The Mocking of Christ [Kunyombwa kwaKristu], naCarl Heinrich Bloch

Gunyana 26–Gumiguru 2

Muporofita Isaya 50–57

“Wakatakura Matenda Edu, noKusimudza Kurwadziwa Kwedu”

Fungisisa nzwisiso dzinobva muna Muporofita Isaya 50–57 idzo dzinokubatsira kuswedera pedyo neMuponesi. Nyora pasi manzwiro aunotambira.

Nyora Pasi Manzwiro Ako

Nemuhushumiri hwake hwose, Isaya akataura nezve musununguri ane simba (ona, semuenzaniso, Muporofita Isaya 9:3–7). Huporofita uhwu hwaizova hwakanyanya kukosha kuvaIsraeri mazana emakore pashure apo pavaiva vari muutapwa muBabironi. Mumwe munhu aikwanisa kuputsa masvingo eBabironi aizova mukundi ane simba zvechokwadi. Asi urwu harusi irworudzi rwaMesiasi akatsanangurwa naIsaya muzvitsauko 52–53: “Wakazvidzwa nokurashwa navanhu; munhu wokurwadziwa, wakaziva urwere: unovanzirwa navanhu zviso zvavo.… Takati wakatambudzwa, wakarohwa naMwari, nokumanikidzwa” (Muporofita Isaya 53:3–4). Nokutumira musununguri asingatarisirwi akadaro, Mwari vakatidzidzisa pamusoro perusununguko rwechokwadi. Kutiponesa kubva paudzvinyiriri nedambudzo, Mwari vakatuma Iye uyo Pachezvake “akadzvinyirirwa, uye … akatambudzwa.” Apo vamwe pavaitarisira shumba, Vakatumira gwayana (ona Muporofita Isaya 53:7). Chokwadi, nzira dzaMwari hadzisi nzira dzedu (ona Muporofita Isaya 55:8–9). Jesu Kristu anotisunungura kwete chete nekungozarura tirongo asi nekutora nzvimbo yedu imomo. Anotisunungura kubva mungetani dzedu dzemarwadzo nerusuwo nekuzvitakura Iye Pachake (ona Muporofita Isaya 53:4–5,12). Haatiponese ari kure. Anotambura nesu, muchiito “chenyasha dzisingaperi” idzo “dzisingabvi kwauri” (Muporofita Isaya 54:8,10).

Mazano eKunzvera Magwaro Matsvene Kwako Wega

Muporofita Isaya 50–52

Ramangwana rakajeka kuvanhu vaIshe.

Kunyangwe zvazvo vaIsraeri vakapedza makore mazhinji vari muutapwa—uye kunyangwe zvazvo utapwa uhwu hwaiva mhedzisiro yesarudzo dzavo pachavo dzakaipa—Ishe vaida kuti vatarise kune ramangwana netariro. Ndeapi mashoko etariro aunowana muna Muporofita Isaya 50–52? Chii chatinodzidziswa naIshe pamusoro pezvaVo Pachavo muzvitsauko izvi, uye sei izvi zvichikupa tariro? (ona somuenzaniso, Muporofita Isaya 50:2, 5–9; 51:3–8, 15–16; 52:3, 9–10).

Ungangodorongodzawo zvinhu zvose zviri muzvitsauko 51–52 izvo Ishe zvavanokoka Israeri kuti iite kuitira kuti ramangwana rine tariro iri riitike. Chii chaunonzwa kuti Ishe vari kukukoka kuti uite kuburikidza nemashoko aya? Semuenzaniso, unofunga zvinorevei kuti “muka” uye “zvifukidze nesimba”? (Muporofita Isaya 51:9; onawo Muporofita Isaya 52:1; Dzidziso neZvibvumirano 113:7–10). Sei uchifunga kuti kukokwa “kuterera” (kana “kuteerera uine chinangwa chekutevera”) kuchidzokororwa kakawanda kudaro? (Russell M. Nelson, “Hear Him,” Liahona, Chivabvu 2020,89).

Onawo Mosiah 12:20–24; 15:13–18; 3 Nephi 20:29–46.

Because of Love [Nokuda kweRudo], nemuvezi Angela Johnson

Muporofita Isaya 53

Jesu Kristu akatora paAri zvivi zvangu nerusuwo rwangu.

Pane zvitsauko zvishoma chete mumagwaro matsvene zvinotsanangura basa rerudzikinuro raJesu Kristu zvakanakisisa kupfuura Muporofita Isaya 53. Tora nguva yekufungisisa mashoko aya. Nendima imwe neimwe, mira ufungisise izvo Muponesi zvaakatambura—zvinoti “marwadzo,” “rusuwo,” uye “zvitadzo” zvaAkatakurira—vanhu vose uye kunyanya iwe. Ungangotsiva mazwi akaita “saisu” uye “edu” neanoti “ini” uye “angu” apo paunoverenga. Manzwiro api kana pfungwa dzipi zvino kurudzirwa mauri nendima idzi? Funga pamusoro pekuzvinyora pasi.

Ungangoda kuongorora Mosiah 14; 15:1–13 kuti uone mashandisiro akaita muporofita Abinadi mashoko aIsaya kudzidzisa pamusoro peMuponesi.

