« ថ្ងៃទី ២–៨ ខែ វិច្ឆិកា មរមន ៧–៩ ៖ ‹ ខ្ញុំនិយាយទៅកាន់អ្នករាល់គ្នា ហាក់បីដូចជាអ្នករាល់គ្នានៅទីនេះ › » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ព្រះគម្ពីរមរមន ឆ្នាំ ២០២០ ( ឆ្នាំ ២០២០ )

« ថ្ងៃទី ២–៨ ខែ វិច្ឆិកា មរមន ៧–៩ » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ឆ្នាំ ២០២០

មរ៉ូណៃសរសេរនៅលើផ្ទាំងចំណារមាស ដោយ ដេល គីលប៊ន

ថ្ងៃទី ២–៨ ខែ វិច្ឆិកា

មរមន ៧–៩

« ខ្ញុំនិយាយទៅកាន់អ្នករាល់គ្នា ហាក់បីដូចជាអ្នករាល់គ្នានៅទីនេះ »

ពេលអ្នកអាន មរមន ៧–៩ សូមពិចារណាពីអ្វីដែលអ្នកប្រាថ្នាចង់ឲ្យកុមារដែលអ្នកបង្រៀនបានដឹងខ្លាំងបំផុត ។ សូមដាក់ផែនការដើម្បីបង្រៀនសេចក្តីពិតដែលអ្នកទទួលអារម្មណ៍ថា នឹងផ្តល់ពរដល់ជីវិតរបស់ពួកគេ ។

កត់ត្រាចំណាប់អារម្មណ៍របស់អ្នក

អញ្ជើញឲ្យចែកចាយ

សូមហុចព្រះគម្ពីរមរមនមួយក្បាលតៗគ្នា ។ ពេលដល់វេនពួកគេកាន់គម្ពីរសូមអញ្ជើញកុមារឲ្យចែកចាយអ្វីមួយដែលពួកគេបានរៀនពីវា ។ ប្រសិនបើពួកគេត្រូវការជំនួយ សូមរំឭកពួកគេអំពីអ្វីដែលពួកគេបានរៀនថ្មីៗនេះនៅក្នុងថ្នាក់ ។

បង្រៀនគោលលទ្ធិ ៖ កុមារតូចៗ

មរមន ៧:៨–១០

ទាំងព្រះគម្ពីរមរមន និងព្រះគម្ពីរប៊ីបថ្លែងទីបន្ទាល់អំពីព្រះយេស៊ូវគ្រីស្ទ ។

មរមនបានបង្រៀនថា ព្រះគម្ពីរមរមនត្រូវបានសរសេរឡើង ដើម្បីជួយយើងឲ្យជឿលើព្រះគម្ពីរប៊ីប ហើយអ្នកណាដែលជឿលើព្រះគម្ពីរប៊ីបនឹងជឿលើព្រះគម្ពីរមរមនដែរ ។

