The Flight of the Prisoners (Birinakoia Buure), iroun James Tissot ao tabeman

Turai 11–17

2 Uea 17–25

“E Onimakina Iehova, ae Atuaia Iteraera”

Ngke Iotia e ongo taeka man te boki n tua, e kaeka inanon te onimaki. Ko na kanga ni kaeka inanon te onimaki nakon te bwai are ko warekia inanon 2 Uea 17–25?

Korei Am Namakin

Irarikin ana mwakuri ni mitinare ae tamaroa te burabeti are Eria, te tamnei ae raoiroi n te Abanuea i Meangin Iteraera e teimatoa n aki kariaiakaki. Uea aika a buakaka a karikirakei taromauriakin boua n anti, ao buaka ao kiitanan te koaua e rikirake. Ao n tokina ana Embwaea Aturia a kaaitara ao ni kamaenakoia a na baronga Iteraera ake tengaun.

N te tai naba anne, Abanuean Iuta i Maiaki e aki rangi ni karaoa ae raoiroi; taromaurian te boua n anti e a buta ikekei. Ma inanon buan te tamnei aei, rongorongon koroboki aika tabu a taekinaki iai uoman uea aika a raoiroi ake, n te tai anne, a kaokiia aia aomata nakon te Uea. Temanna bon Etekia. N ana tai n tautaeka, taian Aturia, a kukurei man tokanikaia i meang, a tokanikai iaoia angiia kaain maiaki. Ma Etekia ma ana aomata a kaota te onimaki inanon te Uea, are e kainaomata Ierutarem inanon kawai aika kamimi. Imwina, imwiin manga kitanan te koaua, Iotia e a moana ana tautaeka. E kaungaaki teutana man bokin te tua are e a tibwa manga kuneaki, Iotia e a karekei katamaroa are e a manga kabooui maiuia inanon te aro angiia ana botannaomata.

Tera ae ti reiakinna man rongorongo aika uoua aika a oota aikai n rongorongon Iuta ae roo? Iaon bwaai riki tabeua, ko na bon bae ni iangoa raoi mwaakan te onimaki ao ana taeka te Uea inanon maium. N aron Iteraera ao Iuta, ti bane ni karaoi rinerine aika a tamaroa ao aika a buakaka. Ao ngke ti namakinna bwa manga kaetakiia anne e kainnanoaki inanon maiura, ao ana katoto Etekia ao Iotia a kona n kaungai nanora bwa ti na “onimakina ara Uea ae te Atua” (2 Uea 18:22).

Taraa naba 2 Rongorongo 29–35; te “Iango aika Kona Katikui n Am Iango” mwakoro “‘E Na Kangai Iesu nakon Iteraera ni Kabane, Okiri Mwengami.’”

Iango ibukin te Kamatebwai i bon Iroum ni Koroboki aika Tabu

2 Uea 18–19

I kona n teimatoa ni kokoaua nakon te Uea n taai ni kangaanga.

Angiira mai ibuakora a rinanon taai ake a kataaki iai ara onimaki. Ibukin Etekia ao ana aomata, teuana mai ibuakon taai ake a roko ngke ana taanga I-Auturia a buakana Iuta, ni kamaunanakoi kaawa aika mwaiti, ao n roko Ierutarem. Ngkana ko wareka 2 Uea 18–19, iangoia ngke arona bwa ko maeka i Ierutarem n te tai aio. Ko na kanga n tia n namakinna, te katoto, n ongo bwainikirinakiia I-Auturia are a koreaki inanon 2 Uea 18:28–37 ao 19:10–13? Tera ae ko reiakinna man te bwai ae karaoia Etekia n ana kaeka? (taraa 2 Uea 19:1–7, 14–19). E kanga te Uea ni kamatoa Etekia? (taraa 2 Uea 19:35–37). Iangoia raoi bwa e kanga ni kamatoako n am tai ni kangaanga.

Ko na bae n iangoa naba rongorongon Etekia inanon 2 Uea 18:5–7. Tera kaotaniango man kiibu aikai ibukin Etekia bwa e kanga n teimatoa n tiku n onimaki ngke a roko kangaanga? Ko na kanga ni irii ana banna ni katooto?

Taraa naba 3 Nibwaai 3–4; D. Todd Christofferson, “Firm and Steadfast in the Faith of Christ,” Liahona, Nobembwa. 2018, 30–33.

2 Uea 19:20–37

Bwaai ni kabane a mena inanon bain te Uea.

Tennakeriba, are uean Auturia, iai bukina irouna ae tamaroa bwa ana taanga ni buaka a na bon tokanikai iaon Ierutarem. E a tia I-Auturia ni konaia aaba aika mwaiti, n ikotaki ma Iteraera—bukin tera Ierutarem e na kaokoro? (taraa 2 Uea 17; 18:33–34; 19:11–13). Ma te Uea e kanakoa ana rongorongo ibukin Tennakeriba, are e anganaki rinanon te burabeti ae Itaia, ao e koreaki inanon 2 Uea 19:20–34. Ko na kanga n kakimototoa te rongorongo aio ni kabane? Tera koaua aika ko kunei man kiibu aikai aika a na kona ni buokiko ni karekea am onimaki inanon te Uea ao Ana babaire?

