“Turai 18–24. Etira 1; 3–7; Neemia 2; 4–6; 8: ‘I Tabe ni Karaoa te Makuri ae Ababaki’” Nakomai, Iriirai—Ibukiia Aomata n Tatabemaniia ao Utu: Te O Tetemanti 2022 (2021)
“Turai 18–24. Etira 1; 3–7; Neemia 2; 4–6; 8,” Nakomai, Iriirai—Ibukiia Aomata n Tatabemaniia ao Utu: 2022
Te Kamataata n tamnein ana tembora Terubabera, iroun Sam Lawlor
Turai 18–24
Etira 1; 3–7; Neemia 2; 4–6; 8
“I Tabe ni Karaoa te Makuri ae Ababaki”
Beretitenti Etira Taft Benson e reirei, “Ana taeka te Atua … iai mwaakana ni kakorakoraia kaain te aro ao n irianaki ma te tamnei bwa a aonga ni totokoa te buakaka, kateimatoa te raoiroi, ao kakaea te kimwareirei inanon maium” (Teachings of Presidents of the Church: Ezra Taft Benson [2014], 118).
Korei Am Namakin
A kabureaki Iutaia i Baburon n te maan ae 70 te ririki. E bua Ierutarem irouia ao te tembora, ao a mwaiti aika a mwaninga ni motinnano nakon ana tua Te Atua. Ma te Atua e aki mwaninga taekaia. Ma, E taetae rinanoia ana burabeti, “N na kawari ngkami, ma ni kakoroa bukin au taeka are raoiroi nakoimi” (Ieremia 29:10). Te Uea e kakaonimaki ni kakoroa nanon te taetae ni burabeti aio, te Uea e a tia ni karaoa te kawa ibukiia Iutaia bwa ana oki, ao E kateirakeia tooro ake a na kakoroi bukin “te makuri ae ababaki” ibukiia Ana aomata (Neemia 6:3). Tooro aikai ni ikotaki ma te tia kairiri ae arana Terubabera, ngaia are e taraa manga katean ana auti te Uea; Etira te ibonga ao te tia koroboki are e kaoka nanoia aomata nakon ana tua te Uea; ao Neemia, ana kowana Iuta imwiina are e kaira te mwakuri ibukin manga katean te oo ni kamanomano ni kabutaa Ierutarem. A boo ma taan kaitara, eng, ma karekei naba buoka man mwakuri n ibuobuoki aika aki kantaningaaki. E kona aia taneiai ni kangoira ao ni kaungaira, ibukina bwa ti karaoa naba te mwakuri ae ababaki. Ao n aron aia mwakuri, angiin te mwakuri ae ti karaoia a kaeti ma ana auti te Uea, ana tua te Uea, ao ana kamanomano te tamnei ae ti kunea Irouna.
Ibukin te kamataata n ana boki Etira ao Neemia, taraa “Etira” ao “Neemia” inanon te Kairi nakon Koroboki aika Tabu.
Iango ibukin te Kamatebwai i bon Iroum ni Koroboki aika Tabu
E kaungai nanoia aomata te Uea bwa a na karekei Ana kantaninga.
Imwiin tokanikain Botia iaoia I-Baburon, uean Botia, Tairati, e bon anaaki nanona iroun te Uea bwa e na kanakoia ana kurubu Iutaia nako Ierutarem bwa a na manga katea te tembora. Ngkai ko wareka Etira 1, koreia bwa tera ae kani karaoia Tairati ni boutokaia Iutaia inanon te mwakuri ae kakawaki aio. Ko na kanga n noora ana mwakuri te Uea rinanoia mwaane ao aine ni ikotaki ma naake tiaki kaain ana Ekaretia? Tera ae tuangko te bwai aei n taekan te Uea ao Ana mwakuri?
Taraa naba Itaia 44:24–28.
A kona tembora ni uota te kimwareirei nakoiu.
Ngke kaain Bwaburon a buakana Ierutarem, a kimoai bwain nanon te tembora ao ni kabuekia nako aontano (taraa 2 Uea 25:1–10; 2 Rongorongo 36:17–19). Tera am namakin ngke arona bwa ngkoe temanna mai ibuakoia Iutaia ake a kakoaua aio? (taraa Taian Areru 137). Koroi bwaai aika a namakinna Iutaia, imwiin te tai, ngke a kariaiakaki bwa a na oki ao ni manga katea te tembora (taraa Etira 3:8–13; 6:16–22). Iangoia raoi n oin am namakin ibukin tembora. Bukin tera taian tembora bon taabo ni kimwareirei? Ko na kanga ni kaota am kakaitau nakon te Uea ibukin taian tembora?
Ibukin katoto n taai aikai iaon te kimwareirei ni katean taian tembora, tarai witeo “Practice, Celebration, Dedication: Tembora Blessings i El Salvador” ao “The Laie Hawaii Tembora Youth Cultural Celebration” (ChurchofJesusChrist.org).