សកម្មភាពដែលអាចជ្រើសរើស

សូមបង្ហាញ ទំព័រចំណងជើងនៃព្រះគម្ពីរមរមន ដល់កុមារ ហើយចង្អុលទៅពាក្យនៃចំណងជើង ពេលអ្នកអានវា ដោយសង្កត់ធ្ងន់ទៅលើពាក្យ មួយទៀត ។ សូមជួយកុមារឲ្យគិតអំពីគម្ពីរផ្សេងទៀតដែលបង្រៀនពួកយើងអំពីព្រះយេស៊ូវ ។ សូមបង្ហាញពួកគេថា ព្រះគម្ពីរប៊ីបមានព្រះគម្ពីរសញ្ញាចាស់ និងព្រះគម្ពីរសញ្ញាថ្មី ។ សូមជួយកុមារឲ្យនិយាយពាក្យ « ព្រះគម្ពីរសញ្ញាចាស់ ព្រះគម្ពីរសញ្ញាថ្មី » ពេលអ្នកចង្អុលទៅព្រះគម្ពីរប៊ីប និង « សក្ខីបទមួយទៀត » ពេលអ្នកចង្អុលទៅព្រះគម្ពីរមរមន ។
សូមដាក់តាំងផែនទីពិភពលោកមួយ ឬទំព័រសកម្មភាពសម្រាប់គម្រោងមេរៀននេះជាមួយនឹងព្រះគម្ពីរប៊ីប និងព្រះគម្ពីរមរមន ។ សូមប្រើសម្ភារទាំងនេះ ដើម្បីបង្រៀនកុមារថា ព្រះគម្ពីរប៊ីបគឺជាកំណត់ត្រានៃការបង្រៀនរបស់ ព្រះយេស៊ូវនៅក្នុង និងជុំវិញទីក្រុងយេរូសាឡិម ហើយព្រះគម្ពីរមរមនគឺជាកំណត់ត្រានៃការបង្រៀនរបស់ទ្រង់នៅទ្វីបអាមេរិក ។
សូមប្រើព្រឹត្តិការណ៍ និងសេចក្តីពិតបីបួនដែលទាំងព្រះគម្ពីរប៊ីប និងព្រះគម្ពីរមរមនថ្លែងទីបន្ទាល់ ដូចជា ការប្រសូត ការសុគត និងការមានព្រះជន្មរស់ឡើងវិញរបស់ព្រះយេស៊ូវ ។ សូមបង្ហាញរូបភាពមកពី សៀវភៅរូបភាពដំណឹងល្អ ដែលបង្ហាញពីព្រឹត្តិការណ៍ និងសេចក្តីពិតទាំងនេះ ។ សូមឲ្យកុមារពិពណ៌នាអ្វីដែលពួកគេឃើញនៅក្នុងរូបភាព ហើយប្រាប់ពួកគេថា ទាំងព្រះគម្ពីរប៊ីប និងព្រះគម្ពីរមរមនបង្រៀនអំពីរឿងទាំងនេះ ។

មរមន ៨:៣

ខ្ញុំអាចជ្រើសរើសត្រូវ ទោះបីពេលខ្ញុំមានអារម្មណ៍ឯកោក្តី ។

មរ៉ូណៃគឺជាសាសន៍នីហ្វៃសុចរិតចុងក្រោយគេ ប៉ុន្តែលោកបានបន្តស្មោះត្រង់ចំពោះទីបន្ទាល់របស់លោក ។ សូមជួយកុមារឲ្យរៀនចេញពីគំរូរបស់លោក ។

សកម្មភាពដែលអាចជ្រើសរើស

សូមអាន មរមន ៨:៣ ដោយសង្កត់ធ្ងន់ថា មរ៉ូណៃនៅតែឯង ប៉ុន្តែលោកនៅតែគោរពបទបញ្ញត្តិ រួមទាំងបទបញ្ញត្តិឲ្យបញ្ចប់ការសរសេរព្រះគម្ពីរមរមនផងដែរ ។ សូមចែកចាយពីគ្រាមួយពេលអ្នកមានចិត្តស្មោះត្រង់ ទោះបីពេលអ្នកមានអារម្មណ៍ឯកោក្តី ។
បន្ទាប់ពីការពិភាក្សាអំពីគំរូរបស់មរ៉ូណៃមក សូមចែកចាយស្ថានភាពមួយចំនួនដែលកុមារត្រូវសម្រេចចិត្តថា តើត្រូវជ្រើសរើសត្រូវឬអត់ ទោះបីគ្មាននរណាម្នាក់កំពុងមើលពួកគេក្តី ។ តើមរ៉ូណៃបានធ្វើអ្វីខ្លះ ?
សូមច្រៀងចម្រៀងជាមួយកុមារនូវបទចម្រៀងមួយបទអំពីការជ្រើសរើសត្រូវ ដូចជាបទ « ឈរដោយសុចរិត » ( សៀវភៅចម្រៀងកុមារ ទំព័រ ៨១ ) ។ ហេតុអ្វីវាសំខាន់ដើម្បីជ្រើសរើសត្រូវគ្រប់ពេលទាំងអស់ ទោះបីពេលអ្នកនៅតែឯងក្តី ?

