“Iaļ ko An Re Jab Jem̧ļo̧k” (Habakkuk 3:6). In the Beginning Was the Word[Ilo Jinoin Kar Naan eo], jān Eva Timothy

Nobōm̧b 28–Tijem̧ba4

Nahum; Habakkuk; Zepanaia

“Iaļ ko An Re Jab Jem̧ļo̧k”

Kwomaron̄ ekkatak jeje ko rekwojarjar ilo aolepān mour eo am̧ im kwoj nej baj wōt lo jet katak ko rekāāl. Jab ļōmņak bwe kwoj aikuj meļeļe aolep men kiiō. Jar n̄an jipan̄ kile ennaan eo kwoj aikuji rainin.

Je En̄jake ko Rej Im̧we Eok

Riiti Kallim̧ur M̧okta ej meļeļein riiti kanaan ko kōn jorrāān/kakkure eo an jikin eo. Irooj emakijkij an kūr rikanaan ro n̄an kakkōļ rijerawiwi ro bwe ekajet eo An epād ioer. Iien kwaļo̧k naan eo an Nahum, Habakkuk, im Zepanaia rej waanjon̄ak ko rem̧m̧an. Ilo tipdikin meļeļe ko rekaleln̄o̧n̄, rikanaan rein rekar kanaan kōn kakkure eo an jikin ko bwe, ilo iien eo, ekar lukkuun pen im kajoor—Nineva, Babilon, im bar Jerusalem. Ak kar taujin iiō rem̧ootļo̧k. Etke eaorōk n̄an riiti kanaan kein rainin?

Jekdo̧o̧n jikin ko me ekar ļap utiej bōro im jerawiwi ie kar kakkuri, utiej bōro im jerawiwi rekar wōnm̧aanļo̧k wōt. Ilo laļ in rainin, jemaron̄ jet iien en̄jake ad jepooļ kōn nana ko me rikanaan ro etto rekar jab errā kaki. Jemaron̄ bar en̄jaki jidikier ilo buruōd make. Kanaan kein ilo Kallim̧ur M̧okta ej kwaļo̧k en̄jake eo an Irooj kōn utiej bōro im jerawiwi, im rej katakin bwe jemaron̄ oktak ļo̧k jān nana kein. Bolen en̄ ne ej unin ad aikuj riit wōt kōn kanaan in etto kein rainin. Nahum, Habakkuk, Zepanaia, im ro jet rekar jab rikanaan wōt in kakkure—rekar rikanaan in lo̧mo̧o̧ren. Kōmeļeļe ko kōn kakkure eo rekar oktak itok jān kūr ko n̄an itok n̄an Kraist im bōk tūriam̧o̧ eo An: “Kom̧win pukot Irooj …; kom̧win pukot wānōk, pukot bōro ettā” (Zepanaia 2:3). En̄in kar iaļ eo an Irooj etto, im ej iaļ eo An rainin. “Iaļ ko An re jab jem̧ļo̧k” (Habakkuk 3:6).

N̄an tukadu in kōmeļeļe ko an bok kein, lale “Nahum,” “Habakkuk,” im “Zepanaia” ilo Bible Dictionary.

Ļōmņak ko n̄an Ekkatak Jeje Ko Rekwojarjar Ippam̧ Make

Nahum1

Irooj ej jim̧or kajoor im tūriam̧o̧.

Kar mijen eo an Nahum ej n̄an kanaan kōn kakkure eo an Nineva—jikin eo eļap an kien eo enana an Assyria, eo me ekar kōjepļōkļōk Israel im kakkure Juda. Nahum ekar jino ilo an kōmeļeļeik illu an Anij im kajoor eo ban maron̄ keidi, ak E ej barāinwōt kōnono kōn tūriam̧o̧ im em̧m̧an an Anij. Kwomaron̄ ļōmņak n̄an kile eoon kein ilo jebta1 me ej jipan̄ eok meļeļe kajjojo iaan m̧wil kein—im m̧wil ko jet an Anij me kwoj kile. Etke kwoj ļōmņak eaorōk n̄an jeļā kajjojo men kein kōn Irooj?

Jet iien emaron̄ pen n̄an errā kōn katak ko ilo jeje ko rekwojarjar ke “Irooj em̧m̧an” (Nahum 1:7) kōn katak eo me E “ej iden-oņeik ri kōjdat ro An” (Nahum 1:2). Ilo Bok in Mormon, ļaddik eo nejin Alma etan Korianton ekar wōr ippān ejja āinwōt kajjitōk ko “kōn jim̧we an Anij ilo kaje ro rej rijero̧wiwi” (Alma 42:1). N̄an ekkatak eļapļo̧k kōn tūraim̧o̧ an Anij im wāween an iookļo̧k kien jim̧we eo An, riiti uwaak ko an Alma n̄an Korianton ilo Alma42.

“Irooj em̧m̧an, juon em̧ ekajoor ilo raan in jorrāān ko” (Nahum 1:7).

Habakkuk

Imaron̄ lōke ankilaan Irooj im iien eo An.

Men̄e rikanaan ro jet iien ekar wōr aer kajjitōk kōn iaļ ko an Irooj. Habakkuk, eo ekar mour ilo iien eo ekar ajedeed jerawiwi ilo Juda, ekar jino kōm̧m̧ani rekoot ko an kōn kajjitōk ko n̄an Irooj (lale Habakkuk 1:1–4). Ewi wāween am̧ kōmeļeļeik ilo tukadu in abōņōņō ko an Habakkuk? Kwar ke en̄jake ejja kain en̄jake rōt in?