Taraa naba Ereman 12:4–23; Reirei ao Berita aika Tabu 101:16.

2 Uea 21–23

Taian Koroboki aika Tabu e kona n raira nanou nakon te Uea.

Ko a tia n namakinna ae iai bwain te tamnei ae akea iroum? Tao ko namakinna bwa e kona ni kakorakoraaki riki am retaki ma te Atua. Tera ae e a tia ni buokiko n rairiko nako Ina? Iangoi raoi titiraki aikai ngkana ko warekia bwa e kanga Abanuean Iuta ni bwaka mairoun te Uea iaan te Uea ae Manate (taraa 2 Uea 21) ao e kanga te Uea are Iotia ni buokiia ni manga motinnanoia i bon irouia n nako Ina (taraa 2 Uea 22–23). Tera ae anaa nanon Iotia ao ana aomata? Te rongorongo aio e na bon kaunga nanom ni kaboua am motinnano n “nakonako n ira te Uea … n [nanom] ni kabane ao n [tamnei] ni kabanea” (2 Uea 23:3).

Ngkana ko warekii mwakoro aikai, iangoa kamatebwaian mwakoro 6 inanon Teachings of Presidents of the Church: Spencer W. Kimball ([2006], 59–68), are e kataua Beretitenti Kimball ni iangoa karakinan te Uea are Iotia “bon teuana te karaki ae moan te tamaroa inanon Koroboki aika Tabu” (iteraniba 62). Bukin tera Beretitenti Kimball e namakinna n te kawai anne? Tera ae ko kunea n ana taeka Beretitenti Kimball, riki n ana rongorongo ibukin te Uea Iotia, ae buokiko ni karekei 2 Uea 22–23 nakon maium?

Taraa naba Aramwa 31:5; Takashi Wada, “Kanuai ngkami n Ana Taeka Kristo,” Riaona, Meei 2019, 38–40; “Josiah and the Book of the Law” (witeo), ChurchofJesusChrist.org.

Koroboki aika Tabu a kona n ibuobuoki n rairi nanora nakon te Uea.

Iango ibukin Kamatebwai ni Koroboki aika Tabu n te Utu ao te Bootaki n te Tairiki

2 Uea 19:14–19.Tera ae ti kona n reiakinna man ana katooto Etekia are e na kona ni buokiira ngkana iai ara kangaanga ke ara titiraki? E kanga ni kaekai ara tataro te Uea ibukin buokara? A kona kaain te utu ni karaoa te bwai teuana ae na katekei inanon mweengaia bwa te kauring bwa a na rairaki nakon te Uea.

2 Uea 22:3–7.Te tia mwakuri are e kabwarabwaraaki inanon 2 Uea 22:3–7 a onimakinaki ma te mwane are e na kabonganaaki ibukin manga katean te tembora “bukina bwa a karaoa te aro ae kakaonimaki” (te kibu 7). Imwiin warekan kiibu aikai, ko kona n titirakinia kaain am utu bwa a na aranii bwaai ake a tia n onimakinaki iai. Ti na kanga n riki n onimakinaki n aroia taan mwakuri inanon kiibu aikai?

2 Uea 22:8–11, 19; 23:1–3.Tera ae riingi nanora ibukin Iotia ma ana aomata ni kaeka nakon ana taeka te Uea? Ti na kanga ni kaeka nakon ana taeka te Atua inanon booki aika tabu? A kona kaain am utu n tibwauai kibuntaeka man booki aika tabu ke karaki ake a tia ni kaunga nanoia ni kan iriira Tamarara are i Karawa ao Iesu Kristo.

2 Uea 23:25.Tera kabwarabwaraan Iotia ae e teretere iroura inanon te kibu aio? A kona kaain am utu ni koro tamnei iaon beeba aika taian aati are a kona ni karaoia n te wiiki aio bwa kaokan nanoia nakon te Uea ma nanoia ni kabane.

Ibukin iango aika a mwaiti riki ibukin reirenakiia ataei, taraa te kamataata n te wiiki aei n Nakomai, Iriirai—Ibukin te Moanrinan.

Te anene ae katauaki: “As I Search the Holy Scriptures,” Boki n Anene, nambwa. 277.

Kanakoraoan Am Kamatebwai I Bon Iroum

Kakaei taeka ao kibun taeka aika kaunganano. Ngkai ko wareware, te Tamnei e na uoti tabeua taeka ke kibun taeka bwa ko na noori. A na anaa nanom ao ni kaunga nanom; ao kanga a taraa ni koreaki ti ibukim.

Tamnein te tia koro karaki e uota te niira ni boki ibukin koroboki aika tabu nakon te Uea Iotia, iroun Robert T. Barrett