មរមន ៩:៧–២១

ព្រះគឺជា « ព្រះនៃអព្ភូតហេតុ » ។

សូមជួយកុមារឲ្យយល់ថា អព្ភូតហេតុមានសារៈសំខាន់នៅក្នុងកិច្ចការរបស់ព្រះ ហើយព្រះនឹងសម្តែងអព្ភូតហេតុ ពេលរាស្ត្ររបស់ទ្រង់មានសេចក្តីជំនឿ ។

សកម្មភាពដែលអាចជ្រើសរើស

សូមពន្យល់ថា អព្ភូតហេតុគឺជាអ្វីដែលព្រះបានធ្វើឡើង ដើម្បីបង្ហាញព្រះចេស្តា និងប្រទានពរដល់ជីវិតរបស់យើង ( សូមមើល សេចក្តីណែនាំដល់បទគម្ពីរទាំងឡាយ « អព្ភូតហេតុ » ) ។ សូមអានពាក្យ និងឃ្លានានាមកពី មរមន ៩:១១–១៣, ១៧ ដែលពិពណ៌នាអំពីអព្ភូតហេតុមួយចំនួនរបស់ព្រះ ។ សូមជួយកុមារឲ្យគិតពីអព្ភូតហេតុផ្សេងទៀតដែលមាននៅក្នុងព្រះគម្ពីរ ( រូបភាពមកពី សៀវភៅរូបភាពដំណឹងល្អ ដូចជា លេខ ២៦, ៤០, ៤១ និង ៨៣ អាចជួយបាន ) ។ សូមថ្លែងទីបន្ទាល់ថា ព្រះបានសម្តែងអព្ភូតហេតុកាលពីជំនាន់បុរាណ ហើយទ្រង់នៅតែសម្តែងអព្ភូតហេតុនៅសព្វថ្ងៃនេះ ។
សូមចែកចាយបទពិសោធន៍មួយ ពេលអ្នកបានឃើញអព្ភូតហេតុនៅក្នុងសាសនាចក្រសព្វថ្ងៃនេះ ឬនៅក្នុងជីវិតរបស់អ្នកផ្ទាល់ ។ សូមថ្លែងទីបន្ទាល់របស់អ្នកថា ព្រះគឺជា « ព្រះនៃអព្ភូតហេតុ » ( មរមន ៩:១១ ) ។

បង្រៀនគោលលទ្ធិ ៖ កុមារធំៗ

មរមន ៧:៨–១០

ទាំងព្រះគម្ពីរមរមន និងព្រះគម្ពីរប៊ីបថ្លែងទីបន្ទាល់អំពីព្រះយេស៊ូវគ្រីស្ទ ។

មរមនបានបង្រៀនថា « ដំណឹងល្អនៃព្រះគ្រីស្ទ… នឹងបានបង្ហាញនៅចំពោះមុខ [ យើង ] » ទាំងនៅក្នុងព្រះគម្ពីរប៊ីប និងព្រះគម្ពីរមរមន ។ សូមពិចារណាអំពីរបៀបដែលអ្នកនឹងបង្រៀនកុមារថា ព្រះគម្ពីរពិសិដ្ឋទាំងពីរនេះមានសារៈសំខាន់សម្រាប់ពួកយើង ។

