« ថ្ងៃទី ១៧–២៣ ខែ សីហា ហេលេមិន ១–៦ ៖ ‹ សិលានៃព្រះដ៏ប្រោសលោះនៃយើង › » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ព្រះគម្ពីរមរមន ឆ្នាំ ២០២០ ( ឆ្នាំ ២០២០ )
« ថ្ងៃទី ១៧–២៣ ខែ សីហា ហេលេមិន ១–៦ » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ឆ្នាំ ២០២០
ថ្ងៃទី ១៧–២៣ ខែ សីហា
ហេលេមិន ១–៦
« សិលានៃព្រះដ៏ប្រោសលោះនៃយើង »
សកម្មភាពនានានៅក្នុងគម្រោងមេរៀននេះមានបំណងដើម្បីជំរុញគំនិត និងបំផុសគំនិតក្នុងចិត្ត និងគំនិតរបស់អ្នក ។ ជាទូទៅ យោបល់ល្អបំផុតតែងតែកើតមាន ពេលអ្នកពិចារណាប្រកបដោយការអធិស្ឋាននូវបទគម្ពីរ និងតម្រូវការរបស់កុមារដែលអ្នកបង្រៀន ។
កត់ត្រាចំណាប់អារម្មណ៍របស់អ្នក
អញ្ជើញឲ្យចែកចាយ
ដើម្បីជួយជ្រោមជ្រែងកុមារនៅក្នុងការរៀនដំណឹងល្អរបស់ពួកគេនៅផ្ទះ សូមអញ្ជើញពួកគេមួយចំនួនឲ្យចែកចាយនូវអ្វីដែលពួកគេបានរៀននៅសប្តាហ៍នេះ ។ សូមពិពណ៌នាអំពីរបៀបដែលអ្នកសិក្សាដំណឹងល្អនៅផ្ទះ និងនិយាយអំពីវិធីនានា ដែលកុមារអាចជួយគ្រួសារពួកគេឲ្យរៀនពីព្រះគម្ពីរមរមន ។
បង្រៀនគោលលទ្ធិ ៖ កុមារតូចៗ
ខ្ញុំអាចសង់គ្រឹះរបស់ខ្ញុំនៅលើព្រះយេស៊ូវគ្រីស្ទបាន ។
ហេលេមិនបានបង្រៀនពួកកូនប្រុសរបស់លោកគឺ នីហ្វៃ និងលីហៃឲ្យសង់ជីវិតរបស់ពួកគេនៅលើសិលានៃព្រះដ៏ប្រោសលោះនៃយើង ។ សូមពិចារណាអំពីរបៀបដែលអ្នកនឹងបង្រៀនរឿងដូចគ្នានេះ ដល់កុមារដែលអ្នកបង្រៀនដែរ ។
សកម្មភាពដែលអាចជ្រើសរើស
-
សូមបង្ហាញរូបភាពព្រះវិហារបរិសុទ្ធ ឬអគារផ្សេងមួយទៀត ហើយពន្យល់ថា អគារនានាត្រូវការគ្រឹះរឹងមាំ ដើម្បីវាមិនរលំចុះពេលមានខ្យល់បក់ និងខ្យល់ព្យុះ ។ ដើម្បីបង្ហាញពីរឿងនេះ សូមអញ្ជើញកុមារឲ្យសាកល្បងរំកិលថ្មមួយដោយផ្លុំដុំថ្មនោះ ។ សូមអានពីរបីជួរដំបូងនៃ ហេលេមិន ៥:១២ ហើយសូមឲ្យកុមារលើកដៃរបស់ពួកគេ នៅពេលពួកគេឮពាក្យ « សិលា » គួរតែជាគ្រឹះរបស់យើង ។
-
សូមអញ្ជើញកុមារឲ្យធ្វើសកម្មភាព នៅពេលអ្នកអាន ហេលេមិន ៥:១២ ។ ឧទាហរណ៍ ពួកគេអាចគ្រវីដៃ ពេលអ្នកអានអំពី « ព្យុះកំណាច » របស់អារក្ស ហើយឈរនៅមួយកន្លែង ពេលអ្នកអានអំពី « សិលានៃព្រះដ៏ប្រោសលោះនៃយើង » ។
-
