« ថ្ងៃទី ២៧ ខែ កក្កដា–ថ្ងៃទី ២ ខែ សីហា អាលម៉ា ៣៩–៤២ ៖ ‹ ផែនការនៃសុភមង្គលដ៏មហិមា › » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ព្រះគម្ពីរមរមន ឆ្នាំ ២០២០ ( ឆ្នាំ ២០២០ )

« ថ្ងៃទី ២៧ ខែ កក្កដា–ថ្ងៃទី ២ ខែ សីហា អាលម៉ា ៣៩–៤២ » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ឆ្នាំ ២០២០

នាងអើយ ហេតុអ្វីបានជាយំ ? ដោយ ម៉ាក អរ ផាហ្វ

ថ្ងៃទី ២៧ ខែ កក្កដា–ថ្ងៃទី ២ ខែ សីហា

អាលម៉ា ៣៩–៤២

« ផែនការនៃសុភមង្គលដ៏មហិមា »

បន្ទាប់ពីសិក្សា អាលម៉ា ៣៩–៤២ ប្រកបដោយការអធិស្ឋានមក សូមដាក់ផែនការសកម្មភាពជួយកុមារដែលអ្នកបង្រៀន ។ អ្នកអាចរកឃើញគំនិតនានាក្នុងចំណោមសកម្មភាពខាងក្រោមនេះ ដែលអាចកែសម្រួលឲ្យស្របនឹងក្រុមអាយុណាមួយ ។

កត់ត្រាចំណាប់អារម្មណ៍របស់អ្នក

អញ្ជើញឲ្យចែកចាយ

សូមឲ្យកុមារម្នាក់ៗក្រោកឈរ ហើយចែកចាយអ្វីមួយអំពីដំណឹងល្អ ដែលគាត់បានរៀនថ្មីៗនេះនៅផ្ទះ ឬនៅព្រះវិហារ ។

បង្រៀនគោលលទ្ធិ ៖ កុមារតូចៗ

អាលម៉ា ៣៩:១, ១០–១១

ខ្ញុំអាចធ្វើជាគំរូល្អបាន ។

អាលម៉ាបានលើកទឹកចិត្តកូរីអានតុនឲ្យរៀនពីគំរូល្អរបស់បងៗគាត់ ហើយលោកបានព្រមានកូរីអានតុន មិនឲ្យធ្វើជាគំរូអវិជ្ជាមានដល់មនុស្សដទៃឡើយ ។

សកម្មភាពដែលអាចជ្រើសរើស

សូមពន្យល់ថា ស៊ិបឡុន និង កូរីអានតុនគឺជាបងប្អូននឹងគ្នា ហើយស៊ិបឡុនធ្វើជាគំរូល្អដល់កូរីអានតុន ។ សូមអញ្ជើញកុមារឲ្យនិយាយសំណួរនេះតាមអ្នក ៖ « តើបងរបស់កូនពុំមែនជាគំរូមួយសម្រាប់កូនទេឬអី ? » ( អាលម៉ា ៣៩:១ ) ។ សូមឲ្យកុមារប្រាប់អំពីនរណាដែលជាគំរូល្អដល់ពួកគេ ។
សូមលេងល្បែងកម្សាន្ត ឬច្រៀងចម្រៀងជាមួយកុមារដែលធ្វើតាម ឬធ្វើត្រាប់តាម ដូចជាបទ « ធ្វើតាមដូចខ្ញុំធ្វើ » ( សៀវភៅចម្រៀងកុមារ ទំព័រ ១៤៨ ) ។ សូមទុកឲ្យកុមារម្នាក់ៗមានឱកាសធ្វើជាអ្នកដឹកនាំ ឬគំរូគេ ។ សូមសួរកុមារពីរបៀបដែលពួកគេអាចធ្វើជាគំរូល្អដល់នរណាម្នាក់ ។
សូមបង្ហាញរូបភាពព្រះយេស៊ូវគ្រីស្ទធ្វើកិច្ចការល្អ ហើយពន្យល់ថា ទ្រង់គឺជាគំរូឥតខ្ចោះរបស់យើង ។ សូមពន្យល់ថា យើងអាចធ្វើជាគំរូល្អ ដូចព្រះយេស៊ូវបានធ្វើផងដែរ ។ សូមអញ្ជើញកុមារឲ្យគូររូបខ្លួនឯងដែលធ្វើជាគំរូល្អ ។