សកម្មភាពដែលអាចជ្រើសរើស

សូមសរសេរ មរមន ៧:៩ នៅលើក្តារខៀន ប៉ុន្តែទុកចន្លោះនៅក្នុងកន្លែងនៃពាក្យ នេះ និង នោះ ។ ក៏សូមសរសេរពាក្យ នេះ = ព្រះគម្ពីរមរមន និងពាក្យ នោះ = ព្រះគម្ពីរប៊ីប នៅលើក្តារខៀន ។ សូមឲ្យកុមារអាន មរមន ៧:៩ ឮៗ ហើយប្រើឃ្លានានានៅលើក្តារខៀន ដើម្បីបំពេញនៅក្នុងចន្លោះទាំងនោះ ។ តើយើងរៀនអ្វីខ្លះអំពីព្រះគម្ពីរប៊ីប និងព្រះគម្ពីរមរមនមកពីខគម្ពីរនេះ ?
សូមបង្ហាញព្រះគម្ពីរមរមន និងព្រះគម្ពីរប៊ីប ។ សូមចែកចាយរឿងមួយចំនួនមកពីគម្ពីរនីមួយៗ ដោយបង្ហាញរូបភាពប្រសិនបើមាន ( សូមមើល សៀវភៅរូបភាពដំណឹងល្អ ) ។ សូមអញ្ជើញកុមារឲ្យចង្អុលទៅគម្ពីរដែលរឿងនោះត្រូវបានដកស្រង់ចេញពីវា ។ ហេតុអ្វីយើងចាំបាច់ត្រូវការសៀវភៅទាំងពីរនេះ ?
សូមសរសេរពាក្យនីមួយៗនៃមាត្រានៃសេចក្តីជំនឿខទីប្រាំបី នៅលើបន្ទះក្រដាសផ្សេងៗគ្នា ។ សូមឲ្យបន្ទះក្រដាសមួយ ឬពីរសន្លឹកដែលមានពាក្យទាំងនោះទៅកុមារម្នាក់ៗ ហើយអញ្ជើញកុមារឲ្យធ្វើការតម្រាប់ជាមួយគ្នាដោយដាក់ពាក្យទាំងនោះ ឲ្យត្រូវតាមលំដាប់លំដោយ ។ បន្ទាប់មក សូមឲ្យពួកគេអានមាត្រានៃសេចក្តីជំនឿនោះបីបួនដងឡើងវិញ ។ តើវាបង្រៀនយើងអ្វីខ្លះ ?

ព្រះគម្ពីរមរមនថ្លែងទីបន្ទាល់អំពីព្រះយេស៊ូវគ្រីស្ទ ។

មរមន ៨:១–៧

ខ្ញុំអាចជ្រើសរើសត្រូវ ទោះបីពេលខ្ញុំមានអារម្មណ៍ឯកោក្ដី ។

ការតាំងចិត្តរបស់មរ៉ូណៃដើម្បី « បំពេញបញ្ជារបស់ឪពុក [ គាត់ ] » ទោះបីឪពុកគាត់បានស្លាប់បាត់ទៅហើយក្តី អាចបំផុសគំនិតកុមារឲ្យគោរពបទបញ្ញត្តិរបស់ព្រះ ។

សកម្មភាពដែលអាចជ្រើសរើស

សូមអាន មរមន ៨:១–៧ ជាមួយកុមារ ហើយអញ្ជើញពួកគេឲ្យចែកចាយអារម្មណ៍ដែលពួកគេអាចមាន ប្រសិនបើពួកគេជាមរ៉ូណៃ ។ សូមឲ្យពួកគេមើល ខទី ១, ៣ និង ៤ ម្តងទៀត ដើម្បីស្វែងរកអ្វីដែលមរ៉ូណៃត្រូវបានបង្គាប់ឲ្យធ្វើ ។ តើមរ៉ូណៃបាន « បំពេញបញ្ជារបស់ឪពុក [ គាត់ ] » យ៉ាងដូចម្ដេច ? តើយើងអាចធ្វើដូចជាមរ៉ូណៃយ៉ាងដូចម្តេច ?
សូមអញ្ជើញកុមារម្នាក់ៗឲ្យកត់ត្រាស្ថានភាពមួយ ដែលពួកគេបានធ្វើការជម្រើសមួយរវាងរឿងត្រូវ ឬខុស នៅពេលគ្មាននរណាម្នាក់កំពុងមើលឃើញពួកគេ ។ សូមដាក់គំនិតរបស់ពួកគេនៅក្នុងដបមួយ ហើយឲ្យកុមារឆ្លាស់វេនគ្នា រើសយកស្ថានភាពមួយ ហើយចែកចាយអ្វីដែលពួកគេនឹងធ្វើដូចមរ៉ូណៃ ។

