist.org) i te tahi mau hi’ora’a.

Esetera 9:26–32.’Ua ha’amauhia te ’ōro’a ’āti Iuda ra nō Purim ’ei ha’amana’ora’a i te ’ā’amu o Esetera. I te taime tāmā’ara’a i terā hepetoma, e nehenehe e fa’ati’a i te mau ’ā’amu nō te ti’ara’a te mau melo o te ’utuāfare nō te maita’i, mai te mau tupuna ato’a, ’e mai ia Esetera.

Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a nō teie hepetoma i roto Mai, pe’e mai—nō te Paraimere

Hīmene tei mana’ohia : « Fais donc le bien », Chants pour les enfants, 80.

Ha’amaita’i i tā tātou ha’api’ira’a

Pe’e i te huru orara’a o te Fa’aora. « Te mana… o te Fa’aora nō te ha’api’i ’e nō te fa’aitoito ia vetahi ’ē, nō roto mai ïa i te huru o tōna orara’a ’e tōna huru ’ei ta’ata. Rahi noa atu ’outou i te tūtavara’a ’ia ora mai ia Iesu Mesia te huru, rahi noa ato’a atu te roa’ara’a ia ’outou ’ia ha’api’i mai iāna ra te huru » (Ha’api’ira’a mai tā te Fa’aora,13).

Esetera

Queen Esther [Te ari’i vahine Esetera], nā Minerva K. Teichert, © William and Betty Stokes