អាលម៉ា ៣៩:៩, ១៣

ព្រះវរបិតាសួគ៌ និងព្រះយេស៊ូវគ្រីស្ទអាចជួយខ្ញុំឲ្យកែកំហុសរបស់ខ្ញុំ ។

ទោះបីជាកុមារតូចៗពុំត្រូវការប្រែចិត្តក្តី ក៏ការប្រាប់ពួកគេអំពីកូរីអានតុនអាចជួយពួកគេ ឲ្យចាប់ផ្តើមយល់អំពីអត្ថន័យនៃការប្រែចិត្តបានដែរ ។

សកម្មភាពដែលអាចជ្រើសរើស

ដោយពុំពន្យល់លម្អិតអំពីលក្ខណៈនៃអំពើបាបរបស់គាត់ សូមពន្យល់ថា កូរីអានតុនបានជ្រើសរើសធ្វើខុស ។ តើយើងអាចនិយាយអ្វីខ្លះដើម្បីជួយគាត់ ? សូមអានឲ្យកុមារស្តាប់នូវអ្វីដែលអាលម៉ាជាឪពុករបស់កូរីអានតុន បាននិយាយទៅកាន់គាត់ ៖ « កូនត្រូវប្រែចិត្ត ហើយបោះបង់ចោលអំពើបាបទាំងឡាយរបស់កូន » ( អាលម៉ា ៣៩:៩ ) ។ សូមប្រាប់ពួកគេថា « ប្រែចិត្ត » មានន័យថា យើងទូលសូមព្រះវរបិតាសួគ៌ និងព្រះយេស៊ូវគ្រីស្ទ ឲ្យអត់ទោសយើង ហើយជួយយើងឲ្យកែកំហុសរបស់យើង ហើយបន្ទាប់មកយើងអាចក្លាយដូចជាពួកទ្រង់ ។
សូមឲ្យអ្វីមួយដែលធ្ងន់ទៅកុមារម្នាក់កាន់ ខណៈអ្នកប្រាប់រឿងមួយអំពីបុគ្គលម្នាក់បានធ្វើខុស ហើយមានអារម្មណ៍មិនល្អ ។ សូមប្រាប់កុមារថា វត្ថុនោះគឺដូចជាអារម្មណ៍មិនល្អ នោះ ដែលយើងមានពេលយើងធ្វើខុស ។ សូមយកវត្ថុធ្ងន់នោះពីកុមារមកវិញនៅពេលអ្នកថ្លែងទីបន្ទាល់ថា ព្រះវរបិតាសួគ៌ និងព្រះយេស៊ូវគ្រីស្ទ អាចយកទម្ងន់នៃអារម្មណ៍មិនល្អនោះចេញបាន ហើយជួយយើងកែកំហុសយើងពេលយើងប្រែចិត្ត ។ សូមច្រៀងចម្រៀងមួយបទអំពីការប្រែចិត្ត ដូចជាបទ « Repentance » ( Children’s Songbook ទំព័រ ៩៨ ) ។

អាលម៉ា ៤០:២៣

ខ្ញុំនឹងរស់ឡើងវិញ ។

សូមជួយកុមារឲ្យទន្ទឹងចាំថ្ងៃដែលពួកគេ និងមនុស្សជាទីស្រឡាញ់របស់ពួកគេនឹងរស់ឡើងវិញម្ដងទៀត ។