មរមន ៨:២៤–២៦; ៩:៧–២៦

ព្រះគឺជា « ព្រះនៃអព្ភូតហេតុ » ។

សព្វថ្ងៃនេះ មានមនុស្សជាច្រើនដែលពុំជឿថា អព្ភូតហេតុនៅតែកើតឡើងឡើយ ។ សូមប្រើការបង្រៀនរបស់មរ៉ូណៃនៅក្នុងខគម្ពីរទាំងនេះ ដើម្បីបង្រៀនកុមារថា ពេលយើងមានសេចក្តីជំនឿ នោះយើងអាចឃើញព្រះសម្តែងអព្ភូតហេតុនៅក្នុងជីវិតយើង ។

សកម្មភាពដែលអាចជ្រើសរើស

សូមបង្ហាញកុមារនូវក្បួនធ្វើម្ហូបមួយ ។ តើនឹងមានរឿងអ្វីកើតឡើង ប្រសិនបើអ្នកមិនដាក់គ្រឿងផ្សំចាំបាច់មួយនោះ ? សូមអញ្ជើញកុមារឲ្យស្រាវជ្រាវ មរមន ៨:២៤ និង ៩:២០–២១ ដើម្បីស្វែងរក « គ្រឿងផ្សំ » ចាំបាច់ដែលយើងត្រូវមាន ពីមុនព្រះអាចសម្តែងអព្ភូតហេតុ ។ សូមចែកចាយឧទាហរណ៍អំពីអព្ភូតហេតុ—ធំ ឬតូច—ដែលអ្នកបានឃើញក្នុងសាសនាចក្រ ឬនៅក្នុងជីវិតរបស់អ្នក ។ សូមអញ្ជើញកុមារឲ្យចែកចាយគំរូរបស់ពួកគេផ្ទាល់ ។
សូមចែកកុមារជាពីរក្រុម ។ សូមអញ្ជើញក្រុមនីមួយៗ ឲ្យរកមើលឧទាហរណ៍អំពីអព្ភូតហេតុនានា នៅក្នុងខគម្ពីរមួយចំនួន ឬទាំងអស់នេះ ៖ មរមន ៨:២៤; ៩:១១–១៣, ១៦–១៨, ២១–២៥ ។ តើយើងអាចនិយាយអ្វីខ្លះទៅកាន់បុគ្គលម្នាក់ដែលគិតថា អព្ភូតហេតុពុំមានទៀតទេ ? ( សូមមើល មរមន ៩:៩, ១៥–២១ ) ។

លើកទឹកចិត្តឲ្យមានការរៀនសូត្រនៅឯគេហដ្ឋាន

សូមអញ្ជើញកុមារឲ្យសូមសមាជិកគ្រួសារម្នាក់ ពិពណ៌នាពីអព្ភូតហេតុមួយដែលបានពង្រឹងទីបន្ទាល់របស់គាត់ ។

ការកែលម្អការបង្រៀនរបស់យើង

កុមារអាចទទួលស្គាល់ឥទ្ធិពលនៃព្រះវិញ្ញាណ ។ សូមបង្រៀនពួកគេថា អារម្មណ៍នៃសេចក្ដីសុខសាន្ត សេចក្ដីស្រឡាញ់ និងភាពកក់ក្ដៅ ដែលពួកគេមាននៅពេលដែលពួកគេនិយាយ ឬច្រៀងអំពីព្រះយេស៊ូវគ្រីស្ទ និងដំណឹងល្អរបស់ទ្រង់ កើតមានមកពីព្រះវិញ្ញាណបរិសុទ្ធ ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ ១១ ) ។

ទំព័រសកម្មភាព ៖ ព្រះគម្ពីរមរមន និងព្រះគម្ពីរប៊ីបថ្លែងទីបន្ទាល់អំពីព្រះអង្គសង្គ្រោះ