Muporofita Isaya 54; 57:15–19

Jesu Kristu anoda kuti ndidzokere kwaAri.

Tose tine nguva apo patinonzwa tiri kure naIshe nokuda kwezvivi zvedu kana utera. Vamwe vakatorasa tariro yekuti Anozombovaregerera. Muporofita Isaya 54 na57 zvitsauko zvakanakisisa zvekuverenga kuitira simbiso uye kurudziro panguva dzakadai. Kunyanya muna Muporofita Isaya 54:4–10; 57:15–19, chii chaunodzidza pamusoro pengoni dzeMuponesi uye nemanzwiro Ake pamusoro pako? Isiyano ipi yazvinoita muupenyu hwako kuziva zvinhu izvi pamusoro Pake?

Maropafadzo akatsanangurwa muna Muporofita Isaya 54:11–17 anoshanda sei kwauri?

Muporofita Isaya 55–56

Ishe vanokoka vose kuti “batisisai chibvumirano changu.”

Kwezvizvarwa zvakawanda, Israeri yakanga ichizivikanwa sevanhu vechibvumirano vaMwari. Zvisinei, chirongwa chaMwari chakagara chichisanganisira vanopfuura rudzi rumwechete, nokuti “wose unenyota” anokokwa “kuuya … kumvura” (Muporofita Isaya 55:1). Chengeta izvi mupfungwa apo paunoverenga Muporofita Isaya 55 na56, uye ufungisise zvazvinoreva kuva vanhu vaMwari. Nderipi shoko raMwari kune avo vanonzwa “kuparadzaniswa zvachose” kubva kwaVari? (Muporofita Isaya 56:3). Funga pamusoro pekumaka ndima dzinotsanangura mafungiro nezviito zveavo “vanobatisisa chibvumirano changu” (ona Muporofita Isaya 56:4–7).

Mazano ekuNzvera Magwaro Matsvene kweMhuri uye eNguva yeMhuri Pamba Manheru

Muporofita Isaya 51–52.Apo pamunokurukura kukoka kwaIshe muzvitsauko izvi, unokwanisa kukoka nhengo dzemhuri kuti vaite mutambo wako. Semuenzaniso, zvinotaridzika sei “kutarira kudenga nameso enyu,” “kumuka, kusimuka,” kana “kuzvizunza kubva muguruva”? (Muporofita Isaya 51:6.17; 52:2). Ndevo idzi dzinotidzidzisei pamusoro pekutevera Jesu Kristu?

Muporofita Isaya 52:9.Mushure mekuverenga ndima iyi, mhuri yako inokwanisa “kuimba pamwechete” rwiyo kana rumbo rwevana rwunovaunzira mufaro. Ndedzipi vimbiso muna Muporofita Isaya 52 dzinoita kuti isu “tipururudze nomufaro”?

Muporofita Isaya 52:11; 55:7.Ndima idzi dzinokwanisa kutungamira kuhurukuro pamusoro pezvingangoreva ndevo inoti “Ivai vakachena”. Sechikamu chehurukuro iyi, munokwanisa kuverenga magwaro matsvene pamusoro pemaropafadzo ekuva vakachena pamweya (ona 3 Nifai 12:8; Dzidziso neZvibvumirano 121:45–46).

Muporofita Isaya 53.Kusuma tsananguro yaIsaya yeMuponesi, mhuri yako inokwanisa kutaura pamusoro pekuti nyaya, mabhaisikopo, nedzimwe nhepfenuro dzenhaurirano zvinoratidza sei kazhinji magamba anonunura vanhu. Unokwanisa kuenzanisa maratidzirwo iwayo netsananguro dzeMuponesi dzamaverenga muna Muporofita Isaya 53. Munokwanisawo kutaura pamusoro pekuti huporofita huri muna Muporofita Isaya 53 hwakazadzikiswa sei. Ndeapi mamwe marwadzo nerusuwo izvo Muponesi zvaanotitakurira?

Muporofita Isaya 55:8–9.Zvinhu zvinotaridzika zvakasiyana sei kana uri kumusoro‑soro kubva pasi? Zvinorevei kwauri kuti nzira nepfungwa dzaMwari zvakakwirira kupfuura zvedu?

Kuti uwane mamwe mazano ekudzidzisa vana, ona chirongwa chevhiki ino chiri muHuyai, Munditevere—Bhuku reVana Vadiki.

Rumbo rwakapuwa: “Ndinoshamiswa Kwazvo,” Nziyo neDzevana Vadiki, nhamba 42.

Kunatsurudza Kunzvera Kwako Wega

Shandisa mumhanzi. Nziyo dzinodzidzisa misimboti yevhangeri zvakasimba. Funga pamusoro pekuteerera kana kuverenga nziyo dzesakaramende kukubatsira kunzwisisa zvokwadi pamusoro peRudzikinuro rwaJesu Kristu rwunodzidziswa muna Muporofita Isaya 53. (Ona Teaching in the Savior’s Way, 22.)

His Light [Chiedza Chake], naMichael T. Malm