សកម្មភាពដែលអាចជ្រើសរើស

ខណៈអ្នកអាន អាលម៉ា ៤០:២៣ ឭៗ សូមឲ្យកុមារប្រើទំព័រសកម្មភាពសប្តាហ៍នេះ ដើម្បីជួយពួកគេឲ្យស្រមៃពីអ្វីដែលខគម្ពីរនេះបង្រៀន ។ សូមអញ្ជើញកុមារម្នាក់ៗប្រើទំព័រសកម្មភាព ដើម្បីបង្រៀនកុមារផ្សេងទៀតអំពីការរស់ឡើងវិញ ។
សូមបង្ហាញរូបភាពព្រះអង្គសង្គ្រោះដែលមានព្រះជន្មរស់ឡើងវិញ ហើយបង្រៀនកុមារនូវចម្រៀងមួយបទអំពីការមានព្រះជន្មរស់ឡើងវិញ ដូចជា « តើព្រះយេស៊ូវរស់ឡើងវិញឬ ? » ឬ « ទ្រង់រស់ឡើងវិញ » ( សៀវភៅចម្រៀងកុមារ ទំព័រ ៤៥, ទំនុកតម្កើង លេខ ១២១ ) ។ សូមឈប់ម្តងម្កាលដើម្បីពន្យល់ពីអត្ថន័យ និងពាក្យ និងឃ្លាសំខាន់ៗ ។
សូមសួរកុមារ ប្រសិនបើមាននរណាម្នាក់ដែលពួកគេស្គាល់បានស្លាប់ ។ សូមថ្លែងទីបន្ទាល់របស់អ្នកថា បុគ្គលនោះ និងមនុស្សផ្សេងទៀតនឹងរស់ឡើងវិញ ដោយសារតែព្រះយេស៊ូវគ្រីស្ទ ។ ប្រសិនបើចាំបាច់ សូមប្រើទំព័រសកម្មភាពសប្តាហ៍នេះ ដើម្បីពន្យល់ពីអត្ថន័យនៃការរស់ឡើងវិញ ។

ម៉ារា និងព្រះអម្ចាស់ដែលមានព្រះជន្មរស់ឡើងវិញ ដោយ ហារី អាន់ឌើរសិន

បង្រៀនគោលលទ្ធិ ៖ កុមារធំៗ

អាលម៉ា ៣៩:១, ១០–១១

ខ្ញុំអាចធ្វើជាគំរូល្អបាន ។

ការទូន្មានរបស់អាលម៉ាដល់កូរីអានតុនអាចជួយកុមារ យល់ពីសារៈសំខាន់នៃការធ្វើតាម និងធ្វើជាគំរូល្អ ។