សូមឲ្យកុមារជួយអ្នកសាងសង់សំណង់មួយដោយប្រើឥដ្ឋ ឬសម្ភារផ្សេងទៀត ។ សូមចាប់ផ្តើមដោយបង្កើត « គ្រឹះដ៏ខ្ជាប់ខ្ជួន » ហើយនិយាយទៅកាន់ពួកគេអំពីរបៀបដែលព្រះយេស៊ូវគ្រីស្ទគួរតែជាគ្រឹះនៃជីវិតរបស់យើង ។ សូមឲ្យកុមារចែកចាយអ្វីដែលពួកគេអាចធ្វើដើម្បីធ្វើតាមព្រះយេស៊ូវគ្រីស្ទ ហើយទុកឲ្យពួកគេបន្ថែមឥដ្ឋទៅលើគ្រឹះនៃសំណង់នោះសម្រាប់ រាល់អ្វីដែលពួកគេចែកចាយ ។
-
សូមអញ្ជើញកុមារឲ្យផាត់ពណ៌រូបភាពនៅទំព័រសកម្មភាព ហើយជួយពួកគេកាត់រូបភាពនោះចេញ ។ តើយើងអាចធ្វើអ្វីខ្លះដើម្បីស្ថាបនាជីវិតរបស់យើងនៅលើគ្រឹះរបស់ព្រះយេស៊ូវគ្រីស្ទ ? សូមចែកចាយរបៀបមួយចំនួនដែលអ្នកបានស្ថាបនាជីវិតរបស់អ្នកលើព្រះអង្គសង្គ្រោះ និងរបៀបដែលការធ្វើបែបនេះបានផ្តល់ពរដល់ជីវិតរបស់អ្នក ។
ព្រះវិញ្ញាណបរិសុទ្ធខ្សឹបប្រាប់ដោយសំឡេងតូចរហៀង ។
ការពិពណ៌នានៅក្នុង ហេលេមិន ៥:២៩–៣០, ៤៥–៤៧ អំពីសំឡេងដែលពួកសាសន៍លេមិនបានឮគឺស្រដៀងទៅនឹងរបៀបដែលយើងពិពណ៌នាជារឿយៗ អំពីរបៀបដែលព្រះវិញ្ញាណបរិសុទ្ធមានបន្ទូល ។ អ្នកអាចប្រើខគម្ពីរទាំងនេះ ដើម្បីជួយកុមារស្គាល់សំឡេងព្រះវិញ្ញាណ ។
សកម្មភាពដែលអាចជ្រើសរើស
-
សូមចែកចាយដំណើររឿងរបស់នីហ្វៃ និងលីហៃនៅក្នុងគុក ។ អ្នកអាចប្រើ « ជំពូកទី ៣៧ ៖ នីហ្វៃ និងលីហៃនៅក្នុងគុក » ( ដំណើររឿងព្រះគម្ពីរមរមន ទំព័រ ៩៩–១០២ ឬមើលវីដេអូដូចគ្នានេះនៅគេហទំព័រ ChurchofJesusChrist.org ) ។ ពេលអ្នកនិយាយអំពីសំឡេងដែលពួកសាសន៍លេមិនឮ សូមនិយាយដោយសំឡេងស្រទន់ ។ សូមតំណាលរឿងនេះពីរបីដង ហើយអញ្ជើញកុមារឲ្យខ្សឹបដាក់អ្នក ។ សូមប្រាប់កុមារពីគ្រាដែលព្រះវិញ្ញាណបរិសុទ្ធបានខ្សឹបប្រាប់អ្នក ហើយបានពង្រឹងទីបន្ទាល់របស់អ្នក ។
-
សូមអាន ហេលេមិន ៥:៣០ ហើយច្រៀងជាមួយកុមារនូវបទចម្រៀងអំពីព្រះវិញ្ញាណបរិសុទ្ធ ដូចជាបទ « The Still Small Voice » Children’s Songbookទំព័រ ១០៦–១០៧ ) ។ សូមចង្អុលបង្ហាញពាក្យនៅក្នុងខគម្ពីរ និងចម្រៀងដែលពិពណ៌នាអំពីរបៀបដែលព្រះវិញ្ញាណបរិសុទ្ធមានបន្ទូលមកកាន់យើង ( សូមមើលផងដែរ ហេលេមិន ៥:៤៥–៤៧ ) ។ សូមប្រើ ហេលេមិន ៥:២៩ និងបទពិសោធន៍ផ្ទាល់របស់អ្នក ដើម្បីចែកចាយជាមួយកុមារនូវឧទាហរណ៍មួយពីរបី អំពីរឿងៗល្អៗដែលព្រះវិញ្ញាណបរិសុទ្ធអាចបំផុសគំនិតឲ្យយើងធ្វើ ។
បង្រៀនគោលលទ្ធិ ៖ កុមារធំៗ
ពេលខ្ញុំបន្ទាបខ្លួន នោះព្រះវរបិតាសួគ៌នឹងប្រទានពរដល់ខ្ញុំ ។