Te tembora e kona n riki bwa te kimwareirei inanon maiura.
I kona ni ibuobuoki n ana mwakuri te Atua e ngae ngkana iai taian kaitara.
Ana mwakuri te Uea e na bon iai kaitaraakina n taainako, ao aio e koaua mwiina are e kairaki iroun Terubabera ao Neemia. Ni bukina aika uoua aikai, “kaitaraan Iuta” (Etira 4:1) bon I-Tamaria—kanoan Iteraera are a ikotaki ma Tientaire. Warekan rongorongon kaitaaran katean te tembora (taraa Etira 4–6) bwa e na kona ni kairiko ni iangoa raoi kaitaaran ana mwakuri te Atua ae a kaitara ma ngaai ni boong aikai ao e na kanga am kaeka ngkana e a roko te kaaitara.
Titebo ma, warekan ana mwakuri Neemia ngke e onobwaia oon Ierutarem (taraa Neemia 2; 4; 6) e kona ni kairiko bwa ko na iangoa raoi ana mwakuri te Atua bwa e tangiriko bwa ko na karaoi. Tera ae ko reiakinna man ana katooto Neemia?
Taraa naba Dieter F. Uchtdorf, “We Are Doing a Great Work and Cannot Come Down,” Liahona, Meei 2009, 59–62.
I kakabwaiaaki ngkana I kamatebwai booki aika tabu.
Imwiin manga katean te tembora, aomata i Ierutarem a mamara tamneia, ibukina bwa, ibukia rooro ma rooro, a tia n aki rinnako inanon ana “boki n tua Mote” (Neemia 8:1). Etira te tia koro rongorongo e karekea te kariaia mairoun te Uea bwa e na nako Ierutarem, ike Etira e “karekea iai te tua imwain te taromauri” (Neemia 8:2). Ko na kanga n ira ana banna ni katooto Etira n aron are e kabwarabwaraaki inanon Etira 7:10? Ngkana ko wareka Neemia 8, are e anga rongorongon Etira ni wareka te tua nakoia aomata, tera am iango iaon mwakan ana taeka te Atua inanon maium?
Taraa naba Teachings: Etira Taft Benson, 115–24.
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
Etira 3:8–13; 6:16–22.A kanga Iutaia ni kaota kimwareireia ibukin te tembora ngkai e a manga kateaki ao ni katabuaki? Tera ae ti karaoia n kaota kimwareireira ibukin te tembora? A kona am utu n noori tamnein tembora ao ni maroroakinna bwa a kanga tembora n anganiko te kimwareirei (taraa temples.ChurchofJesusChrist.org).
-
Etira 7:6, 9–10, 27–28.A mwaiti inanon kiibu aikai, e koreia Etira bwa bain te Uea e mena irouna ngkai e mwananga nako Ierutarem. Tera nanon te kibuntaeka ae bain te Uea e mena iaona? Ti kanga n namakina bain te Uea iaora? A kona kaain te utu n tibwaua te katooto man maiuia.
-
Neemia 2; 4; 6.Rongorongon Neemia e kona ni kaungaia kaain te utu ngkana a kaaitara te kangaanga ngkai a karaoa “te mwakuri ae ababaki” (Neemia 6:3). Membwa n te utu a kona ni katea te oo man bwaai ake iai ni mweengaia ngkana kam kaai ni wareki oin te kibuntaeka (n aron Neemia 2:17–20; 4:13–18; 6:1–3). Tera ae ti reiakinna mairoun Neemia iaon kaitaraan te kakaitara? Tera te mwakuri ae korakora ae tangiriira te Uea bwa tina karaoia? E kanga te Uea ni kakorakoraira n tokanikai iaon kaaitaraan te mwakuri aio?
-
Neemia 8:1–12.Inanon Neemia 8, Etira e wareka ana tua Mote nakoia aomata ake a rangi ni kan ongo ana taeka te Atua. Warekan kiibu 1–12 e kona ni buokiko ni kakorakora aia kakaitau kaain am utu ibukin ana mwakuri te Atua. E na kanga aia namakin aomata n ana tua te Atua? Ti na kanga ni buokiira iamrenara “n oota n te wareware”? (kibu 8).
Ibukin iango riki tabeua ibukin reiakinaia ataei, taraa te kamataata n te wiiki aei inanon Nakomai, Iriirai—Ibukin te Moanrinan.
Anene aika katauaki: “I Love to See the Temple,” Aia Boki n Anene Ataei, 95.
Kanakoraoan Ara Anga reirei
Maroroakin koroboki aika tabu n te utu. N tain aia kamatebwai kaain am utu iaon koroboki aika tabu, kariaia kaain te utu bwa ana tibwauai kibuntaeka man aia kamatebwai aika ana iai uaaia nakoia.
Tamnein Etira ngke e wareki booki aika tabu nakoia aomata i Ierutarem, iroun H. Willard Ortlip, © Providence Collection/licensed man goodsalt.com