សកម្មភាពដែលអាចជ្រើសរើស

សូមពន្យល់ថា កូរីអានតុនកូនប្រុសរបស់អាលម៉ាបានប្រព្រឹត្តិអំពើបាបធ្ងន់ធ្ងរ ខណៈគាត់គួរតែប្រកាសដំណឹងល្អ ។ សូមអាន អាលម៉ា ៣៩:១១ តែពាក់កណ្តាលចុងក្រោយជាមួយកុមារ ហើយសូមឲ្យពួកគេស្តាប់រកអំពើបាបរបស់កូរីអានតុនបានជះឥទ្ធិពលដល់ពួកសាសន៍សូរាំ ។ សូមជួយកុមារឲ្យគិតអំពីមនុស្សដែលអាចទទួលរងឥទ្ធិពលពីទង្វើរបស់ពួកគេ ។ តើពួកគេអាចធ្វើជាគំរូល្អដល់មនុស្សទាំងនេះតាមរបៀបណា ?
សូមអាន អាលម៉ា ៣៩:១ ជាមួយគ្នា ។ តើស៊ិបឡុនដែលជាបងប្រុសរបស់កូរីអានតុនបានធ្វើជាគំរូល្អដូចម្តេច ? សូមឲ្យកុមាររកមើលចម្លើយបន្ថែមចំពោះសំណួរនេះនៅក្នុង អាលម៉ា ៣៨:២–៤ ។ សូមប្រាប់អំពីគំរូល្អមួយចំនួននៅក្នុងជីវិតអ្នក ហើយអញ្ជើញកុមារឲ្យប្រាប់ពីរឿងនោះផងដែរ ។ សូមបង្ហាញវីដេអូ « Lessons I Learned as a Boy » ( ChurchofJesusChrist.org ) រួចសួរកុមារថា តើកុមារច្បងគឺជាគំរូល្អដូចម្តេច ?
សូមយកពិល ឬរូបភាពព្រះអាទិត្យមួយមក ហើយប្រៀបធៀបពន្លឺវាទៅនឹងឥទ្ធិពលនៃគំរូសុចរិត ។ ដូចជាពន្លឺពិល ឬពន្លឺព្រះអាទិត្យអាចជួយយើងមើលឃើញផ្លូវដែលយើងត្រូវដើរតាមដែរ នោះគំរូសុចរិតបង្ហាញយើងនូវអ្វីដែលត្រូវធ្វើ ដើម្បីដើរតាមព្រះវរបិតាសួគ៌ ។ សូមចែកចាយបទពិសោធន៍មួយ ពេលគំរូល្អរបស់នរណាម្នាក់បានជួយដល់អ្នក ។ តើកុមារអាចធ្វើអ្វីខ្លះដើម្បីធ្វើជាគំរូល្អដល់មនុស្សដទៃ ? សូមថ្លែងទីបន្ទាល់ថា ព្រះយេស៊ូវគ្រីស្ទគឺជាគំរូដ៏ឥតខ្ចោះរបស់យើង ។

អាលម៉ា ៣៩:៩–១៣

ខ្ញុំអាចប្រែចិត្តបាន ពេលខ្ញុំធ្វើខុស ។

ដូចជាយើងទាំងអស់គ្នាដែរ កុមារដែលអ្នកបង្រៀនមានបាប និងធ្វើខុស ។ តើអ្នកអាចបំផុសគំនិតពួកគេឲ្យ « បោះបង់ចោលអំពើបាប [ របស់ពួកគេ ] ហើយប្រែចិត្ត ដោយរបៀបណា ? ( អាលម៉ា ៣៩:៩ ) ។

សកម្មភាពដែលអាចជ្រើសរើស

សូមឲ្យកុមារចែកចាយបទពិសោធន៍មួយ ពេលពួកគេមានរបួស ។ តើពួកគេបានធ្វើអ្វីខ្លះដើម្បីជួយឲ្យរបួសរបស់ពួកគេបានជា ? សូមពន្យល់ថា អំពើបាបធ្វើឲ្យវិញ្ញាណយើងរងរបួស ប៉ុន្តែព្រះអង្គសង្គ្រោះអាចជួយព្យាបាលយើង ពេលយើងប្រែចិត្ត ។
សូមឲ្យកុមារស្វែងរកឃ្លា « ប្រែចិត្ត ហើយបោះបង់ចោលអំពើបាបទាំងឡាយរបស់កូន » នៅក្នុង អាលម៉ា ៣៩:៩ ហើយជួយពួកគេឲ្យយល់ពីអត្ថន័យនៃពាក្យ « ប្រែចិត្ត » និង « បោះបង់ចោល » ។ សូមថ្លែងទីបន្ទាល់ថា ការប្រែចិត្តអាចធ្វើទៅបានតាមរយៈព្រះយេស៊ូវគ្រីស្ទ និងដង្វាយធួនរបស់ទ្រង់ ។ សូមអាន អាលម៉ា ៣៩:១០–១៤ ជាមួយគ្នាដើម្បីស្វែងរកអ្វីផ្សេងទៀតដែលយើងអាចធ្វើ ដែលនឹងជួយយើងឲ្យប្រែចិត្ត និងចៀសវាងពីអំពើបាប ។