ព្រះគម្ពីរមរមនមាននូវឧទាហរណ៍ជាច្រើនអំពីគ្រោះថ្នាក់នៃភាពឆ្មើងឆ្មៃ និងពរជ័យនៃភាពរាបសា និងឧទាហរណ៍មួយចំនួននេះមាននៅក្នុង ហេលេមិន ១–៦ ។ នៅពេលអ្នកសិក្សាជំពូកទាំងនេះ សូមពិចារណាអំពីរបៀបដែលអ្នកប្រើឧទាហរណ៍ទាំងនេះ ដើម្បីបង្រៀនកុមារនៅក្នុងថ្នាក់របស់អ្នក ។
សកម្មភាពដែលអាចជ្រើសរើស
-
សូមឲ្យកុមារជួយអ្នកគូរដ្យាក្រាមខាងក្រោមអំពី « វដ្តនៃភាពឆ្មើងឆ្មៃ » ខាងក្រោមនៅលើក្តារខៀន ។ សូមអាន ហេលេមិន ៣:២៤, ៣៣–៣៤ និង ៤:១១–១៥ ហើយអញ្ជើញឲ្យកុមារចង្អុលទៅផ្នែកនានានៃវដ្តដែលខគម្ពីរទាំងនេះពិពណ៌នា ។
-
សូមសរសេរពាក្យ រាបសា និង ឆ្មើងឆ្មៃ នៅលើក្តារខៀន ។ សូមសរសេរឧទាហរណ៍ពីរបីអំពីទង្វើនៃភាពរាបសា ឬភាពឆ្មើងឆ្មៃនៅលើបន្ទះក្រដាស ហើយសូមអញ្ជើញកុមារឆ្លាស់វេនគ្នាជ្រើសរើសក្រដាសមួយ និងដាក់វានៅជាប់នឹងពាក្យនៅលើក្តារខៀន ដែលពិពណ៌នាអំពីទង្វើនោះ ។ តើមានរបៀបណាខ្លះដែលយើងអាចជ្រើសរើសដើម្បីមានភាពរាបសា ?
« វដ្តនៃភាពឆ្មើងឆ្មៃ » ។
ខ្ញុំនឹងស្ថាបនាគ្រឹះរបស់ខ្ញុំនៅលើព្រះយេស៊ូវគ្រីស្ទ ។
ហេលេមិន ៥:១២ មានរូបភាពដ៏មានឥទ្ធិពលមួយនៃការស្ថាបនាគ្រឹះរបស់យើងនៅលើព្រះយេស៊ូវគ្រីស្ទ ។ តើអ្នកអាចប្រើរូបភាពនេះដើម្បីបង្ហាញកុមារអំពីគោលការណ៍នេះយ៉ាងដូចម្ដេច ? ការធ្វើដូច្នោះនឹងជួយត្រៀមខ្លួនកុមារសម្រាប់ការល្បួង និងការសាកល្បងដែលពួកគេនឹងប្រឈមមុខ ។
សកម្មភាពដែលអាចជ្រើសរើស
-
សូមយកសម្ភារមួយចំនួនមកកាន់ថ្នាក់រៀន ដែលអាចតំណាងឲ្យគ្រឹះខ្សោយ ឬគ្រឹះរឹងមាំ ( ដូចជាសំឡីដុំ ឬថ្មសំប៉ែត ឬឥដ្ឋការ៉ូ ) ។ សូមឲ្យកុមារសាងសង់ប៉មមួយដោយប្រើឥដ្ឋ ឬសម្ភារផ្សេងទៀតនៅលើប្រភេទផ្សេងៗនៃគ្រឹះ ។ តើមានអ្វីខ្លះដែលធ្វើឲ្យគ្រឹះមួយចំនួនរឹងមាំជាងគ្រឹះផ្សេងទៀត ? សូមអាន ហេលេមិន ៥:១២ ជាមួយគ្នា ហើយសួរកុមារពីមូលហេតុដែលពួកគេគិតថា ព្រះយេស៊ូវគ្រីស្ទគឺជា « គ្រឹះដ៏ខ្ជាប់ខ្ជួន » សម្រាប់ជីវិតរបស់យើង ។ តើយើងអាចសង់ជីវិតរបស់យើងលើទ្រង់យ៉ាងដូចម្ដេច ? សូមអញ្ជើញពួកគេឲ្យស្រាវជ្រាវ ហេលេមិន ៣:២៧–២៩, ៣៥ និង មាត្រានៃសេចក្ដីជំនឿ ១:៤ ដើម្បីស្វែងរកគំនិតនានា ។
-
សូមអញ្ជើញកុមារឲ្យអាន ហេលេមិន ៥:៥–១៤ ត្រួសៗ ហើយរាប់ពាក្យ « ចងចាំ » ចំនួនប៉ុន្មានដងដែលមាននៅក្នុងនោះ ។ តើហេលេមិនបង្រៀនអ្វីខ្លះដល់ពួកកូនប្រុសរបស់លោក ដែលពួកគេគួរតែចងចាំ ? តើការចងចាំអំពីរឿងទាំងនេះជួយយើង ធ្វើឲ្យព្រះយេស៊ូវគ្រីស្ទជាគ្រឹះនៃជីវិតយើងយ៉ាងដូចម្ដេច ?