Irooj ekar uwaakeļo̧k kajjitōk ko an Habakkuk ilo an ba bwe E enaaj jilkinļo̧k ri Kaldia ro (riBabilon ro) n̄an kaje Juda (lale Habakkuk 1:5–11). Ak Habakkuk ekar inepata wōt, bwe ekar jab jim̧we ippān Irooj n̄an pād wōt ak ikōn̄ “ke ro renana [ri Babilon] rej oran̄ļo̧k ro re wānōk jān er [ri Juda]” (lale eoon ko12–17). Ta eo kwoj loe ilo Habakkuk 2:1–4 me ej im̧we eok n̄an lōke Irooj n̄e ewōr am̧ kajjitōk ko rejjab maron̄ uwaak?

Jebta3 ilo Habakkuk ej juon jar in nōbar Anij im juon kōkaļļe in tōmak ilo E. Ta eo ej im̧we eok kōn naan ko an Habakkuk ilo eoon ko 17–19 Ewi wāween an tōņ in eoon kein oktak jān Habakkuk 1:1–4? Kejokļo̧kjeņ kōn wāween am̧ maron̄ kōļapļo̧k tōmak ilo Anij, men̄e mour in ekalijōkļo̧k.

Bar lale Hibru 10:32–39; 11; Katak im Bujen Kos 121:1–6; RobertD. Hales, “Waiting upon the Lord: Thy Will Be Done,” Liaona, Nov. 2011, 71–74.

Zepanaia

“Kom̧ otemjej im ettā buruōmi ilo āneo, kom̧win pukot Irooj.”

Zepanaia ekar kanaan bwe armej ro an Juda naaj lukkuun kakkure er jān ippān riBabilon ro kōn wōt nana ko aer. “Inaaj kanooj joļo̧k aolep men jān mejān āneo, Irooj ej ba” (Zepanaia 1:2). Im em̧ool Zepanaia ekar ba bwe ro rej “pād wōt” naaj kōjparok er (Zepanaia 3:13). Ilo am̧ riiti kanaan kein, kile kain m̧wil im mour ko me rekar tōl Juda im kurup ko jet n̄an kakkure—lale eļaptata Zepanaia 1:4–6,12; 2:8, 10,15; 3:1–4. Innem kappukot kadkad in m̧wil an armej ro me Anij ekar kōjparok er—lale Zepanaia 2:1–3; 3:12–13, 18–19. Ta ennaan eo kwoj en̄jake Irooj ekar kōpooje n̄an eok ilo eoon kein?

Zepanaia 3:14–20 ej kōmeļeļe lan̄lōn̄ an ro rej mour jim̧we ālkin an Irooj “ubakeļo̧k ri kōjdāt ro am̧” (eoon15). Ta kōjeram̧m̧an ko me kar kallim̧ur kaki ilo eoon kein me rejiktok ippam̧? Etke eaorōk bwe kwon jeļā kōn kōjeraam̧m̧an kein? Kwomaron̄ keidi eoon kein n̄an en̄jake ko me kar kōmeļek ilo 3Nipai17 im kejōkļo̧kjeņ kōn wāween an Jisōs Kraist en̄jake kōn Armej ro An—ekoba kwe.

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Nahum 1:7.Ewi wāween an Irooj āinwōt “juon [em̧] ekajoor”? Bōlen baam̧le eo am̧ emaron̄ kalōk juon em̧ ekilep ak ein dāpdep epen ak joor ilo m̧weo m̧ōm̧ im kōmeļeļeik Nahum 1:7 ilowaan. Ta eo ej kōm̧m̧an bwe raan eo ad en juon “raan in jorrāān”? Ewi wāween an Jisōs Kraist im gospel eo an kōkajoorļo̧k kōj? Ewi wāween ad kwaļo̧k ke jej lōke “lōke E”?

Habakkuk 2:14.Ewi wāween ad maron̄ jipan̄ kakūrm̧ool kanaan eo ilo eoon in?

Habakkuk 3:17–19.Ta eo jemaron̄ ekkatak jān waanjon̄ak eo an Habakkuk ilo eoon kein?

Zepanaia 2:3.Kwomaron̄ ikkure juon ikkure eo me ro uwaan baam̧le eo rej aikuj pukot naan ko “jim̧we” im “ettā” ilo juon peij me elōn̄ naan ko jet ie. Remaron̄ kōnono kōn waanjon̄ak in jim̧we im ettā me rej ippān doon. Ta meļeļein kappukot jim̧we im ettā?

Zepanaia 3:14–20.Ta eo jej loe ilo Zepanaia 3:14–20 me ej kōm̧m̧an bwe jen kōņaan “kwōn al, … kwōn m̧ōņōņō im lan̄lōn̄ kōn aolepen buruōm̧”? Bolen baam̧le eo am̧ emaron̄ al al in jar ko ak al ko me rej jiktok ilo kōļmenļo̧kjeņ ilo aer riiti eoon kein.

N̄an ļōmņak ko reļļapļo̧k n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Al eo kar elmakote: “Seek the Lord Early,” Children’s Songbook,108.

Kōkm̧anm̧anļo̧k Am̧ Make Ekkatak

Kwon kijenmej. Jet iien jekōņaan uwaak ko n̄an kajjitōk ko ad iien eo wōt, ak en̄jake ilo jetōnb ebōk iien im jejjab maron̄ bo̧o̧je. Āinwōt an kar Irooj ba n̄an Habakkuk, “Kwōn kōttar e; bwe ilo m̧ool enaaj itok” (Habakkuk 2:3).

“Irooj am̧ Anij ej i bwiljōm̧; e juon Eo e kajoor” (Zepanaia 3:17). He Comes Again to Rule and Reign[Ej Bar Itok im Tōl im Irooj], jān MaryR. Sauer