អាលម៉ា ៤០:៦–៧, ១១–១៤, ២១–២៣

បន្ទាប់ពីស្លាប់ វិញ្ញាណយើងទៅភពវិញ្ញាណរហូតដល់ការរស់ឡើងវិញ និងការជំនុំជម្រះ ។

វាជារឿងធម្មតាដើម្បីឆ្ងល់ថា តើមានអ្វីកើតឡើងបន្ទាប់ពីយើងស្លាប់ ។ ពាក្យរបស់អាលម៉ាអាចជួយកុមារឲ្យស្វែងរកចម្លើយបំផុសគំនិត ។

សកម្មភាពដែលអាចជ្រើសរើស

សូមសរសេរ សេចក្តីស្លាប់, ភពវិញ្ញាណ, ការរស់ឡើងវិញ និង ការជំនុំជម្រះ នៅលើក្រដាសផ្សេងៗគ្នា ហើយដាក់វានៅលើក្តារខៀនក្នុងលំដាប់មិនរៀបរយ ។ សូមជួយកុមារឲ្យយល់ពីអត្ថន័យនៃពាក្យទាំងនេះ ។ សូមអាន អាលម៉ា ៤០:៦–៧, ១១–១៤ និង ២១–២៣ ជាមួយកុមារ ហើយសូមឲ្យពួកគេដាក់ពាក្យនៅលើក្តារខៀននោះតាមលំដាប់លំដោយដែលវាកើតឡើង ។
សូមសរសេរបញ្ជីរសំណួរដែល អាលម៉ា ៤០:៦–៧, ១១–១៤ និង ២១–២៣ អាចឆ្លើយបាននៅលើក្តារខៀន ហើយអញ្ជើញកុមារឲ្យផ្គូផ្គងសំណួរនីមួយៗ ជាមួយនឹងខគម្ពីរដែលឆ្លើយសំណួរនោះ ។ ឧទាហរណ៍ « តើរូបកាយរបស់ខ្ញុំនឹងមានសភាពបែបណាពេលខ្ញុំរស់ឡើងវិញ ? » ដែលមានចម្លើយនៅក្នុង អាលម៉ា ៤០:២៣ ។ ប្រសិនបើចាំបាច់ សូមពន្យល់ពាក្យពិបាកៗដល់កុមារពេលពួកគេអាន ។ សូមលើកទឹកចិត្តកុមារឲ្យចែកចាយពីមូលហេតុដែលពួកគេមានអំណរគុណចំពោះផែនការរបស់ព្រះវរបិតាសួគ៌ ។

លើកទឹកចិត្តឲ្យមានការរៀនសូត្រនៅឯគេហដ្ឋាន

សូមលើកទឹកចិត្តកុមារឲ្យថ្លែងអំណរគុណសមាជិកគ្រួសារដែលធ្វើជាគំរូល្អដល់ពួកគេ ហើយគិតអំពីរបៀបមួយដែលពួកគេអាចធ្វើជាគំរូល្អក្នុងសប្តាហ៍នេះ ។

ការកែលម្អការបង្រៀនរបស់យើង

ដាក់បញ្ចូលញាណទាំងឡាយ ។ « កុមារភាគច្រើន ( និងមនុស្សពេញវ័យ ) រៀនសូត្រឆាប់ចេះ នៅពេលមានការដាក់បញ្ចូលញាណទាំងឡាយ ។ សូមស្វែងរករបៀបដើម្បីជួយកុមារតូចៗឲ្យប្រើចក្ខុវិញ្ញាណ សោតវិញ្ញាណ និងកាយវិញ្ញាណរបស់ពួកគេនៅពេលពួកគេរៀន » ( ការបង្រៀនតាមរបៀបរបស់ព្រះអង្គសង្គ្រោះ ទំព័រ ២៥ ) ។