ការប្រែចិត្តជំនួសភាពងងឹតខាងវិញ្ញាណដោយពន្លឺ ។
សាសន៍លេមិនដែលបានចូលទៅក្នុងគុកដើម្បីសម្លាប់នីហ្វៃ និង លីហៃ ត្រូវបានហ៊ុមព័ទ្ធដោយភាពងងឹតទាំងស្រុង ។ នៅពេលយើងធ្វើអំពីបាប យើងស្ថិតនៅក្នុងភាពងងឹតខាងវិញ្ញាណ ។ ហេលេមិន ៥:២០–៥២ បង្រៀនយើងពីរបៀបដែល « ពពកនៃសេចក្ដីងងឹត » ខាងវិញ្ញាណ អាចត្រូវបានបក់ចេញទៅ ( ខទី ៤១ ) ។
សកម្មភាពដែលអាចជ្រើសរើស
-
សូមធ្វើឲ្យបន្ទប់រៀនមានភាពងងឹតតាមដែលអាចធ្វើបាន បន្ទាប់មកអាន ឬសង្ខេបដំណើររឿងនៅក្នុង ហេលេមិន ៥:២០–៤០ ដោយប្រើពិលតូចមួយ ។ តើពួកសាសន៍លេមិនអាចទទួលអារម្មណ៍បែបណាអំឡុងពេលងងឹតនោះ ? សូមឲ្យកុមារស្តាប់រកអ្វីដែលអ័មីណាដាប់បានបង្រៀនប្រជាជនឲ្យធ្វើ ដើម្បីឲ្យភាពងងឹតនោះបក់ចេញទៅ បន្ទាប់មកសូមអាន ខទី ៤១ ។ បន្ទាប់មក សូមបើកភ្លើងវិញ ហើយអាន ខទី ៤២–៤៨ ជាមួយគ្នា ។ តើខគម្ពីរទាំងនេះបង្រៀនយើងអ្វីខ្លះ អំពីពរជ័យដែលការប្រែចិត្តនាំឲ្យកើតមានក្នុងជីវិតយើង ?
-
សូមឲ្យកុមារស្រមៃថា ពួកគេកំពុងបង្រៀនកុមារតូចជាងពួកគេអំពីព្រះវិញ្ញាណបរិសុទ្ធ ។ តើពួកគេអាចប្រើ ហេលេមិន ៥:២៩–៣៣, ៤៤–៤៧ ដើម្បីបង្រៀនថា តើសំឡេងនៃព្រះវិញ្ញាណមានសភាពបែបណា ហើយតើព្រះវិញ្ញាណប្រាប់យើងនូវរឿងអ្វីខ្លះ ? តើព្រះវិញ្ញាណបរិសុទ្ធបំផុសគំនិតឲ្យអ្នកប្រែចិត្តដូចម្ដេច ? សូមឲ្យកុមារចែកចាយបទពិសោធន៍ ពេលពួកគេទទួលអារម្មណ៍សុខសាន្ត និងការលួងលោមពីព្រះវិញ្ញាណបរិសុទ្ធ ។
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមឲ្យកុមារសួរសមាជិកគ្រួសាររបស់ពួកគេ អំពីរបៀបដែលពួកគេបានស្ថាបនាជីវិតរបស់ពួកគេលើព្រះយេស៊ូវគ្រីស្ទ ។ ឬពួកគេអាចចែកចាយជាមួយសមាជិកគ្រួសារពួកគេ អំពីរបៀបដែលពួកគេគ្រោងស្ថាបនាជីវិតរបស់ពួកគេផ្ទាល់លើទ្រង់ ។
ការកែលម្អការបង្រៀនរបស់យើង
សូមថ្លែងទីបន្ទាល់អំពីព្រះយេស៊ូវគ្រីស្ទ ។ អ្នកមានឱកាសដ៏ពិសិដ្ឋដើម្បីជួយពង្រឹងទីបន្ទាល់កុមារនៅក្នុងថ្នាក់របស់អ្នកឲ្យរីកចម្រើន ។ សូមជួយពួកគេឲ្យទទួលអារម្មណ៍នៃសេចក្តីស្រឡាញ់របស់ព្រះយេស៊ូវចំពោះពួកគេ ហើយថ្លែងទីបន្ទាល់របស់អ្នកអំពីទ្រង់ជារឿយៗ ។